໑. ກມ຺ມວຄ຺ໂຄ

໔໘໒. ຈຕ຺ຕາຣິ ກມ຺ມານິ. ອປໂລກນກມ຺ມໍ, ຎຕ຺ຕິກມ຺ມໍ, ຎຕ຺ຕິທຸຕິຍກມ຺ມໍ, ຎຕ຺ຕິຈຕຸຕ຺ຖກມ຺ມໍ – ອິມານິ ຈຕ຺ຕາຣິ ກມ຺ມານິ. ກຕິຫາກາເຣຫິ ວິປຊ຺ຊນ຺ຕິ? ອິມານິ ຈຕ຺ຕາຣິ ກມ຺ມານິ ປຎ຺ຈຫາກາເຣຫິ ວິປຊ຺ຊນ຺ຕິ – ວຕ຺ຖຸໂຕ ວາ ຎຕ຺ຕິໂຕ ວາ ອນຸສ຺ສາວນໂຕ ວາ ສີມໂຕ ວາ ປຣິສໂຕ ວາ.

໔໘໓. ກຖໍ ວຕ຺ຖຸໂຕ ກມ຺ມານິ ວິປຊ຺ຊນ຺ຕິ? ສມ຺ມຸຂາກຣຓີຍໍ ກມ຺ມໍ ອສມ຺ມຸຂາ ກໂຣຕິ, ວຕ຺ຖຸວິປນ຺ນໍ ອຘມ຺ມກມ຺ມໍ; ປຏິປຸຈ຺ຉາກຣຓີຍໍ ກມ຺ມໍ ອປຏິປຸຈ຺ຉາ ກໂຣຕິ, ວຕ຺ຖຸວິປນ຺ນໍ ອຘມ຺ມກມ຺ມໍ; ປຏິຎ຺ຎາຍ ກຣຓີຍໍ ກມ຺ມໍ ອປຏິຎ຺ຎາຍ ກໂຣຕິ, ວຕ຺ຖຸວິປນ຺ນໍ ອຘມ຺ມກມ຺ມໍ; ສຕິວິນຍາຣຫສ຺ສ ອມູຬ຺ຫວິນຍໍ ເທຕິ, ວຕ຺ຖຸວິປນ຺ນໍ ອຘມ຺ມກມ຺ມໍ; ອມູຬ຺ຫວິນຍາຣຫສ຺ສ ຕສ຺ສປາປິຍສິກາກມ຺ມໍ ກໂຣຕິ, ວຕ຺ຖຸວິປນ຺ນໍ ອຘມ຺ມກມ຺ມໍ; ຕສ຺ສປາປິຍສິກາກມ຺ມາຣຫສ຺ສ ຕຊ຺ຊນີຍກມ຺ມໍ ກໂຣຕິ, ວຕ຺ຖຸວິປນ຺ນໍ ອຘມ຺ມກມ຺ມໍ; ຕຊ຺ຊນີຍກມ຺ມາຣຫສ຺ສ ນິຍສ຺ສກມ຺ມໍ ກໂຣຕິ, ວຕ຺ຖຸວິປນ຺ນໍ ອຘມ຺ມກມ຺ມໍ; ນິຍສ຺ສກມ຺ມາຣຫສ຺ສ ປພ຺ພາຊນີຍກມ຺ມໍ ກໂຣຕິ, ວຕ຺ຖຸວິປນ຺ນໍ ອຘມ຺ມກມ຺ມໍ; ປພ຺ພາຊນີຍກມ຺ມາຣຫສ຺ສ ປຏິສາຣຓີຍກມ຺ມໍ ກໂຣຕິ, ວຕ຺ຖຸວິປນ຺ນໍ ອຘມ຺ມກມ຺ມໍ; ປຏິສາຣຓີຍກມ຺ມາຣຫສ຺ສ ອຸກ຺ເຂປນີຍກມ຺ມໍ ກໂຣຕິ, ວຕ຺ຖຸວິປນ຺ນໍ ອຘມ຺ມກມ຺ມໍ; ອຸກ຺ເຂປນີຍກມ຺ມາຣຫສ຺ສ ປຣິວາສໍ ເທຕິ, ວຕ຺ຖຸວິປນ຺ນໍ ອຘມ຺ມກມ຺ມໍ; ປຣິວາສາຣຫໍ ມູລາຍ ປຏິກສ຺ສຕິ, ວຕ຺ຖຸວິປນ຺ນໍ ອຘມ຺ມກມ຺ມໍ; ມູລາຍປຏິກສ຺ສນາຣຫສ຺ສ ມານຕ຺ຕໍ ເທຕິ, ວຕ຺ຖຸວິປນ຺ນໍ ອຘມ຺ມກມ຺ມໍ; ມານຕ຺ຕາຣຫໍ ອພ຺ເຠຕິ, ວຕ຺ຖຸວິປນ຺ນໍ ອຘມ຺ມກມ຺ມໍ; ອພ຺ຠານາຣຫໍ ອຸປສມ຺ປາເທຕິ, ວຕ຺ຖຸວິປນ຺ນໍ ອຘມ຺ມກມ຺ມໍ; ອນຸໂປສເຖ ອຸໂປສຖໍ ກໂຣຕິ, ວຕ຺ຖຸວິປນ຺ນໍ ອຘມ຺ມກມ຺ມໍ; ອປວາຣຓາຍ ປວາເຣຕິ, ວຕ຺ຖຸວິປນ຺ນໍ ອຘມ຺ມກມ຺ມໍ. ເອວໍ ວຕ຺ຖຸໂຕ ກມ຺ມານິ ວິປຊ຺ຊນ຺ຕິ.

