໑. ປຐມສິກ຺ຂາປທໍ

໑໑໑໙. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຠິກ຺ຂຸນິໂຍ ອູນວີສຕິວສ຺ສໍ ກຸມາຣິຠູຕໍ ວຸຏ຺ຐາເປນ຺ຕິ. ຕາ ອກ຺ຂມາ ໂຫນ຺ຕິ ສີຕສ຺ສ ອຸຓ຺ຫສ຺ສ ຊິຆຈ຺ຉາຍ ປິປາສາຍ ຑໍສມກສວາຕາຕປສຣີສປສມ຺ຜສ຺ສານໍ ທຸຣຸຕ຺ຕານໍ ທຸຣາຄຕານໍ ວຈນປຖານໍ. ອຸປ຺ປນ຺ນານໍ ສາຣີຣິການໍ ເວທນານໍ ທຸກ຺ຂານໍ ຕິພ຺ພານໍ ຂຣານໍ ກຏຸການໍ ອສາຕານໍ ອມນາປານໍ ປາຓຫຣານໍ ອນຘິວາສກຊາຕິກາ ໂຫນ຺ຕິ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນິໂຍ ອູນວີສຕິວສ຺ສໍ ກຸມາຣິຠູຕໍ ວຸຏ຺ຐາເປສ຺ສນ຺ຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂຸນິໂຍ ອູນວີສຕິວສ຺ສໍ ກຸມາຣິຠູຕໍ ວຸຏ຺ຐາເປນ຺ຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຠິກ຺ຂຸນິໂຍ ອູນວີສຕິວສ຺ສໍ ກຸມາຣິຠູຕໍ ວຸຏ຺ຐາເປສ຺ສນ຺ຕິ! ອູນວີສຕິວສ຺ສາ, ຠິກ຺ຂເວ, ກຸມາຣິຠູຕາ ອກ຺ຂມາ ໂຫຕິ ສີຕສ຺ສ ອຸຓ຺ຫສ຺ສ…ເປ… ປາຓຫຣານໍ ອນຘິວາສກຊາຕິກາ ໂຫຕິ. ວີສຕິວສ຺ສາວ ໂຂ, ຠິກ຺ຂເວ, ກຸມາຣິຠູຕາ ຂມາ ໂຫຕິ ສີຕສ຺ສ ອຸຓ຺ຫສ຺ສ…ເປ… ປາຓຫຣານໍ ອຘິວາສກຊາຕິກາ ໂຫຕິ. ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໑໑໒໐. ‘‘ຍາ ປນ ຠິກ຺ຂຸນີ ອູນວີສຕິວສ຺ສໍ ກຸມາຣິຠູຕໍ ວຸຏ຺ຐາເປຍ຺ຍ, ປາຈິຕ຺ຕິຍ’’ນ຺ຕິ.

໑໑໒໑. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ອູນວີສຕິວສ຺ສາ ນາມ ອປ຺ປຕ຺ຕວີສຕິວສ຺ສາ. ກຸມາຣິຠູຕາ ນາມ ສາມເຓຣີ ວຸຈ຺ຈຕິ. ວຸຏ຺ຐາເປຍ຺ຍາຕິ ອຸປສມ຺ປາເທຍ຺ຍ.

‘‘ວຸຏ຺ຐາເປສ຺ສາມີ’’ຕິ ຄຓໍ ວາ ອາຈຣິນິໍ ວາ ປຕ຺ຕໍ ວາ ຈີວຣໍ ວາ ປຣິເຍສຕິ, ສີມໍ ວາ ສມ຺ມນ຺ນຕິ, ອາປຕ຺ຕິ ທຸກ຺ກຏສ຺ສ. ຎຕ຺ຕິຍາ ທຸກ຺ກຏໍ. ທ຺ວີຫິ ກມ຺ມວາຈາຫິ ທຸກ຺ກຏາ. ກມ຺ມວາຈາປຣິໂຍສາເນ ອຸປຊ຺ຌາຍາຍ ອາປຕ຺ຕິ ປາຈິຕ຺ຕິຍສ຺ສ. ຄຓສ຺ສ ຈ ອາຈຣິນິຍາ ຈ ອາປຕ຺ຕິ ທຸກ຺ກຏສ຺ສ.

໑໑໒໒. ອູນວີສຕິວສ຺ສາຍ ອູນວີສຕິວສ຺ສສຎ຺ຎາ ວຸຏ຺ຐາເປຕິ, ອາປຕ຺ຕິ ປາຈິຕ຺ຕິຍສ຺ສ. ອູນວີສຕິວສ຺ສາຍ ເວມຕິກາ ວຸຏ຺ຐາເປຕິ, ອາປຕ຺ຕິ ທຸກ຺ກຏສ຺ສ. ອູນວີສຕິວສ຺ສາຍ ປຣິປຸຓ຺ຓສຎ຺ຎາ ວຸຏ຺ຐາເປຕິ, ອນາປຕ຺ຕິ. ປຣິປຸຓ຺ຓວີສຕິວສ຺ສາຍ ອູນວີສຕິວສ຺ສສຎ຺ຎາ, ອາປຕ຺ຕິ ທຸກ຺ກຏສ຺ສ. ປຣິປຸຓ຺ຓວີສຕິວສ຺ສາຍ ເວມຕິກາ, ອາປຕ຺ຕິ ທຸກ຺ກຏສ຺ສ. ປຣິປຸຓ຺ຓວີສຕິວສ຺ສາຍ ປຣິປຸຓ຺ຓສຎ຺ຎາ, ອນາປຕ຺ຕິ.

໑໑໒໓. ອນາປຕ຺ຕິ ອູນວີສຕິວສ຺ສໍ ປຣິປຸຓ຺ຓສຎ຺ຎາ ວຸຏ຺ຐາເປຕິ, ປຣິປຸຓ຺ຓວີສຕິວສ຺ສໍ ປຣິປຸຓ຺ຓສຎ຺ຎາ ວຸຏ຺ຐາເປຕິ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ປຐມສິກ຺ຂາປທໍ ນິຏ຺ຐິຕໍ.