໒. ກຕາປຕ຺ຕິວາໂຣ

໒໗໗. ປຐເມນ ອາປຕ຺ຕິສມຸຏ຺ຐາເນນ ກຕິ ອາປຕ຺ຕິໂຍ ອາປຊ຺ຊຕິ? ປຐເມນ ອາປຕ຺ຕິສມຸຏ຺ຐາເນນ ປຎ຺ຈ ອາປຕ຺ຕິໂຍ ອາປຊ຺ຊຕິ. ຠິກ຺ຂຸ ກປ຺ປິຍສຎ຺ຎີ ສຎ຺ຎາຈິກາຍ ກຸຏິໍ ກໂຣຕິ ອເທສິຕວຕ຺ຖຸກໍ ປມາຓາຕິກ຺ກນ຺ຕໍ ສາຣມ຺ຠໍ ອປຣິກ຺ກມນໍ, ປໂຍເຄ ທຸກ຺ກຏໍ; ເອກໍ ປິຓ຺ຑໍ ອນາຄເຕ ອາປຕ຺ຕິ ຖຸລ຺ລຈ຺ຈຍສ຺ສ; ຕສ຺ມິໍ ປິຓ຺ເຑ ອາຄເຕ ອາປຕ຺ຕິ ສງ຺ຆາທິເສສສ຺ສ; ຠິກ຺ຂຸ ກປ຺ປິຍສຎ຺ຎີ ວິກາເລ ໂຠຊນໍ ຠຸຎ຺ຊຕິ, ອາປຕ຺ຕິ ປາຈິຕ຺ຕິຍສ຺ສ; ຠິກ຺ຂຸ ກປ຺ປິຍສຎ຺ຎີ ອຎ຺ຎາຕິກາຍ ຠິກ຺ຂຸນິຍາ ອນ຺ຕຣຆຣໍ ປວິຏ຺ຐາຍ ຫຕ຺ຖໂຕ ຂາທນີຍໍ ວາ ໂຠຊນີຍໍ ວາ ສຫຕ຺ຖາ ປຏິຄ຺ຄເຫຕ຺ວາ ຠຸຎ຺ຊຕິ, ອາປຕ຺ຕິ ປາຏິເທສນີຍສ຺ສ – ປຐເມນ ອາປຕ຺ຕິສມຸຏ຺ຐາເນນ ອິມາ ປຎ຺ຈ ອາປຕ຺ຕິໂຍ ອາປຊ຺ຊຕິ.

ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ກຕິ ວິປຕ຺ຕິໂຍ ຠຊນ຺ຕິ? ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ກຕິຫິ ອາປຕ຺ຕິກ຺ຂນ຺ເຘຫິ ສງ຺ຄຫິຕາ? ຉນ຺ນໍ ອາປຕ຺ຕິສມຸຏ຺ຐານານໍ ກຕິຫິ ສມຸຏ຺ຐາເນຫິ ສມຸຏ຺ຐນ຺ຕິ? ຈຕຸນ຺ນໍ ອຘິກຣຓານໍ ກຕມໍ ອຘິກຣຓໍ? ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມນ຺ຕິ? ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ທ຺ເວ ວິປຕ຺ຕິໂຍ ຠຊນ຺ຕິ – ສິຍາ ສີລວິປຕ຺ຕິໍ, ສິຍາ ອາຈາຣວິປຕ຺ຕິໍ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ປຎ຺ຈຫິ ອາປຕ຺ຕິກ຺ຂນ຺ເຘຫິ ສງ຺ຄຫິຕາ – ສິຍາ ສງ຺ຆາທິເສສາປຕ຺ຕິກ຺ຂນ຺ເຘນ, ສິຍາ ຖຸລ຺ລຈ຺ຈຍາປຕ຺ຕິກ຺ຂນ຺ເຘນ, ສິຍາ ປາຈິຕ຺ຕິຍາປຕ຺ຕິກ຺ຂນ຺ເຘນ, ສິຍາ ປາຏິເທສນີຍາປຕ຺ຕິກ຺ຂນ຺ເຘນ, ສິຍາ ທຸກ຺ກຏາປຕ຺ຕິກ຺ຂນ຺ເຘນ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐນ຺ຕິ – ກາຍໂຕ ສມຸຏ຺ຐນ຺ຕິ, ນ ວາຈໂຕ ນ ຈິຕ຺ຕໂຕ. ຈຕຸນ຺ນໍ ອຘິກຣຓານໍ ອາປຕ຺ຕາຘິກຣຓໍ. ສຕ຺ຕນ຺ນໍ ສມຖານໍ ຕີຫິ ສມເຖຫິ ສມ຺ມນ຺ຕິ – ສິຍາ ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ, ສິຍາ ສມ຺ມຸຂາວິນເຍນ ຈ ຕິຓວຕ຺ຖາຣເກນ ຈ.

