໒໔໐. ອຘມ຺ມກມ຺ມາທິກຖາ

໓໙໗. ອິຘ ປນ, ຠິກ຺ຂເວ, ຠິກ຺ຂຸສ຺ສ ນ ໂຫຕິ ອາປຕ຺ຕິ ທຏ຺ຐພ຺ພາ. ຕເມນໍ ໂຈເທຕິ ສງ຺ໂຆ ວາ ສມ຺ພຫຸລາ ວາ ເອກປຸຄ຺ຄໂລ ວາ – ‘‘ອາປຕ຺ຕິໍ ຕ຺ວໍ, ອາວຸໂສ, ອາປນ຺ໂນ, ປສ຺ສເສຕໍ ອາປຕ຺ຕິ’’ນ຺ຕິ? ໂສ ເອວໍ ວເທຕິ – ‘‘ນຕ຺ຖິ ເມ, ອາວຸໂສ, ອາປຕ຺ຕິ, ຍມຫໍ ປສ຺ເສຍ຺ຍ’’ນ຺ຕິ. ຕໍ ສງ຺ໂຆ ອາປຕ຺ຕິຍາ ອທສ຺ສເນ ອຸກ຺ຂິປຕິ – ອຘມ຺ມກມ຺ມໍ.

ອິຘ ປນ, ຠິກ຺ຂເວ, ຠິກ຺ຂຸສ຺ສ ນ ໂຫຕິ ອາປຕ຺ຕິ ປຏິກາຕພ຺ພາ. ຕເມນໍ ໂຈເທຕິ ສງ຺ໂຆ ວາ ສມ຺ພຫຸລາ ວາ ເອກປຸຄ຺ຄໂລ ວາ – ‘‘ອາປຕ຺ຕິໍ ຕ຺ວໍ, ອາວຸໂສ, ອາປນ຺ໂນ, ປຏິກໂຣຫິ ຕໍ ອາປຕ຺ຕິ’’ນ຺ຕິ. ໂສ ເອວໍ ວເທຕິ – ‘‘ນຕ຺ຖິ ເມ, ອາວຸໂສ, ອາປຕ຺ຕິ, ຍມຍໍ ປຏິກເຣຍ຺ຍ’’ນ຺ຕິ. ຕໍ ສງ຺ໂຆ ອາປຕ຺ຕິຍາ ອປ຺ປຏິກມ຺ເມ ອຸກ຺ຂິປຕິ – ອຘມ຺ມກມ຺ມໍ.

ອິຘ ປນ, ຠິກ຺ຂເວ, ຠິກ຺ຂຸສ຺ສ ນ ໂຫຕິ ປາປິກາ ທິຏ຺ຐິ ປຏິນິສ຺ສຊ຺ເຊຕາ. ຕເມນໍ ໂຈເທຕິ ສງ຺ໂຆ ວາ ສມ຺ພຫຸລາ ວາ ເອກປຸຄ຺ຄໂລ ວາ – ‘‘ປາປິກາ ເຕ, ອາວຸໂສ, ທິຏ຺ຐິ, ປຏິນິສ຺ສຊ຺ເຊຕໍ ປາປິກໍ ທິຏ຺ຐິ’’ນ຺ຕິ. ໂສ ເອວໍ ວເທຕິ – ‘‘ນຕ຺ຖິ ເມ, ອາວຸໂສ, ປາປິກາ ທິຏ຺ຐິ, ຍມຫໍ ປຏິນິສ຺ສຊ຺ເຊຍ຺ຍ’’ນ຺ຕິ. ຕໍ ສງ຺ໂຆ ປາປິກາຍ ທິຏ຺ຐິຍາ ອປ຺ປຏິນິສ຺ສຄ຺ເຄ ອຸກ຺ຂິປຕິ – ອຘມ຺ມກມ຺ມໍ.

