ອຕ຺ຖາປຕ຺ຕິສມຸຏ຺ຐານໍ

໑. ປາຣາຊິກໍ

໔໗໐. ອຕ຺ຖາປຕ຺ຕິ ອຈິຕ຺ຕໂກ ອາປຊ຺ຊຕິ, ສຈິຕ຺ຕໂກ ວຸຏ຺ຐາຕິ. ອຕ຺ຖາປຕ຺ຕິ ສຈິຕ຺ຕໂກ ອາປຊ຺ຊຕິ, ອຈິຕ຺ຕໂກ ວຸຏ຺ຐາຕິ. ອຕ຺ຖາປຕ຺ຕິ ອຈິຕ຺ຕໂກ ອາປຊ຺ຊຕິ, ອຈິຕ຺ຕໂກ ວຸຏ຺ຐາຕິ. ອຕ຺ຖາປຕ຺ຕິ ສຈິຕ຺ຕໂກ ອາປຊ຺ຊຕິ, ສຈິຕ຺ຕໂກ ວຸຏ຺ຐາຕິ. ອຕ຺ຖາປຕ຺ຕິ ກຸສລຈິຕ຺ໂຕ ອາປຊ຺ຊຕິ, ກຸສລຈິຕ຺ໂຕ ວຸຏ຺ຐາຕິ. ອຕ຺ຖາປຕ຺ຕິ ກຸສລຈິຕ຺ໂຕ ອາປຊ຺ຊຕິ, ອກຸສລຈິຕ຺ໂຕ ວຸຏ຺ຐາຕິ. ອຕ຺ຖາປຕ຺ຕິ ກຸສລຈິຕ຺ໂຕ ອາປຊ຺ຊຕິ, ອພ຺ຍາກຕຈິຕ຺ໂຕ ວຸຏ຺ຐາຕິ. ອຕ຺ຖາປຕ຺ຕິ ອກຸສລຈິຕ຺ໂຕ ອາປຊ຺ຊຕິ, ກຸສລຈິຕ຺ໂຕ ວຸຏ຺ຐາຕິ. ອຕ຺ຖາປຕ຺ຕິ ອກຸສລຈິຕ຺ໂຕ ອາປຊ຺ຊຕິ, ອກຸສລຈິຕ຺ໂຕ ວຸຏ຺ຐາຕິ. ອຕ຺ຖາປຕ຺ຕິ ອກຸສລຈິຕ຺ໂຕ ອາປຊ຺ຊຕິ, ອພ຺ຍາກຕຈິຕ຺ໂຕ ວຸຏ຺ຐາຕິ. ອຕ຺ຖາປຕ຺ຕິ ອພ຺ຍາກຕຈິຕ຺ໂຕ ອາປຊ຺ຊຕິ, ກຸສລຈິຕ຺ໂຕ ວຸຏ຺ຐາຕິ. ອຕ຺ຖາປຕ຺ຕິ ອພ຺ຍາກຕຈິຕ຺ໂຕ ອາປຊ຺ຊຕິ, ອກຸສລຈິຕ຺ໂຕ ວຸຏ຺ຐາຕິ. ອຕ຺ຖາປຕ຺ຕິ ອພ຺ຍາກຕຈິຕ຺ໂຕ ອາປຊ຺ຊຕິ, ອພ຺ຍາກຕຈິຕ຺ໂຕ ວຸຏ຺ຐາຕິ.

ປຐມໍ ປາຣາຊິກໍ ກຕິຫິ ສມຸຏ຺ຐາເນຫິ ສມຸຏ຺ຐາຕິ? ປຐມໍ ປາຣາຊິກໍ ເອເກນ ສມຸຏ຺ຐາເນນ ສມຸຏ຺ຐາຕິ. ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ.

ທຸຕິຍໍ ປາຣາຊິກໍ ກຕິຫິ ສມຸຏ຺ຐາເນຫິ ສມຸຏ຺ຐາຕິ? ທຸຕິຍໍ ປາຣາຊິກໍ ຕີຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ.

