໕. ປຎ຺ຈມສິກ຺ຂາປທໍ

໙໕໐. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຠທ຺ທາ ກາປິລານີ ສາເກເຕ ວສ຺ສໍ ອຸປຄຕາ ໂຫຕິ. ສາ ເກນຈິເທວ ກຣຓີເຍນ ອຸພ຺ພາຬ຺ຫາ ຖຸລ຺ລນນ຺ທາຍ ຠິກ຺ຂຸນິຍາ ສນ຺ຕິເກ ທູຕໍ ປາເຫສິ – ‘‘ສເຈ ເມ ອຍ຺ຍາ ຖຸລ຺ລນນ຺ທາ ອຸປສ຺ສຍໍ ທເທຍ຺ຍ ອາຄຈ຺ເຉຍ຺ຍາມຫໍ ສາວຕ຺ຖິ’’ນ຺ຕິ. ຖຸລ຺ລນນ຺ທາ ຠິກ຺ຂຸນີ ເອວມາຫ – ‘‘ອາຄຈ຺ຉຕຸ, ທສ຺ສາມີ’’ຕິ. ອຖ ໂຂ ຠທ຺ທາ ກາປິລານີ ສາເກຕາ ສາວຕ຺ຖິໍ ອຄມາສິ. ຖຸລ຺ລນນ຺ທາ ຠິກ຺ຂຸນີ ຠທ຺ທາຍ ກາປິລານິຍາ ອຸປສ຺ສຍໍ ອທາສິ. ເຕນ ໂຂ ປນ ສມເຍນ ຖຸລ຺ລນນ຺ທາ ຠິກ຺ຂຸນີ ພຫຸສ຺ສຸຕາ ໂຫຕິ ຠາຓິກາ ວິສາຣທາ ປຏ຺ຏາ ຘມ຺ມິໍ ກຖໍ ກາຕຸໍ. ຠທ຺ທາປິ ກາປິລານີ ພຫຸສ຺ສຸຕາ [ພຫຸສ຺ສຸຕາເຍວ (ກ.)] ໂຫຕິ ຠາຓິກາ ວິສາຣທາ ປຏ຺ຏາ ຘມ຺ມິໍ ກຖໍ ກາຕຸໍ ອຸຬາຣສມ຺ຠາວິຕາ. ມນຸສ຺ສາ – ‘‘ອຍ຺ຍາ ຠທ຺ທາ ກາປິລານີ ພຫຸສ຺ສຸຕາ ຠາຓິກາ ວິສາຣທາ ປຏ຺ຏາ ຘມ຺ມິໍ ກຖໍ ກາຕຸໍ ອຸຬາຣສມ຺ຠາວິຕາ’’ຕິ ຠທ຺ທໍ ກາປິລານິໍ ປຐມໍ ປຍິຣຸປາສິຕ຺ວາ ປຈ຺ຉາ ຖຸລ຺ລນນ຺ທໍ ຠິກ຺ຂຸນິໍ ປຍິຣຸປາສນ຺ຕິ. ຖຸລ຺ລນນ຺ທາ ຠິກ຺ຂຸນີ ອິສ຺ສາປກຕາ – ‘‘ອິມາ ກິຣ ອປ຺ປິຈ຺ຉາ ສນ຺ຕຸຏ຺ຐາ ປວິວິຕ຺ຕາ ອສໍສຏ຺ຐາ ຍາ ອິມາ ສຎ຺ຎຕ຺ຕິພຫຸລາ ວິຎ຺ຎຕ຺ຕິພຫຸລາ ວິຫຣນ຺ຕີ’’ຕິ ກຸປິຕາ ອນຕ຺ຕມນາ ຠທ຺ທໍ ກາປິລານິໍ ອຸປສ຺ສຍາ ນິກ຺ກຑ຺ຒິ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອຍ຺ຍາ ຖຸລ຺ລນນ຺ທາ ອຍ຺ຍາຍ ຠທ຺ທາຍ ກາປິລານິຍາ ອຸປສ຺ສຍໍ ທຕ຺ວາ ກຸປິຕາ ອນຕ຺ຕມນາ ນິກ຺ກຑ຺ຒິສ຺ສຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ຠທ຺ທາຍ ກາປິລານິຍາ ອຸປສ຺ສຍໍ ທຕ຺ວາ ກຸປິຕາ ອນຕ຺ຕມນາ ນິກ຺ກຑ຺ຒຕີຕິ [ນິກ຺ກຑ຺ຒີຕິ (ກ.)]? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ຠທ຺ທາຍ ກາປິລານິຍາ ອຸປສ຺ສຍໍ ທຕ຺ວາ ກຸປິຕາ ອນຕ຺ຕມນາ ນິກ຺ກຑ຺ຒິສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໙໕໑. ‘‘ຍາ ປນ ຠິກ຺ຂຸນີ ຠິກ຺ຂຸນິຍາ ອຸປສ຺ສຍໍ ທຕ຺ວາ ກຸປິຕາ ອນຕ຺ຕມນາ ນິກ຺ກຑ຺ເຒຍ຺ຍ ວາ ນິກ຺ກຑ຺ຒາເປຍ຺ຍ ວາ, ປາຈິຕ຺ຕິຍ’’ນ຺ຕິ.

