໓. ຕຕິຍສິກ຺ຂາປທໍ

໙໔໑. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຖຸລ຺ລນນ຺ທາ ຠິກ຺ຂຸນີ ພຫຸສ຺ສຸຕາ ໂຫຕິ ຠາຓິກາ ວິສາຣທາ ປຏ຺ຏາ ຘມ຺ມິໍ ກຖໍ ກາຕຸໍ. ຠທ຺ທາປິ ກາປິລານີ ພຫຸສ຺ສຸຕາ ໂຫຕິ ຠາຓິກາ ວິສາຣທາ ປຏ຺ຏາ ຘມ຺ມິໍ ກຖໍ ກາຕຸໍ ອຸຬາຣສມ຺ຠາວິຕາ. ມນຸສ຺ສາ – ‘‘ອຍ຺ຍາ ຠທ຺ທາ ກາປິລານີ ພຫຸສ຺ສຸຕາ ຠາຓິກາ ວິສາຣທາ ປຏ຺ຏາ ຘມ຺ມິໍ ກຖໍ ກາຕຸໍ ອຸຬາຣສມ຺ຠາວິຕາ’’ຕິ ຠທ຺ທໍ ກາປິລານິໍ ປຐມໍ ປຍິຣຸປາສິຕ຺ວາ, ປຈ຺ຉາ ຖຸລ຺ລນນ຺ທໍ ຠິກ຺ຂຸນິໍ ປຍິຣຸປາສນ຺ຕິ. ຖຸລ຺ລນນ຺ທາ ຠິກ຺ຂຸນີ ອິສ຺ສາປກຕາ – ‘‘ອິມາ ກິຣ ອປ຺ປິຈ຺ຉາ ສນ຺ຕຸຏ຺ຐາ ປວິວິຕ຺ຕາ ອສໍສຏ຺ຐາ ຍາ ອິມາ ສຎ຺ຎຕ຺ຕິພຫຸລາ ວິຎ຺ຎຕ຺ຕິພຫຸລາ ວິຫຣນ຺ຕີ’’ຕິ ຠທ຺ທາຍ ກາປິລານິຍາ ປຸຣໂຕ ຈງ຺ກມຕິປິ ຕິຏ຺ຐຕິປິ ນິສີທຕິປິ ເສຍ຺ຍມ຺ປິ ກປ຺ເປຕິ ອຸທ຺ທິສຕິປິ ອຸທ຺ທິສາເປຕິປິ ສຊ຺ຌາຍມ຺ປິ ກໂຣຕິ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອຍ຺ຍາ ຖຸລ຺ລນນ຺ທາ ອຍ຺ຍາຍ ຠທ຺ທາຍ ກາປິລານິຍາ ສຎ຺ຈິຈ຺ຈ ອຜາສຸໍ ກຣິສ຺ສຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ຠທ຺ທາຍ ກາປິລານິຍາ ສຎ຺ຈິຈ຺ຈ ອຜາສຸໍ ກໂຣຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ຠທ຺ທາຍ ກາປິລານິຍາ ສຎ຺ຈິຈ຺ຈ ອຜາສຸໍ ກຣິສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໙໔໒. ‘‘ຍາ ປນ ຠິກ຺ຂຸນີ ຠິກ຺ຂຸນິຍາ ສຎ຺ຈິຈ຺ຈ ອຜາສຸໍ ກເຣຍ຺ຍ, ປາຈິຕ຺ຕິຍ’’ນ຺ຕິ.

໙໔໓. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ຠິກ຺ຂຸນິຍາຕິ ອຎ຺ຎາຍ ຠິກ຺ຂຸນິຍາ.

ສຎ຺ຈິຈ຺ຈາຕິ ຊານນ຺ຕີ ສຎ຺ຊານນ຺ຕີ ເຈຈ຺ຈ ອຠິວິຕຣິຕ຺ວາ ວີຕິກ຺ກໂມ.

ອຜາສຸໍ ກເຣຍ຺ຍາຕິ – ‘‘ອິມິນາ ອິມິສ຺ສາ ອຜາສຸ ຠວິສ຺ສຕີ’’ຕິ ອນາປຸຈ຺ຉາ ປຸຣໂຕ ຈງ຺ກມຕິ ວາ ຕິຏ຺ຐຕິ ວາ ນິສີທຕິ ວາ ເສຍ຺ຍໍ ວາ ກປ຺ເປຕິ ອຸທ຺ທິສຕິ ວາ ອຸທ຺ທິສາເປຕິ ວາ ສຊ຺ຌາຍໍ ວາ ກໂຣຕິ, ອາປຕ຺ຕິ ປາຈິຕ຺ຕິຍສ຺ສ.

໙໔໔. ອຸປສມ຺ປນ຺ນາຍ ອຸປສມ຺ປນ຺ນສຎ຺ຎາ ສຎ຺ຈິຈ຺ຈ ອຜາສຸໍ ກໂຣຕິ, ອາປຕ຺ຕິ ປາຈິຕ຺ຕິຍສ຺ສ. ອຸປສມ຺ປນ຺ນາຍ ເວມຕິກາ ສຎ຺ຈິຈ຺ຈ ອຜາສຸໍ ກໂຣຕິ, ອາປຕ຺ຕິ ປາຈິຕ຺ຕິຍສ຺ສ. ອຸປສມ຺ປນ຺ນາຍ ອນຸປສມ຺ປນ຺ນສຎ຺ຎາ ສຎ຺ຈິຈ຺ຈ ອຜາສຸໍ ກໂຣຕິ, ອາປຕ຺ຕິ ປາຈິຕ຺ຕິຍສ຺ສ.

ອນຸປສມ຺ປນ຺ນາຍ ສຎ຺ຈິຈ຺ຈ ອຜາສຸໍ ກໂຣຕິ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ນາຍ ອຸປສມ຺ປນ຺ນສຎ຺ຎາ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ນາຍ ເວມຕິກາ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ນາຍ ອນຸປສມ຺ປນ຺ນສຎ຺ຎາ, ອາປຕ຺ຕິ ທຸກ຺ກຏສ຺ສ.

໙໔໕. ອນາປຕ຺ຕິ ນ ອຜາສຸໍ ກຕ຺ຕຸກາມາ ອາປຸຈ຺ຉາ ປຸຣໂຕ ຈງ຺ກມຕິ ວາ ຕິຏ຺ຐຕິ ວາ ນິສີທຕິ ວາ ເສຍ຺ຍໍ ວາ ກປ຺ເປຕິ ອຸທ຺ທິສຕິ ວາ ອຸທ຺ທິສາເປຕິ ວາ ສຊ຺ຌາຍໍ ວາ ກໂຣຕິ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ຕຕິຍສິກ຺ຂາປທໍ ນິຏ຺ຐິຕໍ.