໗. ສຕ຺ຕມສິກ຺ຂາປທໍ

໑໒໐໖. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຠິກ຺ຂຸນິໂຍ ຠິກ຺ຂຸນິຍາ ອຸມ຺ມທ຺ທາເປນ຺ຕິປິ ປຣິມທ຺ທາເປນ຺ຕິປິ. ມນຸສ຺ສາ ວິຫາຣຈາຣິກໍ ອາຫິຓ຺ຑນ຺ຕາ ປສ຺ສິຕ຺ວາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນິໂຍ ຠິກ຺ຂຸນິຍາ ອຸມ຺ມທ຺ທາເປສ຺ສນ຺ຕິປິ ປຣິມທ຺ທາເປສ຺ສນ຺ຕິປິ ເສຍ຺ຍຖາປິ ຄິຫິນິໂຍ ກາມໂຠຄິນິໂຍ’’ຕິ! ອສ຺ໂສສຸໍ ໂຂ ຠິກ຺ຂຸນິໂຍ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນິໂຍ ຠິກ຺ຂຸນິຍາ ອຸມ຺ມທ຺ທາເປສ຺ສນ຺ຕິປິ ປຣິມທ຺ທາເປສ຺ສນ຺ຕິປີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂຸນິໂຍ ຠິກ຺ຂຸນິຍາ ອຸມ຺ມທ຺ທາເປນ຺ຕິປິ ປຣິມທ຺ທາເປນ຺ຕິປີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຠິກ຺ຂຸນິໂຍ ຠິກ຺ຂຸນິຍາ ອຸມ຺ມທ຺ທາເປສ຺ສນ຺ຕິປິ ປຣິມທ຺ທາເປສ຺ສນ຺ຕິປິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໑໒໐໗. ‘‘ຍາ ປນ ຠິກ຺ຂຸນີ ຠິກ຺ຂຸນິຍາ ອຸມ຺ມທ຺ທາເປຍ຺ຍ ວາ ປຣິມທ຺ທາເປຍ຺ຍ ວາ, ປາຈິຕ຺ຕິຍ’’ນ຺ຕິ.

໑໒໐໘. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ຠິກ຺ຂຸນິຍາຕິ ອຎ຺ຎາຍ ຠິກ຺ຂຸນິຍາ. ອຸມ຺ມທ຺ທາເປຍ຺ຍ ວາຕິ ອຸມ຺ມທ຺ທາເປຕິ [ອຸພ຺ພຏ຺ຏາເປຕິ (ສີ.)], ອາປຕ຺ຕິ ປາຈິຕ຺ຕິຍສ຺ສ. ປຣິມທ຺ທາເປຍ຺ຍ ວາຕິ ສມ຺ພາຫາເປຕິ, ອາປຕ຺ຕິ ປາຈິຕ຺ຕິຍສ຺ສ.

໑໒໐໙. ອນາປຕ຺ຕິ ຄິລານາຍ, ອາປທາສຸ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ສຕ຺ຕມສິກ຺ຂາປທໍ ນິຏ຺ຐິຕໍ.