໔໘໔. ກຖໍ ຎຕ຺ຕິໂຕ ກມ຺ມານິ ວິປຊ຺ຊນ຺ຕິ? ປຎ຺ຈຫາກາເຣຫິ ຎຕ຺ຕິໂຕ ກມ຺ມານິ ວິປຊ຺ຊນ຺ຕິ – ວຕ຺ຖຸໍ ນ ປຣາມສຕິ, ສງ຺ຆໍ ນ ປຣາມສຕິ, ປຸຄ຺ຄລໍ ນ ປຣາມສຕິ, ຎຕ຺ຕິໍ ນ ປຣາມສຕິ, ປຈ຺ຉາ ວາ ຎຕ຺ຕິໍ ຐເປຕິ – ອິເມຫິ ປຎ຺ຈຫາກາເຣຫິ ຎຕ຺ຕິໂຕ ກມ຺ມານິ ວິປຊ຺ຊນ຺ຕິ.

໔໘໕. ກຖໍ ອນຸສ຺ສາວນໂຕ ກມ຺ມານິ ວິປຊ຺ຊນ຺ຕິ? ປຎ຺ຈຫາກາເຣຫິ ອນຸສ຺ສາວນໂຕ ກມ຺ມານິ ວິປຊ຺ຊນ຺ຕິ – ວຕ຺ຖຸໍ ນ ປຣາມສຕິ, ສງ຺ຆໍ ນ ປຣາມສຕິ, ປຸຄ຺ຄລໍ ນ ປຣາມສຕິ, ສາວນໍ ຫາເປຕິ, ອກາເລ ວາ ສາເວຕິ – ອິເມຫິ ປຎ຺ຈຫາກາເຣຫິ ອນຸສ຺ສາວນໂຕ ກມ຺ມານິ ວິປຊ຺ຊນ຺ຕິ.

