໔. ອວນ຺ທນີຍປຸຄ຺ຄລາທິ

໔໗໗. ກຕິ ປຸຄ຺ຄລາ ນາຠິວາເທຕພ຺ພາ, ອຎ຺ຊລິສາມິເຈນ ຈ;

ກຕິນໍ ທຸກ຺ກຏໍ ໂຫຕິ, ກຕິ ຈີວຣຘາຣຓາ.

ທສ ປຸຄ຺ຄລາ ນາຠິວາເທຕພ຺ພາ, ອຎ຺ຊລິສາມິເຈນ ຈ;

ທສນ຺ນໍ ທຸກ຺ກຏໍ ໂຫຕິ, ທສ ຈີວຣຘາຣຓາ.

ກຕິນໍ ວສ຺ສໍວຸຏ຺ຐານໍ, ທາຕພ຺ພໍ ອິຘ ຈີວຣໍ;

ກຕິນໍ ຠນ຺ເຕ ທາຕພ຺ພໍ, ກຕິນຎ຺ເຈວ ນ ທາຕພ຺ພໍ.

ປຎ຺ຈນ຺ນໍ ວສ຺ສໍວຸຏ຺ຐານໍ, ທາຕພ຺ພໍ ອິຘ ຈີວຣໍ;

ສຕ຺ຕນ຺ນໍ ສນ຺ເຕ ທາຕພ຺ພໍ, ໂສຬສນ຺ນໍ ນ ທາຕພ຺ພໍ.

ກຕິສຕໍ ຣຕ຺ຕິສຕໍ, ອາປຕ຺ຕິໂຍ ຉາທຍິຕ຺ວານ;

ກຕິ ຣຕ຺ຕິໂຍ ວສິຕ຺ວານ, ມຸຈ຺ເຈຍ຺ຍ ປາຣິວາສິໂກ.

ທສສຕໍ ຣຕ຺ຕິສຕໍ, ອາປຕ຺ຕິໂຍ ຉາທຍິຕ຺ວານ;

ທສ ຣຕ຺ຕິໂຍ ວສິຕ຺ວານ, ມຸຈ຺ເຈຍ຺ຍ ປາຣິວາສິໂກ.

ກຕິ ກມ຺ມໂທສາ ວຸຕ຺ຕາ, ພຸທ຺ເຘນາທິຈ຺ຈພນ຺ຘຸນາ;

ຈມ຺ປາຍໍ ວິນຍວຕ຺ຖຸສ຺ມິໍ, ສພ຺ເພວ ອຘມ຺ມິກາ [ສພ຺ເພ ອຘມ຺ມິກາ (ສີ. ສ຺ຍາ.)] ກຕິ.

ທ຺ວາທສ ກມ຺ມໂທສາ ວຸຕ຺ຕາ, ພຸທ຺ເຘນາທິຈ຺ຈພນ຺ຘຸນາ;

ຈມ຺ປາຍໍ ວິນຍວຕ຺ຖຸສ຺ມິໍ, ສພ຺ເພວ ອຘມ຺ມິກາ [ສພ຺ເພວາຘມ຺ມິກາ (ສີ.), ສພ຺ເພ ອຘມ຺ມິກາ (ສ຺ຍາ.)] ກຕາ.

ກຕິ ກມ຺ມສມ຺ປຕ຺ຕິໂຍ ວຸຕ຺ຕາ, ພຸທ຺ເຘນາທິຈ຺ຈພນ຺ຘຸນາ;

ຈມ຺ປາຍໍ ວິນຍວຕ຺ຖຸສ຺ມິໍ, ສພ຺ເພວ ຘມ຺ມິກາ ກຕິ.

ຈຕສ຺ໂສ ກມ຺ມສມ຺ປຕ຺ຕິໂຍ ວຸຕ຺ຕາ, ພຸທ຺ເຘນາທິຈ຺ຈພນ຺ຘຸນາ;

ຈມ຺ປາຍໍ ວິນຍວຕ຺ຖຸສ຺ມິໍ, ສພ຺ເພວ ຘມ຺ມິກາ ກຕາ.

ກຕິ ກມ຺ມານິ ວຸຕ຺ຕານິ, ພຸທ຺ເຘນາທິຈ຺ຈພນ຺ຘຸນາ;

ຈມ຺ປາຍໍ ວິນຍວຕ຺ຖຸສ຺ມິໍ, ຘມ຺ມິກາ ອຘມ຺ມິກາ ກຕິ.

