໒. ກຕາປຕ຺ຕິວາໂຣ

໑. ປາຣາຊິກກຓ຺ຑໍ

໑໙໓. ເມຖຸນໍ ຘມ຺ມໍ ປຏິເສວນປຈ຺ຈຍາ ກຕິ ອາປຕ຺ຕິໂຍ ອາປຊ຺ຊຕິ? ເມຖຸນໍ ຘມ຺ມໍ ປຏິເສວນປຈ຺ຈຍາ ຈຕສ຺ໂສ ອາປຕ຺ຕິໂຍ ອາປຊ຺ຊຕິ – ອກ຺ຂາຍິເຕ ສຣີເຣ ເມຖຸນໍ ຘມ຺ມໍ ປຏິເສວຕິ, ອາປຕ຺ຕິ ປາຣາຊິກສ຺ສ; ເຍຠຸຍ຺ເຍນ ຂາຍິເຕ ສຣີເຣ ເມຖຸນໍ ຘມ຺ມໍ ປຏິເສວຕິ, ອາປຕ຺ຕິ ຖຸລ຺ລຈ຺ຈຍສ຺ສ; ວຏ຺ຏກເຕ ມຸເຂ ອຈ຺ຉຸປນ຺ຕໍ ອງ຺ຄຊາຕໍ ປເວເສຕິ, ອາປຕ຺ຕິ ທຸກ຺ກຏສ຺ສ; ຊຕຸມຏ຺ຐເກ ປາຈິຕ຺ຕິຍໍ – ເມຖຸນໍ ຘມ຺ມໍ ປຏິເສວນປຈ຺ຈຍາ ອິມາ ຈຕສ຺ໂສ ອາປຕ຺ຕິໂຍ ອາປຊ຺ຊຕິ.

ອທິນ຺ນໍ ອາທິຍນປຈ຺ຈຍາ ກຕິ ອາປຕ຺ຕິໂຍ ອາປຊ຺ຊຕິ? ອທິນ຺ນໍ ອາທິຍນປຈ຺ຈຍາ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ປຎ຺ຈມາສກໍ ວາ ອຕິເຣກປຎ຺ຈມາສກໍ ວາ ອຄ຺ຆນກໍ ອທິນ຺ນໍ ເຖຍ຺ຍສງ຺ຂາຕໍ ອາທິຍຕິ, ອາປຕ຺ຕິ ປາຣາຊິກສ຺ສ; ອຕິເຣກມາສກໍ ວາ ອູນປຎ຺ຈມາສກໍ ວາ ອຄ຺ຆນກໍ ອທິນ຺ນໍ ເຖຍ຺ຍສງ຺ຂາຕໍ ອາທິຍຕິ, ອາປຕ຺ຕິ ຖຸລ຺ລຈ຺ຈຍສ຺ສ; ມາສກໍ ວາ ອູນມາສກໍ ວາ ອຄ຺ຆນກໍ ອທິນ຺ນໍ ເຖຍ຺ຍສງ຺ຂາຕໍ ອາທິຍຕິ, ອາປຕ຺ຕິ ທຸກ຺ກຏສ຺ສ – ອທິນ຺ນໍ ອາທິຍນປຈ຺ຈຍາ ອິມາ ຕິສ຺ໂສ ອາປຕ຺ຕິໂຍ ອາປຊ຺ຊຕິ.

ສຎ຺ຈິຈ຺ຈ ມນຸສ຺ສວິຄ຺ຄຫໍ ຊີວິຕາ ໂວໂຣປນປຈ຺ຈຍາ ກຕິ ອາປຕ຺ຕິໂຍ ອາປຊ຺ຊຕິ? ສຎ຺ຈິຈ຺ຈ ມນຸສ຺ສວິຄ຺ຄຫໍ ຊີວິຕາ ໂວໂຣປນປຈ຺ຈຍາ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ມນຸສ຺ສໍ ໂອທິສ຺ສ ໂອປາຕໍ ຂຓຕິ ‘‘ປປຕິຕ຺ວາ ມຣິສ຺ສຕີ’’ຕິ, ອາປຕ຺ຕິ ທຸກ຺ກຏສ຺ສ; ປປຕິເຕ ທຸກ຺ຂາ ເວທນາ ອຸປ຺ປຊ຺ຊຕິ, ອາປຕ຺ຕິ ຖຸລ຺ລຈ຺ຈຍສ຺ສ; ມຣຕິ, ອາປຕ຺ຕິ ປາຣາຊິກສ຺ສ – ສຎ຺ຈິຈ຺ຈ ມນຸສ຺ສວິຄ຺ຄຫໍ ຊີວິຕາ ໂວໂຣປນປຈ຺ຈຍາ ອິມາ ຕິສ຺ໂສ ອາປຕ຺ຕິໂຍ ອາປຊ຺ຊຕິ.