໔໘໖. ກຖໍ ສີມໂຕ ກມ຺ມານິ ວິປຊ຺ຊນ຺ຕິ? ເອກາທສຫິ ອາກາເຣຫິ ສີມໂຕ ກມ຺ມານິ ວິປຊ຺ຊນ຺ຕິ – ອຕິຂຸທ຺ທກໍ ສີມໍ ສມ຺ມນ຺ນຕິ, ອຕິມຫຕິໍ ສີມໍ ສມ຺ມນ຺ນຕິ, ຂຓ຺ຑນິມິຕ຺ຕໍ ສີມໍ ສມ຺ມນ຺ນຕິ, ຉາຍານິມິຕ຺ຕໍ ສີມໍ ສມ຺ມນ຺ນຕິ, ອນິມິຕ຺ຕໍ ສີມໍ ສມ຺ມນ຺ນຕິ, ພຫິສີເມ ຐິໂຕ ສີມໍ ສມ຺ມນ຺ນຕິ, ນທິຍາ ສີມໍ ສມ຺ມນ຺ນຕິ, ສມຸທ຺ເທ ສີມໍ ສມ຺ມນ຺ນຕິ, ຊາຕສ຺ສເຣ ສີມໍ ສມ຺ມນ຺ນຕິ, ສີມາຍ ສີມໍ ສມ຺ຠິນ຺ທຕິ, ສີມາຍ ສີມໍ ອຊ຺ໂຌຕ຺ຖຣຕິ – ອິເມຫິ ເອກາທສຫິ ອາກາເຣຫິ ສີມໂຕ ກມ຺ມານິ ວິປຊ຺ຊນ຺ຕິ.

໔໘໗. ກຖໍ ປຣິສໂຕ ກມ຺ມານິ ວິປຊ຺ຊນ຺ຕິ? ທ຺ວາທສຫິ ອາກາເຣຫິ ປຣິສໂຕ ກມ຺ມານິ ວິປຊ຺ຊນ຺ຕິ – ຈຕຸວຄ຺ຄກຣເຓ ກມ຺ເມ ຍາວຕິກາ ຠິກ຺ຂູ ກມ຺ມປຕ຺ຕາ ເຕ ອນາຄຕາ ໂຫນ຺ຕິ, ຉນ຺ທາຣຫານໍ ຉນ຺ໂທ ອນາຫໂຏ ໂຫຕິ, ສມ຺ມຸຂີຠູຕາ ປຏິກ຺ໂກສນ຺ຕິ, ຈຕຸວຄ຺ຄກຣເຓ ກມ຺ເມ ຍາວຕິກາ ຠິກ຺ຂູ ກມ຺ມປຕ຺ຕາ ເຕ ອາຄຕາ ໂຫນ຺ຕິ, ຉນ຺ທາຣຫານໍ ຉນ຺ໂທ ອນາຫໂຏ ໂຫຕິ, ສມ຺ມຸຂີຠູຕາ ປຏິກ຺ໂກສນ຺ຕິ, ຈຕຸວຄ຺ຄກຣເຓ ກມ຺ເມ ຍາວຕິກາ ຠິກ຺ຂູ ກມ຺ມປຕ຺ຕາ ເຕ ອາຄຕາ ໂຫນ຺ຕິ, ຉນ຺ທາຣຫານໍ ຉນ຺ໂທ ອາຫໂຏ ໂຫຕິ, ສມ຺ມຸຂີຠູຕາ ປຏິກ຺ໂກສນ຺ຕິ. ປຎ຺ຈວຄ຺ຄກຣເຓ ກມ຺ເມ…ເປ… ທສວຄ຺ຄກຣເຓ ກມ຺ເມ…ເປ… ວີສຕິວຄ຺ຄກຣເຓ ກມ຺ເມ ຍາວຕິກາ ຠິກ຺ຂູ ກມ຺ມປຕ຺ຕາ ເຕ ອນາຄຕາ ໂຫນ຺ຕິ, ຉນ຺ທາຣຫານໍ ຉນ຺ໂທ ອນາຫໂຏ ໂຫຕິ, ສມ຺ມຸຂີຠູຕາ ປຏິກ຺ໂກສນ຺ຕິ, ວີສຕິວຄ຺ຄກຣເຓ ກມ຺ເມ ຍາວຕິກາ ຠິກ຺ຂູ ກມ຺ມປຕ຺ຕາ, ເຕ ອາຄຕາ ໂຫນ຺ຕິ, ຉນ຺ທາຣຫານໍ ຉນ຺ໂທ ອນາຫໂຏ ໂຫຕິ, ສມ຺ມຸຂີຠູຕາ ປຏິກ຺ໂກສນ຺ຕິ, ວີສຕິວຄ຺ຄກຣເຓ ກມ຺ເມ ຍາວຕິກາ ຠິກ຺ຂູ ກມ຺ມປຕ຺ຕາ, ເຕ ອາຄຕາ ໂຫນ຺ຕິ, ຉນ຺ທາຣຫານໍ ຉນ຺ໂທ ອາຫໂຏ ໂຫຕິ ສມ຺ມຸຂີຠູຕາ ປຏິກ຺ໂກສນ຺ຕິ – ອິເມຫິ ທ຺ວາທສຫິ ອາກາເຣຫິ ປຣິສໂຕ ກມ຺ມານິ ວິປຊ຺ຊນ຺ຕິ.