ຕຕິຍໍ ປາຣາຊິກໍ ກຕິຫິ ສມຸຏ຺ຐາເນຫິ ສມຸຏ຺ຐາຕິ? ຕຕິຍໍ ປາຣາຊິກໍ ຕີຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ.

ຈຕຸຕ຺ຖໍ ປາຣາຊິກໍ ກຕິຫິ ສມຸຏ຺ຐາເນຫິ ສມຸຏ຺ຐາຕິ? ຈຕຸຕ຺ຖໍ ປາຣາຊິກໍ ຕີຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ.

ຈຕ຺ຕາໂຣ ປາຣາຊິກາ ນິຏ຺ຐິຕາ.

໒. ສງ຺ຆາທິເສສໍ

໔໗໑. ອຸປກ຺ກມິຕ຺ວາ ອສຸຈິໍ ໂມເຈນ຺ຕສ຺ສ ສງ຺ຆາທິເສໂສ ກຕິຫິ ສມຸຏ຺ຐາເນຫິ ສມຸຏ຺ຐາຕິ? ອຸປກ຺ກມິຕ຺ວາ ອສຸຈິໍ ໂມເຈນ຺ຕສ຺ສ ສງ຺ຆາທິເສໂສ ເອເກນ ສມຸຏ຺ຐາເນນ ສມຸຏ຺ຐາຕິ – ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ.

ມາຕຸຄາເມນ ສທ຺ຘິໍ ກາຍສໍສຄ຺ຄໍ ສມາປຊ຺ຊນ຺ຕສ຺ສ ສງ຺ຆາທິເສໂສ ກຕິຫິ ສມຸຏ຺ຐາເນຫິ ສມຸຏ຺ຐາຕິ? ມາຕຸຄາເມນ ສທ຺ຘິໍ ກາຍສໍສຄ຺ຄໍ ສມາປຊ຺ຊນ຺ຕສ຺ສ ສງ຺ຆາທິເສໂສ ເອເກນ ສມຸຏ຺ຐາເນນ ສມຸຏ຺ຐາຕິ – ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ.

ມາຕຸຄາມໍ ທຸຏ຺ຐຸລ຺ລາຫິ ວາຈາຫິ ໂອຠາເສນ຺ຕສ຺ສ ສງ຺ຆາທິເສໂສ ກຕິຫິ ສມຸຏ຺ຐາເນຫິ ສມຸຏ຺ຐາຕິ? ມາຕຸຄາມໍ ທຸຏ຺ຐຸລ຺ລາຫິ ວາຈາຫິ ໂອຠາເສນ຺ຕສ຺ສ ສງ຺ຆາທິເສໂສ ຕີຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ.

ມາຕຸຄາມສ຺ສ ສນ຺ຕິເກ ອຕ຺ຕກາມປາຣິຈຣິຍາຍ ວຓ຺ຓໍ ຠາສນ຺ຕສ຺ສ ສງ຺ຆາທິເສໂສ ກຕິຫິ ສມຸຏ຺ຐາເນຫິ ສມຸຏ຺ຐາຕິ? ມາຕຸຄາມສ຺ສ ສນ຺ຕິເກ ອຕ຺ຕກາມປາຣິຈຣິຍາຍ ວຓ຺ຓໍ ຠາສນ຺ຕສ຺ສ ສງ຺ຆາທິເສໂສ ຕີຫິ ສມຸຏ຺ຐາເນຫິ ສມຸຏ຺ຐາຕິ…ເປ….

ສຎ຺ຈຣິຕ຺ຕໍ ສມາປຊ຺ຊນ຺ຕສ຺ສ ສງ຺ຆາທິເສໂສ ກຕິຫິ ສມຸຏ຺ຐາເນຫິ ສມຸຏ຺ຐາຕິ? ສຎ຺ຈຣິຕ຺ຕໍ ສມາປຊ຺ຊນ຺ຕສ຺ສ ສງ຺ຆາທິເສໂສ ຉຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ສມຸຏ຺ຐາຕິ, ນ ວາຈໂຕ ນ ຈິຕ຺ຕໂຕ; ສິຍາ ວາຈໂຕ ສມຸຏ຺ຐາຕິ, ນ ກາຍໂຕ ນ ຈິຕ຺ຕໂຕ; ສິຍາ ກາຍໂຕ ຈ ວາຈໂຕ ຈ ສມຸຏ຺ຐາຕິ, ນ ຈິຕ຺ຕໂຕ; ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ.

