໑. ລສຸຓວຄ຺ໂຄ

໑. ປຐມສິກ຺ຂາປທໍ

ອິເມ ໂຂ ປນາຍ຺ຍາໂຍ ຉສຏ຺ຐິສຕາ ປາຈິຕ຺ຕິຍາ

ຘມ຺ມາ ອຸທ຺ເທສໍ ອາຄຈ຺ຉນ຺ຕິ.

໗໙໓. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອຎ຺ຎຕເຣນ ອຸປາສເກນ ຠິກ຺ຂຸນິສງ຺ໂຆ ລສຸເຓນ ປວາຣິໂຕ ໂຫຕິ – ‘‘ຍາສໍ ອຍ຺ຍານໍ ລສຸເຓນ ອຕ຺ໂຖ, ອຫໍ ລສຸເຓນາ’’ຕິ. ເຂຕ຺ຕປາໂລ ຈ ອາຓຕ຺ໂຕ ໂຫຕິ – ‘‘ສເຈ ຠິກ຺ຂຸນິໂຍ ອາຄຈ຺ຉນ຺ຕິ, ເອກເມກາຍ ຠິກ຺ຂຸນິຍາ ທ຺ເວຕໂຍ ຠຓ຺ຑິເກ ເທຫີ’’ຕິ. ເຕນ ໂຂ ປນ ສມເຍນ ສາວຕ຺ຖິຍໍ ອຸສ຺ສໂວ ໂຫຕິ. ຍຖາຠຕໍ ລສຸຓໍ ປຣິກ຺ຂຍໍ ອຄມາສິ. ຠິກ຺ຂຸນິໂຍ ຕໍ ອຸປາສກໍ ອຸປສງ຺ກມິຕ຺ວາ ເອຕທໂວຈຸໍ – ‘‘ລສຸເຓນ, ອາວຸໂສ, ອຕ຺ໂຖ’’ຕິ. ‘‘ນຕ຺ຖາຍ຺ເຍ. ຍຖາຠຕໍ ລສຸຓໍ ປຣິກ຺ຂີຓໍ. ເຂຕ຺ຕໍ ຄຈ຺ຉຖາ’’ຕິ. ຖຸລ຺ລນນ຺ທາ ຠິກ຺ຂຸນີ ເຂຕ຺ຕໍ ຄນ຺ຕ຺ວາ ນ ມຕ຺ຕໍ ຊານິຕ຺ວາ ພຫຸໍ ລສຸຓໍ ຫຣາເປສິ. ເຂຕ຺ຕປາໂລ ອຸຊ຺ຌາຍຕິ ຂິຍ຺ຍຕິ ວິປາເຈຕິ – ‘‘ກຖຎ຺ຫິ ນາມ ຠິກ຺ຂຸນິໂຍ ນ ມຕ຺ຕໍ ຊານິຕ຺ວາ ພຫຸໍ ລສຸຓໍ ຫຣາເປສ຺ສນ຺ຕີ’’ຕິ! ອສ຺ໂສສຸໍ ໂຂ ຠິກ຺ຂຸນິໂຍ ຕສ຺ສ ເຂຕ຺ຕປາລສ຺ສ ອຸຊ຺ຌາຍນ຺ຕສ຺ສ ຂິຍ຺ຍນ຺ຕສ຺ສ ວິປາເຈນ຺ຕສ຺ສ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອຍ຺ຍາ ຖຸລ຺ລນນ຺ທາ ນ ມຕ຺ຕໍ ຊານິຕ຺ວາ ພຫຸໍ ລສຸຓໍ ຫຣາເປສ຺ສຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ນ ມຕ຺ຕໍ ຊານິຕ຺ວາ ພຫຸໍ ລສຸຓໍ ຫຣາເປຕີຕິ [ຫຣາເປສີຕິ (ກ.)]? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ນ ມຕ຺ຕໍ ຊານິຕ຺ວາ ພຫຸໍ ລສຸຓໍ ຫຣາເປສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ –

‘‘ຠູຕປຸພ຺ພໍ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ອຎ຺ຎຕຣສ຺ສ ພ຺ຣາຫ຺ມຓສ຺ສ ປຊາປຕິ ອໂຫສິ. ຕິສ຺ໂສ ຈ ຘີຕໂຣ – ນນ຺ທາ, ນນ຺ທວຕີ, ສຸນ຺ທຣີນນ຺ທາ. ອຖ ໂຂ, ຠິກ຺ຂເວ, ໂສ ພ຺ຣາຫ຺ມໂຓ ກາລງ຺ກຕ຺ວາ ອຎ຺ຎຕຣໍ ຫໍສໂຍນິໍ ອຸປປຊ຺ຊິ. ຕສ຺ສ ສພ຺ພໂສວຓ຺ຓມຍາ ປຕ຺ຕາ ອເຫສຸໍ. ໂສ ຕາສໍ ເອເກກໍ ປຕ຺ຕໍ ເທຕິ. ອຖ ໂຂ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ‘‘ອຍໍ ຫໍໂສ ອມ຺ຫາກໍ ເອເກກໍ ປຕ຺ຕໍ ເທຕີ’’ຕິ ຕໍ ຫໍສຣາຊໍ ຄເຫຕ຺ວາ ນິປ຺ປຕ຺ຕໍ ອກາສິ. ຕສ຺ສ ປຸນ ຊາຍມານາ ປຕ຺ຕາ ເສຕາ ສມ຺ປຊ຺ຊິໍສຸ. ຕທາປິ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ອຕິໂລເຠນ ສຸວຓ຺ຓາ ປຣິຫີນາ. ອິທານິ ລສຸຓາ ປຣິຫາຍິສ຺ສຕີ’’ຕິ.

[ຊາ. ໑.໑.໑໓໖ ສຸວຓ຺ຓຫໍສຊາຕເກປິ] ‘‘ຍໍ ລທ຺ຘໍ ເຕນ ຕຸຏ຺ຐພ຺ພໍ, ອຕິໂລໂຠ ຫິ ປາປໂກ;

ຫໍສຣາຊໍ ຄເຫຕ຺ວານ, ສຸວຓ຺ຓາ ປຣິຫາຍຖາ’’ຕິ.

ອຖ ໂຂ ຠຄວາ ຖຸລ຺ລນນ຺ທໍ ຠິກ຺ຂຸນິໍ ອເນກປຣິຍາເຍນ ວິຄຣຫິຕ຺ວາ ທຸພ຺ຠຣຕາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໗໙໔. ‘‘ຍາ ປນ ຠິກ຺ຂຸນີ ລສຸຓໍ ຂາເທຍ຺ຍ ປາຈິຕ຺ຕິຍ’’ນ຺ຕິ.