ອສນ຺ຕໍ ອຠູຕໍ ອຸຕ຺ຕຣິມນຸສ຺ສຘມ຺ມໍ ອຸລ຺ລປນປຈ຺ຈຍາ ກຕິ ອາປຕ຺ຕິໂຍ ອາປຊ຺ຊຕິ? ອສນ຺ຕໍ ອຠູຕໍ ອຸຕ຺ຕຣິມນຸສ຺ສຘມ຺ມໍ ອຸລ຺ລປນປຈ຺ຈຍາ ຕິສ຺ໂສ ອາປຕ຺ຕິໂຍ ອາປຊ຺ຊຕິ – ປາປິຈ຺ໂຉ ອິຈ຺ຉາປກໂຕ ອສນ຺ຕໍ ອຠູຕໍ ອຸຕ຺ຕຣິມນຸສ຺ສຘມ຺ມໍ ອຸລ຺ລປຕິ, ອາປຕ຺ຕິ ປາຣາຊິກສ຺ສ, ‘‘ໂຍ ເຕ ວິຫາເຣ ວສຕິ ໂສ ຠິກ຺ຂຸ ອຣຫາ’’ຕິ ຠຓຕິ, ປຏິວິຊານນ຺ຕສ຺ສ ອາປຕ຺ຕິ ຖຸລ຺ລຈ຺ຈຍສ຺ສ; ນ ປຏິວິຊານນ຺ຕສ຺ສ ອາປຕ຺ຕິ ທຸກ຺ກຏສ຺ສ – ອສນ຺ຕໍ ອຠູຕໍ ອຸຕ຺ຕຣິມນຸສ຺ສຘມ຺ມໍ ອຸລ຺ລປນປຈ຺ຈຍາ ອິມາ ຕິສ຺ໂສ ອາປຕ຺ຕິໂຍ ອາປຊ຺ຊຕິ.

ຈຕ຺ຕາໂຣ ປາຣາຊິກາ ນິຏ຺ຐິຕາ.

໒. ສງ຺ຆາທິເສສກຓ຺ຑາທິ

໑໙໔. ອຸປກ຺ກມິຕ຺ວາ ອສຸຈິໍ ໂມຈນປຈ຺ຈຍາ ກຕິ ອາປຕ຺ຕິໂຍ ອາປຊ຺ຊຕິ? ອຸປກ຺ກມິຕ຺ວາ ອສຸຈິໂມຈນປຈ຺ຈຍາ ຕິສ຺ໂສ ອາປຕ຺ຕິໂຍ ອາປຊ຺ຊຕິ – ເຈເຕຕິ ອຸປກ຺ກມຕິ ມຸຈ຺ຈຕິ, ອາປຕ຺ຕິ ສງ຺ຆາທິເສສສ຺ສ; ເຈເຕຕິ ອຸປກ຺ກມຕິ ນ ມຸຈ຺ຈຕິ, ອາປຕ຺ຕິ ຖຸລ຺ລຈ຺ຈຍສ຺ສ; ປໂຍເຄ ທຸກ຺ກຏໍ – ອຸປກ຺ກມິຕ຺ວາ ອສຸຈິໂມຈນປຈ຺ຈຍາ ອິມາ ຕິສ຺ໂສ ອາປຕ຺ຕິໂຍ ອາປຊ຺ຊຕິ.