໔໘໘. ຈຕຸວຄ຺ຄກຣເຓ ກມ຺ເມ ຈຕ຺ຕາໂຣ ຠິກ຺ຂູ ປກຕຕ຺ຕາ ກມ຺ມປຕ຺ຕາ, ອວເສສາ ປກຕຕ຺ຕາ ຉນ຺ທາຣຫາ. ຍສ຺ສ ສງ຺ໂຆ ກມ຺ມໍ ກໂຣຕິ ໂສ ເນວ ກມ຺ມປຕ຺ໂຕ ນາປິ ຉນ຺ທາຣໂຫ, ອປິ ຈ ກມ຺ມາຣໂຫ. ປຎ຺ຈວຄ຺ຄກຣເຓ ກມ຺ເມ ປຎ຺ຈ ຠິກ຺ຂູ ປກຕຕ຺ຕາ ກມ຺ມປຕ຺ຕາ, ອວເສສາ ປກຕຕ຺ຕາ ຉນ຺ທາຣຫາ. ຍສ຺ສ ສງ຺ໂຆ ກມ຺ມໍ ກໂຣຕິ ໂສ ເນວ ກມ຺ມປຕ຺ໂຕ ນາປິ ຉນ຺ທາຣໂຫ, ອປິ ຈ ກມ຺ມາຣໂຫ. ທສວຄ຺ຄກຣເຓ ກມ຺ເມ ທສ ຠິກ຺ຂູ ປກຕຕ຺ຕາ ກມ຺ມປຕ຺ຕາ, ອວເສສາ ປກຕຕ຺ຕາ ຉນ຺ທາຣຫາ. ຍສ຺ສ ສງ຺ໂຆ ກມ຺ມໍ ກໂຣຕິ ໂສ ເນວ ກມ຺ມປຕ຺ໂຕ ນາປິ ຉນ຺ທາຣໂຫ, ອປິ ຈ ກມ຺ມາຣໂຫ. ວີສຕິວຄ຺ຄກຣເຓ ກມ຺ເມ ວີສຕິ ຠິກ຺ຂູ ປກຕຕ຺ຕາ ກມ຺ມປຕ຺ຕາ, ອວເສສາ ປກຕຕ຺ຕາ ຉນ຺ທາຣຫາ. ຍສ຺ສ ສງ຺ໂຆ ກມ຺ມໍ ກໂຣຕິ ໂສ ເນວ ກມ຺ມປຕ຺ໂຕ ນາປິ ຉນ຺ທາຣໂຫ, ອປິ ຈ ກມ຺ມາຣໂຫ.

໔໘໙. ຈຕ຺ຕາຣິ ກມ຺ມານິ – ອປໂລກນກມ຺ມໍ, ຎຕ຺ຕິກມ຺ມໍ, ຎຕ຺ຕິທຸຕິຍກມ຺ມໍ, ຎຕ຺ຕິຈຕຸຕ຺ຖກມ຺ມໍ. ອິມານິ ຈຕ຺ຕາຣິ ກມ຺ມານິ ກຕິຫາກາເຣຫິ ວິປຊ຺ຊນ຺ຕິ? ອິມານິ ຈຕ຺ຕາຣິ ກມ຺ມານິ ປຎ຺ຈຫາກາເຣຫິ ວິປຊ຺ຊນ຺ຕິ – ວຕ຺ຖຸໂຕ ວາ ຎຕ຺ຕິໂຕ ວາ ອນຸສ຺ສາວນໂຕ ວາ ສີມໂຕ ວາ ປຣິສໂຕ ວາ.

