໗. ຘມ຺ມເທສນາສິກ຺ຂາປທໍ

໖໐. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອາຍສ຺ມາ ອຸທາຍີ ສາວຕ຺ຖິຍໍ ກຸລູປໂກ ໂຫຕິ, ພຫຸການິ ກຸລານິ ອຸປສງ຺ກມຕິ. ອຖ ໂຂ ອາຍສ຺ມາ ອຸທາຍີ ປຸພ຺ພຓ຺ຫສມຍໍ ນິວາເສຕ຺ວາ ປຕ຺ຕຈີວຣມາທາຍ ເຍນ ອຎ຺ຎຕຣໍ ກຸລໍ ເຕນຸປສງ຺ກມິ. ເຕນ ໂຂ ປນ ສມເຍນ ຆຣຓີ ນິເວສນທ຺ວາເຣ ນິສິນ຺ນາ ໂຫຕິ, ຆຣສຸຓ຺ຫາ ອາວສຖທ຺ວາເຣ ນິສິນ຺ນາ ໂຫຕິ. ອຖ ໂຂ ອາຍສ຺ມາ ອຸທາຍີ ເຍນ ຆຣຓີ ເຕນຸປສງ຺ກມິ; ອຸປສງ຺ກມິຕ຺ວາ ຆຣຓິຍາ ອຸປກຓ຺ຓເກ ຘມ຺ມໍ ເທເສສິ. ອຖ ໂຂ ຆຣສຸຓ຺ຫາຍ ເອຕທໂຫສິ – ‘‘ກິ ນຸ ໂຂ ໂສ ສມໂຓ ສສ຺ສຸຍາ ຊາໂຣ ອຸທາຫຸ ໂອຠາສຕີ’’ຕິ?

ອຖ ໂຂ ອາຍສ຺ມາ ອຸທາຍີ ຆຣຓິຍາ ອຸປກຓ຺ຓເກ ຘມ຺ມໍ ເທເສຕ຺ວາ ເຍນ ຆຣສຸຓ຺ຫາ ເຕນຸປສງ຺ກມິ; ອຸປສງ຺ກມິຕ຺ວາ ຆຣສຸຓ຺ຫາຍ ອຸປກຓ຺ຓເກ ຘມ຺ມໍ ເທເສສິ. ອຖ ໂຂ ຆຣຓິຍາ ເອຕທໂຫສິ – ‘‘ກິໍ ນຸ ໂຂ ໂສ ສມໂຓ ຆຣສຸຓ຺ຫາຍ ຊາໂຣ ອຸທາຫຸ ໂອຠາສຕີ’’ຕິ? ອຖ ໂຂ ອາຍສ຺ມາ ອຸທາຍີ ຆຣສຸຓ຺ຫາຍ ອຸປກຓ຺ຓເກ ຘມ຺ມໍ ເທເສຕ຺ວາ ປກ຺ກາມິ. ອຖ ໂຂ ຆຣຓີ ຆຣສຸຓ຺ຫໍ ເອຕທໂວຈ – ‘‘ເຫ ເຊ, ກິໍ ເຕ ເອໂສ ສມໂຓ ອໂວຈາ’’ຕິ? ‘‘ຘມ຺ມໍ ເມ, ອຍ຺ເຍ, ເທເສສິ’’. ‘‘ອຍ຺ຍາຍ ປນ ກິໍ ອໂວຈາ’’ຕິ? ‘‘ມຍ຺ຫມ຺ປິ ຘມ຺ມໍ ເທເສສີ’’ຕິ. ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອຍ຺ໂຍ ອຸທາຍີ ມາຕຸຄາມສ຺ສ ອຸປກຓ຺ຓເກ ຘມ຺ມໍ ເທເສສ຺ສຕິ! ນນຸ ນາມ ວິສ຺ສຏ຺ເຐນ ວິວເຏນ ຘມ຺ໂມ ເທເສຕພ຺ໂພ’’ຕິ?