໗໙໕. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ລສຸຓໍ ນາມ ມາຄຘກໍ ວຸຈ຺ຈຕິ.

‘‘ຂາທິສ຺ສາມີຕິ ປຏິຄ຺ຄຓ຺ຫາ’’ຕິ, ອາປຕ຺ຕິ ທຸກ຺ກຏສ຺ສ. ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ປາຈິຕ຺ຕິຍສ຺ສ.

໗໙໖. ລສຸເຓ ລສຸຓສຎ຺ຎາ ຂາທຕິ, ອາປຕ຺ຕິ ປາຈິຕ຺ຕິຍສ຺ສ. ລສຸເຓ ເວມຕິກາ ຂາທຕິ, ອາປຕ຺ຕິ ປາຈິຕ຺ຕິຍສ຺ສ. ລສຸເຓ ອລສຸຓສຎ຺ຎາ ຂາທຕິ, ອາປຕ຺ຕິ ປາຈິຕ຺ຕິຍສ຺ສ.

ອລສຸເຓ ລສຸຓສຎ຺ຎາ ຂາທຕິ, ອາປຕ຺ຕິ ທຸກ຺ກຏສ຺ສ. ອລສຸເຓ ເວມຕິກາ ຂາທຕິ, ອາປຕ຺ຕິ ທຸກ຺ກຏສ຺ສ. ອລສຸເຓ ອລສຸຓສຎ຺ຎາ ຂາທຕິ, ອນາປຕ຺ຕິ.

໗໙໗. ອນາປຕ຺ຕິ ປລຓ຺ຑຸເກ, ຠຎ຺ຊນເກ, ຫຣີຕເກ, ຈາປລສຸເຓ, ສູປສມ຺ປາເກ, ມໍສສມ຺ປາເກ, ເຕລສມ຺ປາເກ, ສາຬເວ, ອຸຕ຺ຕຣິຠງ຺ເຄ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ປຐມສິກ຺ຂາປທໍ ນິຏ຺ຐິຕໍ.

໒. ທຸຕິຍສິກ຺ຂາປທໍ

໗໙໘. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂຸນິໂຍ ສມ຺ພາເຘ ໂລມໍ ສໍຫຣາເປຕ຺ວາ ອຈິຣວຕິຍາ ນທິຍາ ເວສິຍາຫິ ສທ຺ຘິໍ ນຄ຺ຄາ ເອກຕິຕ຺ເຖ ນຫາຍນ຺ຕິ. ເວສິຍາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນິໂຍ ສມ຺ພາເຘ ໂລມໍ ສໍຫຣາເປສ຺ສນ຺ຕິ, ເສຍ຺ຍຖາປິ ຄິຫິນິໂຍ ກາມໂຠຄິນິໂຍ’’ຕິ! ອສ຺ໂສສຸໍ ໂຂ ຠິກ຺ຂຸນິໂຍ ຕາສໍ ເວສິຍານໍ ອຸຊ຺ຌາຍນ຺ຕີນໍ ຂິຍ຺ຍນ຺ຕີນໍ ວິປາເຈນ຺ຕີນໍ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂຸນິໂຍ ສມ຺ພາເຘ ໂລມໍ ສໍຫຣາເປສ຺ສນ຺ຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຉພ຺ພຄ຺ຄິຍາ ຠິກ຺ຂຸນິໂຍ ສມ຺ພາເຘ ໂລມໍ ສໍຫຣາເປນ຺ຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຉພ຺ພຄ຺ຄິຍາ ຠິກ຺ຂຸນິໂຍ ສມ຺ພາເຘ ໂລມໍ ສໍຫຣາເປສ຺ສນ຺ຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໗໙໙. ‘‘ຍາ ປນ ຠິກ຺ຂຸນີ ສມ຺ພາເຘ ໂລມໍ ສໍຫຣາເປຍ຺ຍ, ປາຈິຕ຺ຕິຍ’’ນ຺ຕິ.

໘໐໐. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ສມ຺ພາໂຘ ນາມ ອຸໂຠ ອຸປກຈ຺ຉກາ, ມຸຕ຺ຕກຣຓໍ.

ສໍຫຣາເປຍ຺ຍາຕິ ເອກມ຺ປິ ໂລມໍ ສໍຫຣາເປຕິ, ອາປຕ຺ຕິ ປາຈິຕ຺ຕິຍສ຺ສ. ພຫຸເກປິ ໂລເມ ສໍຫຣາເປຕິ, ອາປຕ຺ຕິ ປາຈິຕ຺ຕິຍສ຺ສ.

໘໐໑. ອນາປຕ຺ຕິ ອາພາຘປຈ຺ຈຍາ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ທຸຕິຍສິກ຺ຂາປທໍ ນິຏ຺ຐິຕໍ.

໓. ຕຕິຍສິກ຺ຂາປທໍ

໘໐໒. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ທ຺ເວ ຠິກ຺ຂຸນິໂຍ ອນຠິຣຕິຍາ ປີຬິຕາ ໂອວຣກໍ ປວິສິຕ຺ວາ ຕລຆາຕກໍ ກໂຣນ຺ຕິ. ຠິກ຺ຂຸນິໂຍ ເຕນ ສທ຺ເທນ ອຸປຘາວິຕ຺ວາ ຕາ ຠິກ຺ຂຸນິໂຍ ເອຕທໂວຈຸໍ – ‘‘ກິສ຺ສ ຕຸມ຺ເຫ, ອຍ຺ເຍ, ປຸຣິເສນ ສທ຺ຘິໍ ສມ຺ປທຸສ຺ສຖາ’’ຕິ? ‘‘ນ ມຍໍ, ອຍ຺ເຍ, ປຸຣິເສນ ສທ຺ຘິໍ ສມ຺ປທຸສ຺ສາມາ’’ຕິ. ຠິກ຺ຂຸນີນໍ ເອຕມຕ຺ຖໍ ອາໂຣເຈສຸໍ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນິໂຍ ຕລຆາຕກໍ ກຣິສ຺ສນ຺ຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂຸນິໂຍ ຕລຆາຕກໍ ກໂຣນ຺ຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຠິກ຺ຂຸນິໂຍ ຕລຆາຕກໍ ກຣິສ຺ສນ຺ຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໘໐໓. ‘‘ຕລຆາຕເກ ປາຈິຕ຺ຕິຍ’’ນ຺ຕິ.

໘໐໔. ຕລຆາຕກໍ ນາມ ສມ຺ຜສ຺ສໍ ສາທິຍນ຺ຕີ ອນ຺ຕມໂສ ອຸປ຺ປລປຕ຺ເຕນປິ ມຸຕ຺ຕກຣເຓ ປຫາຣໍ ເທຕິ, ອາປຕ຺ຕິ ປາຈິຕ຺ຕິຍສ຺ສ.