ສຎ຺ຎາຈິກາຍ ກຸຏິໍ ກາຣາເປນ຺ຕສ຺ສ ສງ຺ຆາທິເສໂສ ກຕິຫິ ສມຸຏ຺ຐາເນຫິ ສມຸຏ຺ຐາຕິ? ສຎ຺ຎາຈິກາຍ ກຸຏິໍ ກາຣາເປນ຺ຕສ຺ສ ສງ຺ຆາທິເສໂສ ຉຫິ ສມຸຏ຺ຐາເນຫິ ສມຸຏ຺ຐາຕິ…ເປ….

ມຫລ຺ລກໍ ວິຫາຣໍ ກາຣາເປນ຺ຕສ຺ສ ສງ຺ຆາທິເສໂສ ກຕິຫິ ສມຸຏ຺ຐາເນຫິ ສມຸຏ຺ຐາຕິ? ມຫລ຺ລກໍ ວິຫາຣໍ ກາຣາເປນ຺ຕສ຺ສ ສງ຺ຆາທິເສໂສ ຉຫິ ສມຸຏ຺ຐາເນຫິ ສມຸຏ຺ຐາຕິ…ເປ….

ຠິກ຺ຂຸໍ ອມູລເກນ ປາຣາຊິເກນ ຘມ຺ເມນ ອນຸທ຺ຘໍເສນ຺ຕສ຺ສ ສງ຺ຆາທິເສໂສ ກຕິຫິ ສມຸຏ຺ຐາເນຫິ ສມຸຏ຺ຐາຕິ? ຠິກ຺ຂຸໍ ອມູລເກນ ປາຣາຊິເກນ ຘມ຺ເມນ ອນຸທ຺ຘໍເສນ຺ຕສ຺ສ ສງ຺ຆາທິເສໂສ ຕີຫິ ສມຸຏ຺ຐາເນຫິ ສມຸຏ຺ຐາຕິ…ເປ….

ຠິກ຺ຂຸໍ ອຎ຺ຎຠາຄິຍສ຺ສ ອຘິກຣຓສ຺ສ ກິຎ຺ຈິ ເທສໍ ເລສມຕ຺ຕໍ ອຸປາທາຍ ປາຣາຊິເກນ ຘມ຺ເມນ ອນຸທ຺ຘໍເສນ຺ຕສ຺ສ ສງ຺ຆາທິເສໂສ ກຕິຫິ ສມຸຏ຺ຐາເນຫິ ສມຸຏ຺ຐາຕິ? ຠິກ຺ຂຸໍ ອຎ຺ຎຠາຄິຍສ຺ສ ອຘິກຣຓສ຺ສ ກິຎ຺ຈິ ເທສໍ ເລສມຕ຺ຕໍ ອຸປາທາຍ ປາຣາຊິເກນ ຘມ຺ເມນ ອນຸທ຺ຘໍເສນ຺ຕສ຺ສ ສງ຺ຆາທິເສໂສ ຕີຫິ ສມຸຏ຺ຐາເນຫິ ສມຸຏ຺ຐາຕິ…ເປ….

ສງ຺ຆເຠທກສ຺ສ ຠິກ຺ຂຸໂນ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ຕສ຺ສ ສງ຺ຆາທິເສໂສ ກຕິຫິ ສມຸຏ຺ຐາເນຫິ ສມຸຏ຺ຐາຕິ? ສງ຺ຆເຠທກສ຺ສ ຠິກ຺ຂຸໂນ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ຕສ຺ສ ສງ຺ຆາທິເສໂສ ເອເກນ ສມຸຏ຺ຐາເນນ ສມຸຏ຺ຐາຕິ – ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ.