໙໕໒. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ຠິກ຺ຂຸນິຍາຕິ ອຎ຺ຎາຍ ຠິກ຺ຂຸນິຍາ. ອຸປສ຺ສໂຍ ນາມ ກວາຏພທ຺ໂຘ ວຸຈ຺ຈຕິ. ທຕ຺ວາຕິ ສຍໍ ທຕ຺ວາ. ກຸປິຕາ ອນຕ຺ຕມນາຕິ ອນຠິຣທ຺ຘາ ອາຫຕຈິຕ຺ຕາ ຂິລຊາຕາ.

ນິກ຺ກຑ຺ເຒຍ຺ຍາຕິ ຄພ຺ເຠ ຄເຫຕ຺ວາ ປມຸຂໍ ນິກ຺ກຑ຺ຒຕິ, ອາປຕ຺ຕິ ປາຈິຕ຺ຕິຍສ຺ສ. ປມຸເຂ ຄເຫຕ຺ວາ ພຫິ ນິກ຺ກຑ຺ຒຕິ, ອາປຕ຺ຕິ ປາຈິຕ຺ຕິຍສ຺ສ. ເອເກນ ປໂຍເຄນ ພຫຸເກປິ ທ຺ວາເຣ ອຕິກ຺ກາເມຕິ, ອາປຕ຺ຕິ ປາຈິຕ຺ຕິຍສ຺ສ.

ນິກ຺ກຑ຺ຒາເປຍ຺ຍາຕິ ອຎ຺ຎໍ ອາຓາເປຕິ, ອາປຕ຺ຕິ ປາຈິຕ຺ຕິຍສ຺ສ [ເອຕ຺ຖ ‘‘ອາປຕ຺ຕິ ທຸກ຺ກຏສ຺ສາ’’ຕິ ສພ຺ພຕ຺ຖ ທິສ຺ສຕິ, ຠິກ຺ຂຸວິຠງ຺ເຄ ປນ ອິທິເສສຸ ອາຓຕ຺ຕິສຫຄຕສິກ຺ຂາປເທສຸ ‘‘ອຎ຺ຎໍ ອາຓາເປຕິ ອາປຕ຺ຕິ ປາຈິຕ຺ຕິຍສ຺ສາ’’ຕິ ອາຄຕຕ຺ຕາ ຕມນຸວຕ຺ຕິຕ຺ວາ ວິໂສຘິຕມິທໍ]. ສກິໍ ອາຓຕ຺ຕາ ພຫຸເກປິ ທ຺ວາເຣ ອຕິກ຺ກາເມຕິ, ອາປຕ຺ຕິ ປາຈິຕ຺ຕິຍສ຺ສ.

໙໕໓. ອຸປສມ຺ປນ຺ນາຍ ອຸປສມ຺ປນ຺ນສຎ຺ຎາ ອຸປສ຺ສຍໍ ທຕ຺ວາ ກຸປິຕາ ອນຕ຺ຕມນາ ນິກ຺ກຑ຺ຒຕິ ວາ ນິກ຺ກຑ຺ຒາເປຕິ ວາ, ອາປຕ຺ຕິ ປາຈິຕ຺ຕິຍສ຺ສ. ອຸປສມ຺ປນ຺ນາຍ ເວມຕິກາ ອຸປສ຺ສຍໍ ທຕ຺ວາ ກຸປິຕາ ອນຕ຺ຕມນາ ນິກ຺ກຑ຺ຒຕິ ວາ ນິກ຺ກຑ຺ຒາເປຕິ ວາ, ອາປຕ຺ຕິ ປາຈິຕ຺ຕິຍສ຺ສ. ອຸປສມ຺ປນ຺ນາຍ ອນຸປສມ຺ປນ຺ນສຎ຺ຎາ ອຸປສ຺ສຍໍ ທຕ຺ວາ ກຸປິຕາ ອນຕ຺ຕມນາ ນິກ຺ກຑ຺ຒຕິ ວາ ນິກ຺ກຑ຺ຒາເປຕິ ວາ, ອາປຕ຺ຕິ ປາຈິຕ຺ຕິຍສ຺ສ.

