໑໒. ທ຺ວາທສມສິກ຺ຂາປທໍ

໑໒໑໙. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຠິກ຺ຂຸນິໂຍ ອໂນກາສກຕໍ ຠິກ຺ຂຸໍ ປຎ຺ຫໍ ປຸຈ຺ຉນ຺ຕິ. ຠິກ຺ຂູ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນິໂຍ ອໂນກາສກຕໍ ຠິກ຺ຂຸໍ ປຎ຺ຫໍ ປຸຈ຺ຉິສ຺ສນ຺ຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂຸນິໂຍ ອໂນກາສກຕໍ ຠິກ຺ຂຸໍ ປຎ຺ຫໍ ປຸຈ຺ຉນ຺ຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຠິກ຺ຂຸນິໂຍ ອໂນກາສກຕໍ ຠິກ຺ຂຸໍ ປຎ຺ຫໍ ປຸຈ຺ຉິສ຺ສນ຺ຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໑໒໒໐. ‘‘ຍາ ປນ ຠິກ຺ຂຸນີ ອໂນກາສກຕໍ ຠິກ຺ຂຸໍ ປຎ຺ຫໍ ປຸຈ຺ເຉຍ຺ຍ, ປາຈິຕ຺ຕິຍ’’ນ຺ຕິ.

໑໒໒໑. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ອໂນກາສກຕນ຺ຕິ ອນາປຸຈ຺ຉາ. ຠິກ຺ຂຸນ຺ຕິ ອຸປສມ຺ປນ຺ນໍ. ປຎ຺ຫໍ ປຸຈ຺ເຉຍ຺ຍາຕິ ສຸຕ຺ຕນ຺ເຕ ໂອກາສໍ ກາຣາເປຕ຺ວາ ວິນຍໍ ວາ ອຠິຘມ຺ມໍ ວາ ປຸຈ຺ຉຕິ, ອາປຕ຺ຕິ ປາຈິຕ຺ຕິຍສ຺ສ. ວິນເຍ ໂອກາສໍ ກາຣາເປຕ຺ວາ ສຸຕ຺ຕນ຺ຕໍ ວາ ອຠິຘມ຺ມໍ ວາ ປຸຈ຺ຉຕິ, ອາປຕ຺ຕິ ປາຈິຕ຺ຕິຍສ຺ສ. ອຠິຘມ຺ເມ ໂອກາສໍ ກາຣາເປຕ຺ວາ ສຸຕ຺ຕນ຺ຕໍ ວາ ວິນຍໍ ວາ ປຸຈ຺ຉຕິ, ອາປຕ຺ຕິ ປາຈິຕ຺ຕິຍສ຺ສ.

໑໒໒໒. ອນາປຸຈ຺ຉິເຕ ອນາປຸຈ຺ຉິຕສຎ຺ຎາ ປຎ຺ຫໍ ປຸຈ຺ຉຕິ, ອາປຕ຺ຕິ ປາຈິຕ຺ຕິຍສ຺ສ. ອນາປຸຈ຺ຉິເຕ ເວມຕິກາ ປຎ຺ຫໍ ປຸຈ຺ຉຕິ, ອາປຕ຺ຕິ ປາຈິຕ຺ຕິຍສ຺ສ. ອນາປຸຈ຺ຉິເຕ ອາປຸຈ຺ຉິຕສຎ຺ຎາ ປຎ຺ຫໍ ປຸຈ຺ຉຕິ, ອາປຕ຺ຕິ ປາຈິຕ຺ຕິຍສ຺ສ.

ອາປຸຈ຺ຉິເຕ ອນາປຸຈ຺ຉິຕສຎ຺ຎາ, ອາປຕ຺ຕິ ທຸກ຺ກຏສ຺ສ. ອາປຸຈ຺ຉິເຕ ເວມຕິກາ, ອາປຕ຺ຕິ ທຸກ຺ກຏສ຺ສ. ອາປຸຈ຺ຉິເຕ ອາປຸຈ຺ຉິຕສຎ຺ຎາ, ອນາປຕ຺ຕິ.

໑໒໒໓. ອນາປຕ຺ຕິ ໂອກາສໍ ກາຣາເປຕ຺ວາ ປຸຈ຺ຉຕິ, ອໂນທິສ຺ສ ໂອກາສໍ ກາຣາເປຕ຺ວາ ຍຕ຺ຖ ກຕ຺ຖຈິ ປຸຈ຺ຉຕິ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ທ຺ວາທສມສິກ຺ຂາປທໍ ນິຏ຺ຐິຕໍ.