໔໙໐. ກຖໍ ວຕ຺ຖຸໂຕ ກມ຺ມານິ ວິປຊ຺ຊນ຺ຕິ? ປຓ຺ຑກໍ ອຸປສມ຺ປາເທຕິ, ວຕ຺ຖຸວິປນ຺ນໍ ອຘມ຺ມກມ຺ມໍ. ເຖຍ຺ຍສໍວາສກໍ ອຸປສມ຺ປາເທຕິ, ວຕ຺ຖຸວິປນ຺ນໍ ອຘມ຺ມກມ຺ມໍ. ຕິຕ຺ຖິຍປກ຺ກນ຺ຕກໍ ອຸປສມ຺ປາເທຕິ, ວຕ຺ຖຸວິປນ຺ນໍ ອຘມ຺ມກມ຺ມໍ. ຕິຣຈ຺ຉານຄຕໍ ອຸປສມ຺ປາເທຕິ, ວຕ຺ຖຸວິປນ຺ນໍ ອຘມ຺ມກມ຺ມໍ. ມາຕຸຆາຕກໍ ອຸປສມ຺ປາເທຕິ, ວຕ຺ຖຸວິປນ຺ນໍ ອຘມ຺ມກມ຺ມໍ. ປິຕຸຆາຕກໍ ອຸປສມ຺ປາເທຕິ, ວຕ຺ຖຸວິປນ຺ນໍ ອຘມ຺ມກມ຺ມໍ. ອຣຫນ຺ຕຆາຕກໍ ອຸປສມ຺ປາເທຕິ, ວຕ຺ຖຸວິປນ຺ນໍ ອຘມ຺ມກມ຺ມໍ. ຠິກ຺ຂຸນິທູສກໍ ອຸປສມ຺ປາເທຕິ, ວຕ຺ຖຸວິປນ຺ນໍ ອຘມ຺ມກມ຺ມໍ. ສງ຺ຆເຠທກໍ ອຸປສມ຺ປາເທຕິ, ວຕ຺ຖຸວິປນ຺ນໍ ອຘມ຺ມກມ຺ມໍ. ໂລຫິຕຸປ຺ປາທກໍ ອຸປສມ຺ປາເທຕິ, ວຕ຺ຖຸວິປນ຺ນໍ ອຘມ຺ມກມ຺ມໍ. ອຸຠໂຕພ຺ຍຎ຺ຊນໍ ອຸປສມ຺ປາເທຕິ, ວຕ຺ຖຸວິປນ຺ນໍ ອຘມ຺ມກມ຺ມໍ. ອູນວີສຕິວສ຺ສໍ ປຸຄ຺ຄລໍ ອຸປສມ຺ປາເທຕິ, ວຕ຺ຖຸວິປນ຺ນໍ ອຘມ຺ມກມ຺ມໍ. ເອວໍ ວຕ຺ຖຸໂຕ ກມ຺ມານິ ວິປຊ຺ຊນ຺ຕິ.

໔໙໑. ກຖໍ ຎຕ຺ຕິໂຕ ກມ຺ມານິ ວິປຊ຺ຊນ຺ຕິ? ປຎ຺ຈຫາກາເຣຫິ ຎຕ຺ຕິໂຕ ກມ຺ມານິ ວິປຊ຺ຊນ຺ຕິ. ວຕ຺ຖຸໍ ນ ປຣາມສຕິ, ສງ຺ຆໍ ນ ປຣາມສຕິ, ປຸຄ຺ຄລໍ ນ ປຣາມສຕິ, ຎຕ຺ຕິໍ ນ ປຣາມສຕິ, ປຈ຺ຉາ ວາ ຎຕ຺ຕິໍ ຐເປຕິ – ອິເມຫິ ປຎ຺ຈຫາກາເຣຫິ ຎຕ຺ຕິໂຕ ກມ຺ມານິ ວິປຊ຺ຊນ຺ຕິ.

