໑. ມຸສາວາທສິກ຺ຂາປທໍ

ອິເມ ໂຂ ປນາຍສ຺ມນ຺ໂຕ ທ຺ເວນວຸຕິ ປາຈິຕ຺ຕິຍາ

ຘມ຺ມາ ອຸທ຺ເທສໍ ອາຄຈ຺ຉນ຺ຕິ.

໑. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຫຕ຺ຖໂກ ສກ຺ຍປຸຕ຺ໂຕ ວາທກ຺ຂິຕ຺ໂຕ ໂຫຕິ. ໂສ ຕິຕ຺ຖິເຍຫິ ສທ຺ຘິໍ ສລ຺ລປນ຺ໂຕ ອວຊານິຕ຺ວາ ປຏິຊານາຕິ, ປຏິຊານິຕ຺ວາ ອວຊານາຕິ, ອຎ຺ເຎນຎ຺ຎໍ ປຏິຈຣຕິ, ສມ຺ປຊານມຸສາ ຠາສຕິ, ສງ຺ເກຕໍ ກຕ຺ວາ ວິສໍວາເທຕິ. ຕິຕ຺ຖິຍາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຫຕ຺ຖໂກ ສກ຺ຍປຸຕ຺ໂຕ ອມ຺ເຫຫິ ສທ຺ຘິໍ ສລ຺ລປນ຺ໂຕ ອວຊານິຕ຺ວາ ປຏິຊານິສ຺ສຕິ, ປຏິຊານິຕ຺ວາ ອວຊານິສ຺ສຕິ, ອຎ຺ເຎນຎ຺ຎໍ ປຏິຈຣິສ຺ສຕິ, ສມ຺ປຊານມຸສາ ຠາສິສ຺ສຕິ, ສງ຺ເກຕໍ ກຕ຺ວາ ວິສໍວາເທສ຺ສຕີ’’ຕິ!

ອສ຺ໂສສຸໍ ໂຂ ຠິກ຺ຂູ ເຕສໍ ຕິຕ຺ຖິຍານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ອຖ ໂຂ ເຕ ຠິກ຺ຂູ ເຍນ ຫຕ຺ຖໂກ ສກ຺ຍປຸຕ຺ໂຕ ເຕນຸປສງ຺ກມິໍສຸ; ອຸປສງ຺ກມິຕ຺ວາ ຫຕ຺ຖກໍ ສກ຺ຍປຸຕ຺ຕໍ ເອຕທໂວຈຸໍ – ‘‘ສຈ຺ຈໍ ກິຣ ຕ຺ວໍ, ອາວຸໂສ ຫຕ຺ຖກ, ຕິຕ຺ຖິເຍຫິ ສທ຺ຘິໍ ສລ຺ລປນ຺ໂຕ ອວຊານິຕ຺ວາ ປຏິຊານາສິ, ປຏິຊານິຕ຺ວາ ອວຊານາສິ, ອຎ຺ເຎນຎ຺ຎໍ ປຏິຈຣສິ, ສມ຺ປຊານມຸສາ ຠາສສິ, ສງ຺ເກຕໍ ກຕ຺ວາ ວິສໍວາເທສີ’’ຕິ? ‘‘ເອເຕ ໂຂ, ອາວຸໂສ, ຕິຕ຺ຖິຍາ ນາມ ເຍນ ເກນຈິ ເຊຕພ຺ພາ; ເນວ ເຕສໍ ຊໂຍ ທາຕພ຺ໂພ’’ຕິ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຫຕ຺ຖໂກ ສກ຺ຍປຸຕ຺ໂຕ ຕິຕ຺ຖິເຍຫິ ສທ຺ຘິໍ ສລ຺ລປນ຺ໂຕ ອວຊານິຕ຺ວາ ປຏິຊານິສ຺ສຕິ, ປຏິຊານິຕ຺ວາ ອວຊານິສ຺ສຕິ, ອຎ຺ເຎນຎ຺ຎໍ ປຏິຈຣິສ຺ສຕິ, ສມ຺ປຊານມຸສາ ຠາສິສ຺ສຕິ, ສງ຺ເກຕໍ ກຕ຺ວາ ວິສໍວາເທສ຺ສຕີ’’ຕິ!