໒໗໘. ທຸຕິເຍນ ອາປຕ຺ຕິສມຸຏ຺ຐາເນນ ກຕິ ອາປຕ຺ຕິໂຍ ອາປຊ຺ຊຕິ? ທຸຕິເຍນ ອາປຕ຺ຕິສມຸຏ຺ຐາເນນ ຈຕສ຺ໂສ ອາປຕ຺ຕິໂຍ ອາປຊ຺ຊຕິ – ຠິກ຺ຂຸ ກປ຺ປິຍສຎ຺ຎີ ສມາທິສຕິ – ‘‘ກຸຏິໍ ເມ ກໂຣຖາ’’ຕິ. ຕສ຺ສ ກຸຏິໍ ກໂຣນ຺ຕິ ອເທສິຕວຕ຺ຖຸກໍ ປມາຓາຕິກ຺ກນ຺ຕໍ ສາຣມ຺ຠໍ ອປຣິກ຺ກມນໍ. ປໂຍເຄ ທຸກ຺ກຏໍ; ເອກໍ ປິຓ຺ຑໍ ອນາຄເຕ ອາປຕ຺ຕິ ຖຸລ຺ລຈ຺ຈຍສ຺ສ; ຕສ຺ມິໍ ປິຓ຺ເຑ ອາຄເຕ ອາປຕ຺ຕິ ສງ຺ຆາທິເສສສ຺ສ. ຠິກ຺ຂຸ ກປ຺ປິຍສຎ຺ຎີ ອນຸປສມ຺ປນ຺ນໍ ປທໂສ ຘມ຺ມໍ ວາເຈຕິ, ອາປຕ຺ຕິ ປາຈິຕ຺ຕິຍສ຺ສ – ທຸຕິເຍນ ອາປຕ຺ຕິສມຸຏ຺ຐາເນນ ອິມາ ຈຕສ຺ໂສ ອາປຕ຺ຕິໂຍ ອາປຊ຺ຊຕິ.

ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ກຕິ ວິປຕ຺ຕິໂຍ ຠຊນ຺ຕິ…ເປ… ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມນ຺ຕິ? ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ທ຺ເວ ວິປຕ຺ຕິໂຍ ຠຊນ຺ຕິ – ສິຍາ ສີລວິປຕ຺ຕິໍ, ສິຍາ ອາຈາຣວິປຕ຺ຕິໍ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ຈຕູຫິ ອາປຕ຺ຕິກ຺ຂນ຺ເຘຫິ ສງ຺ຄຫິຕາ – ສິຍາ ສງ຺ຆາທິເສສາປຕ຺ຕິກ຺ຂນ຺ເຘນ, ສິຍາ ຖຸລ຺ລຈ຺ຈຍາປຕ຺ຕິກ຺ຂນ຺ເຘນ, ສິຍາ ປາຈິຕ຺ຕິຍາປຕ຺ຕິກ຺ຂນ຺ເຘນ, ສິຍາ ທຸກ຺ກຏາປຕ຺ຕິກ຺ຂນ຺ເຘນ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐນ຺ຕິ – ວາຈໂຕ ສມຸຏ຺ຐນ຺ຕິ, ນ ກາຍໂຕ ນ ຈິຕ຺ຕໂຕ. ຈຕຸນ຺ນໍ ອຘິກຣຓານໍ, ອາປຕ຺ຕາຘິກຣຓໍ. ສຕ຺ຕນ຺ນໍ ສມຖານໍ ຕີຫິ ສມເຖຫິ ສມ຺ມນ຺ຕິ – ສິຍາ ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ, ສິຍາ ສມ຺ມຸຂາວິນເຍນ ຈ ຕິຓວຕ຺ຖາຣເກນ ຈ.