ອິຘ ປນ, ຠິກ຺ຂເວ, ຠິກ຺ຂຸສ຺ສ ນ ໂຫຕິ ອາປຕ຺ຕິ ທຏ຺ຐພ຺ພາ, ນ ໂຫຕິ ອາປຕ຺ຕິ ປຏິກາຕພ຺ພາ. ຕເມນໍ ໂຈເທຕິ ສງ຺ໂຆ ວາ ສມ຺ພຫຸລາ ວາ ເອກປຸຄ຺ຄໂລ ວາ – ‘‘ອາປຕ຺ຕິໍ ຕ຺ວໍ, ອາວຸໂສ, ອາປນ຺ໂນ, ປສ຺ສເສຕໍ ອາປຕ຺ຕິ? ປຏິກໂຣຫິ ຕໍ ອາປຕ຺ຕິ’’ນ຺ຕິ. ໂສ ເອວໍ ວເທຕິ – ‘‘ນຕ຺ຖິ ເມ, ອາວຸໂສ, ອາປຕ຺ຕິ, ຍມຫໍ ປສ຺ເສຍ຺ຍໍ. ນຕ຺ຖິ ເມ, ອາວຸໂສ, ອາປຕ຺ຕິ, ຍມຫໍ ປຏິກເຣຍ຺ຍ’’ນ຺ຕິ. ຕໍ ສງ຺ໂຆ ອທສ຺ສເນ ວາ ອປ຺ປຏິກມ຺ເມ ວາ ອຸກ຺ຂິປຕິ – ອຘມ຺ມກມ຺ມໍ.

ອິຘ ປນ, ຠິກ຺ຂເວ, ຠິກ຺ຂຸສ຺ສ ນ ໂຫຕິ ອາປຕ຺ຕິ ທຏ຺ຐພ຺ພາ, ນ ໂຫຕິ ປາປິກາ ທິຏ຺ຐິ ປຏິນິສ຺ສຊ຺ເຊຕາ. ຕເມນໍ ໂຈເທຕິ ສງ຺ໂຆ ວາ ສມ຺ພຫຸລາ ວາ ເອກປຸຄ຺ຄໂລ ວາ – ‘‘ອາປຕ຺ຕິໍ ຕ຺ວໍ, ອາວຸໂສ, ອາປນ຺ໂນ, ປສ຺ສເສຕໍ ອາປຕ຺ຕິໍ? ປາປິກາ ເຕ ທິຏ຺ຐິ, ປຏິນິສ຺ສຊ຺ເຊຕໍ ປາປິກໍ ທິຏ຺ຐິ’’ນ຺ຕິ. ໂສ ເອວໍ ວເທຕິ – ‘‘ນຕ຺ຖິ ເມ, ອາວຸໂສ, ອາປຕ຺ຕິ, ຍມຫໍ ປສ຺ເສຍ຺ຍໍ; ນຕ຺ຖິ ເມ, ອາວຸໂສ, ປາປິກາ ທິຏ຺ຐິ, ຍມຫໍ ປຏິນິສ຺ສຊ຺ເຊຍ຺ຍ’’ນ຺ຕິ. ຕໍ ສງ຺ໂຆ ອທສ຺ສເນ ວາ ອປ຺ປຏິນິສ຺ສຄ຺ເຄ ວາ ອຸກ຺ຂິປຕິ – ອຘມ຺ມກມ຺ມໍ.