໘໐໕. ອນາປຕ຺ຕິ ອາພາຘປຈ຺ຈຍາ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ຕຕິຍສິກ຺ຂາປທໍ ນິຏ຺ຐິຕໍ.

໔. ຈຕຸຕ຺ຖສິກ຺ຂາປທໍ

໘໐໖. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອຎ຺ຎຕຣາ ປຸຣາຓຣາໂຊໂຣຘາ ຠິກ຺ຂຸນີສຸ ປພ຺ພຊິຕາ [ອຎ຺ຎຕໂຣ ປຸຣາຓຣາໂຊໂຣໂຘ ຠິກ຺ຂຸນີສຸ ປພ຺ພຊິໂຕ (ສ຺ຍາ.)] ໂຫຕິ. ອຎ຺ຎຕຣາ ຠິກ຺ຂຸນີ ອນຠິຣຕິຍາ ປີຬິຕາ ເຍນ ສາ ຠິກ຺ຂຸນີ ເຕນຸປສງ຺ກມິ; ອຸປສງ຺ກມິຕ຺ວາ ຕໍ ຠິກ຺ຂຸນິໍ ເອຕທໂວຈ – ‘‘ຣາຊາ ໂຂ, ອຍ຺ເຍ, ຕຸມ຺ເຫ ຈິຣາຈິຣໍ ຄຈ຺ຉຕິ. ກຖໍ ຕຸມ຺ເຫ ຘາເຣຖາ’’ຕິ? ‘‘ຊຕຸມຏ຺ຐເກນ, ອຍ຺ເຍ’’ຕິ. ‘‘ກິໍ ເອຕໍ, ອຍ຺ເຍ, ຊຕຸມຏ຺ຐກ’’ນ຺ຕິ? ອຖ ໂຂ ສາ ຠິກ຺ຂຸນີ ຕສ຺ສາ ຠິກ຺ຂຸນິຍາ ຊຕຸມຏ຺ຐກໍ ອາຈິກ຺ຂິ. ອຖ ໂຂ ສາ ຠິກ຺ຂຸນີ ຊຕຸມຏ຺ຐກໍ ອາທິຍິຕ຺ວາ ໂຘວິຕຸໍ ວິສ຺ສຣິຕ຺ວາ ເອກມນ຺ຕໍ ຉຑ຺ເຑສິ. ຠິກ຺ຂຸນິໂຍ ມກ຺ຂິກາຫິ ສມ຺ປຣິກິຓ຺ຓໍ ປສ຺ສິຕ຺ວາ ເອວມາຫໍສຸ – ‘‘ກສ຺ສິທໍ ກມ຺ມ’’ນ຺ຕິ? ສາ ເອວມາຫ – ‘‘ມຍ຺ຫິທໍ ກມ຺ມ’’ນ຺ຕິ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນີ ຊຕຸມຏ຺ຐກໍ ອາທິຍິສ຺ສຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂຸນີ ຊຕຸມຏ຺ຐກໍ ອາທິຍຕີຕິ [ອາທິຍີຕິ (ກ.)]? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຠິກ຺ຂຸນີ ຊຕຸມຏ຺ຐກໍ ອາທິຍິສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໘໐໗. ‘‘ຊຕຸມຏ຺ຐເກ [ຊຕຸມຏ຺ຏເກ (ສີ.)] ປາຈິຕ຺ຕິຍ’’ນ຺ຕິ.

໘໐໘. ຊຕຸມຏ຺ຐກໍ ນາມ ຊຕຸມຍໍ ກຏ຺ຐມຍໍ ປິຏ຺ຐມຍໍ ມຕ຺ຕິກາມຍໍ.

ອາທິເຍຍ຺ຍາຕິ ສມ຺ຜສ຺ສໍ ສາທິຍນ຺ຕີ ອນ຺ຕມໂສ ອຸປ຺ປລປຕ຺ຕມ຺ປິ ມຸຕ຺ຕກຣຓໍ ປເວເສຕິ, ອາປຕ຺ຕິ ປາຈິຕ຺ຕິຍສ຺ສ.

໘໐໙. ອນາປຕ຺ຕິ ອາພາຘປຈ຺ຈຍາ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ຈຕຸຕ຺ຖສິກ຺ຂາປທໍ ນິຏ຺ຐິຕໍ.

໕. ປຎ຺ຈມສິກ຺ຂາປທໍ

໘໑໐. ເຕນ ສມເຍນ ພຸທ຺ໂຘ ຠຄວາ ສກ຺ເກສຸ ວິຫຣຕິ ກປິລວຕ຺ຖຸສ຺ມິໍ ນິຄ຺ໂຣຘາຣາເມ. ອຖ ໂຂ ມຫາປຊາປຕິ ໂຄຕມີ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ອໂຘວາເຕ ອຏ຺ຐາສິ – ‘‘ທຸຄ຺ຄນ຺ໂຘ, ຠຄວາ, ມາຕຸຄາໂມ’’ຕິ. ອຖ ໂຂ ຠຄວາ – ‘‘ອາທິຍນ຺ຕຸ ໂຂ ຠິກ຺ຂຸນິໂຍ ອຸທກສຸທ຺ຘິກ’’ນ຺ຕິ, ມຫາປຊາປຕິໍ ໂຄຕມິໍ ຘມ຺ມິຍາ ກຖາຍ ສນ຺ທສ຺ເສສິ ສມາທເປສິ ສມຸຕ຺ເຕເຊສິ ສມ຺ປຫໍເສສິ. ອຖ ໂຂ ມຫາປຊາປຕິ ໂຄຕມີ ຠຄວຕາ ຘມ຺ມິຍາ ກຖາຍ ສນ຺ທສ຺ສິຕາ ສມາທປິຕາ ສມຸຕ຺ເຕຊິຕາ ສມ຺ປຫໍສິຕາ ຠຄວນ຺ຕໍ ອຠິວາເທຕ຺ວາ ປທກ຺ຂິຓໍ ກຕ຺ວາ ປກ຺ກາມິ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ – ‘‘ອນຸຊານາມິ, ຠິກ຺ຂເວ, ຠິກ຺ຂຸນີນໍ ອຸທກສຸທ຺ຘິກ’’ນ຺ຕິ. ເຕນ ໂຂ ປນ ສມເຍນ ອຎ຺ຎຕຣາ ຠິກ຺ຂຸນີ – ‘‘ຠຄວຕາ ອຸທກສຸທ຺ຘິກາ ອນຸຎ຺ຎາຕາ’’ຕິ ອຕິຄມ຺ຠີຣໍ ອຸທກສຸທ຺ຘິກໍ ອາທິຍນ຺ຕີ ມຸຕ຺ຕກຣເຓ ວຓໍ ອກາສິ. ອຖ ໂຂ ສາ ຠິກ຺ຂຸນີ ຠິກ຺ຂຸນີນໍ ເອຕມຕ຺ຖໍ ອາໂຣເຈຕິ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ກຖຎ຺ຫິ ນາມ ຠິກ຺ຂຸນີ ອຕິຄມ຺ຠີຣໍ ອຸທກສຸທ຺ຘິກໍ ອາທິຍິສ຺ສຕີຕິ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂຸນີ ອຕິຄມ຺ຠີຣໍ ອຸທກສຸທ຺ຘິກໍ ອາທິຍຕີ’’ຕິ [ອາທິຍີຕິ (ກ.)]? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຠິກ຺ຂຸນີ ອຕິຄມ຺ຠີຣໍ ອຸທກສຸທ຺ຘິກໍ ອາທິຍິສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໘໑໑. ‘‘ອຸທກສຸທ຺ຘິກໍ ປນ ຠິກ຺ຂຸນິຍາ ອາທິຍມານາຍ ທ຺ວງ຺ຄຸລປພ຺ພປຣມໍ ອາທາຕພ຺ພໍ. ຕໍ ອຕິກ຺ກາເມນ຺ຕິຍາ ປາຈິຕ຺ຕິຍ’’ນ຺ຕິ.