ອຖ ໂຂ ເຕ ຠິກ຺ຂູ ຫຕ຺ຖກໍ ສກ຺ຍປຸຕ຺ຕໍ ອເນກປຣິຍາເຍນ ວິຄຣຫິຕ຺ວາ ຠຄວໂຕ ເອຕມຕ຺ຖໍ ອາໂຣເຈສຸໍ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຠິກ຺ຂຸສງ຺ຆໍ ສນ຺ນິປາຕາເປຕ຺ວາ ຫຕ຺ຖກໍ ສກ຺ຍປຸຕ຺ຕໍ ປຏິປຸຈ຺ຉິ – ‘‘ສຈ຺ຈໍ ກິຣ ຕ຺ວໍ, ຫຕ຺ຖກ, ຕິຕ຺ຖິເຍຫິ ສທ຺ຘິໍ ສລ຺ລປນ຺ໂຕ ອວຊານິຕ຺ວາ ປຏິຊານາສິ, ປຏິຊານິຕ຺ວາ ອວຊານາສິ, ອຎ຺ເຎນຎ຺ຎໍ ປຏິຈຣສິ, ສມ຺ປຊານມຸສາ ຠາສສິ, ສງ຺ເກຕໍ ກຕ຺ວາ ວິສໍວາເທສີ’’ຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕ຺ວໍ, ໂມຆປຸຣິສ, ຕິຕ຺ຖິເຍຫິ ສທ຺ຘິໍ ສລ຺ລປນ຺ໂຕ ອວຊານິຕ຺ວາ ປຏິຊານິສ຺ສສິ, ປຏິຊານິຕ຺ວາ ອວຊານິສ຺ສສິ, ອຎ຺ເຎນຎ຺ຎໍ ປຏິຈຣິສ຺ສສິ, ສມ຺ປຊານມຸສາ ຠາສິສ຺ສສິ, ສງ຺ເກຕໍ ກຕ຺ວາ ວິສໍວາເທສ຺ສສິ! ເນຕໍ, ໂມຆປຸຣິສ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໒. ‘‘ສມ຺ປຊານມຸສາວາເທ ປາຈິຕ຺ຕິຍ’’ນ຺ຕິ.

໓. ສມ຺ປຊານມຸສາວາໂທ ນາມ ວິສໍວາທນປຸເຣກ຺ຂາຣສ຺ສ ວາຈາ, ຄິຣາ, ພ຺ຍປ຺ປໂຖ, ວຈີເຠໂທ, ວາຈສິກາ ວິຎ຺ຎຕ຺ຕິ, ອຏ຺ຐ ອນຣິຍໂວຫາຣາ – ອທິຏ຺ຐໍ ທິຏ຺ຐໍ ເມຕິ, ອສ຺ສຸຕໍ ສຸຕໍ ເມຕິ, ອມຸຕໍ ມຸຕໍ ເມຕິ, ອວິຎ຺ຎາຕໍ ວິຎ຺ຎາຕໍ ເມຕິ, ທິຏ຺ຐໍ ອທິຏ຺ຐໍ ເມຕິ, ສຸຕໍ ອສ຺ສຸຕໍ ເມຕິ, ມຸຕໍ ອມຸຕໍ ເມຕິ, ວິຎ຺ຎາຕໍ ອວິຎ຺ຎາຕໍ ເມຕິ.

ອທິຏ຺ຐໍ ນາມ ນ ຈກ຺ຂຸນາ ທິຏ຺ຐໍ. ອສ຺ສຸຕໍ ນາມ ນ ໂສເຕນ ສຸຕໍ. ອມຸຕໍ ນາມ ນ ຆາເນນ ຆາຍິຕໍ, ນ ຊິວ຺ຫາຍ ສາຍິຕໍ, ນ ກາເຍນ ຜຸຏ຺ຐໍ. ອວິຎ຺ຎາຕໍ ນາມ ນ ມນສາ ວິຎ຺ຎາຕໍ. ທິຏ຺ຐໍ ນາມ ຈກ຺ຂຸນາ ທິຏ຺ຐໍ. ສຸຕໍ ນາມ ໂສເຕນ ສຸຕໍ. ມຸຕໍ ນາມ ຆາເນນ ຆາຍິຕໍ, ຊິວ຺ຫາຍ ສາຍິຕໍ, ກາເຍນ ຜຸຏ຺ຐໍ. ວິຎ຺ຎາຕໍ ນາມ ມນສາ ວິຎ຺ຎາຕໍ.

