໑. ປຐມສິກ຺ຂາປທໍ

໘໓໘. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຠທ຺ທາຍ ກາປິລານິຍາ ອນ຺ເຕວາສິນິຍາ ຠິກ຺ຂຸນິຍາ ຎາຕໂກ ປຸຣິໂສ ຄາມກາ ສາວຕ຺ຖິໍ ອຄມາສິ ເກນຈິເທວ ກຣຓີເຍນ. ອຖ ໂຂ ສາ ຠິກ຺ຂຸນີ ເຕນ ປຸຣິເສນ ສທ຺ຘິໍ ຣຕ຺ຕນ຺ຘກາເຣ ອປ຺ປທີເປ ເອເກເນກາ ສນ຺ຕິຏ຺ຐຕິປິ ສລ຺ລປຕິປິ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນີ ຣຕ຺ຕນ຺ຘກາເຣ ອປ຺ປທີເປ ປຸຣິເສນ ສທ຺ຘິໍ ເອເກເນກາ ສນ຺ຕິຏ຺ຐິສ຺ສຕິປິ ສລ຺ລປິສ຺ສຕິປີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂຸນີ ຣຕ຺ຕນ຺ຘກາເຣ ອປ຺ປທີເປ ປຸຣິເສນ ສທ຺ຘິໍ ເອເກເນກາ ສນ຺ຕິຏ຺ຐຕິປິ ສລ຺ລປຕິປີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຠິກ຺ຂຸນີ ຣຕ຺ຕນ຺ຘກາເຣ ອປ຺ປທີເປ ປຸຣິເສນ ສທ຺ຘິໍ ເອເກເນກາ ສນ຺ຕິຏ຺ຐິສ຺ສຕິປິ ສລ຺ລປິສ຺ສຕິປິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໘໓໙. ‘‘ຍາ ປນ ຠິກ຺ຂຸນີ ຣຕ຺ຕນ຺ຘກາເຣ ອປ຺ປທີເປ ປຸຣິເສນ ສທ຺ຘິໍ ເອເກເນກາ ສນ຺ຕິຏ຺ເຐຍ຺ຍ ວາ ສລ຺ລເປຍ຺ຍ ວາ, ປາຈິຕ຺ຕິຍ’’ນ຺ຕິ.

໘໔໐. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ຣຕ຺ຕນ຺ຘກາເຣຕິ ໂອຄ຺ຄເຕ ສູຣິເຍ. ອປ຺ປທີເປຕິ ອນາໂລເກ.

ປຸຣິໂສ ນາມ ມນຸສ຺ສປຸຣິໂສ ນ ຍກ຺ໂຂ ນ ເປໂຕ ນ ຕິຣຈ຺ຉານຄໂຕ ວິຎ຺ຎູ ປຏິພໂລ ສນ຺ຕິຏ຺ຐິຕຸໍ ສລ຺ລປິຕຸໍ.

ສທ຺ຘິນ຺ຕິ ເອກໂຕ. ເອເກເນກາຕິ ປຸຣິໂສ ເຈວ ໂຫຕິ ຠິກ຺ຂຸນີ ຈ.

ສນ຺ຕິຏ຺ເຐຍ຺ຍ ວາຕິ ປຸຣິສສ຺ສ ຫຕ຺ຖປາເສ ຕິຏ຺ຐຕິ, ອາປຕ຺ຕິ ປາຈິຕ຺ຕິຍສ຺ສ.

ສລ຺ລເປຍ຺ຍ ວາຕິ ປຸຣິສສ຺ສ ຫຕ຺ຖປາເສ ຐິຕາ ສລ຺ລປຕິ, ອາປຕ຺ຕິ ປາຈິຕ຺ຕິຍສ຺ສ.

ຫຕ຺ຖປາສໍ ວິຊຫິຕ຺ວາ ສນ຺ຕິຏ຺ຐຕິ ວາ ສລ຺ລປຕິ ວາ, ອາປຕ຺ຕິ ທຸກ຺ກຏສ຺ສ. ຍກ຺ເຂນ ວາ ເປເຕນ ວາ ປຓ຺ຑເກນ ວາ ຕິຣຈ຺ຉານຄຕມນຸສ຺ສວິຄ຺ຄເຫນ ວາ ສທ຺ຘິໍ ສນ຺ຕິຏ຺ຐຕິ ວາ ສລ຺ລປຕິ ວາ, ອາປຕ຺ຕິ ທຸກ຺ກຏສ຺ສ.

໘໔໑. ອນາປຕ຺ຕິ ໂຍ ໂກຈິ ວິຎ຺ຎູ ທຸຕິໂຍ [ຍາ ກາຈິ ວິຎ຺ຎູ ທຸຕິຍາ (ສ຺ຍາ.)] ໂຫຕິ, ອຣໂຫເປກ຺ຂາ, ອຎ຺ຎວິຫິຕາ ສນ຺ຕິຏ຺ຐຕິ ວາ ສລ຺ລປຕິ ວາ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ປຐມສິກ຺ຂາປທໍ ນິຏ຺ຐິຕໍ.