໘໑໒. ອຸທກສຸທ຺ຘິກໍ ນາມ ມຸຕ຺ຕກຣຓສ຺ສ ໂຘວນາ ວຸຈ຺ຈຕິ.

ອາທິຍມານາຍາຕິ ໂຘວນ຺ຕິຍາ.

ທ຺ວງ຺ຄຸລປພ຺ພປຣມໍ ອາທາຕພ຺ພນ຺ຕິ ທ຺ວີສຸ ອງ຺ຄຸເລສຸ ທ຺ເວ ປພ຺ພປຣມາ ອາທາຕພ຺ພາ.

ຕໍ ອຕິກ຺ກາເມນ຺ຕິຍາຕິ ສມ຺ຜສ຺ສໍ ສາທິຍນ຺ຕີ ອນ຺ຕມໂສ ເກສຄ຺ຄມຕ຺ຕມ຺ປິ ອຕິກ຺ກາເມຕິ, ອາປຕ຺ຕິ ປາຈິຕ຺ຕິຍສ຺ສ.

໘໑໓. ອຕິເຣກທ຺ວງ຺ຄຸລປພ຺ເພ ອຕິເຣກສຎ຺ຎາ ອາທິຍຕິ, ອາປຕ຺ຕິ ປາຈິຕ຺ຕິຍສ຺ສ. ອຕິເຣກທ຺ວງ຺ຄຸລປພ຺ເພ ເວມຕິກາ ອາທິຍຕິ, ອາປຕ຺ຕິ ປາຈິຕ຺ຕິຍສ຺ສ. ອຕິເຣກທ຺ວງ຺ຄຸລປພ຺ເພ ອູນກສຎ຺ຎາ ອາທິຍຕິ, ອາປຕ຺ຕິ ປາຈິຕ຺ຕິຍສ຺ສ.

ອູນກທ຺ວງ຺ຄຸລປພ຺ເພ ອຕິເຣກສຎ຺ຎາ, ອາປຕ຺ຕິ ທຸກ຺ກຏສ຺ສ. ອູນກທ຺ວງ຺ຄຸລປພ຺ເພ ເວມຕິກາ, ອາປຕ຺ຕິ ທຸກ຺ກຏສ຺ສ. ອູນກທ຺ວງ຺ຄຸລປພ຺ເພ ອູນກສຎ຺ຎາ, ອນາປຕ຺ຕິ.

໘໑໔. ອນາປຕ຺ຕິ ທ຺ວງ຺ຄຸລປພ຺ພປຣມໍ ອາທິຍຕິ, ອູນກທ຺ວງ຺ຄຸລປພ຺ພປຣມໍ ອາທິຍຕິ, ອາພາຘປຈ຺ຈຍາ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ປຎ຺ຈມສິກ຺ຂາປທໍ ນິຏ຺ຐິຕໍ.

໖. ຉຏ຺ຐສິກ຺ຂາປທໍ

໘໑໕. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອາໂຣຫນ຺ໂຕ ນາມ ມຫາມຕ຺ໂຕ ຠິກ຺ຂູສຸ ປພ຺ພຊິໂຕ ໂຫຕິ. ຕສ຺ສ ປຸຣາຓທຸຕິຍິກາ ຠິກ຺ຂຸນີສຸ ປພ຺ພຊິຕາ ໂຫຕິ. ເຕນ ໂຂ ປນ ສມເຍນ ໂສ ຠິກ຺ຂຸ ຕສ຺ສາ ຠິກ຺ຂຸນິຍາ ສນ຺ຕິເກ ຠຕ຺ຕວິສ຺ສຄ຺ຄໍ ກໂຣຕິ. ອຖ ໂຂ ສາ ຠິກ຺ຂຸນີ ຕສ຺ສ ຠິກ຺ຂຸໂນ ຠຸຎ຺ຊນ຺ຕສ຺ສ ປານີເຍນ ຈ ວິຘູປເນນ ຈ ອຸປຕິຏ຺ຐິຕ຺ວາ ອຈ຺ຈາວທຕິ. ອຖ ໂຂ ໂສ ຠິກ຺ຂຸ ຕໍ ຠິກ຺ຂຸນິໍ ອປສາເທຕິ – ‘‘ມາ, ຠຄິນິ, ເອວຣູປໍ ອກາສິ. ເນຕໍ ກປ຺ປຕີ’’ຕິ. ‘‘ປຸພ຺ເພ ມໍ ຕ຺ວໍ ເອວຎ຺ຈ ເອວຎ຺ຈ ກໂຣສິ, ອິທານິ ເອຕ຺ຕກໍ ນ ສຫສີ’’ຕິ – ປານີຍຖາລກໍ ມຕ຺ຖເກ ອາສຸມ຺ຠິຕ຺ວາ ວິຘູປເນນ ປຫາຣໍ ອທາສິ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນີ ຠິກ຺ຂຸສ຺ສ ປຫາຣໍ ທສ຺ສຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂຸນີ ຠິກ຺ຂຸສ຺ສ ປຫາຣໍ ອທາສີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຠິກ຺ຂຸນີ ຠິກ຺ຂຸສ຺ສ ປຫາຣໍ ທສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໘໑໖. ‘‘ຍາ ປນ ຠິກ຺ຂຸນີ ຠິກ຺ຂຸສ຺ສ ຠຸຎ຺ຊນ຺ຕສ຺ສ ປານີເຍນ ວາ ວິຘູປເນນ ວາ ອຸປຕິຏ຺ເຐຍ຺ຍ, ປາຈິຕ຺ຕິຍ’’ນ຺ຕິ.