໔. ຕີຫາກາເຣຫິ ‘‘ອທິຏ຺ຐໍ ທິຏ຺ຐໍ ເມ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ – ປຸພ຺ເພວສ຺ສ ໂຫຕິ ‘‘ມຸສາ ຠຓິສ຺ສ’’ນ຺ຕິ, ຠຓນ຺ຕສ຺ສ ໂຫຕິ ‘‘ມຸສາ ຠຓາມີ’’ຕິ, ຠຓິຕສ຺ສ ໂຫຕິ ‘‘ມຸສາ ມຍາ ຠຓິຕ’’ນ຺ຕິ.

ຈຕູຫາກາເຣຫິ ‘‘ອທິຏ຺ຐໍ ທິຏ຺ຐໍ ເມ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ – ປຸພ຺ເພວສ຺ສ ໂຫຕິ ‘‘ມຸສາ ຠຓິສ຺ສ’’ນ຺ຕິ, ຠຓນ຺ຕສ຺ສ ໂຫຕິ ‘‘ມຸສາ ຠຓາມີ’’ຕິ, ຠຓິຕສ຺ສ ໂຫຕິ ‘‘ມຸສາ ມຍາ ຠຓິຕ’’ນ຺ຕິ, ວິນິຘາຍ ທິຏ຺ຐິໍ.

ປຎ຺ຈຫາກາເຣຫິ ‘‘ອທິຏ຺ຐໍ ທິຏ຺ຐໍ ເມ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ – ປຸພ຺ເພວສ຺ສ ໂຫຕິ ‘‘ມຸສາ ຠຓິສ຺ສ’’ນ຺ຕິ, ຠຓນ຺ຕສ຺ສ ໂຫຕິ ‘‘ມຸສາ ຠຓາມີ’’ຕິ, ຠຓິຕສ຺ສ ໂຫຕິ ‘‘ມຸສາ ມຍາ ຠຓິຕ’’ນ຺ຕິ, ວິນິຘາຍ ທິຏ຺ຐິໍ, ວິນິຘາຍ ຂນ຺ຕິໍ.

ຉຫາກາເຣຫິ ‘‘ອທິຏ຺ຐໍ ທິຏ຺ຐໍ ເມ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ – ປຸພ຺ເພວສ຺ສ ໂຫຕິ ‘‘ມຸສາ ຠຓິສ຺ສ’’ນ຺ຕິ, ຠຓນ຺ຕສ຺ສ ໂຫຕິ ‘‘ມຸສາ ຠຓາມີ’’ຕິ, ຠຓິຕສ຺ສ ໂຫຕິ ‘‘ມຸສາ ມຍາ ຠຓິຕ’’ນ຺ຕິ, ວິນິຘາຍ ທິຏ຺ຐິໍ, ວິນິຘາຍ ຂນ຺ຕິໍ, ວິນິຘາຍ ຣຸຈິໍ.

ສຕ຺ຕຫາກາເຣຫິ ‘‘ອທິຏ຺ຐໍ ທິຏ຺ຐໍ ເມ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ’’ – ປຸພ຺ເພວສ຺ສ ໂຫຕິ ‘‘ມຸສາ ຠຓິສ຺ສ’’ນ຺ຕິ, ຠຓນ຺ຕສ຺ສ ໂຫຕິ ‘‘ມຸສາ ຠຓາມີ’’ຕິ, ຠຓິຕສ຺ສ ໂຫຕິ ‘‘ມຸສາ ມຍາ ຠຓິຕ’’ນ຺ຕິ, ວິນິຘາຍ ທິຏ຺ຐິໍ, ວິນິຘາຍ ຂນ຺ຕິໍ, ວິນິຘາຍ ຣຸຈິໍ, ວິນິຘາຍ ຠາວໍ.

໕. ຕີຫາກາເຣຫິ ‘‘ອສ຺ສຸຕໍ ສຸຕໍ ເມ’’ຕິ…ເປ… ອມຸຕໍ ມຸຕໍ ເມຕິ…ເປ… ອວິຎ຺ຎາຕໍ ວິຎ຺ຎາຕໍ ເມຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ – ປຸພ຺ເພວສ຺ສ ໂຫຕິ ‘‘ມຸສາ ຠຓິສ຺ສ’’ນ຺ຕິ, ຠຓນ຺ຕສ຺ສ ໂຫຕິ ‘‘ມຸສາ ຠຓາມີ’’ຕິ, ຠຓິຕສ຺ສ ໂຫຕິ ‘‘ມຸສາ ມຍາ ຠຓິຕ’’ນ຺ຕິ.