ອິຘ ປນ, ຠິກ຺ຂເວ, ຠິກ຺ຂຸສ຺ສ ນ ໂຫຕິ ອາປຕ຺ຕິ ປຏິກາຕພ຺ພາ, ນ ໂຫຕິ ປາປິກາ ທິຏ຺ຐິ ປຏິນິສ຺ສຊ຺ເຊຕາ. ຕເມນໍ ໂຈເທຕິ ສງ຺ໂຆ ວາ ສມ຺ພຫຸລາ ວາ ເອກປຸຄ຺ຄໂລ ວາ – ‘‘ອາປຕ຺ຕິໍ ຕ຺ວໍ, ອາວຸໂສ, ອາປນ຺ໂນ, ປຏິກໂຣຫິ ຕໍ ອາປຕ຺ຕິໍ; ປາປິກາ ເຕ ທິຏ຺ຐິ, ປຏິນິສ຺ສຊ຺ເຊຕໍ ປາປິກໍ ທິຏ຺ຐິ’’ນ຺ຕິ. ໂສ ເອວໍ ວເທຕິ – ‘‘ນຕ຺ຖິ ເມ, ອາວຸໂສ, ອາປຕ຺ຕິ, ຍມຫໍ ປຏິກເຣຍ຺ຍໍ. ນຕ຺ຖິ ເມ, ອາວຸໂສ, ປາປິກາ ທິຏ຺ຐິ, ຍມຫໍ ປຏິນິສ຺ສຊ຺ເຊຍ຺ຍ’’ນ຺ຕິ. ຕໍ ສງ຺ໂຆ ອປ຺ປຏິກມ຺ເມ ວາ ອປ຺ປຏິນິສ຺ສຄ຺ເຄ ວາ ອຸກ຺ຂິປຕິ – ອຘມ຺ມກມ຺ມໍ.

ອິຘ ປນ, ຠິກ຺ຂເວ, ຠິກ຺ຂຸສ຺ສ ນ ໂຫຕິ ອາປຕ຺ຕິ ທຏ຺ຐພ຺ພາ, ນ ໂຫຕິ ອາປຕ຺ຕິ ປຏິກາຕພ຺ພາ, ນ ໂຫຕິ ປາປິກາ ທິຏ຺ຐິ ປຏິນິສ຺ສຊ຺ເຊຕາ. ຕເມນໍ ໂຈເທຕິ ສງ຺ໂຆ ວາ ສມ຺ພຫຸລາ ວາ ເອກປຸຄ຺ຄໂລ ວາ – ‘‘ອາປຕ຺ຕິໍ ຕ຺ວໍ, ອາວຸໂສ, ອາປນ຺ໂນ, ປສ຺ສເສຕໍ ອາປຕ຺ຕິໍ? ປຏິກໂຣຫິ ຕໍ ອາປຕ຺ຕິໍ; ປາປິກາ ເຕ ທິຏ຺ຐິ, ປຏິນິສ຺ສຊ຺ເຊຕໍ ປາປິກໍ ທິຏ຺ຐິ’’ນ຺ຕິ. ໂສ ເອວໍ ວເທຕິ – ‘‘ນຕ຺ຖິ ເມ, ອາວຸໂສ, ອາປຕ຺ຕິ, ຍມຫໍ ປສ຺ເສຍ຺ຍໍ. ນຕ຺ຖິ ເມ, ອາວຸໂສ, ອາປຕ຺ຕິ, ຍມຫໍ ປຏິກເຣຍ຺ຍໍ. ນຕ຺ຖິ ເມ, ອາວຸໂສ, ປາປິກາ ທິຏ຺ຐິ, ຍມຫໍ ປຏິນິສ຺ສຊ຺ເຊຍ຺ຍ’’ນ຺ຕິ. ຕໍ ສງ຺ໂຆ ອທສ຺ສເນ ວາ ອປ຺ປຏິກມ຺ເມ ວາ ອປ຺ປຏິນິສ຺ສຄ຺ເຄ ວາ ອຸກ຺ຂິປຕິ – ອຘມ຺ມກມ຺ມໍ.

໓໙໘. ອິຘ ປນ, ຠິກ຺ຂເວ, ຠິກ຺ຂຸສ຺ສ ໂຫຕິ ອາປຕ຺ຕິ ທຏ຺ຐພ຺ພາ. ຕເມນໍ ໂຈເທຕິ. ສງ຺ໂຆ ວາ ສມ຺ພຫຸລາ ວາ ເອກປຸຄ຺ຄໂລ ວາ – ‘‘ອາປຕ຺ຕິໍ ຕ຺ວໍ, ອາວຸໂສ, ອາປນ຺ໂນ, ປສ຺ສເສຕໍ ອາປຕ຺ຕິ’’ນ຺ຕິ? ໂສ ເອວໍ ວເທຕິ – ‘‘ອາມາວຸໂສ, ປສ຺ສາມີ’’ຕິ. ຕໍ ສງ຺ໂຆ ອາປຕ຺ຕິຍາ ອທສ຺ສເນ ອຸກ຺ຂິປຕິ – ອຘມ຺ມກມ຺ມໍ.