໘໑໗. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ຠິກ຺ຂຸສ຺ສາຕິ ອຸປສມ຺ປນ຺ນສ຺ສ.

ຠຸຎ຺ຊນ຺ຕສ຺ສາຕິ ປຎ຺ຈນ຺ນໍ ໂຠຊນານໍ ອຎ຺ຎຕຣໍ ໂຠຊນໍ ຠຸຎ຺ຊນ຺ຕສ຺ສ.

ປານີຍໍ ນາມ ຍໍ ກິຎ຺ຈິ ປານີຍໍ.

ວິຘູປນໍ ນາມ ຍາ ກາຈິ ພີຊນີ.

ອຸປຕິຏ຺ເຐຍ຺ຍາຕິ ຫຕ຺ຖປາເສ ຕິຏ຺ຐຕິ, ອາປຕ຺ຕິ ປາຈິຕ຺ຕິຍສ຺ສ.

໘໑໘. ອຸປສມ຺ປນ຺ເນ ອຸປສມ຺ປນ຺ນສຎ຺ຎາ ປານີເຍນ ວາ ວິຘູປເນນ ວາ ອຸປຕິຏ຺ຐຕິ, ອາປຕ຺ຕິ ປາຈິຕ຺ຕິຍສ຺ສ. ອຸປສມ຺ປນ຺ເນ ເວມຕິກາ ປານີເຍນ ວາ ວິຘູປເນນ ວາ ອຸປຕິຏ຺ຐຕິ, ອາປຕ຺ຕິ ປາຈິຕ຺ຕິຍສ຺ສ. ອຸປສມ຺ປນ຺ເນ ອນຸປສມ຺ປນ຺ນສຎ຺ຎາ ປານີເຍນ ວາ ວິຘູປເນນ ວາ ອຸປຕິຏ຺ຐຕິ, ອາປຕ຺ຕິ ປາຈິຕ຺ຕິຍສ຺ສ.

ຫຕ຺ຖປາສໍ ວິຊຫິຕ຺ວາ ອຸປຕິຏ຺ຐຕິ, ອາປຕ຺ຕິ ທຸກ຺ກຏສ຺ສ. ຂາທນີຍໍ ຂາທນ຺ຕສ຺ສ ອຸປຕິຏ຺ຐຕິ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ນສ຺ສ ອຸປຕິຏ຺ຐຕິ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ເນ ອຸປສມ຺ປນ຺ນສຎ຺ຎາ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ເນ ເວມຕິກາ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ເນ ອນຸປສມ຺ປນ຺ນສຎ຺ຎາ, ອາປຕ຺ຕິ ທຸກ຺ກຏສ຺ສ.

໘໑໙. ອນາປຕ຺ຕິ ເທຕິ, ທາເປຕິ, ອນຸປສມ຺ປນ຺ນໍ ອາຓາເປຕິ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ຉຏ຺ຐສິກ຺ຂາປທໍ ນິຏ຺ຐິຕໍ.

໗. ສຕ຺ຕມສິກ຺ຂາປທໍ

໘໒໐. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຠິກ຺ຂຸນິໂຍ ສສ຺ສກາເລ ອາມກຘຎ຺ຎໍ ວິຎ຺ຎາເປຕ຺ວາ ນຄຣໍ ອຕິຫຣນ຺ຕິ ທ຺ວາຣຏ຺ຐາເນ – ‘‘ເທຖາຍ຺ເຍ, ຠາຄ’’ນ຺ຕິ. ປລິພຸນ຺ເຘຕ຺ວາ ມຸຎ຺ຈິໍສຸ. ອຖ ໂຂ ຕາ ຠິກ຺ຂຸນິໂຍ ອຸປສ຺ສຍໍ ຄນ຺ຕ຺ວາ ຠິກ຺ຂຸນີນໍ ເອຕມຕ຺ຖໍ ອາໂຣເຈສຸໍ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນິໂຍ ອາມກຘຎ຺ຎໍ ວິຎ຺ຎາເປສ຺ສນ຺ຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂຸນິໂຍ ອາມກຘຎ຺ຎໍ ວິຎ຺ຎາເປນ຺ຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຠິກ຺ຂຸນິໂຍ ອາມກຘຎ຺ຎໍ ວິຎ຺ຎາເປສ຺ສນ຺ຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໘໒໑. ‘‘ຍາ ປນ ຠິກ຺ຂຸນີ ອາມກຘຎ຺ຎໍ ວິຎ຺ຎຕ຺ວາ ວາ ວິຎ຺ຎາເປຕ຺ວາ ວາ ຠຊ຺ຊິຕ຺ວາ ວາ ຠຊ຺ຊາເປຕ຺ວາ ວາ ໂກຏ຺ເຏຕ຺ວາ ວາ ໂກຏ຺ຏາເປຕ຺ວາ ວາ ປຈິຕ຺ວາ ວາ ປຈາເປຕ຺ວາ ວາ ຠຸຎ຺ເຊຍ຺ຍ, ປາຈິຕ຺ຕິຍ’’ນ຺ຕິ.

໘໒໒. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ອາມກຘຎ຺ຎໍ ນາມ ສາລິ ວີຫິ ຍໂວ ໂຄຘຸໂມ ກງ຺ຄຸ ວຣໂກ ກຸທ຺ຣຸສໂກ.

ວິຎ຺ຎຕ຺ວາຕິ ສຍໍ ວິຎ຺ຎຕ຺ວາ. ວິຎ຺ຎາເປຕ຺ວາຕິ ອຎ຺ຎໍ ວິຎ຺ຎາເປຕ຺ວາ.

ຠຊ຺ຊິຕ຺ວາຕິ ສຍໍ ຠຊ຺ຊິຕ຺ວາ. ຠຊ຺ຊາເປຕ຺ວາຕິ ອຎ຺ຎໍ ຠຊ຺ຊາເປຕ຺ວາ.

ໂກຏ຺ເຏຕ຺ວາຕິ ສຍໍ ໂກຏ຺ເຏຕ຺ວາ. ໂກຏ຺ຏາເປຕ຺ວາຕິ ອຎ຺ຎໍ ໂກຏ຺ຏາເປຕ຺ວາ.