ເຠທການຸວຕ຺ຕການໍ ຠິກ຺ຂູນໍ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ຕານໍ ສງ຺ຆາທິເສໂສ ກຕິຫິ ສມຸຏ຺ຐາເນຫິ ສມຸຏ຺ຐາຕິ? ເຠທການຸວຕ຺ຕການໍ ຠິກ຺ຂູນໍ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ຕານໍ ສງ຺ຆາທິເສໂສ ເອເກນ ສມຸຏ຺ຐາເນນ ສມຸຏ຺ຐາຕິ – ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ.

ທຸພ຺ພຈສ຺ສ ຠິກ຺ຂຸໂນ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ຕສ຺ສ ສງ຺ຆາທິເສໂສ ກຕິຫິ ສມຸຏ຺ຐາເນຫິ ສມຸຏ຺ຐາຕິ? ທຸພ຺ພຈສ຺ສ ຠິກ຺ຂຸໂນ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ຕສ຺ສ ສງ຺ຆາທິເສໂສ ເອເກນ ສມຸຏ຺ຐາເນນ ສມຸຏ຺ຐາຕິ – ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ.

ກຸລທູສກສ຺ສ ຠິກ຺ຂຸໂນ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ຕສ຺ສ ສງ຺ຆາທິເສໂສ ກຕິຫິ ສມຸຏ຺ຐາເນຫິ ສມຸຏ຺ຐາຕິ? ກຸລທູສກສ຺ສ ຠິກ຺ຂຸໂນ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ຕສ຺ສ ສງ຺ຆາທິເສໂສ ເອເກນ ສມຸຏ຺ຐາເນນ ສມຸຏ຺ຐາຕິ – ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ.

ເຕຣສ ສງ຺ຆາທິເສສາ ນິຏ຺ຐິຕາ.

໔໗໒. …ເປ… ອນາທຣິຍໍ ປຏິຈ຺ຈ ອຸທເກ ອຸຈ຺ຈາຣໍ ວາ ປສ຺ສາວໍ ວາ ເຂຬໍ ວາ ກໂຣນ຺ຕສ຺ສ ທຸກ຺ກຏໍ ກຕິຫິ ສມຸຏ຺ຐາເນຫິ ສມຸຏ຺ຐາຕິ? ອນາທຣິຍໍ ປຏິຈ຺ຈ ອຸທເກ ອຸຈ຺ຈາຣໍ ວາ ປສ຺ສາວໍ ວາ ເຂຬໍ ວາ ກໂຣນ຺ຕສ຺ສ ທຸກ຺ກຏໍ ເອເກນ ສມຸຏ຺ຐາເນນ ສມຸຏ຺ຐາຕິ – ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ.

ເສຂິຍາ ນິຏ຺ຐິຕາ.

໓. ປາຣາຊິກາທິ

໔໗໓. ຈຕ຺ຕາໂຣ ປາຣາຊິກາ ກຕິຫິ ສມຸຏ຺ຐາເນຫິ ສມຸຏ຺ຐນ຺ຕິ? ຈຕ຺ຕາໂຣ ປາຣາຊິກາ ຕີຫິ ສມຸຏ຺ຐາເນຫິ ສມຸຏ຺ຐນ຺ຕິ – ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ, ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ.

ເຕຣສ ສງ຺ຆາທິເສສາ ກຕິຫິ ສມຸຏ຺ຐາເນຫິ ສມຸຏ຺ຐນ຺ຕິ? ເຕຣສ ສງ຺ຆາທິເສສາ ຉຫິ ສມຸຏ຺ຐາເນຫິ ສມຸຏ຺ຐນ຺ຕິ – ສິຍາ ກາຍໂຕ ສມຸຏ຺ຐນ຺ຕິ, ນ ວາຈໂຕ ນ ຈິຕ຺ຕໂຕ; ສິຍາ ວາຈໂຕ ສມຸຏ຺ຐນ຺ຕິ, ນ ກາຍໂຕ ນ ຈິຕ຺ຕໂຕ; ສິຍາ ກາຍໂຕ ຈ ວາຈໂຕ ນ ສມຸຏ຺ຐນ຺ຕິ, ນ ຈິຕ຺ຕໂຕ; ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ, ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ.