ອິຘ ປນ, ຠິກ຺ຂເວ, ຠິກ຺ຂຸສ຺ສ ໂຫຕິ ອາປຕ຺ຕິ ປຏິກາຕພ຺ພາ. ຕເມນໍ ໂຈເທຕິ ສງ຺ໂຆ ວາ ສມ຺ພຫຸລາ ວາ ເອກປຸຄ຺ຄໂລ ວາ – ‘‘ອາປຕ຺ຕິໍ ຕ຺ວໍ, ອາວຸໂສ, ອາປນ຺ໂນ, ປຏິກໂຣຫິ ຕໍ ອາປຕ຺ຕິ’’ນ຺ຕິ. ໂສ ເອວໍ ວເທຕິ – ‘‘ອາມາວຸໂສ, ປຏິກຣິສ຺ສາມີ’’ຕິ. ຕໍ ສງ຺ໂຆ ອາປຕ຺ຕິຍາ ອປ຺ປຏິກມ຺ເມ ອຸກ຺ຂິປຕິ – ອຘມ຺ມກມ຺ມໍ.

ອິຘ ປນ, ຠິກ຺ຂເວ, ຠິກ຺ຂຸສ຺ສ ໂຫຕິ ປາປິກາ ທິຏ຺ຐິ ປຏິນິສ຺ສຊ຺ເຊຕາ. ຕເມນໍ ໂຈເທຕິ ສງ຺ໂຆ ວາ ສມ຺ພຫຸລາ ວາ ເອກປຸຄ຺ຄໂລ ວາ – ‘‘ປາປິກາ ເຕ, ອາວຸໂສ, ທິຏ຺ຐິ; ປຏິນິສ຺ສຊ຺ເຊຕໍ ປາປິກໍ ທິຏ຺ຐິ’’ນ຺ຕິ. ໂສ ເອວໍ ວເທຕິ – ‘‘ອາມາວຸໂສ, ປຏິນິສ຺ສຊ຺ຊິສ຺ສາມີ’’ຕິ. ຕໍ ສງ຺ໂຆ ປາປິກາຍ ທິຏ຺ຐິຍາ ອປ຺ປຏິນິສ຺ສຄ຺ເຄ ອຸກ຺ຂິປຕິ – ອຘມ຺ມກມ຺ມໍ.

ອິຘ ປນ, ຠິກ຺ຂເວ, ຠິກ຺ຂຸສ຺ສ ໂຫຕິ ອາປຕ຺ຕິ ທຏ຺ຐພ຺ພາ, ໂຫຕິ ອາປຕ຺ຕິ ປຏິກາຕພ຺ພາ…ເປ… ໂຫຕິ ອາປຕ຺ຕິ ທຏ຺ຐພ຺ພາ, ໂຫຕິ ປາປິກາ ທິຏ຺ຐິ ປຏິນິສ຺ສຊ຺ເຊຕາ…ເປ… ໂຫຕິ ອາປຕ຺ຕິ ປຏິກາຕພ຺ພາ, ໂຫຕິ ປາປິກາ ທິຏ຺ຐິ ປຏິນິສ຺ສຊ຺ເຊຕາ…ເປ… ໂຫຕິ ອາປຕ຺ຕິ ທຏ຺ຐພ຺ພາ, ໂຫຕິ ອາປຕ຺ຕິ ປຏິກາຕພ຺ພາ, ໂຫຕິ ປາປິກາ ທິຏ຺ຐິ ປຏິນິສ຺ສຊ຺ເຊຕາ. ຕເມນໍ ໂຈເທຕິ ສງ຺ໂຆ ວາ ສມ຺ພຫຸລາ ວາ ເອກປຸຄ຺ຄໂລ ວາ – ‘‘ອາປຕ຺ຕິໍ ຕ຺ວໍ, ອາວຸໂສ, ອາປນ຺ໂນ, ປສ຺ສເສຕໍ ອາປຕ຺ຕິໍ? ປຏິກໂຣຫິ ຕໍ ອາປຕ຺ຕິໍ; ປາປິກາ ເຕ ທິຏ຺ຐິ, ປຏິນິສ຺ສຊ຺ເຊຕໍ ປາປິກໍ ທິຏ຺ຐິ’’ນ຺ຕິ. ໂສ ເອວໍ ວເທຕິ – ‘‘ອາມາວຸໂສ, ປສ຺ສາມິ, ອາມ ປຏິກຣິສ຺ສາມິ, ອາມ ປຏິນິສ຺ສຊ຺ຊິສ຺ສາມີ’’ຕິ. ຕໍ ສງ຺ໂຆ ອທສ຺ສເນ ວາ ອປ຺ປຏິກມ຺ເມ ວາ ອປ຺ປຏິນິສ຺ສຄ຺ເຄ ວາ ອຸກ຺ຂິປຕິ – ອຘມ຺ມກມ຺ມໍ.