ປຈິຕ຺ວາຕິ ສຍໍ ປຈິຕ຺ວາ. ປຈາເປຕ຺ວາຕິ ອຎ຺ຎໍ ປຈາເປຕ຺ວາ.

‘‘ຠຸຎ຺ຊິສ຺ສາມີ’’ຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ. ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ປາຈິຕ຺ຕິຍສ຺ສ.

໘໒໓. ອນາປຕ຺ຕິ ອາພາຘປຈ຺ຈຍາ, ອປຣຓ຺ຓໍ ວິຎ຺ຎາເປຕິ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ສຕ຺ຕມສິກ຺ຂາປທໍ ນິຏ຺ຐິຕໍ.

໘. ອຏ຺ຐມສິກ຺ຂາປທໍ

໘໒໔. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອຎ຺ຎຕໂຣ ພ຺ຣາຫ຺ມໂຓ ນິພ຺ພິຏ຺ຐຣາຊຠໂຏ ‘‘ຕຎ຺ເຎວ ຠຏປຖໍ ຍາຈິສ຺ສາມີ’’ຕິ ສີສໍ ນຫາຍິຕ຺ວາ ຠິກ຺ຂຸນຸປສ຺ສຍໍ ນິສ຺ສາຍ ຣາຊກຸລໍ ຄຈ຺ຉຕິ. ອຎ຺ຎຕຣາ ຠິກ຺ຂຸນີ ກຏາເຫ ວຈ຺ຈໍ ກຕ຺ວາ ຕິໂຣກຸຏ຺ເຏ ຉຑ຺ເຑນ຺ຕີ ຕສ຺ສ ພ຺ຣາຫ຺ມຓສ຺ສ ມຕ຺ຖເກ ອາສຸມ຺ຠິ. ອຖ ໂຂ ໂສ ພ຺ຣາຫ຺ມໂຓ ອຸຊ຺ຌາຍຕິ ຂິຍ຺ຍຕິ ວິປາເຈຕິ – ‘‘ອສ຺ສມຓິໂຍ ອິມາ ມຸຓ຺ຑາ ພນ຺ຘກິນິໂຍ. ກຖຎ຺ຫິ ນາມ ຄູຖກຏາຫໍ ມຕ຺ຖເກ ອາສຸມ຺ຠິສ຺ສນ຺ຕິ! ອິມາສໍ ອຸປສ຺ສຍໍ ຌາເປສ຺ສາມີ’’ຕິ! ອຸມ຺ມຸກໍ ຄເຫຕ຺ວາ ອຸປສ຺ສຍໍ ປວິສຕິ. ອຎ຺ຎຕໂຣ ອຸປາສໂກ ອຸປສ຺ສຍາ ນິກ຺ຂມນ຺ໂຕ ອທ຺ທສ ຕໍ ພ຺ຣາຫ຺ມຓໍ ອຸມ຺ມຸກໍ ຄເຫຕ຺ວາ ອຸປສ຺ສຍໍ ປວິສນ຺ຕໍ. ທິສ຺ວານ ຕໍ ພ຺ຣາຫ຺ມຓໍ ເອຕທໂວຈ – ‘‘ກິສ຺ສ ຕ຺ວໍ, ໂຠ, ອຸມ຺ມຸກໍ ຄເຫຕ຺ວາ ອຸປສ຺ສຍໍ ປວິສສີ’’ຕິ? ‘‘ອິມາ ມໍ, ໂຠ, ມຸຓ຺ຑາ ພນ຺ຘກິນິໂຍ ຄູຖກຏາຫໍ ມຕ຺ຖເກ ອາສຸມ຺ຠິໍສຸ. ອິມາສໍ ອຸປສ຺ສຍໍ ຌາເປສ຺ສາມີ’’ຕິ. ‘‘ຄຈ຺ຉ, ໂຠ ພ຺ຣາຫ຺ມຓ, ມງ຺ຄລໍ ເອຕໍ. ສຫສ຺ສໍ ລຈ຺ຉສິ ຕຎ຺ຈ ຠຏປຖ’’ນ຺ຕິ. ອຖ ໂຂ ໂສ ພ຺ຣາຫ຺ມໂຓ ສີສໍ ນຫາຍິຕ຺ວາ ຣາຊກຸລໍ ຄນ຺ຕ຺ວາ ສຫສ຺ສໍ ອລຕ຺ຖ ຕຎ຺ຈ ຠຏປຖໍ. ອຖ ໂຂ ໂສ ອຸປາສໂກ ອຸປສ຺ສຍໍ ປວິສິຕ຺ວາ ຠິກ຺ຂຸນີນໍ ເອຕມຕ຺ຖໍ ອາໂຣເຈຕ຺ວາ ປຣິຠາສິ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນິໂຍ ອຸຈ຺ຈາຣໍ ຕິໂຣກຸຏ຺ເຏ ຉຑ຺ເຑສ຺ສນ຺ຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂຸນິໂຍ ອຸຈ຺ຈາຣໍ ຕິໂຣກຸຏ຺ເຏ ຉຑ຺ເຑນ຺ຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຠິກ຺ຂຸນິໂຍ ອຸຈ຺ຈາຣໍ ຕິໂຣກຸຏ຺ເຏ ຉຑ຺ເຑສ຺ສນ຺ຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໘໒໕. ‘‘ຍາ ປນ ຠິກ຺ຂຸນີ ອຸຈ຺ຈາຣໍ ວາ ປສ຺ສາວໍ ວາ ສງ຺ກາຣໍ ວາ ວິຆາສໍ ວາ ຕິໂຣກຸຏ຺ເຏ ວາ ຕິໂຣປາກາເຣ ວາ ຉຑ຺ເຑຍ຺ຍ ວາ ຉຑ຺ຑາເປຍ຺ຍ ວາ, ປາຈິຕ຺ຕິຍ’’ນ຺ຕິ.

໘໒໖. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ອຸຈ຺ຈາໂຣ ນາມ ຄູໂຖ ວຸຈ຺ຈຕິ. ປສ຺ສາໂວ ນາມ ມຸຕ຺ຕໍ ວຸຈ຺ຈຕິ.

ສງ຺ກາຣໍ ນາມ ກຈວຣໍ ວຸຈ຺ຈຕິ.

ວິຆາສໍ ນາມ ຈລການິ ວາ ອຏ຺ຐິການິ ວາ ອຸຈ຺ຉິຏ຺ໂຐທກໍ ວາ.

ກຸຏ຺ໂຏ ນາມ ຕໂຍ ກຸຏ຺ຏາ – ອິຏ຺ຐກາກຸຏ຺ໂຏ, ສິລາກຸຏ຺ໂຏ, ທາຣຸກຸຏ຺ໂຏ.