ຈຕູຫາກາເຣຫິ…ເປ… ປຎ຺ຈຫາກາເຣຫິ…ເປ… ຉຫາກາເຣຫິ…ເປ… ສຕ຺ຕຫາກາເຣຫິ ‘‘ອວິຎ຺ຎາຕໍ ວິຎ຺ຎາຕໍ ເມ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ – ປຸພ຺ເພວສ຺ສ ໂຫຕິ ‘‘ມຸສາ ຠຓິສ຺ສ’’ນ຺ຕິ, ຠຓນ຺ຕສ຺ສ ໂຫຕິ ‘‘ມຸສາ ຠຓາມີ’’ຕິ, ຠຓິຕສ຺ສ ໂຫຕິ ‘‘ມຸສາ ມຍາ ຠຓິຕນ຺ຕິ, ວິນິຘາຍ ທິຏ຺ຐິໍ, ວິນິຘາຍ ຂນ຺ຕິໍ, ວິນິຘາຍ ຣຸຈິໍ, ວິນິຘາຍ ຠາວໍ.

໖. ຕີຫາກາເຣຫິ ‘‘ອທິຏ຺ຐໍ ທິຏ຺ຐຎ຺ຈ ເມ ສຸຕຎ຺ຈາ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ…ເປ… ຕີຫາກາເຣຫິ ‘‘ອທິຏ຺ຐໍ ທິຏ຺ຐຎ຺ຈ ເມ ມຸຕຎ຺ຈາ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ…ເປ… ຕີຫາກາເຣຫິ ‘‘ອທິຏ຺ຐໍ ທິຏ຺ຐຎ຺ຈ ເມ ວິຎ຺ຎາຕຎ຺ຈາ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ …ເປ… ຕີຫາກາເຣຫິ ອທິຏ຺ຐໍ ‘‘ທິຏ຺ຐຎ຺ຈ ເມ ສຸຕຎ຺ຈ ມຸຕຎ຺ຈາ’’ຕິ…ເປ… ຕີຫາກາເຣຫິ ອທິຏ຺ຐໍ ‘‘ທິຏ຺ຐຎ຺ຈ ເມ ສຸຕຎ຺ຈ ວິຎ຺ຎາຕຎ຺ຈາ’’ຕິ…ເປ… ຕີຫາກາເຣຫິ ອທິຏ຺ຐໍ ‘‘ທິຏ຺ຐຎ຺ຈ ເມ ສຸຕຎ຺ຈ ມຸຕຎ຺ຈ ວິຎ຺ຎາຕຎ຺ຈາ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ…ເປ….

ຕີຫາກາເຣຫິ ອສ຺ສຸຕໍ ‘‘ສຸຕຎ຺ຈ ເມ ມຸຕຎ຺ຈາ’’ຕິ…ເປ… ຕີຫາກາເຣຫິ ອສ຺ສຸຕໍ ‘‘ສຸຕຎ຺ຈ ເມ ວິຎ຺ຎາຕຎ຺ຈາ’’ຕິ…ເປ… ຕີຫາກາເຣຫິ ອສ຺ສຸຕໍ ‘‘ສຸຕຎ຺ຈ ເມ ທິຏ຺ຐຎ຺ຈາ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ…ເປ… ຕີຫາກາເຣຫິ ອສ຺ສຸຕໍ ‘‘ສຸຕຎ຺ຈ ເມ ມຸຕຎ຺ຈ ວິຎ຺ຎາຕຎ຺ຈາ’’ຕິ…ເປ… ຕີຫາກາເຣຫິ ອສ຺ສຸຕໍ ‘‘ສຸຕຎ຺ຈ ເມ ມຸຕຎ຺ຈ ທິຏ຺ຐຎ຺ຈາ’’ຕິ…ເປ… ຕີຫາກາເຣຫິ ອສ຺ສຸຕໍ ‘‘ສຸຕຎ຺ຈ ເມ ມຸຕຎ຺ຈ ວິຎ຺ຎາຕຎ຺ຈ ທິຏ຺ຐຎ຺ຈາ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ…ເປ….