໒໗໙. ຕຕິເຍນ ອາປຕ຺ຕິສມຸຏ຺ຐາເນນ ກຕິ ອາປຕ຺ຕິໂຍ ອາປຊ຺ຊຕິ? ຕຕິເຍນ ອາປຕ຺ຕິສມຸຏ຺ຐາເນນ ປຎ຺ຈ ອາປຕ຺ຕິໂຍ ອາປຊ຺ຊຕິ. ຠິກ຺ຂຸ ກປ຺ປິຍສຎ຺ຎີ ສໍວິທຫິຕ຺ວາ ກຸຏິໍ ກໂຣຕິ ອເທສິຕວຕ຺ຖຸກໍ ປມາຓາຕິກ຺ກນ຺ຕໍ ສາຣມ຺ຠໍ ອປຣິກ຺ກມນໍ. ປໂຍເຄ ທຸກ຺ກຏໍ; ເອກໍ ປິຓ຺ຑໍ ອນາຄເຕ ອາປຕ຺ຕິ ຖຸລ຺ລຈ຺ຈຍສ຺ສ; ຕສ຺ມິໍ ປິຓ຺ເຑ ອາຄເຕ ອາປຕ຺ຕິ ສງ຺ຆາທິເສສສ຺ສ. ຠິກ຺ຂຸ ກປ຺ປິຍສຎ຺ຎີ ປຓີຕໂຠຊນານິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊຕິ, ອາປຕ຺ຕິ ປາຈິຕ຺ຕິຍສ຺ສ. ຠິກ຺ຂຸ ກປ຺ປິຍສຎ຺ຎີ ຠິກ຺ຂຸນິຍາ ໂວສາສນ຺ຕິຍາ ນ ນິວາເຣຕ຺ວາ ຠຸຎ຺ຊຕິ, ອາປຕ຺ຕິ ປາຏິເທສນີຍສ຺ສ – ຕຕິເຍນ ອາປຕ຺ຕິສມຸຏ຺ຐາເນນ ອິມາ ປຎ຺ຈ ອາປຕ຺ຕິໂຍ ອາປຊ຺ຊຕິ.

ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ກຕິ ວິປຕ຺ຕິໂຍ ຠຊນ຺ຕິ…ເປ… ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມນ຺ຕິ? ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ທ຺ເວ ວິປຕ຺ຕິໂຍ ຠຊນ຺ຕິ – ສິຍາ ສີລວິປຕ຺ຕິໍ, ສິຍາ ອາຈາຣວິປຕ຺ຕິໍ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ປຎ຺ຈຫິ ອາປຕ຺ຕິກ຺ຂນ຺ເຘຫິ ສງ຺ຄຫິຕາ – ສິຍາ ສງ຺ຆາທິເສສາປຕ຺ຕິກ຺ຂນ຺ເຘນ, ສິຍາ ຖຸລ຺ລຈ຺ຈຍາປຕ຺ຕິກ຺ຂນ຺ເຘນ, ສິຍາ ປາຈິຕ຺ຕິຍາປຕ຺ຕິກ຺ຂນ຺ເຘນ, ສິຍາ ປາຏິເທສນີຍາປຕ຺ຕິກ຺ຂນ຺ເຘນ, ສິຍາ ທຸກ຺ກຏາປຕ຺ຕິກ຺ຂນ຺ເຘນ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐນ຺ຕິ – ກາຍໂຕ ຈ ວາຈໂຕ ຈ ສມຸຏ຺ຐນ຺ຕິ, ນ ຈິຕ຺ຕໂຕ. ຈຕຸນ຺ນໍ ອຘິກຣຓານໍ, ອາປຕ຺ຕາຘິກຣຓໍ. ສຕ຺ຕນ຺ນໍ ສມຖານໍ ຕີຫິ ສມເຖຫິ ສມ຺ມນ຺ຕິ – ສິຍາ ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ, ສິຍາ ສມ຺ມຸຂາວິນເຍນ ຈ ຕິຓວຕ຺ຖາຣເກນ ຈ.

