໑. ປຐມສິກ຺ຂາປທໍ

໑໑໗໘. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂຸນິໂຍ ຉຕ຺ຕຸປາຫນໍ ຘາເຣນ຺ຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນິໂຍ ຉຕ຺ຕຸປາຫນໍ ຘາເຣສ຺ສນ຺ຕິ, ເສຍ຺ຍຖາປິ ຄິຫິນິໂຍ ກາມໂຠຄິນິໂຍ’’ຕິ! ອສ຺ໂສສຸໍ ໂຂ ຠິກ຺ຂຸນິໂຍ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂຸນິໂຍ ຉຕ຺ຕຸປາຫນໍ ຘາເຣສ຺ສນ຺ຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຉພ຺ພຄ຺ຄິຍາ ຠິກ຺ຂຸນິໂຍ ຉຕ຺ຕຸປາຫນໍ ຘາເຣນ຺ຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຉພ຺ພຄ຺ຄິຍາ ຠິກ຺ຂຸນິໂຍ ຉຕ຺ຕຸປາຫນໍ ຘາເຣສ຺ສນ຺ຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

‘‘ຍາ ປນ ຠິກ຺ຂຸນີ ຉຕ຺ຕຸປາຫນໍ ຘາເຣຍ຺ຍ, ປາຈິຕ຺ຕິຍ’’ນ຺ຕິ.

ເອວຎ຺ຈິທໍ ຠຄວຕາ ຠິກ຺ຂຸນີນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໑໑໗໙. ເຕນ ໂຂ ປນ ສມເຍນ ອຎ຺ຎຕຣາ ຠິກ຺ຂຸນີ ຄິລານາ ໂຫຕິ. ຕສ຺ສາ ວິນາ ຉຕ຺ຕຸປາຫນໍ ນ ຜາສຸ ໂຫຕິ…ເປ… ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ອນຸຊານາມິ, ຠິກ຺ຂເວ, ຄິລານາຍ ຠິກ຺ຂຸນິຍາ ຉຕ຺ຕຸປາຫນໍ. ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໑໑໘໐. ‘‘ຍາ ປນ ຠິກ຺ຂຸນີ ອຄິລານາ ຉຕ຺ຕຸປາຫນໍ ຘາເຣຍ຺ຍ, ປາຈິຕ຺ຕິຍ’’ນ຺ຕິ.

໑໑໘໑. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ອຄິລານາ ນາມ ຍສ຺ສາ ວິນາ ຉຕ຺ຕຸປາຫນໍ ຜາສຸ ໂຫຕິ.

ຄິລານາ ນາມ ຍສ຺ສາ ວິນາ ຉຕ຺ຕຸປາຫນໍ ນ ຜາສຸ ໂຫຕິ.

ຉຕ຺ຕໍ ນາມ ຕີຓິ ຉຕ຺ຕານິ – ເສຕຈ຺ຉຕ຺ຕໍ, ກິລຎ຺ຊຈ຺ຉຕ຺ຕໍ, ປຓ຺ຓຈ຺ຉຕ຺ຕໍ ມຓ຺ຑລພທ຺ຘໍ ສລາກພທ຺ຘໍ. ຘາເຣຍ຺ຍາຕິ ສກິມ຺ປິ ຘາເຣຕິ, ອາປຕ຺ຕິ ປາຈິຕ຺ຕິຍສ຺ສ.

໑໑໘໒. ອຄິລານາ ອຄິລານສຎ຺ຎາ ຉຕ຺ຕຸປາຫນໍ ຘາເຣຕິ, ອາປຕ຺ຕິ ປາຈິຕ຺ຕິຍສ຺ສ. ອຄິລານາ ເວມຕິກາ ຉຕ຺ຕຸປາຫນໍ ຘາເຣຕິ, ອາປຕ຺ຕິ ປາຈິຕ຺ຕິຍສ຺ສ. ອຄິລານາ ຄິລານສຎ຺ຎາ ຉຕ຺ຕຸປາຫນໍ ຘາເຣຕິ, ອາປຕ຺ຕິ ປາຈິຕ຺ຕິຍສ຺ສ.

ຉຕ຺ຕໍ ຘາເຣຕິ ນ ອຸປາຫນໍ, ອາປຕ຺ຕິ ທຸກ຺ກຏສ຺ສ. ອຸປາຫນໍ ຘາເຣຕິ ນ ຉຕ຺ຕໍ, ອາປຕ຺ຕິ ທຸກ຺ກຏສ຺ສ. ຄິລານາ ອຄິລານສຎ຺ຎາ, ອາປຕ຺ຕິ ທຸກ຺ກຏສ຺ສ. ຄິລານາ ເວມຕິກາ, ອາປຕ຺ຕິ ທຸກ຺ກຏສ຺ສ. ຄິລານາ ຄິລານສຎ຺ຎາ, ອນາປຕ຺ຕິ.

໑໑໘໓. ອນາປຕ຺ຕິ ຄິລານາຍ, ອາຣາເມ ອາຣາມູປຈາເຣ ຘາເຣຕິ, ອາປທາສຸ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ປຐມສິກ຺ຂາປທໍ ນິຏ຺ຐິຕໍ.