໑. ປຣິມຓ຺ຑລວຄ຺ໂຄ

ອິເມ ໂຂ ປນາຍ຺ຍາໂຍ ເສຂິຍາ

ຘມ຺ມາ ອຸທ຺ເທສໍ ອາຄຈ຺ຉນ຺ຕິ.

໑໒໔໐. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂຸນິໂຍ ປຸຣໂຕປິ ປຈ຺ຉໂຕປິ ໂອລມ຺ເພນ຺ຕີ ນິວາເສນ຺ຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນິໂຍ ປຸຣໂຕປິ ປຈ຺ຉໂຕປິ ໂອລມ຺ເພນ຺ຕີ ນິວາເສສ຺ສນ຺ຕິ, ເສຍ຺ຍຖາປິ ຄິຫິນິໂຍ ກາມໂຠຄິນິໂຍ’’ຕິ! ອສ຺ໂສສຸໍ ໂຂ ຠິກ຺ຂຸນິໂຍ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂຸນິໂຍ ປຸຣໂຕປິ ປຈ຺ຉໂຕປິ ໂອລມ຺ເພນ຺ຕີ ນິວາເສສ຺ສນ຺ຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຉພ຺ພຄ຺ຄິຍາ ຠິກ຺ຂຸນິໂຍ ປຸຣໂຕປິ ປຈ຺ຉໂຕປິ ໂອລມ຺ເພນ຺ຕີ ນິວາເສນ຺ຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຉພ຺ພຄ຺ຄິຍາ ຠິກ຺ຂຸນິໂຍ ປຸຣໂຕປິ ປຈ຺ຉໂຕປິ ໂອລມ຺ເພນ຺ຕີ ນິວາເສສ຺ສນ຺ຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

‘‘ປຣິມຓ຺ຑລໍ ນິວາເສສ຺ສາມີຕິ ສິກ຺ຂາ ກຣຓີຍາ’’ຕິ.

ປຣິມຓ຺ຑລໍ ນິວາເສຕພ຺ພໍ ນາຠິມຓ຺ຑລໍ ຊາຓຸມຓ຺ຑລໍ ປຏິຈ຺ຉາເທນ຺ຕິຍາ. ຍາ ອນາທຣິຍໍ ປຏິຈ຺ຈ ປຸຣໂຕ ວາ ປຈ຺ຉໂຕ ວາ ໂອລມ຺ເພນ຺ຕີ ນິວາເສຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕິຍາ, ຄິລານາຍ, ອາປທາສຸ, ອຸມ຺ມຕ຺ຕິກາຍ, ອາທິກມ຺ມິກາຍາຕິ…ເປ… (ສໍຂິຕ຺ຕໍ).