ຕີຫາກາເຣຫິ ອມຸຕໍ ‘‘ມຸຕຎ຺ຈ ເມ ວິຎ຺ຎາຕຎ຺ຈາ’’ຕິ…ເປ… ຕີຫາກາເຣຫິ ອມຸຕໍ ‘‘ມຸຕຎ຺ຈ ເມ ທິຏ຺ຐຎ຺ຈາ’’ຕິ…ເປ… ຕີຫາກາເຣຫິ ອມຸຕໍ ‘‘ມຸຕຎ຺ຈ ເມ ສຸຕຎ຺ຈາ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ…ເປ… ຕີຫາກາເຣຫິ ອມຸຕໍ ‘‘ມຸຕຎ຺ຈ ເມ ວິຎ຺ຎາຕຎ຺ຈ ທິຏ຺ຐຎ຺ຈາ’’ຕິ…ເປ… ຕີຫາກາເຣຫິ ອມຸຕໍ ‘‘ມຸຕຎ຺ຈ ເມ ວິຎ຺ຎາຕຎ຺ຈ ສຸຕຎ຺ຈາ’’ຕິ…ເປ… ຕີຫາກາເຣຫິ ອມຸຕໍ ‘‘ມຸຕຎ຺ຈ ເມ ວິຎ຺ຎາຕຎ຺ຈ ທິຏ຺ຐຎ຺ຈ ສຸຕຎ຺ຈາ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ…ເປ….

ຕີຫາກາເຣຫິ ອວິຎ຺ຎາຕໍ ‘‘ວິຎ຺ຎາຕຎ຺ຈ ເມ ທິຏ຺ຐຎ຺ຈາ’’ຕິ…ເປ… ຕີຫາກາເຣຫິ ອວິຎ຺ຎາຕໍ ‘‘ວິຎ຺ຎາຕຎ຺ຈ ເມ ສຸຕຎ຺ຈາ’’ຕິ…ເປ… ຕີຫາກາເຣຫິ ອວິຎ຺ຎາຕໍ ‘‘ວິຎ຺ຎາຕຎ຺ຈ ເມ ມຸຕຎ຺ຈາ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ…ເປ… ຕີຫາກາເຣຫິ ອວິຎ຺ຎາຕໍ ‘‘ວິຎ຺ຎາຕຎ຺ຈ ເມ ທິຏ຺ຐຎ຺ຈ ສຸຕຎ຺ຈາ’’ຕິ…ເປ… ຕີຫາກາເຣຫິ ອວິຎ຺ຎາຕໍ ‘‘ວິຎ຺ຎາຕຎ຺ຈ ເມ ທິຏ຺ຐຎ຺ຈ ມຸຕຎ຺ຈາ’’ຕິ…ເປ… ຕີຫາກາເຣຫິ ອວິຎ຺ຎາຕໍ ‘‘ວິຎ຺ຎາຕຎ຺ຈ ເມ ທິຏ຺ຐຎ຺ຈ ສຸຕຎ຺ຈ ມຸຕຎ຺ຈາ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ…ເປ….

໗. ຕີຫາກາເຣຫິ ທິຏ຺ຐໍ ‘‘ອທິຏ຺ຐໍ ເມ’’ຕິ…ເປ… ສຸຕໍ ‘‘ອສ຺ສຸຕໍ ເມ’’ຕິ…ເປ… ມຸຕໍ ‘‘ອມຸຕໍ ເມ’’ຕິ…ເປ… ວິຎ຺ຎາຕໍ ‘‘ອວິຎ຺ຎາຕໍ ເມ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ…ເປ….

໘. ຕີຫາກາເຣຫິ ທິຏ຺ຐໍ ‘‘ສຸຕໍ ເມ’’ຕິ…ເປ… ຕີຫາກາເຣຫິ ທິຏ຺ຐໍ ‘‘ມຸຕໍ ເມ’’ຕິ…ເປ… ຕີຫາກາເຣຫິ ທິຏ຺ຐໍ ‘‘ວິຎ຺ຎາຕໍ ເມ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ…ເປ… ຕີຫາກາເຣຫິ ທິຏ຺ຐໍ ‘‘ສຸຕຎ຺ຈ ເມ ມຸຕຎ຺ຈາ’’ຕິ…ເປ… ຕີຫາກາເຣຫິ ທິຏ຺ຐໍ ‘‘ສຸຕຎ຺ຈ ເມ ວິຎ຺ຎາຕຎ຺ຈາ’’ຕິ…ເປ… ຕີຫາກາເຣຫິ ທິຏ຺ຐໍ ‘‘ສຸຕຎ຺ຈ ເມ ມຸຕຎ຺ຈ ວິຎ຺ຎາຕຎ຺ຈາ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ…ເປ….