໔໙໒. ກຖໍ ອນຸສ຺ສາວນໂຕ ກມ຺ມານິ ວິປຊ຺ຊນ຺ຕິ? ປຎ຺ຈຫາກາເຣຫິ ອນຸສ຺ສາວນໂຕ ກມ຺ມານິ ວິປຊ຺ຊນ຺ຕິ – ວຕ຺ຖຸໍ ນ ປຣາມສຕິ, ສງ຺ຆໍ ນ ປຣາມສຕິ, ປຸຄ຺ຄລໍ ນ ປຣາມສຕິ, ສາວນໍ ຫາເປຕິ, ອກາເລ ວາ ສາເວຕິ – ອິເມຫິ ປຎ຺ຈຫາກາເຣຫິ ອນຸສ຺ສາວນໂຕ ກມ຺ມານິ ວິປຊ຺ຊນ຺ຕິ.

໔໙໓. ກຖໍ ສີມໂຕ ກມ຺ມານິ ວິປຊ຺ຊນ຺ຕິ? ເອກາທສຫິ ອາກາເຣຫິ ສີມໂຕ ກມ຺ມານິ ວິປຊ຺ຊນ຺ຕິ. ອຕິຂຸທ຺ທກໍ ສີມໍ ສມ຺ມນ຺ນຕິ, ອຕິມຫຕິໍ ສີມໍ ສມ຺ມນ຺ນຕິ, ຂຓ຺ຑນິມິຕ຺ຕໍ ສີມໍ ສມ຺ມນ຺ນຕິ, ຉາຍານິມິຕ຺ຕໍ ສີມໍ ສມ຺ມນ຺ນຕິ, ອນິມິຕ຺ຕໍ ສີມໍ ສມ຺ມນ຺ນຕິ, ພຫິສີເມ ຐິໂຕ ສີມໍ ສມ຺ມນ຺ນຕິ, ນທິຍາ ສີມໍ ສມ຺ມນ຺ນຕິ, ສມຸທ຺ເທ ສີມໍ ສມ຺ມນ຺ນຕິ, ຊາຕສ຺ສເຣ ສີມໍ ສມ຺ມນ຺ນຕິ, ສີມາຍ ສີມໍ ສມ຺ຠິນ຺ທຕິ, ສີມາຍ ສີມໍ ອຊ຺ໂຌຕ຺ຖຣຕິ – ອິເມຫິ ເອກາທສຫິ ອາກາເຣຫິ ສີມໂຕ ກມ຺ມານິ ວິປຊ຺ຊນ຺ຕິ.

໔໙໔. ກຖໍ ປຣິສໂຕ ກມ຺ມານິ ວິປຊ຺ຊນ຺ຕິ? ທ຺ວາທສຫິ ອາກາເຣຫິ ປຣິສໂຕ ກມ຺ມານິ ວິປຊ຺ຊນ຺ຕິ – ຈຕຸວຄ຺ຄກຣເຓ ກມ຺ເມ ຍາວຕິກາ ຠິກ຺ຂູ ກມ຺ມປຕ຺ຕາ ເຕ ອນາຄຕາ ໂຫນ຺ຕິ, ຉນ຺ທາຣຫານໍ ຉນ຺ໂທ ອນາຫໂຏ ໂຫຕິ, ສມ຺ມຸຂີຠູຕາ ປຏິກ຺ໂກສນ຺ຕິ, ຈຕຸວຄ຺ຄກຣເຓ ກມ຺ເມ ຍາວຕິກາ ຠິກ຺ຂູ ກມ຺ມປຕ຺ຕາ ເຕ ອາຄຕາ ໂຫນ຺ຕິ, ຉນ຺ທາຣຫານໍ ຉນ຺ໂທ ອນາຫໂຏ ໂຫຕິ, ສມ຺ມຸຂີຠູຕາ ປຏິກ຺ໂກສນ຺ຕິ. ຈຕຸວຄ຺ຄກຣເຓ ກມ຺ເມ ຍາວຕິກາ ຠິກ຺ຂູ ກມ຺ມປຕ຺ຕາ ເຕ ອາຄຕາ ໂຫນ຺ຕິ, ຉນ຺ທາຣຫານໍ ຉນ຺ໂທ ອາຫໂຏ ໂຫຕິ ສມ຺ມຸຂີຠູຕາ ປຏິກ຺ໂກສນ຺ຕິ. ປຎ຺ຈວຄ຺ຄກຣເຓ ກມ຺ເມ…ເປ… ທສວຄ຺ຄກຣເຓ ກມ຺ເມ…ເປ… ວີສຕິວຄ຺ຄກຣເຓ ກມ຺ເມ ຍາວຕິກາ ຠິກ຺ຂູ ກມ຺ມປຕ຺ຕາ ເຕ ອນາຄຕາ ໂຫນ຺ຕິ, ຉນ຺ທາຣຫານໍ ຉນ຺ໂທ ອນາຫໂຏ ໂຫຕິ, ສມ຺ມຸຂີຠູຕາ ປຏິກ຺ໂກສນ຺ຕິ. ວີສຕິວຄ຺ຄກຣເຓ ກມ຺ເມ ຍາວຕິກາ ຠິກ຺ຂູ ກມ຺ມປຕ຺ຕາ ເຕ ອາຄຕາ ໂຫນ຺ຕິ, ຉນ຺ທາຣຫານໍ ຉນ຺ໂທ ອນາຫໂຏ ໂຫຕິ, ສມ຺ມຸຂີຠູຕາ ປຏິກ຺ໂກສນ຺ຕິ. ວີສຕິວຄ຺ຄກຣເຓ ກມ຺ເມ ຍາວຕິກາ ຠິກ຺ຂູ ກມ຺ມປຕ຺ຕາ ເຕ ອາຄຕາ ໂຫນ຺ຕິ, ຉນ຺ທາຣຫານໍ ຉນ຺ໂທ ອາຫໂຏ ໂຫຕິ, ສມ຺ມຸຂີຠູຕາ ປຏິກ຺ໂກສນ຺ຕິ – ອິເມຫິ ທ຺ວາທສຫິ ອາກາເຣຫິ ປຣິສໂຕ ກມ຺ມານິ ວິປຊ຺ຊນ຺ຕິ.