ອສ຺ໂສສຸໍ ໂຂ ຠິກ຺ຂູ ຕາສໍ ອິຕ຺ຖີນໍ ອຸຊ຺ຌາຍນ຺ຕີນໍ ຂິຍ຺ຍນ຺ຕີນໍ ວິປາເຈນ຺ຕີນໍ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອາຍສ຺ມາ ອຸທາຍີ ມາຕຸຄາມສ຺ສ ຘມ຺ມໍ ເທເສສ຺ສຕີ’’ຕິ! ອຖ ໂຂ ເຕ ຠິກ຺ຂູ ອາຍສ຺ມນ຺ຕໍ ອຸທາຍິໍ ອເນກປຣິຍາເຍນ ວິຄຣຫິຕ຺ວາ ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ‘‘ສຈ຺ຈໍ ກິຣ ຕ຺ວໍ, ອຸທາຍິ, ມາຕຸຄາມສ຺ສ ຘມ຺ມໍ ເທເສສີ’’ຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕ຺ວໍ, ໂມຆປຸຣິສ, ມາຕຸຄາມສ຺ສ ຘມ຺ມໍ ເທເສສ຺ສສິ. ເນຕໍ ໂມຆປຸຣິສ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ໂຍ ປນ ຠິກ຺ຂຸ ມາຕຸຄາມສ຺ສ ຘມ຺ມໍ ເທເສຍ຺ຍ ປາຈິຕ຺ຕິຍ’’ນ຺ຕິ.

ເອວຎ຺ຈິທໍ ຠຄວຕາ ຠິກ຺ຂູນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໖໑. ເຕນ ໂຂ ປນ ສມເຍນ ອຸປາສິກາ ຠິກ຺ຂູ ປສ຺ສິຕ຺ວາ ເອຕທໂວຈຸໍ – ‘‘ອິງ຺ຆາຍ຺ຍາ ຘມ຺ມໍ ເທເສຖາ’’ຕິ. ‘‘ນ, ຠຄິນີ, ກປ຺ປຕິ ມາຕຸຄາມສ຺ສ ຘມ຺ມໍ ເທເສຕຸ’’ນ຺ຕິ. ‘‘ອິງ຺ຆາຍ຺ຍາ ຉປ຺ປຎ຺ຈວາຈາຫິ ຘມ຺ມໍ ເທເສຖ, ສກ຺ກາ ເອຕ຺ຕເກນປິ ຘມ຺ໂມ ອຎ຺ຎາຕຸ’’ນ຺ຕິ. ‘‘ນ, ຠຄິນີ, ກປ຺ປຕິ ມາຕຸຄາມສ຺ສ ຘມ຺ມໍ ເທເສຕຸ’’ນ຺ຕິ. ກຸກ຺ກຸຈ຺ຈາຍນ຺ຕາ ນ ເທເສສຸໍ. ອຸປາສິກາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອຍ຺ຍາ ອມ຺ເຫຫິ ຍາຈິຍມານາ ຘມ຺ມໍ ນ ເທເສສ຺ສນ຺ຕີ’’ຕິ! ອສ຺ໂສສຸໍ ໂຂ ຠິກ຺ຂູ ຕາສໍ ອຸປາສິການໍ ອຸຊ຺ຌາຍນ຺ຕີນໍ ຂິຍ຺ຍນ຺ຕີນໍ ວິປາເຈນ຺ຕີນໍ. ອຖ ໂຂ ເຕ ຠິກ຺ຂູ ຠຄວໂຕ ເອຕມຕ຺ຖໍ ອາໂຣເຈສຸໍ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ – ‘‘ອນຸຊານາມິ, ຠິກ຺ຂເວ, ມາຕຸຄາມສ຺ສ ຉປ຺ປຎ຺ຈວາຈາຫິ ຘມ຺ມໍ ເທເສຕຸໍ. ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ໂຍ ປນ ຠິກ຺ຂູ ມາຕຸຄາມສ຺ສ ອຸຕ຺ຕຣິຉປ຺ປຎ຺ຈວາຈາຫິ ຘມ຺ມໍ ເທເສຍ຺ຍ, ປາຈິຕ຺ຕິຍ’’ນ຺ຕິ.

