໙. ນວມສິກ຺ຂາປທໍ

໘໗໔. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຠິກ຺ຂຸນິໂຍ ອຕ຺ຕໂນ ຠຓ຺ຑກໍ ອປສ຺ສນ຺ຕິໂຍ ຈຓ຺ຑກາຬິໍ ຠິກ຺ຂຸນິໍ ເອຕທໂວຈຸໍ – ‘‘ອປາຍ຺ເຍ, ອມ຺ຫາກໍ, ຠຓ຺ຑກໍ ປສ຺ເສຍ຺ຍາສີ’’ຕິ? ຈຓ຺ຑກາຬີ ຠິກ຺ຂຸນີ ອຸຊ຺ຌາຍຕິ ຂິຍ຺ຍຕິ ວິປາເຈຕິ – ‘‘ອຫເມວ ນູນ ໂຈຣີ, ອຫເມວ ນູນ ອລຊ຺ຊິນີ, ຍາ ອຍ຺ຍາໂຍ ອຕ຺ຕໂນ ຠຓ຺ຑກໍ ອປສ຺ສນ຺ຕິໂຍ ຕາ ມໍ ເອວມາຫໍສຸ – ‘ອປາຍ຺ເຍ, ອມ຺ຫາກໍ ຠຓ຺ຑກໍ ປສ຺ເສຍ຺ຍາສີ’ຕິ? ສຈາຫໍ, ອຍ຺ເຍ, ຕຸມ຺ຫາກໍ ຠຓ຺ຑກໍ ຄຓ຺ຫາມິ, ອສ຺ສມຓີ ໂຫມິ, ພ຺ຣຫ຺ມຈຣິຍາ ຈວາມິ, ນິຣຍໍ ອຸປປຊ຺ຊາມິ; ຍາ ປນ ມໍ ອຠູເຕນ ເອວມາຫ ສາປິ ອສ຺ສມຓີ ໂຫຕຸ, ພ຺ຣຫ຺ມຈຣິຍາ ຈວຕຸ, ນິຣຍໍ ອຸປປຊ຺ຊຕູ’’ຕິ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອຍ຺ຍາ ຈຓ຺ຑກາຬີ ອຕ຺ຕານມ຺ປິ ປຣມ຺ປິ ນິຣເຍນປິ ພ຺ຣຫ຺ມຈຣິເຍນປິ ອຠິສປິສ຺ສຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຈຓ຺ຑກາຬີ ຠິກ຺ຂຸນີ ອຕ຺ຕານມ຺ປິ ປຣມ຺ປິ ນິຣເຍນປິ ພ຺ຣຫ຺ມຈຣິເຍນປິ ອຠິສປຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຈຓ຺ຑກາຬີ ຠິກ຺ຂຸນີ ອຕ຺ຕານມ຺ປິ ປຣມ຺ປິ ນິຣເຍນປິ ພ຺ຣຫ຺ມຈຣິເຍນປິ ອຠິສປິສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໘໗໕. ‘‘ຍາ ປນ ຠິກ຺ຂຸນີ ອຕ຺ຕານໍ ວາ ປຣໍ ວາ ນິຣເຍນ ວາ ພ຺ຣຫ຺ມຈຣິເຍນ ວາ ອຠິສເປຍ຺ຍ, ປາຈິຕ຺ຕິຍ຺ຍ’’ນ຺ຕິ.

໘໗໖. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ອຕ຺ຕານນ຺ຕິ ປຈ຺ຈຕ຺ຕໍ. ປຣນ຺ຕິ ອຸປສມ຺ປນ຺ນໍ. ນິຣເຍນ ວາ ພ຺ຣຫ຺ມຈຣິເຍນ ວາ ອຠິສປຕິ, ອາປຕ຺ຕິ ປາຈິຕ຺ຕິຍສ຺ສ.

໘໗໗. ອຸປສມ຺ປນ຺ນາຍ ອຸປສມ຺ປນ຺ນສຎ຺ຎາ ນິຣເຍນ ວາ ພ຺ຣຫ຺ມຈຣິເຍນ ວາ ອຠິສປຕິ, ອາປຕ຺ຕິ ປາຈິຕ຺ຕິຍສ຺ສ. ອຸປສມ຺ປນ຺ນາຍ ເວມຕິກາ ນິຣເຍນ ວາ ພ຺ຣຫ຺ມຈຣິເຍນ ວາ ອຠິສປຕິ, ອາປຕ຺ຕິ ປາຈິຕ຺ຕິຍສ຺ສ. ອຸປສມ຺ປນ຺ນາຍ ອນຸປສມ຺ປນ຺ນສຎ຺ຎາ ນິຣເຍນ ວາ ພ຺ຣຫ຺ມຈຣິເຍນ ວາ ອຠິສປຕິ, ອາປຕ຺ຕິ ປາຈິຕ຺ຕິຍສ຺ສ.

ຕິຣຈ຺ຉານໂຍນິຍາ ວາ ເປຕ຺ຕິວິສເຍນ ວາ ມນຸສ຺ສໂທຠຄ຺ເຄນ ວາ ອຠິສປຕິ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ນໍ ອຠິສປຕິ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ນາຍ ອຸປສມ຺ປນ຺ນສຎ຺ຎາ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ນາຍ ເວມຕິກາ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ນາຍ ອນຸປສມ຺ປນ຺ນສຎ຺ຎາ, ອາປຕ຺ຕິ ທຸກ຺ກຏສ຺ສ.

໘໗໘. ອນາປຕ຺ຕິ ອຕ຺ຖປຸເຣກ຺ຂາຣາຍ, ຘມ຺ມປຸເຣກ຺ຂາຣາຍ, ອນຸສາສນິປຸເຣກ຺ຂາຣາຍ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ນວມສິກ຺ຂາປທໍ ນິຏ຺ຐິຕໍ.