໒໘໐. ຈຕຸຕ຺ເຖນ ອາປຕ຺ຕິສມຸຏ຺ຐາເນນ ກຕິ ອາປຕ຺ຕິໂຍ ອາປຊ຺ຊຕິ? ຈຕຸຕ຺ເຖນ ອາປຕ຺ຕິສມຸຏ຺ຐາເນນ ຉ ອາປຕ຺ຕິໂຍ ອາປຊ຺ຊຕິ – ຠິກ຺ຂຸ ເມຖຸນໍ ຘມ຺ມໍ ປຏິເສວຕິ, ອາປຕ຺ຕິ ປາຣາຊິກສ຺ສ; ຠິກ຺ຂຸ ອກປ຺ປິຍສຎ຺ຎີ ສຎ຺ຎາຈິກາຍ ກຸຏິໍ ກໂຣຕິ ອເທສິຕວຕ຺ຖຸກໍ ປມາຓາຕິກ຺ກນ຺ຕໍ ສາຣມ຺ຠໍ ອປຣິກ຺ກມນໍ, ປໂຍເຄ ທຸກ຺ກຏໍ; ເອກໍ ປິຓ຺ຑໍ ອນາຄເຕ ອາປຕ຺ຕິ ຖຸລ຺ລຈ຺ຈຍສ຺ສ; ຕສ຺ມິໍ ປິຓ຺ເຑ ອາຄເຕ ອາປຕ຺ຕິ ສງ຺ຆາທິເສສສ຺ສ. ຠິກ຺ຂຸ ອກປ຺ປິຍສຎ຺ຎີ ວິກາເລ ໂຠຊນໍ ຠຸຎ຺ຊຕິ, ອາປຕ຺ຕິ ປາຈິຕ຺ຕິຍສ຺ສ. ຠິກ຺ຂຸ ອກປ຺ປິຍສຎ຺ຎີ ອຎ຺ຎາຕິກາຍ ຠິກ຺ຂຸນິຍາ ອນ຺ຕຣຆຣໍ ປວິຏ຺ຐາຍ ຫຕ຺ຖໂຕ ຂາທນີຍໍ ວາ ໂຠຊນີຍໍ ວາ ສຫຕ຺ຖາ ປຏິຄ຺ຄເຫຕ຺ວາ ຠຸຎ຺ຊຕິ, ອາປຕ຺ຕິ ປາຏິເທສນີຍສ຺ສ. ຈຕຸຕ຺ເຖນ ອາປຕ຺ຕິສມຸຏ຺ຐາເນນ ອິມາ ຉ ອາປຕ຺ຕິໂຍ ອາປຊ຺ຊຕິ.

ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ກຕິ ວິປຕ຺ຕິໂຍ ຠຊນ຺ຕິ…ເປ… ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມນ຺ຕິ? ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ທ຺ເວ ວິປຕ຺ຕິໂຍ ຠຊນ຺ຕິ – ສິຍາ ສີລວິປຕ຺ຕິໍ, ສິຍາ ອາຈາຣວິປຕ຺ຕິໍ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ຉຫິ ອາປຕ຺ຕິກ຺ຂນ຺ເຘຫິ ສງ຺ຄຫິຕາ – ສິຍາ ປາຣາຊິກາປຕ຺ຕິກ຺ຂນ຺ເຘນ, ສິຍາ ສງ຺ຆາທິເສສາປຕ຺ຕິກ຺ຂນ຺ເຘນ, ສິຍາ ຖຸລ຺ລຈ຺ຈຍາປຕ຺ຕິກ຺ຂນ຺ເຘນ, ສິຍາ ປາຈິຕ຺ຕິຍາປຕ຺ຕິກ຺ຂນ຺ເຘນ, ສິຍາ ປາຏິເທສນີຍາປຕ຺ຕິກ຺ຂນ຺ເຘນ, ສິຍາ ທຸກ຺ກຏາປຕ຺ຕິກ຺ຂນ຺ເຘນ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐນ຺ຕິ – ກາຍໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ, ນ ວາຈໂຕ. ຈຕຸນ຺ນໍ ອຘິກຣຓານໍ, ອາປຕ຺ຕາຘິກຣຓໍ. ສຕ຺ຕນ຺ນໍ ສມຖານໍ ຕີຫິ ສມເຖຫິ ສມ຺ມນ຺ຕິ – ສິຍາ ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ, ສິຍາ ສມ຺ມຸຂາວິນເຍນ ຈ ຕິຓວຕ຺ຖາຣເກນ ຈ.