ເອວຎ຺ຈິທໍ ຠຄວຕາ ຠິກ຺ຂູນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໖໒. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ – ‘‘ຠຄວຕາ ອນຸຎ຺ຎາຕໍ ມາຕຸຄາມສ຺ສ ຉປ຺ປຎ຺ຈວາຈາຫິ ຘມ຺ມໍ ເທເສຕຸ’’ນ຺ຕິ ເຕ ອວິຎ຺ຎຸໍ ປຸຣິສວິຄ຺ຄຫໍ ອຸປນິສີທາເປຕ຺ວາ ມາຕຸຄາມສ຺ສ ອຸຕ຺ຕຣິຉປ຺ປຎ຺ຈວາຈາຫິ ຘມ຺ມໍ ເທເສນ຺ຕິ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂູ ອວິຎ຺ຎຸໍ ປຸຣິສວິຄ຺ຄຫໍ ອຸປນິສີທາເປຕ຺ວາ ມາຕຸຄາມສ຺ສ ອຸຕ຺ຕຣິຉປ຺ປຎ຺ຈວາຈາຫິ ຘມ຺ມໍ ເທເສສ຺ສນ຺ຕີ’’ຕິ!

ອຖ ໂຂ ເຕ ຠິກ຺ຂູ ຉພ຺ພຄ຺ຄິເຍ ຠິກ຺ຂູ ອເນກປຣິຍາເຍນ ວິຄຣຫິຕ຺ວາ ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ‘‘ສຈ຺ຈໍ ກິຣ ຕຸມ຺ເຫ, ຠິກ຺ຂເວ, ອວິຎ຺ຎຸໍ ປຸຣິສວິຄ຺ຄຫໍ ອຸປນິສີທາເປຕ຺ວາ ມາຕຸຄາມສ຺ສ ອຸຕ຺ຕຣິຉປ຺ປຎ຺ຈວາຈາຫິ ຘມ຺ມໍ ເທເສຖາ’’ຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕຸມ຺ເຫ, ໂມຆປຸຣິສາ, ອວິຎ຺ຎຸໍ ປຸຣິສວິຄ຺ຄຫໍ ອຸປນິສີທາເປຕ຺ວາ ມາຕຸຄາມສ຺ສ ອຸຕ຺ຕຣິຉປ຺ປຎ຺ຈວາຈາຫິ ຘມ຺ມໍ ເທເສສ຺ສຖ! ເນຕໍ, ໂມຆປຸຣິສາ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໖໓. ‘‘ໂຍ ປນ ຠິກ຺ຂຸ ມາຕຸຄາມສ຺ສ ອຸຕ຺ຕຣິຉປ຺ປຎ຺ຈວາຈາຫິ ຘມ຺ມໍ ເທເສຍ຺ຍ, ອຎ຺ຎຕ຺ຣ ວິຎ຺ຎຸນາ ປຸຣິສວິຄ຺ຄເຫນ, ປາຈິຕ຺ຕິຍ’’ນ຺ຕິ.

໖໔. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ມາຕຸຄາໂມ ນາມ ມນຸສ຺ສິຕ຺ຖີ; ນ ຍກ຺ຂີ ນ ເປຕີ ນ ຕິຣຈ຺ຉານຄຕາ; ວິຎ຺ຎູ, ປຏິພລາ ສຸຠາສິຕທຸພ຺ຠາສິຕໍ ທຸຏ຺ຐຸລ຺ລາທຸຏ຺ຐຸລ຺ລໍ ອາຊານິຕຸໍ.

ອຸຕ຺ຕຣິຉປ຺ປຎ຺ຈວາຈາຫີຕິ ອຕິເຣກຉປ຺ປຎ຺ຈວາຈາຫິ.

ຘມ຺ໂມ ນາມ ພຸທ຺ຘຠາສິໂຕ, ສາວກຠາສິໂຕ, ອິສິຠາສິໂຕ, ເທວຕາຠາສິໂຕ, ອຕ຺ຖູປສຎ຺ຫິໂຕ, ຘມ຺ມູປສຎ຺ຫິໂຕ.

ເທເສຍ຺ຍາຕິ ປເທນ ເທເສຕິ, ປເທ ປເທ ອາປຕ຺ຕິ ປາຈິຕ຺ຕິຍສ຺ສ. ອກ຺ຂຣາຍ ເທເສຕິ, ອກ຺ຂຣກ຺ຂຣາຍ ອາປຕ຺ຕິ ປາຈິຕ຺ຕິຍສ຺ສ.