ປາກາໂຣ ນາມ ຕໂຍ ປາກາຣາ – ອິຏ຺ຐກາປາກາໂຣ, ສິລາປາກາໂຣ, ທາຣຸປາກາໂຣ.

ຕິໂຣກຸຏ຺ເຏຕິ ກຸຏ຺ຏສ຺ສ ປຣໂຕ. ຕິໂຣປາກາເຣຕິ ປາກາຣສ຺ສ ປຣໂຕ.

ຉຑ຺ເຑຍ຺ຍາຕິ ສຍໍ ຉຑ຺ເຑຕິ, ອາປຕ຺ຕິ ປາຈິຕ຺ຕິຍສ຺ສ.

ຉຑ຺ຑາເປຍ຺ຍາຕິ ອຎ຺ຎໍ ອາຓາເປຕິ, ອາປຕ຺ຕິ ທຸກ຺ກຏສ຺ສ. ສກິໍ ອາຓຕ຺ຕາ ພຫຸກມ຺ປິ ຉຑ຺ເຑຕິ, ອາປຕ຺ຕິ ປາຈິຕ຺ຕິຍສ຺ສ.

໘໒໗. ອນາປຕ຺ຕິ ໂອໂລເກຕ຺ວາ ຉຑ຺ເຑຕິ, ອວຬຎ຺ເຊ ຉຑ຺ເຑຕິ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ອຏ຺ຐມສິກ຺ຂາປທໍ ນິຏ຺ຐິຕໍ.

໙. ນວມສິກ຺ຂາປທໍ

໘໒໘. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອຎ຺ຎຕຣສ຺ສ ພ຺ຣາຫ຺ມຓສ຺ສ ຠິກ຺ຂຸນູປສ຺ສຍໍ ນິສ຺ສາຍ ຍວເຂຕ຺ຕໍ ໂຫຕິ. ຠິກ຺ຂຸນິໂຍ ອຸຈ຺ຈາຣມ຺ປິ ປສ຺ສາວມ຺ປິ ສງ຺ກາຣມ຺ປິ ວິຆາສມ຺ປິ ເຂຕ຺ເຕ ຉຑ຺ເຑນ຺ຕິ. ອຖ ໂຂ ໂສ ພ຺ຣາຫ຺ມໂຓ ອຸຊ຺ຌາຍຕິ ຂິຍ຺ຍຕິ ວິປາເຈຕິ – ‘‘ກຖຎ຺ຫິ ນາມ ຠິກ຺ຂຸນິໂຍ ອມ຺ຫາກໍ ຍວເຂຕ຺ຕໍ ທູເສສ຺ສນ຺ຕີ’’ຕິ! ອສ຺ໂສສຸໍ ໂຂ ຠິກ຺ຂຸນິໂຍ ຕສ຺ສ ພ຺ຣາຫ຺ມຓສ຺ສ ອຸຊ຺ຌາຍນ຺ຕສ຺ສ ຂິຍ຺ຍນ຺ຕສ຺ສ ວິປາເຈນ຺ຕສ຺ສ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນິໂຍ ອຸຈ຺ຈາຣມ຺ປິ ປສ຺ສາວມ຺ປິ ສງ຺ກາຣມ຺ປິ ວິຆາສມ຺ປິ ຫຣິເຕ ຉຑ຺ເຑສ຺ສນ຺ຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂຸນິໂຍ ອຸຈ຺ຈາຣມ຺ປິ ປສ຺ສາວມ຺ປິ ສງ຺ກາຣມ຺ປິ ວິຆາສມ຺ປິ ຫຣິເຕ ຉຑ຺ເຑນ຺ຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຠິກ຺ຂຸນິໂຍ ອຸຈ຺ຈາຣມ຺ປິ ປສ຺ສາວມ຺ປິ ສງ຺ກາຣມ຺ປິ ວິຆາສມ຺ປິ ຫຣິເຕ ຉຑ຺ເຑສ຺ສນ຺ຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໘໒໙. ‘‘ຍາ ປນ ຠິກ຺ຂຸນີ ອຸຈ຺ຈາຣໍ ວາ ປສ຺ສາວໍ ວາ ສງ຺ກາຣໍ ວາ ວິຆາສໍ ວາ ຫຣິເຕ ຉຑ຺ເຑຍ຺ຍ ວາ ຉຑ຺ຑາເປຍ຺ຍ ວາ, ປາຈິຕ຺ຕິຍ’’ນ຺ຕິ.

໘໓໐. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ອຸຈ຺ຈາໂຣ ນາມ ຄູໂຖ ວຸຈ຺ຈຕິ. ປສ຺ສາໂວ ນາມ ມຸຕ຺ຕໍ ວຸຈ຺ຈຕິ.

ສງ຺ກາຣໍ ນາມ ກຈວຣໍ ວຸຈ຺ຈຕິ.

ວິຆາສໍ ນາມ ຈລການິ ວາ ອຏ຺ຐິການິ ວາ ອຸຈ຺ຉິຏ຺ໂຐທກໍ ວາ.

ຫຣິຕໍ ນາມ ປຸພ຺ພຓ຺ຓໍ ອປຣຓ຺ຓໍ ຍໍ ມນຸສ຺ສານໍ ອຸປໂຠຄປຣິໂຠຄໍ ໂຣປິມໍ.

ຉຑ຺ເຑຍ຺ຍາຕິ ສຍໍ ຉຑ຺ເຑຕິ, ອາປຕ຺ຕິ ປາຈິຕ຺ຕິຍສ຺ສ.

ຉຑ຺ຑາເປຍ຺ຍາຕິ ອຎ຺ຎໍ ອາຓາເປຕິ, ອາປຕ຺ຕິ ທຸກ຺ກຏສ຺ສ. ສກິໍ ອາຓຕ຺ຕາ ພຫຸກມ຺ປິ ຉຑ຺ເຑຕິ, ອາປຕ຺ຕິ ປາຈິຕ຺ຕິຍສ຺ສ.

໘໓໑. ຫຣິເຕ ຫຣິຕສຎ຺ຎາ ຉຑ຺ເຑຕິ ວາ ຉຑ຺ຑາເປຕິ ວາ, ອາປຕ຺ຕິ ປາຈິຕ຺ຕິຍສ຺ສ. ຫຣິເຕ ເວມຕິກາ ຉຑ຺ເຑຕິ ວາ ຉຑ຺ຑາເປຕິ ວາ, ອາປຕ຺ຕິ ປາຈິຕ຺ຕິຍສ຺ສ. ຫຣິເຕ ອຫຣິຕສຎ຺ຎາ ຉຑ຺ເຑຕິ ວາ ຉຑ຺ຑາເປຕິ ວາ, ອາປຕ຺ຕິ ປາຈິຕ຺ຕິຍສ຺ສ.