ຕີຫາກາເຣຫິ ສຸຕໍ ‘‘ມຸຕໍ ເມ’’ຕິ…ເປ… ຕີຫາກາເຣຫິ ສຸຕໍ ‘‘ວິຎ຺ຎາຕໍ ເມ’’ຕິ…ເປ… ຕີຫາກາເຣຫິ ສຸຕໍ ‘‘ທິຏ຺ຐໍ ເມ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ…ເປ… ຕີຫາກາເຣຫິ ສຸຕໍ ‘‘ມຸຕຎ຺ຈ ເມ ວິຎ຺ຎາຕຎ຺ຈາ’’ຕິ…ເປ… ຕີຫາກາເຣຫິ ສຸຕໍ ‘‘ມຸຕຎ຺ຈ ເມ ທິຏ຺ຐຎ຺ຈາ’’ຕິ…ເປ… ຕີຫາກາເຣຫິ ສຸຕໍ ‘‘ມຸຕຎ຺ຈ ເມ ວິຎ຺ຎາຕຎ຺ຈ ທິຏ຺ຐຎ຺ຈາ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ…ເປ….

ຕີຫາກາເຣຫິ ມຸຕໍ ‘‘ວິຎ຺ຎາຕໍ ເມ’’ຕິ…ເປ… ຕີຫາກາເຣຫິ ມຸຕໍ ‘‘ທິຏ຺ຐໍ ເມ’’ຕິ…ເປ… ຕີຫາກາເຣຫິ ມຸຕໍ ‘‘ສຸຕໍ ເມ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ…ເປ… ຕີຫາກາເຣຫິ ມຸຕໍ ‘‘ວິຎ຺ຎາຕຎ຺ຈ ເມ ທິຏ຺ຐຎ຺ຈາ’’ຕິ…ເປ… ຕີຫາກາເຣຫິ ມຸຕໍ ‘‘ວິຎ຺ຎາຕຎ຺ຈ ເມ ສຸຕຎ຺ຈາ’’ຕິ…ເປ… ຕີຫາກາເຣຫິ ມຸຕໍ ‘‘ວິຎ຺ຎາຕຎ຺ຈ ເມ ທິຏ຺ຐຎ຺ຈ ສຸຕຎ຺ຈາ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ…ເປ….

ຕີຫາກາເຣຫິ ວິຎ຺ຎາຕໍ ‘‘ທິຏ຺ຐໍ ເມ’’ຕິ…ເປ… ຕີຫາກາເຣຫິ ວິຎ຺ຎາຕໍ ‘‘ສຸຕໍ ເມ’’ຕິ …ເປ… ຕີຫາກາເຣຫິ ວິຎ຺ຎາຕໍ ‘‘ມຸຕໍ ເມ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ…ເປ… ຕີຫາກາເຣຫິ ວິຎ຺ຎາຕໍ ‘‘ທິຏ຺ຐຎ຺ຈ ເມ ສຸຕຎ຺ຈາ’’ຕິ…ເປ… ຕີຫາກາເຣຫິ ວິຎ຺ຎາຕໍ ‘‘ທິຏ຺ຐຎ຺ຈ ເມ ມຸຕຎ຺ຈາ’’ຕິ…ເປ… ຕີຫາກາເຣຫິ ວິຎ຺ຎາຕໍ ‘‘ທິຏ຺ຐຎ຺ຈ ເມ ສຸຕຎ຺ຈ ມຸຕຎ຺ຈາ’’ຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ…ເປ….