໓໙໙. ອິຘ ປນ, ຠິກ຺ຂເວ, ຠິກ຺ຂຸສ຺ສ ໂຫຕິ ອາປຕ຺ຕິ ທຏ຺ຐພ຺ພາ. ຕເມນໍ ໂຈເທຕິ ສງ຺ໂຆ ວາ ສມ຺ພຫຸລາ ວາ ເອກປຸຄ຺ຄໂລ ວາ – ‘‘ອາປຕ຺ຕິໍ ຕ຺ວໍ, ອາວຸໂສ, ອາປນ຺ໂນ, ປສ຺ສເສຕໍ ອາປຕ຺ຕິ’’ນ຺ຕິ? ໂສ ເອວໍ ວເທຕິ – ‘‘ນຕ຺ຖິ ເມ, ອາວຸໂສ, ອາປຕ຺ຕິ, ຍມຫໍ ປສ຺ເສຍ຺ຍ’’ນ຺ຕິ. ຕໍ ສງ຺ໂຆ ອາປຕ຺ຕິຍາ ອທສ຺ສເນ ອຸກ຺ຂິປຕິ – ຘມ຺ມກມ຺ມໍ.

ອິຘ ປນ, ຠິກ຺ຂເວ, ຠິກ຺ຂຸສ຺ສ ໂຫຕິ ອາປຕ຺ຕິ ປຏິກາຕພ຺ພາ. ຕເມນໍ ໂຈເທຕິ ສງ຺ໂຆ ວາ ສມ຺ພຫຸລາ ວາ ເອກປຸຄ຺ຄໂລ ວາ – ‘‘ອາປຕ຺ຕິໍ ຕ຺ວໍ, ອາວຸໂສ, ອາປນ຺ໂນ, ປຏິກໂຣຫິ ຕໍ ອາປຕ຺ຕິ’’ນ຺ຕິ. ໂສ ເອວໍ ວເທຕິ – ‘‘ນຕ຺ຖິ ເມ, ອາວຸໂສ, ອາປຕ຺ຕິ, ຍມຫໍ ປຏິກເຣຍ຺ຍ’’ນ຺ຕິ. ຕໍ ສງ຺ໂຆ ອາປຕ຺ຕິຍາ ອປ຺ປຏິກມ຺ເມ ອຸກ຺ຂິປຕິ – ຘມ຺ມກມ຺ມໍ.