ຕສ຺ສາ ປຣິກ຺ຂາຣໍ ນິກ຺ກຑ຺ຒຕິ ວາ ນິກ຺ກຑ຺ຒາເປຕິ ວາ, ອາປຕ຺ຕິ ທຸກ຺ກຏສ຺ສ. ອກວາຏພທ຺ຘາ ນິກ຺ກຑ຺ຒຕິ ວາ ນິກ຺ກຑ຺ຒາເປຕິ ວາ, ອາປຕ຺ຕິ ທຸກ຺ກຏສ຺ສ. ຕສ຺ສາ ປຣິກ຺ຂາຣໍ ນິກ຺ກຑ຺ຒຕິ ວາ ນິກ຺ກຑ຺ຒາເປຕິ ວາ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ນໍ ກວາຏພທ຺ຘາ ວາ ອກວາຏພທ຺ຘາ ວາ ນິກ຺ກຑ຺ຒຕິ ວາ ນິກ຺ກຑ຺ຒາເປຕິ ວາ, ອາປຕ຺ຕິ ທຸກ຺ກຏສ຺ສ. ຕສ຺ສາ ປຣິກ຺ຂາຣໍ ນິກ຺ກຑ຺ຒຕິ ວາ ນິກ຺ກຑ຺ຒາເປຕິ ວາ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ນາຍ ອຸປສມ຺ປນ຺ນສຎ຺ຎາ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ນາຍ ເວມຕິກາ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ນາຍ ອນຸປສມ຺ປນ຺ນສຎ຺ຎາ, ອາປຕ຺ຕິ ທຸກ຺ກຏສ຺ສ.

໙໕໔. ອນາປຕ຺ຕິ ອລຊ຺ຊິນິໍ ນິກ຺ກຑ຺ຒຕິ ວາ ນິກ຺ກຑ຺ຒາເປຕິ ວາ, ຕສ຺ສາ ປຣິກ຺ຂາຣໍ ນິກ຺ກຑ຺ຒຕິ ວາ ນິກ຺ກຑ຺ຒາເປຕິ ວາ, ອຸມ຺ມຕ຺ຕິກໍ ນິກ຺ກຑ຺ຒຕິ ວາ ນິກ຺ກຑ຺ຒາເປຕິ ວາ, ຕສ຺ສາ ປຣິກ຺ຂາຣໍ ນິກ຺ກຑ຺ຒຕິ ວາ ນິກ຺ກຑ຺ຒາເປຕິ ວາ, ຠຓ຺ຑນກາຣິກໍ ກລຫກາຣິກໍ ວິວາທກາຣິກໍ ຠສ຺ສກາຣິກໍ ສງ຺ເຆ ອຘິກຣຓກາຣິກໍ ນິກ຺ກຑ຺ຒຕິ ວາ ນິກ຺ກຑ຺ຒາເປຕິ ວາ, ຕສ຺ສາ ປຣິກ຺ຂາຣໍ ນິກ຺ກຑ຺ຒຕິ ວາ ນິກ຺ກຑ຺ຒາເປຕິ ວາ, ອນ຺ເຕວາສິນິໍ ວາ ສທ຺ຘິວິຫາຣິນິໍ ວາ ນ ສມ຺ມາ ວຕ຺ຕນ຺ຕິໍ ນິກ຺ກຑ຺ຒຕິ ວາ ນິກ຺ກຑ຺ຒາເປຕິ ວາ, ຕສ຺ສາ ປຣິກ຺ຂາຣໍ ນິກ຺ກຑ຺ຒຕິ ວາ ນິກ຺ກຑ຺ຒາເປຕິ ວາ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ປຎ຺ຈມສິກ຺ຂາປທໍ ນິຏ຺ຐິຕໍ.