ຉ ກມ຺ມານິ ວຸຕ຺ຕານິ, ພຸທ຺ເຘນາທິຈ຺ຈພນ຺ຘຸນາ;

ຈມ຺ປາຍໍ ວິນຍວຕ຺ຖຸສ຺ມິໍ, ເອເກຕ຺ຖ ຘມ຺ມິກາ ກຕາ;

ປຎ຺ຈ ອຘມ຺ມິກາ ວຸຕ຺ຕາ, ພຸທ຺ເຘນາທິຈ຺ຈພນ຺ຘຸນາ.

ກຕິ ກມ຺ມານິ ວຸຕ຺ຕານິ, ພຸທ຺ເຘນາທິຈ຺ຈພນ຺ຘຸນາ;

ຈມ຺ປາຍໍ ວິນຍວຕ຺ຖຸສ຺ມິໍ, ຘມ຺ມິກາ ອຘມ຺ມິກາ ກຕິ.

ຈຕ຺ຕາຣິ ກມ຺ມານິ ວຸຕ຺ຕານິ, ພຸທ຺ເຘນາທິຈ຺ຈພນ຺ຘຸນາ;

ຈມ຺ປາຍໍ ວິນຍວຕ຺ຖຸສ຺ມິໍ, ເອເກຕ຺ຖ ຘມ຺ມິກາ ກຕາ;

ຕໂຍ ອຘມ຺ມິກາ ວຸຕ຺ຕາ, ພຸທ຺ເຘນາທິຈ຺ຈພນ຺ຘຸນາ.

ຍໍ ເທສິຕໍນນ຺ຕຊິເນນ ຕາທິນາ;

ອາປຕ຺ຕິກ຺ຂນ຺ຘານິ ວິເວກທສ຺ສິນາ;

ກເຕຕ຺ຖ ສມ຺ມນ຺ຕິ ວິນາ ສມເຖຫິ;

ປຸຈ຺ຉາມິ ຕໍ ພ຺ຣູຫິ ວິຠງ຺ຄໂກວິທ.

ຍໍ ເທສິຕໍນນ຺ຕຊິເນນ ຕາທິນາ;

ອາປຕ຺ຕິກ຺ຂນ຺ຘານິ ວິເວກທສ຺ສິນາ;

ເອເກຕ຺ຖ ສມ຺ມຕິ ວິນາ ສມເຖຫິ;

ເອຕໍ ເຕ ອກ຺ຂາມິ ວິຠງ຺ຄໂກວິທ.

ກຕິ ອາປາຍິກາ ວຸຕ຺ຕາ, ພຸທ຺ເຘນາທິຈ຺ຈພນ຺ຘຸນາ;

ວິນຍໍ ປຏິຊານນ຺ຕສ຺ສ, ວິນຍານິ [ວິສຍານິ (ສີ. ສ຺ຍາ. ເອວມຸປຣິປິ)] ສຸໂຓມ ເຕ.

ຉອູນທິຍຑ຺ຒສຕາ ວຸຕ຺ຕາ, ພຸທ຺ເຘນາທິຈ຺ຈພນ຺ຘຸນາ;

ອາປາຍິກາ ເນຣຍິກາ, ກປ຺ປຏ຺ຐາ ສງ຺ຆເຠທກາ;

ວິນຍໍ ປຏິຊານນ຺ຕສ຺ສ, ວິນຍານິ ສຸໂຓຫິ ເມ.

ກຕິ ນາປາຍິກາ ວຸຕ຺ຕາ, ພຸທ຺ເຘນາທິຈ຺ຈພນ຺ຘຸນາ;

ວິນຍໍ ປຏິຊານນ຺ຕສ຺ສ, ວິນຍານິ ສຸໂຓມ ເຕ.

ອຏ຺ຐາຣສ ນາປາຍິກາ ວຸຕ຺ຕາ, ພຸທ຺ເຘນາທິຈ຺ຈພນ຺ຘຸນາ;

ວິນຍໍ ປຏິຊານນ຺ຕສ຺ສ, ວິນຍານິ ສຸໂຓຫິ ເມ.

ກຕິ ອຏ຺ຐກາ ວຸຕ຺ຕາ, ພຸທ຺ເຘນາທິຈ຺ຈພນ຺ຘຸນາ;

ວິນຍໍ ປຏິຊານນ຺ຕສ຺ສ, ວິນຍານິ ສຸໂຓມ ເຕ.

ອຏ຺ຐາຣສ ອຏ຺ຐກາ ວຸຕ຺ຕາ, ພຸທ຺ເຘນາທິຈ຺ຈພນ຺ຘຸນາ;

ວິນຍໍ ປຏິຊານນ຺ຕສ຺ສ, ວິນຍານິ ສຸໂຓຫິ ເມ.