໒໘໑. ປຎ຺ຈເມນ ອາປຕ຺ຕິສມຸຏ຺ຐາເນນ ກຕິ ອາປຕ຺ຕິໂຍ ອາປຊ຺ຊຕິ? ປຎ຺ຈເມນ ອາປຕ຺ຕິສມຸຏ຺ຐາເນນ ຉ ອາປຕ຺ຕິໂຍ ອາປຊ຺ຊຕິ. ຠິກ຺ຂຸ ປາປິຈ຺ໂຉ ອິຈ຺ຉາປກໂຕ ອສນ຺ຕໍ ອຠູຕໍ ອຸຕ຺ຕຣິມນຸສ຺ສຘມ຺ມໍ ອຸລ຺ລປຕິ, ອາປຕ຺ຕິ ປາຣາຊິກສ຺ສ; ຠິກ຺ຂຸ ອກປ຺ປິຍສຎ຺ຎີ ສມາທິສຕິ – ‘‘ກຸຏິໍ ເມ ກໂຣຖາ’’ຕິ. ຕສ຺ສ ກຸຏິໍ ກໂຣນ຺ຕິ ອເທສິຕວຕ຺ຖຸກໍ ປມາຓາຕິກ຺ກນ຺ຕໍ ສາຣມ຺ຠໍ ອປຣິກ຺ກມນໍ. ປໂຍເຄ ທຸກ຺ກຏໍ; ເອກໍ ປິຓ຺ຑໍ ອນາຄເຕ ອາປຕ຺ຕິ ຖຸລ຺ລຈ຺ຈຍສ຺ສ; ຕສ຺ມິໍ ປິຓ຺ເຑ ອາຄເຕ ອາປຕ຺ຕິ ສງ຺ຆາທິເສສສ຺ສ. ຠິກ຺ຂຸ ອກປ຺ປິຍສຎ຺ຎີ ອນຸປສມ຺ປນ຺ນໍ ປທໂສ ຘມ຺ມໍ ວາເຈຕິ, ອາປຕ຺ຕິ ປາຈິຕ຺ຕິຍສ຺ສ. ນ ຂຸໍເສຕຸກາໂມ ນ ວມ຺ເຠຕຸກາໂມ ນ ມງ຺ກຸກຕ຺ຕຸກາໂມ ທວກມ຺ຍຕາ ຫີເນນ ຫີນໍ ວເທຕິ, ອາປຕ຺ຕິ ທຸພ຺ຠາສິຕສ຺ສ – ປຎ຺ຈເມນ ອາປຕ຺ຕິສມຸຏ຺ຐາເນນ ອິມາ ຉ ອາປຕ຺ຕິໂຍ ອາປຊ຺ຊຕິ.

ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ກຕິ ວິປຕ຺ຕິໂຍ ຠຊນ຺ຕິ…ເປ… ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມນ຺ຕິ? ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ທ຺ເວ ວິປຕ຺ຕິໂຍ ຠຊນ຺ຕິ – ສິຍາ ສີລວິປຕ຺ຕິໍ, ສິຍາ ອາຈາຣວິປຕ຺ຕິໍ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ຉຫິ ອາປຕ຺ຕິກ຺ຂນ຺ເຘຫິ ສງ຺ຄຫິຕາ – ສິຍາ ປາຣາຊິກາປຕ຺ຕິກ຺ຂນ຺ເຘນ, ສິຍາ ສງ຺ຆາທິເສສາປຕ຺ຕິກ຺ຂນ຺ເຘນ, ສິຍາ ຖຸລ຺ລຈ຺ຈຍາປຕ຺ຕິກ຺ຂນ຺ເຘນ, ສິຍາ ປາຈິຕ຺ຕິຍາປຕ຺ຕິກ຺ຂນ຺ເຘນ, ສິຍາ ທຸກ຺ກຏາປຕ຺ຕິກ຺ຂນ຺ເຘນ, ສິຍາ ທຸພ຺ຠາສິຕາປຕ຺ຕິກ຺ຂນ຺ເຘນ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐນ຺ຕິ – ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ, ນ ກາຍໂຕ. ຈຕຸນ຺ນໍ ອຘິກຣຓານໍ, ອາປຕ຺ຕາຘິກຣຓໍ. ສຕ຺ຕນ຺ນໍ ສມຖານໍ ຕີຫິ ສມເຖຫິ ສມ຺ມນ຺ຕິ – ສິຍາ ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ, ສິຍາ ສມ຺ມຸຂາວິນເຍນ ຈ ຕິຓວຕ຺ຖາຣເກນ ຈ.