ກາຍສໍສຄ຺ຄໍ ສມາປຊ຺ຊນປຈ຺ຈຍາ ກຕິ ອາປຕ຺ຕິໂຍ ອາປຊ຺ຊຕິ? ກາຍສໍສຄ຺ຄໍ ສມາປຊ຺ຊນປຈ຺ຈຍາ ປຎ຺ຈ ອາປຕ຺ຕິໂຍ ອາປຊ຺ຊຕິ – ອວສ຺ສຸຕາ ຠິກ຺ຂຸນີ ອວສ຺ສຸຕສ຺ສ ປຸຣິສປຸຄ຺ຄລສ຺ສ ອຘກ຺ຂກໍ ອຸພ຺ຠຊາຓຸມຓ຺ຑລໍ ຄຫຓໍ ສາທິຍຕິ, ອາປຕ຺ຕິ ປາຣາຊິກສ຺ສ; ຠິກ຺ຂຸ ກາເຍນ ກາຍໍ ອາມສຕິ, ອາປຕ຺ຕິ ສງ຺ຆາທິເສສສ຺ສ; ກາເຍນ ກາຍປຏິພທ຺ຘໍ ອາມສຕິ, ອາປຕ຺ຕິ ຖຸລ຺ລຈ຺ຈຍສ຺ສ; ກາຍປຏິພທ຺ເຘນ ກາຍປຏິພທ຺ຘໍ ອາມສຕິ, ອາປຕ຺ຕິ ທຸກ຺ກຏສ຺ສ; ອງ຺ຄຸລິປໂຕທເກ ປາຈິຕ຺ຕິຍໍ – ກາຍສໍສຄ຺ຄໍ ສມາປຊ຺ຊນປຈ຺ຈຍາ ອິມາ ປຎ຺ຈ ອາປຕ຺ຕິໂຍ ອາປຊ຺ຊຕິ.

ມາຕຸຄາມໍ ທຸຏ຺ຐຸລ຺ລາຫິ ວາຈາຫິ ໂອຠາສນປຈ຺ຈຍາ ຕິສ຺ໂສ ອາປຕ຺ຕິໂຍ ອາປຊ຺ຊຕິ – ວຈ຺ຈມຄ຺ຄໍ ປສ຺ສາວມຄ຺ຄໍ ອາທິສ຺ສ ວຓ຺ຓມ຺ປິ ຠຓຕິ ອວຓ຺ຓມ຺ປິ ຠຓຕິ, ອາປຕ຺ຕິ ສງ຺ຆາທິເສສສ຺ສ; ວຈ຺ຈມຄ຺ຄໍ ປສ຺ສາວມຄ຺ຄໍ ຐເປຕ຺ວາ ອຘກ຺ຂກໍ ອຸພ຺ຠຊາຓຸມຓ຺ຑລໍ ອາທິສ຺ສ ວຓ຺ຓມ຺ປິ ຠຓຕິ ອວຓ຺ຓມ຺ປິ ຠຓຕິ, ອາປຕ຺ຕິ ຖຸລ຺ລຈ຺ຈຍສ຺ສ; ກາຍປຏິພທ຺ຘໍ ອາທິສ຺ສ ວຓ຺ຓມ຺ປິ ຠຓຕິ ອວຓ຺ຓມ຺ປິ ຠຓຕິ, ອາປຕ຺ຕິ ທຸກ຺ກຏສ຺ສ.

ອຕ຺ຕກາມປາຣິຈຣິຍາຍ ວຓ຺ຓໍ ຠາສນປຈ຺ຈຍາ ຕິສ຺ໂສ ອາປຕ຺ຕິໂຍ ອາປຊ຺ຊຕິ – ມາຕຸຄາມສ຺ສ ສນ຺ຕິເກ ອຕ຺ຕກາມປາຣິຈຣິຍາຍ ວຓ຺ຓໍ ຠາສຕິ, ອາປຕ຺ຕິ ສງ຺ຆາທິເສສສ຺ສ; ປຓ຺ຑກສ຺ສ ສນ຺ຕິເກ ອຕ຺ຕກາມປາຣິຈຣິຍາຍ ວຓ຺ຓໍ ຠາສຕິ, ອາປຕ຺ຕິ ຖຸລ຺ລຈ຺ຈຍສ຺ສ; ຕິຣຈ຺ຉານຄຕສ຺ສ ສນ຺ຕິເກ ອຕ຺ຕກາມປາຣິຈຣິຍາຍ ວຓ຺ຓໍ ຠາສຕິ, ອາປຕ຺ຕິ ທຸກ຺ກຏສ຺ສ.