໔໙໕. ອປໂລກນກມ຺ມໍ ກຕິ ຐານານິ ຄຈ຺ຉຕິ? ຎຕ຺ຕິກມ຺ມໍ ກຕິ ຐານານິ ຄຈ຺ຉຕິ? ຎຕ຺ຕິທຸຕິຍກມ຺ມໍ ກຕິ ຐານານິ ຄຈ຺ຉຕິ? ຎຕ຺ຕິຈຕຸຕ຺ຖກມ຺ມໍ ກຕິ ຐານານິ ຄຈ຺ຉຕິ? ອປໂລກນກມ຺ມໍ ປຎ຺ຈ ຐານານິ ຄຈ຺ຉຕິ. ຎຕ຺ຕິກມ຺ມໍ ນວ ຐານານິ ຄຈ຺ຉຕິ. ຎຕ຺ຕິທຸຕິຍກມ຺ມໍ ສຕ຺ຕ ຐານານິ ຄຈ຺ຉຕິ. ຎຕ຺ຕິຈຕຸຕ຺ຖກມ຺ມໍ ສຕ຺ຕ ຐານານິ ຄຈ຺ຉຕິ.

໔໙໖. ອປໂລກນກມ຺ມໍ ກຕມານິ ປຎ຺ຈ ຐານານິ ຄຈ຺ຉຕິ? ໂອສາຣຓໍ, ນິສ຺ສາຣຓໍ, ຠຓ຺ຑຸກມ຺ມໍ, ພ຺ຣຫ຺ມທຓ຺ຑໍ, ກມ຺ມລກ຺ຂຓຎ຺ເຎວ ປຎ຺ຈມໍ – ອປໂລກນກມ຺ມໍ ອິມານິ ປຎ຺ຈ ຐານານິ ຄຈ຺ຉຕິ. ຎຕ຺ຕິກມ຺ມໍ ກຕມານິ ນວ ຐານານິ ຄຈ຺ຉຕິ? ໂອສາຣຓໍ, ນິສ຺ສາຣຓໍ, ອຸໂປສຖໍ, ປວາຣຓໍ, ສມ຺ມຸຕິໍ, ທານໍ, ປຏິຄ຺ຄຫໍ, ປຈ຺ຈຸກ຺ກຑ຺ຒນໍ, ກມ຺ມລກ຺ຂຓຎ຺ເຎວ ນວມໍ – ຎຕ຺ຕິກມ຺ມໍ ອິມານິ ນວ ຐານານິ ຄຈ຺ຉຕິ. ຎຕ຺ຕິທຸຕິຍກມ຺ມໍ ກຕມານິ ສຕ຺ຕ ຐານານິ ຄຈ຺ຉຕິ? ໂອສາຣຓໍ, ນິສ຺ສາຣຓໍ, ສມ຺ມຸຕິໍ, ທານໍ, ອຸທ຺ຘຣຓໍ, ເທສນໍ, ກມ຺ມລກ຺ຂຓຎ຺ເຎວ ສຕ຺ຕມໍ – ຎຕ຺ຕິທຸຕິຍກມ຺ມໍ ອິມານິ ສຕ຺ຕ ຐານານິ ຄຈ຺ຉຕິ. ຎຕ຺ຕິຈຕຸຕ຺ຖກມ຺ມໍ ກຕມານິ ສຕ຺ຕ ຐານານິ ຄຈ຺ຉຕິ? ໂອສາຣຓໍ, ນິສ຺ສາຣຓໍ, ສມ຺ມຸຕິໍ, ທານໍ, ນິຄ຺ຄຫໍ, ສມນຸຠາສນໍ, ກມ຺ມລກ຺ຂຓຎ຺ເຎວ ສຕ຺ຕມໍ – ຎຕ຺ຕິຈຕຸຕ຺ຖກມ຺ມໍ ອິມານິ ສຕ຺ຕ ຐານານິ ຄຈ຺ຉຕິ.

໔໙໗. ຈຕຸວຄ຺ຄກຣເຓ ກມ຺ເມ ຈຕ຺ຕາໂຣ ຠິກ຺ຂູ ປກຕຕ຺ຕາ ກມ຺ມປຕ຺ຕາ, ອວເສສາ ປກຕຕ຺ຕາ ຉນ຺ທາຣຫາ. ຍສ຺ສ ສງ຺ໂຆ ກມ຺ມໍ ກໂຣຕິ ໂສ ເນວ ກມ຺ມປຕ຺ໂຕ ນາປິ ຉນ຺ທາຣໂຫ, ອປິ ຈ ກມ຺ມາຣໂຫ. ປຎ຺ຈວຄ຺ຄກຣເຓ ກມ຺ເມ ປຎ຺ຈ ຠິກ຺ຂູ ປກຕຕ຺ຕາ ກມ຺ມປຕ຺ຕາ, ອວເສສາ ປກຕຕ຺ຕາ ຉນ຺ທາຣຫາ. ຍສ຺ສ ສງ຺ໂຆ ກມ຺ມໍ ກໂຣຕິ ໂສ ເນວ ກມ຺ມປຕ຺ໂຕ ນາປິ ຉນ຺ທາຣໂຫ, ອປິ ຈ ກມ຺ມາຣໂຫ. ທສວຄ຺ຄກຣເຓ ກມ຺ເມ ທສ ຠິກ຺ຂູ ປກຕຕ຺ຕາ ກມ຺ມປຕ຺ຕາ, ອວເສສາ ປກຕຕ຺ຕາ ຉນ຺ທາຣຫາ. ຍສ຺ສ ສງ຺ໂຆ ກມ຺ມໍ ກໂຣຕິ ໂສ ເນວ ກມ຺ມປຕ຺ໂຕ ນາປິ ຉນ຺ທາຣໂຫ, ອປິ ຈ ກມ຺ມາຣໂຫ. ວີສຕິວຄ຺ຄກຣເຓ ກມ຺ເມ ວີສຕິ ຠິກ຺ຂູ ປກຕຕ຺ຕາ ກມ຺ມປຕ຺ຕາ, ອວເສສາ ປກຕຕ຺ຕາ ຉນ຺ທາຣຫາ. ຍສ຺ສ ສງ຺ໂຆ ກມ຺ມໍ ກໂຣຕິ ໂສ ເນວ ກມ຺ມປຕ຺ໂຕ ນາປິ ຉນ຺ທາຣໂຫ, ອປິ ຈ ກມ຺ມາຣໂຫ.

ກມ຺ມວຄ຺ໂຄ ນິຏ຺ຐິໂຕ ປຐໂມ.