໗. ສຕ຺ຕມສິກ຺ຂາປທໍ

໙໑໑. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຠິກ຺ຂຸນິສງ຺ຆສ຺ສ ອກາລຈີວຣໍ ອຸປ຺ປນ຺ນໍ ໂຫຕິ. ອຖ ໂຂ ຠິກ຺ຂຸນິສງ຺ໂຆ ຕໍ ຈີວຣໍ ຠາເຊຕຸກາໂມ ສນ຺ນິປຕິ. ເຕນ ໂຂ ປນ ສມເຍນ ຖຸລ຺ລນນ຺ທາຍ ຠິກ຺ຂຸນິຍາ ອນ຺ເຕວາສິນິໂຍ ຠິກ຺ຂຸນິໂຍ ປກ຺ກນ຺ຕາ ໂຫນ຺ຕິ. ຖຸລ຺ລນນ຺ທາ ຠິກ຺ຂຸນີ ຕາ ຠິກ຺ຂຸນິໂຍ ເອຕທໂວຈ – ‘‘ອຍ຺ເຍ, ຠິກ຺ຂຸນິໂຍ ປກ຺ກນ຺ຕາ, ນ ຕາວ ຈີວຣໍ ຠາຊີຍິສ຺ສຕີ’’ຕິ. ຈີວຣວິຠງ຺ຄໍ ປຏິພາຫິ. ຠິກ຺ຂຸນິໂຍ ນ ຕາວ ຈີວຣໍ ຠາຊີຍິສ຺ສຕີຕິ ປກ຺ກມິໍສຸ [ວິປກ຺ກມິໍສຸ (ສ຺ຍາ.)]. ຖຸລ຺ລນນ຺ທາ ຠິກ຺ຂຸນີ ອນ຺ເຕວາສິນີສຸ ຠິກ຺ຂຸນີສຸ ອາຄຕາສຸ ຕໍ ຈີວຣໍ ຠາຊາເປສິ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອຍ຺ຍາ ຖຸລ຺ລນນ຺ທາ ຘມ຺ມິກໍ ຈີວຣວິຠງ຺ຄໍ ປຏິພາຫິສ຺ສຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ຘມ຺ມິກໍ ຈີວຣວິຠງ຺ຄໍ ປຏິພາຫຕີຕິ [ປຏິພາຫີຕິ (ກ.)]? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ຘມ຺ມິກໍ ຈີວຣວິຠງ຺ຄໍ ປຏິພາຫິສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໙໑໒. ‘‘ຍາ ປນ ຠິກ຺ຂຸນີ ຘມ຺ມິກໍ ຈີວຣວິຠງ຺ຄໍ ປຏິພາເຫຍ຺ຍ, ປາຈິຕ຺ຕິຍ’’ນ຺ຕິ.

໙໑໓. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ຘມ຺ມິໂກນາມ ຈີວຣວິຠງ຺ໂຄ ສມຄ຺ໂຄ ຠິກ຺ຂຸນິສງ຺ໂຆ ສນ຺ນິປຕິຕ຺ວາ ຠາເຊຕິ.

ປຏິພາເຫຍ຺ຍາຕິ ກຖໍ ອິມໍ ຈີວຣໍ ນ ຠາເຊຍ຺ຍາຕິ [ຈີວຣໍ ຠາເຊຍ຺ຍາຕິ (ກ.)] ປຏິພາຫຕິ, ອາປຕ຺ຕິ ປາຈິຕ຺ຕິຍສ຺ສ.

໙໑໔. ຘມ຺ມິເກ ຘມ຺ມິກສຎ຺ຎາ ປຏິພາຫຕິ, ອາປຕ຺ຕິ ປາຈິຕ຺ຕິຍສ຺ສ. ຘມ຺ມິເກ ເວມຕິກາ ປຏິພາຫຕິ, ອາປຕ຺ຕິ ທຸກ຺ກຏສ຺ສ. ຘມ຺ມິເກ ອຘມ຺ມິກສຎ຺ຎາ ປຏິພາຫຕິ, ອນາປຕ຺ຕິ. ອຘມ຺ມິເກ ຘມ຺ມິກສຎ຺ຎາ, ອາປຕ຺ຕິ ທຸກ຺ກຏສ຺ສ. ອຘມ຺ມິເກ ເວມຕິກາ, ອາປຕ຺ຕິ ທຸກ຺ກຏສ຺ສ. ອຘມ຺ມິເກ ອຘມ຺ມິກສຎ຺ຎາ, ອນາປຕ຺ຕິ.

໙໑໕. ອນາປຕ຺ຕິ ອານິສໍສໍ ທສ຺ເສຕ຺ວາ ປຏິພາຫຕິ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ສຕ຺ຕມສິກ຺ຂາປທໍ ນິຏ຺ຐິຕໍ.