ອຫຣິເຕ ຫຣິຕສຎ຺ຎາ, ອາປຕ຺ຕິ ທຸກ຺ກຏສ຺ສ. ອຫຣິເຕ ເວມຕິກາ, ອາປຕ຺ຕິ ທຸກ຺ກຏສ຺ສ. ອຫຣິເຕ ອຫຣິຕສຎ຺ຎາ, ອນາປຕ຺ຕິ.

໘໓໒. ອນາປຕ຺ຕິ ໂອໂລເກຕ຺ວາ ຉຑ຺ເຑຕິ, ເຂຕ຺ຕມຣິຍາເທ [ຉຑ຺ຑິຕເຂຕ຺ເຕ (?) ອຏ຺ຐກຖາ ໂອໂລເກຕພ຺ພາ] ຉຑ຺ເຑຕິ ສາມິເກ ອາປຸຈ຺ຉິຕ຺ວາ ອປໂລເກຕ຺ວາ ຉຑ຺ເຑຕິ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ນວມສິກ຺ຂາປທໍ ນິຏ຺ຐິຕໍ.

໑໐. ທສມສິກ຺ຂາປທໍ

໘໓໓. ເຕນ ສມເຍນ ພຸທ຺ໂຘ ຠຄວາ ຣາຊຄເຫ ວິຫຣຕິ ເວຬຸວເນ ກລນ຺ທກນິວາເປ. ເຕນ ໂຂ ປນ ສມເຍນ ຣາຊຄເຫ ຄິຣຄ຺ຄສມຊ຺ໂຊ ໂຫຕິ. ຉພ຺ພຄ຺ຄິຍາ ຠິກ຺ຂຸນິໂຍ ຄິຣຄ຺ຄສມຊ຺ຊໍ ທສ຺ສນາຍ ອຄມໍສຸ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນິໂຍ ນຈ຺ຈມ຺ປິ ຄີຕມ຺ປິ ວາທິຕມ຺ປິ ທສ຺ສນາຍ ຄຈ຺ຉິສ຺ສນ຺ຕິ, ເສຍ຺ຍຖາປິ ຄິຫິນິໂຍ ກາມໂຠຄິນິໂຍ’’ຕິ! ອສ຺ໂສສຸໍ ໂຂ ຠິກ຺ຂຸນິໂຍ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂຸນິໂຍ ນຈ຺ຈມ຺ປິ ຄີຕມ຺ປິ ວາທິຕມ຺ປິ ທສ຺ສນາຍ ຄຈ຺ຉິສ຺ສນ຺ຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຉພ຺ພຄ຺ຄິຍາ ຠິກ຺ຂຸນິໂຍ ນຈ຺ຈມ຺ປິ ຄີຕມ຺ປິ ວາທິຕມ຺ປິ ທສ຺ສນາຍ ຄຈ຺ຉນ຺ຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຉພ຺ພຄ຺ຄິຍາ ຠິກ຺ຂຸນິໂຍ ນຈ຺ຈມ຺ປິ ຄີຕມ຺ປິ ວາທິຕມ຺ປິ ທສ຺ສນາຍ ຄຈ຺ຉິສ຺ສນ຺ຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໘໓໔. ‘‘ຍາ ປນ ຠິກ຺ຂຸນີ ນຈ຺ຈໍ ວາ ຄີຕໍ ວາ ວາທິຕໍ ວາ ທສ຺ສນາຍ ຄຈ຺ເຉຍ຺ຍ, ປາຈິຕ຺ຕິຍ’’ນ຺ຕິ.

໘໓໕. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ນຈ຺ຈໍ ນາມ ຍໍ ກິຎ຺ຈິ ນຈ຺ຈໍ. ຄີຕໍ ນາມ ຍໍ ກິຎ຺ຈິ ຄີຕໍ. ວາທິຕໍ ນາມ ຍໍ ກິຎ຺ຈິ ວາທິຕໍ.

໘໓໖. ທສ຺ສນາຍ ຄຈ຺ຉຕິ, ອາປຕ຺ຕິ ທຸກ຺ກຏສ຺ສ. ຍຕ຺ຖ ຐິຕາ ປສ຺ສຕິ ວາ ສຸຓາຕິ ວາ, ອາປຕ຺ຕິ ປາຈິຕ຺ຕິຍສ຺ສ. ທສ຺ສນູປຈາຣໍ ວິຊຫິຕ຺ວາ ປຸນປ຺ປຸນໍ ປສ຺ສຕິ ວາ ສຸຓາຕິ ວາ, ອາປຕ຺ຕິ ປາຈິຕ຺ຕິຍສ຺ສ. ເອກເມກໍ ທສ຺ສນາຍ ຄຈ຺ຉຕິ, ອາປຕ຺ຕິ ທຸກ຺ກຏສ຺ສ. ຍຕ຺ຖ ຐິຕາ ປສ຺ສຕິ ວາ ສຸຓາຕິ ວາ, ອາປຕ຺ຕິ ປາຈິຕ຺ຕິຍສ຺ສ. ທສ຺ສນູປຈາຣໍ ວິຊຫິຕ຺ວາ ປຸນປ຺ປຸນໍ ປສ຺ສຕິ ວາ ສຸຓາຕິ ວາ, ອາປຕ຺ຕິ ປາຈິຕ຺ຕິຍສ຺ສ.

໘໓໗. ອນາປຕ຺ຕິ ອາຣາເມ ຐິຕາ ປສ຺ສຕິ ວາ ສຸຓາຕິ ວາ, ຠິກ຺ຂຸນິຍາ ຐິໂຕກາສໍ ວາ ນິສິນ຺ໂນກາສໍ ວາ ນິປນ຺ໂນກາສໍ ວາ ອາຄນ຺ຕ຺ວາ ນຈ຺ຈນ຺ຕິ ວາ ຄາຍນ຺ຕິ ວາ ວາເທນ຺ຕິ ວາ, ປຏິປຖໍ ຄຈ຺ຉນ຺ຕີ ປສ຺ສຕິ ວາ ສຸຓາຕິ ວາ, ສຕິ ກຣຓີເຍ ຄນ຺ຕ຺ວາ ປສ຺ສຕິ ວາ ສຸຓາຕິ ວາ, ອາປທາສຸ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ທສມສິກ຺ຂາປທໍ ນິຏ຺ຐິຕໍ.

ລສຸຓວຄ຺ໂຄ ປຐໂມ.