ສຎ຺ຈຣິຕ຺ຕໍ ສມາປຊ຺ຊນປຈ຺ຈຍາ ຕິສ຺ໂສ ອາປຕ຺ຕິໂຍ ອາປຊ຺ຊຕິ – ປຏິຄ຺ຄຓ຺ຫາຕິ ວີມໍສຕິ ປຈ຺ຈາຫຣຕິ, ອາປຕ຺ຕິ ສງ຺ຆາທິເສສສ຺ສ; ປຏິຄ຺ຄຓ຺ຫາຕິ ວີມໍສຕິ ນ ປຈ຺ຈາຫຣຕິ, ອາປຕ຺ຕິ ຖຸລ຺ລຈ຺ຈຍສ຺ສ; ປຏິຄ຺ຄຓ຺ຫາຕິ ນ ວີມໍສຕິ ນ ປຈ຺ຈາຫຣຕິ, ອາປຕ຺ຕິ ທຸກ຺ກຏສ຺ສ.

ສຎ຺ຎາຈິກາຍ ກຸຏິໍ ກາຣາປນປຈ຺ຈຍາ ຕິສ຺ໂສ ອາປຕ຺ຕິໂຍ ອາປຊ຺ຊຕິ – ກາຣາເປຕິ, ປໂຍເຄ ທຸກ຺ກຏໍ; ເອກໍ ປິຓ຺ຑໍ [ເອກປິຓ຺ເຑ (ສ຺ຍາ.)] ອນາຄເຕ ອາປຕ຺ຕິ ຖຸລ຺ລຈ຺ຈຍສ຺ສ; ຕສ຺ມິໍ ປິຓ຺ເຑ ອາຄເຕ ອາປຕ຺ຕິ ສງ຺ຆາທິເສສສ຺ສ.

ມຫລ຺ລກໍ ວິຫາຣໍ ກາຣາປນປຈ຺ຈຍາ ຕິສ຺ໂສ ອາປຕ຺ຕິໂຍ ອາປຊ຺ຊຕິ – ກາຣາເປຕິ, ປໂຍເຄ ທຸກ຺ກຏໍ; ເອກໍ ປິຓ຺ຑໍ ອນາຄເຕ, ອາປຕ຺ຕິ ຖຸລ຺ລຈ຺ຈຍສ຺ສ; ຕສ຺ມິໍ ປິຓ຺ເຑ ອາຄເຕ ອາປຕ຺ຕິ ສງ຺ຆາທິເສສສ຺ສ.

ຠິກ຺ຂຸໍ ອມູລເກນ ປາຣາຊິເກນ ຘມ຺ເມນ ອນຸທ຺ຘໍສນປຈ຺ຈຍາ ຕິສ຺ໂສ ອາປຕ຺ຕິໂຍ ອາປຊ຺ຊຕິ – ອໂນກາສໍ ກາຣາເປຕ຺ວາ ຈາວນາຘິປ຺ປາໂຍ ວເທຕິ, ອາປຕ຺ຕິ ສງ຺ຆາທິເສເສນ ທຸກ຺ກຏສ຺ສ; ໂອກາສໍ ກາຣາເປຕ຺ວາ ອກ຺ໂກສາຘິປ຺ປາໂຍ ວເທຕິ, ອາປຕ຺ຕິ ໂອມສວາທສ຺ສ.

ຠິກ຺ຂຸໍ ອຎ຺ຎຠາຄິຍສ຺ສ ອຘິກຣຓສ຺ສ ກິຎ຺ຈິ ເທສໍ ເລສມຕ຺ຕໍ ອຸປາທາຍ ປາຣາຊິເກນ ຘມ຺ເມນ ອນຸທ຺ຘໍສນປຈ຺ຈຍາ ຕິສ຺ໂສ ອາປຕ຺ຕິໂຍ ອາປຊ຺ຊຕິ – ອໂນກາສໍ ກາຣາເປຕ຺ວາ ຈາວນາຘິປ຺ປາໂຍ ວເທຕິ, ອາປຕ຺ຕິ ສງ຺ຆາທິເສເສນ ທຸກ຺ກຏສ຺ສ; ໂອກາສໍ ກາຣາເປຕ຺ວາ ອກ຺ໂກສາຘິປ຺ປາໂຍ ວເທຕິ, ອາປຕ຺ຕິ ໂອມສວາທສ຺ສ.