໒໘໒. ຉຏ຺ເຐນ ອາປຕ຺ຕິສມຸຏ຺ຐາເນນ ກຕິ ອາປຕ຺ຕິໂຍ ອາປຊ຺ຊຕິ? ຉຏ຺ເຐນ ອາປຕ຺ຕິສມຸຏ຺ຐາເນນ ຉ ອາປຕ຺ຕິໂຍ ອາປຊ຺ຊຕິ – ຠິກ຺ຂຸ ສໍວິທຫິຕ຺ວາ ຠຓ຺ຑໍ ອວຫຣຕິ, ອາປຕ຺ຕິ ປາຣາຊິກສ຺ສ; ຠິກ຺ຂຸ ອກປ຺ປິຍສຎ຺ຎີ ສໍວິທຫິຕ຺ວາ ກຸຏິໍ ກໂຣຕິ ອເທສິຕວຕ຺ຖຸກໍ ປມາຓາຕິກ຺ກນ຺ຕໍ ສາຣມ຺ຠໍ ອປຣິກ຺ກມນໍ, ປໂຍເຄ ທຸກ຺ກຏໍ; ເອກໍ ປິຓ຺ຑໍ ອນາຄເຕ ອາປຕ຺ຕິ ຖຸລ຺ລຈ຺ຈຍສ຺ສ; ຕສ຺ມິໍ ປິຓ຺ເຑ ອາຄເຕ, ອາປຕ຺ຕິ ສງ຺ຆາທິເສສສ຺ສ. ຠິກ຺ຂຸ ອກປ຺ປິຍສຎ຺ຎີ ປຓີຕໂຠຊນານິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊຕິ, ອາປຕ຺ຕິ ປາຈິຕ຺ຕິຍສ຺ສ. ຠິກ຺ຂຸ ອກປ຺ປິຍສຎ຺ຎີ ຠິກ຺ຂຸນິຍາ ໂວສາສນ຺ຕິຍາ ນ ນິວາເຣຕ຺ວາ ຠຸຎ຺ຊຕິ, ອາປຕ຺ຕິ ປາຏິເທສນີຍສ຺ສ – ຉຏ຺ເຐນ ອາປຕ຺ຕິສມຸຏ຺ຐາເນນ ອິມາ ຉ ອາປຕ຺ຕິໂຍ ອາປຊ຺ຊຕິ.

ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ກຕິ ວິປຕ຺ຕິໂຍ ຠຊນ຺ຕິ? ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ກຕິຫິ ອາປຕ຺ຕິກ຺ຂນ຺ເຘຫິ ສງ຺ຄຫິຕາ? ຉນ຺ນໍ ອາປຕ຺ຕິສມຸຏ຺ຐານານໍ ກຕິຫິ ອາປຕ຺ຕິສມຸຏ຺ຐາເນຫິ ສມຸຏ຺ຐນ຺ຕິ? ຈຕຸນ຺ນໍ ອຘິກຣຓານໍ ກຕມໍ ອຘິກຣຓໍ? ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມນ຺ຕິ? ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ທ຺ເວ ວິປຕ຺ຕິໂຍ ຠຊນ຺ຕິ – ສິຍາ ສີລວິປຕ຺ຕິໍ, ສິຍາ ອາຈາຣວິປຕ຺ຕິໍ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ຉຫິ ອາປຕ຺ຕິກ຺ຂນ຺ເຘຫິ ສງ຺ຄຫິຕາ – ສິຍາ ປາຣາຊິກາປຕ຺ຕິກ຺ຂນ຺ເຘນ, ສິຍາ ສງ຺ຆາທິເສສາປຕ຺ຕິກ຺ຂນ຺ເຘນ, ສິຍາ ຖຸລ຺ລຈ຺ຈຍາປຕ຺ຕິກ຺ຂນ຺ເຘນ, ສິຍາ ປາຈິຕ຺ຕິຍາປຕ຺ຕິກ຺ຂນ຺ເຘນ, ສິຍາ ປາຏິເທສນີຍາປຕ຺ຕິກ຺ຂນ຺ເຘນ, ສິຍາ ທຸກ຺ກຏາປຕ຺ຕິກ຺ຂນ຺ເຘນ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐນ຺ຕິ – ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ. ຈຕຸນ຺ນໍ ອຘິກຣຓານໍ, ອາປຕ຺ຕາຘິກຣຓໍ. ສຕ຺ຕນ຺ນໍ ສມຖານໍ ຕີຫິ ສມເຖຫິ ສມ຺ມນ຺ຕິ – ສິຍາ ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ, ສິຍາ ສມ຺ມຸຂາວິນເຍນ ຈ ຕິຓວຕ຺ຖາຣເກນ ຈາຕິ.

ຉນ຺ນໍ ອາປຕ຺ຕິສມຸຏ຺ຐານານໍ

ກຕາປຕ຺ຕິວາໂຣ ນິຏ຺ຐິໂຕ ທຸຕິໂຍ.