ອິຘ ປນ, ຠິກ຺ຂເວ, ຠິກ຺ຂຸສ຺ສ ໂຫຕິ ປາປິກາ ທິຏ຺ຐິ ປຏິນິສ຺ສຊ຺ເຊຕາ. ຕເມນໍ ໂຈເທຕິ ສງ຺ໂຆ ວາ ສມ຺ພຫຸລາ ວາ ເອກປຸຄ຺ຄໂລ ວາ – ‘‘ປາປິກາ ເຕ, ອາວຸໂສ, ທິຏ຺ຐິ, ປຏິນິສ຺ສຊ຺ເຊຕໍ ປາປິກໍ ທິຏ຺ຐິ’’ນ຺ຕິ. ໂສ ເອວໍ ວເທຕິ – ‘‘ນຕ຺ຖິ ເມ, ອາວຸໂສ, ປາປິກາ ທິຏ຺ຐິ, ຍມຫໍ ປຏິນິສ຺ສຊ຺ເຊຍ຺ຍ’’ນ຺ຕິ. ຕໍ ສງ຺ໂຆ ປາປິກາຍ ທິຏ຺ຐິຍາ ອປ຺ປຏິນິສ຺ສຄ຺ເຄ ອຸກ຺ຂິປຕິ – ຘມ຺ມກມ຺ມໍ.

ອິຘ ປນ, ຠິກ຺ຂເວ, ຠິກ຺ຂຸສ຺ສ ໂຫຕິ ອາປຕ຺ຕິ ທຏ຺ຐພ຺ພາ, ໂຫຕິ ອາປຕ຺ຕິ ປຏິກາຕພ຺ພາ…ເປ…

ໂຫຕິ ອາປຕ຺ຕິ ທຏ຺ຐພ຺ພາ, ໂຫຕິ ປາປິກາ ທິຏ຺ຐິ ປຏິນິສ຺ສຊ຺ເຊຕາ…ເປ… ໂຫຕິ ອາປຕ຺ຕິ ປຏິກາຕພ຺ພາ, ໂຫຕິ ປາປິກາ ທິຏ຺ຐິ ປຏິນິສ຺ສຊ຺ເຊຕາ …ເປ… ໂຫຕິ ອາປຕ຺ຕິ ທຏ຺ຐພ຺ພາ, ໂຫຕິ ອາປຕ຺ຕິ ປຏິກາຕພ຺ພາ, ໂຫຕິ ປາປິກາ ທິຏ຺ຐິ ປຏິນິສ຺ສຊ຺ເຊຕາ. ຕເມນໍ ໂຈເທຕິ ສງ຺ໂຆ ວາ ສມ຺ພຫຸລາ ວາ ເອກປຸຄ຺ຄໂລ ວາ – ‘‘ອາປຕ຺ຕິໍ ຕ຺ວໍ, ອາວຸໂສ, ອາປນ຺ໂນ, ປສ຺ສເສຕໍ ອາປຕ຺ຕິໍ? ປຏິກໂຣຫິ ຕໍ ອາປຕ຺ຕິໍ. ປາປິກາ ເຕ ທິຏ຺ຐິ, ປຏິນິສ຺ສຊ຺ເຊຕໍ ປາປິກໍ ທິຏ຺ຐິ’’ນ຺ຕິ. ໂສ ເອວໍ ວເທຕິ – ‘‘ນຕ຺ຖິ ເມ, ອາວຸໂສ, ອາປຕ຺ຕິ, ຍມຫໍ ປສ຺ເສຍ຺ຍໍ. ນຕ຺ຖິ ເມ, ອາວຸໂສ, ອາປຕ຺ຕິ ຍມຫໍ ປຏິກເຣຍ຺ຍໍ. ນຕ຺ຖິ ເມ, ອາວຸໂສ, ປາປິກາ ທິຏ຺ຐິ, ຍມຫໍ ປຏິນິສ຺ສຊ຺ເຊຍ຺ຍ’’ນ຺ຕິ. ຕໍ ສງ຺ໂຆ ອທສ຺ສເນ ວາ ອປ຺ປຏິກມ຺ເມ ວາ ອປ຺ປຏິນິສ຺ສຄ຺ເຄ ວາ ອຸກ຺ຂິປຕິ – ຘມ຺ມກມ຺ມນ຺ຕິ.

ອຘມ຺ມກມ຺ມາທິກຖາ ນິຏ຺ຐິຕາ.