ສງ຺ຆເຠທໂກ ຠິກ຺ຂຸ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນປຈ຺ຈຍາ ຕິສ຺ໂສ ອາປຕ຺ຕິໂຍ ອາປຊ຺ຊຕິ – ຎຕ຺ຕິຍາ ທຸກ຺ກຏໍ; ທ຺ວີຫິ ກມ຺ມວາຈາຫິ ຖຸລ຺ລຈ຺ຈຍາ; ກມ຺ມວາຈາປຣິໂຍສາເນ ອາປຕ຺ຕິ ສງ຺ຆາທິເສສສ຺ສ.

ເຠທການຸວຕ຺ຕກາ ຠິກ຺ຂູ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນປຈ຺ຈຍາ ຕິສ຺ໂສ ອາປຕ຺ຕິໂຍ ອາປຊ຺ຊຕິ – ຎຕ຺ຕິຍາ ທຸກ຺ກຏໍ; ທ຺ວີຫິ ກມ຺ມວາຈາຫິ ຖຸລ຺ລຈ຺ຈຍາ; ກມ຺ມວາຈາປຣິໂຍສາເນ ອາປຕ຺ຕິ ສງ຺ຆາທິເສສສ຺ສ.

ທຸພ຺ພໂຈ ຠິກ຺ຂຸ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນປຈ຺ຈຍາ ຕິສ຺ໂສ ອາປຕ຺ຕິໂຍ ອາປຊ຺ຊຕິ – ຎຕ຺ຕິຍາ ທຸກ຺ກຏໍ; ທ຺ວີຫິ ກມ຺ມວາຈາຫິ ຖຸລ຺ລຈ຺ຈຍາ; ກມ຺ມວາຈາປຣິໂຍສາເນ ອາປຕ຺ຕິ ສງ຺ຆາທິເສສສ຺ສ.

ກຸລທູສໂກ ຠິກ຺ຂຸ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນປຈ຺ຈຍາ ຕິສ຺ໂສ ອາປຕ຺ຕິໂຍ ອາປຊ຺ຊຕິ – ຎຕ຺ຕິຍາ ທຸກ຺ກຏໍ; ທ຺ວີຫິ ກມ຺ມວາຈາຫິ ຖຸລ຺ລຈ຺ຈຍາ; ກມ຺ມວາຈາປຣິໂຍສາເນ ອາປຕ຺ຕິ ສງ຺ຆາທິເສສສ຺ສ…ເປ….

ອນາທຣິຍໍ ປຏິຈ຺ຈ ອຸທເກ ອຸຈ຺ຈາຣໍ ວາ ປສ຺ສາວໍ ວາ ເຂຬໍ ວາ ກຣຓປຈ຺ຈຍາ ກຕິ ອາປຕ຺ຕິໂຍ ອາປຊ຺ຊຕິ? ອນາທຣິຍໍ ປຏິຈ຺ຈ ອຸທເກ ອຸຈ຺ຈາຣໍ ວາ ປສ຺ສາວໍ ວາ ເຂຬໍ ວາ ກຣຓປຈ຺ຈຍາ ເອກໍ ອາປຕ຺ຕິໍ ອາປຊ຺ຊຕິ. ທຸກ຺ກຏໍ – ອນາທຣິຍໍ ປຏິຈ຺ຈ ອຸທເກ ອຸຈ຺ຈາຣໍ ວາ ປສ຺ສາວໍ ວາ ເຂຬໍ ວາ ກຣຓປຈ຺ຈຍາ ອິມໍ ເອກໍ ອາປຕ຺ຕິໍ ອາປຊ຺ຊຕິ.

ກຕາປຕ຺ຕິວາໂຣ ນິຏ຺ຐິໂຕ ທຸຕິໂຍ.