໙. ຕີຫາກາເຣຫິ ທິຏ຺ເຐ ເວມຕິໂກ ທິຏ຺ຐໍ ໂນກປ຺ເປຕິ, ທິຏ຺ຐໍ ນສ຺ສຣຕິ, ທິຏ຺ຐໍ ປມຸຏ຺ໂຐ ໂຫຕິ…ເປ… ສຸເຕ ເວມຕິໂກ ສຸຕໍ ໂນກປ຺ເປຕິ, ສຸຕໍ ນສ຺ສຣຕິ, ສຸຕໍ ປມຸຏ຺ໂຐ ໂຫຕິ…ເປ… ມຸເຕ ເວມຕິໂກ ມຸຕໍ ໂນກປ຺ເປຕິ, ມຸຕໍ ນສ຺ສຣຕິ, ມຸຕໍ ປມຸຏ຺ໂຐ ໂຫຕິ…ເປ… ວິຎ຺ຎາເຕ ເວມຕິໂກ ວິຎ຺ຎາຕໍ ໂນກປ຺ເປຕິ, ວິຎ຺ຎາຕໍ ນສ຺ສຣຕິ, ວິຎ຺ຎາຕໍ ປມຸຏ຺ໂຐ ໂຫຕິ… ວິຎ຺ຎາຕຎ຺ຈ ເມ ທິຏ຺ຐຎ຺ຈາຕິ…ເປ… ວິຎ຺ຎາຕໍ ປມຸຏ຺ໂຐ ໂຫຕິ ວິຎ຺ຎາຕຎ຺ຈ ເມ ສຸຕຎ຺ຈາຕິ…ເປ… ວິຎ຺ຎາຕໍ ປມຸຏ຺ໂຐ ໂຫຕິ; ວິຎ຺ຎາຕຎ຺ຈ ເມ ມຸຕຎ຺ຈາຕິ…ເປ… ວິຎ຺ຎາຕໍ ປມຸຏ຺ໂຐ ໂຫຕິ; ວິຎ຺ຎາຕຎ຺ຈ ເມ ທິຏ຺ຐຎ຺ຈ ສຸຕຎ຺ຈາຕິ…ເປ… ວິຎ຺ຎາຕໍ ປມຸຏ຺ໂຐ ໂຫຕິ; ວິຎ຺ຎາຕຎ຺ຈ ເມ ທິຏ຺ຐຎ຺ຈ ມຸຕຎ຺ຈາຕິ…ເປ… ວິຎ຺ຎາຕໍ ປມຸຏ຺ໂຐ ໂຫຕິ; ວິຎ຺ຎາຕຎ຺ຈ ເມ ທິຏ຺ຐຎ຺ຈ ສຸຕຎ຺ຈ ມຸຕຎ຺ຈາຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ.

໑໐. ຈຕູຫາກາເຣຫິ…ເປ… ປຎ຺ຈຫາກາເຣຫິ…ເປ… ຉຫາກາເຣຫິ…ເປ… ສຕ຺ຕຫາກາເຣຫິ…ເປ… ວິຎ຺ຎາຕໍ ປມຸຏ຺ໂຐ ໂຫຕິ, ວິຎ຺ຎາຕຎ຺ຈ ເມ ທິຏ຺ຐຎ຺ຈ ສຸຕຎ຺ຈ ມຸຕຎ຺ຈາຕິ ສມ຺ປຊານມຸສາ ຠຓນ຺ຕສ຺ສ ອາປຕ຺ຕິ ປາຈິຕ຺ຕິຍສ຺ສ – ປຸພ຺ເພວສ຺ສ ໂຫຕິ ‘‘ມຸສາ ຠຓິສ຺ສ’’ນ຺ຕິ, ຠຓນ຺ຕສ຺ສ ໂຫຕິ ‘‘ມຸສາ ຠຓາມີ’’ຕິ, ຠຓິຕສ຺ສ ໂຫຕິ ‘‘ມຸສາ ມຍາ ຠຓິຕ’’ນ຺ຕິ, ວິນິຘາຍ ທິຏ຺ຐິໍ, ວິນິຘາຍ ຂນ຺ຕິໍ, ວິນິຘາຍ ຣຸຈິໍ, ວິນິຘາຍ ຠາວໍ.

໑໑. ອນາປຕ຺ຕິ ທວາ ຠຓຕິ, ຣວາ ຠຓຕິ [ທວາຍ ຠຓຕິ, ຣວາຍ ຠຓຕິ (ສ຺ຍາ.)]. ‘‘ທວາ ຠຓຕິ ນາມ ສຫສາ ຠຓຕິ. ຣວາ ຠຓຕິ ນາມ ‘ອຎ຺ຎໍ ຠຓິສ຺ສາມີ’ຕິ ອຎ຺ຎໍ ຠຓຕິ’’. ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ມຸສາວາທສິກ຺ຂາປທໍ ນິຏ຺ຐິຕໍ ປຐມໍ.