ທ຺ເວ ອນິຍຕາ ກຕິຫິ ສມຸຏ຺ຐາເນຫິ ສມຸຏ຺ຐນ຺ຕິ? ທ຺ເວ ອນິຍຕາ ຕີຫິ ສມຸຏ຺ຐາເນຫິ ສມຸຏ຺ຐນ຺ຕິ – ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ, ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ.

ຕິໍສ ນິສ຺ສຄ຺ຄິຍາ ປາຈິຕ຺ຕິຍາ ກຕິຫິ ສມຸຏ຺ຐາເນຫິ ສມຸຏ຺ຐນ຺ຕິ? ຕິໍສ ນິສ຺ສຄ຺ຄິຍາ ປາຈິຕ຺ຕິຍາ ຉຫິ ສມຸຏ຺ຐາເນຫິ ສມຸຏ຺ຐນ຺ຕິ – ສິຍາ ກາຍໂຕ ສມຸຏ຺ຐນ຺ຕິ, ນ ວາຈໂຕ ນ ຈິຕ຺ຕໂຕ; ສິຍາ ວາຈໂຕ ສມຸຏ຺ຐນ຺ຕິ, ນ ກາຍໂຕ ນ ຈິຕ຺ຕໂຕ; ສິຍາ ກາຍໂຕ ຈ ວາຈໂຕ ຈ ສມຸຏ຺ຐນ຺ຕິ, ນ ຈິຕ຺ຕໂຕ; ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ, ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ.

ທ຺ເວນວຸຕິ ປາຈິຕ຺ຕິຍາ ກຕິຫິ ສມຸຏ຺ຐາເນຫິ ສມຸຏ຺ຐນ຺ຕິ? ທ຺ເວນວຸຕິ ປາຈິຕ຺ຕິຍາ ຉຫິ ສມຸຏ຺ຐາເນຫິ ສມຸຏ຺ຐນ຺ຕິ – ສິຍາ ກາຍໂຕ ສມຸຏ຺ຐນ຺ຕິ, ນ ວາຈໂຕ ນ ຈິຕ຺ຕໂຕ; ສິຍາ ວາຈໂຕ ສມຸຏ຺ຐນ຺ຕິ, ນ ກາຍໂຕ ນ ຈິຕ຺ຕໂຕ; ສິຍາ ກາຍໂຕ ຈ ວາຈໂຕ ຈ ສມຸຏ຺ຐນ຺ຕິ, ນ ຈິຕ຺ຕໂຕ; ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ.

ຈຕ຺ຕາໂຣ ປາຏິເທສນີຍາ ກຕິຫິ ສມຸຏ຺ຐາເນຫິ ສມຸຏ຺ຐນ຺ຕິ? ຈຕ຺ຕາໂຣ ປາຏິເທສນີຍາ ຈຕູຫິ ສມຸຏ຺ຐາເນຫິ ສມຸຏ຺ຐນ຺ຕິ – ສິຍາ ກາຍໂຕ ສມຸຏ຺ຐນ຺ຕິ, ນ ວາຈໂຕ ນ ຈິຕ຺ຕໂຕ; ສິຍາ ກາຍໂຕ ຈ ວາຈໂຕ ຈ ສມຸຏ຺ຐນ຺ຕິ, ນ ຈິຕ຺ຕໂຕ; ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ, ນ ວາຈໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ.

ປຎ຺ຈສຕ຺ຕຕິ ເສຂິຍາ ກຕິຫິ ສມຸຏ຺ຐາເນຫິ ສມຸຏ຺ຐນ຺ຕິ? ປຎ຺ຈສຕ຺ຕຕິ ເສຂິຍາ ຕີຫິ ສມຸຏ຺ຐາເນຫິ ສມຸຏ຺ຐນ຺ຕິ – ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ, ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ.

ສມຸຏ຺ຐານໍ ນິຏ຺ຐິຕໍ.