ອຎ຺ຎຕ຺ຣ ວິຎ຺ຎຸນາ ປຸຣິສວິຄ຺ຄເຫນາຕິ ຐເປຕ຺ວາ ວິຎ຺ຎຸໍ ປຸຣິສວິຄ຺ຄຫໍ. ວິຎ຺ຎູ ນາມ ປຸຣິສວິຄ຺ຄໂຫ, ປຏິພໂລ ໂຫຕິ ສຸຠາສິຕທຸພ຺ຠາສິຕໍ ທຸຏ຺ຐຸລ຺ລາທຸຏ຺ຐຸລ຺ລໍ ອາຊານິຕຸໍ.

໖໕. ມາຕຸຄາເມ ມາຕຸຄາມສຎ຺ຎີ ອຸຕ຺ຕຣິຉປ຺ປຎ຺ຈວາຈາຫິ ຘມ຺ມໍ ເທເສຕິ, ອຎ຺ຎຕ຺ຣ ວິຎ຺ຎຸນາ ປຸຣິສວິຄ຺ຄເຫນ, ອາປຕ຺ຕິ ປາຈິຕ຺ຕິຍສ຺ສ. ມາຕຸຄາເມ ເວມຕິໂກ ອຸຕ຺ຕຣິຉປ຺ປຎ຺ຈວາຈາຫິ ຘມ຺ມໍ ເທເສຕິ, ອຎ຺ຎຕ຺ຣ ວິຎ຺ຎຸນາ ປຸຣິສວິຄ຺ຄເຫນ, ອາປຕ຺ຕິ ປາຈິຕ຺ຕິຍສ຺ສ. ມາຕຸຄາເມ ອມາຕຸຄາມສຎ຺ຎີ ອຸຕ຺ຕຣິຉປ຺ປຎ຺ຈວາຈາຫິ ຘມ຺ມໍ ເທເສຕິ, ອຎ຺ຎຕ຺ຣ ວິຎ຺ຎຸນາ ປຸຣິສວິຄ຺ຄເຫນ, ອາປຕ຺ຕິ ປາຈິຕ຺ຕິຍສ຺ສ.

ຍກ຺ຂິຍາ ວາ ເປຕິຍາ ວາ ປຓ຺ຑກສ຺ສ ວາ ຕິຣຈ຺ຉານຄຕມນຸສ຺ສວິຄ຺ຄຫິຕ຺ຖິຍາ ວາ ອຸຕ຺ຕຣິຉປ຺ປຎ຺ຈວາຈາຫິ ຘມ຺ມໍ ເທເສຕິ, ອຎ຺ຎຕ຺ຣ ວິຎ຺ຎຸນາ ປຸຣິສວິຄ຺ຄເຫນ, ອາປຕ຺ຕິ ທຸກ຺ກຏສ຺ສ. ອມາຕຸຄາເມ ມາຕຸຄາມສຎ຺ຎີ, ອາປຕ຺ຕິ ທຸກ຺ກຏສ຺ສ. ອມາຕຸຄາເມ ເວມຕິໂກ, ອາປຕ຺ຕິ ທຸກ຺ກຏສ຺ສ. ອມາຕຸຄາເມ ອມາຕຸຄາມສຎ຺ຎີ, ອນາປຕ຺ຕິ.

໖໖. ອນາປຕ຺ຕິ ວິຎ຺ຎຸນາ ປຸຣິສວິຄ຺ຄເຫນ, ຉປ຺ປຎ຺ຈວາຈາຫິ ຘມ຺ມໍ ເທເສຕິ, ອູນກຉປ຺ປຎ຺ຈວາຈາຫິ ຘມ຺ມໍ ເທເສຕິ, ອຸຏ຺ຐຫິຕ຺ວາ ປຸນ ນິສີທິຕ຺ວາ ເທເສຕິ, ມາຕຸຄາໂມ ອຸຏ຺ຐຫິຕ຺ວາ ປຸນ ນິສີທຕິ ຕສ຺ມິໍ ເທເສຕິ, ອຎ຺ຎສ຺ສ ມາຕຸຄາມສ຺ສ ເທເສຕິ, ປຎ຺ຫໍ ປຸຈ຺ຉຕິ, ປຎ຺ຫໍ ປຸຏ຺ໂຐ ກເຖຕິ, ອຎ຺ຎສ຺ສຕ຺ຖາຍ ຠຓນ຺ຕໍ ມາຕຸຄາໂມ ສຸຓາຕິ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ຘມ຺ມເທສນາສິກ຺ຂາປທໍ ນິຏ຺ຐິຕໍ ສຕ຺ຕມໍ.