໑໙໖. ອາສາໂທຬສກໍ

໓໑໙. ຠິກ຺ຂຸ ອຕ຺ຖຕກຖິໂນ ຈີວຣາສາຍ ປກ຺ກມຕິ ‘‘ປຈ຺ເຈສ຺ສ’’ນ຺ຕິ. ໂສ ພຫິສີມຄໂຕ ຕໍ ຈີວຣາສໍ ປຍິຣຸປາສຕິ. ອາສາຍ ລຠຕິ, ອນາສາຍ ນ ລຠຕິ. ຕສ຺ສ ເອວໍ ໂຫຕິ – ‘‘ອິເຘວິມໍ ຈີວຣໍ ກາເຣສ຺ສໍ, ນ ປຈ຺ເຈສ຺ສ’’ນ຺ຕິ. ໂສ ຕໍ ຈີວຣໍ ກາເຣຕິ. ຕສ຺ສ ຠິກ຺ຂຸໂນ ນິຏ຺ຐານນ຺ຕິໂກ ກຖິນຸທ຺ຘາໂຣ.

ຠິກ຺ຂຸ ອຕ຺ຖຕກຖິໂນ ຈີວຣາສາຍ ປກ຺ກມຕິ ‘‘ປຈ຺ເຈສ຺ສ’’ນ຺ຕິ. ໂສ ພຫິສີມຄໂຕ ຕໍ ຈີວຣາສໍ ປຍິຣຸປາສຕິ. ອາສາຍ ລຠຕິ, ອນາສາຍ ນ ລຠຕິ. ຕສ຺ສ ເອວໍ ໂຫຕິ – ‘‘ເນວິມໍ ຈີວຣໍ ກາເຣສ຺ສໍ, ນ ປຈ຺ເຈສ຺ສ’’ນ຺ຕິ. ຕສ຺ສ ຠິກ຺ຂຸໂນ ສນ຺ນິຏ຺ຐານນ຺ຕິໂກ ກຖິນຸທ຺ຘາໂຣ.

ຠິກ຺ຂຸ ອຕ຺ຖຕກຖິໂນ ຈີວຣາສາຍ ປກ຺ກມຕິ ‘‘ປຈ຺ເຈສ຺ສ’’ນ຺ຕິ. ໂສ ພຫິສີມຄໂຕ ຕໍ ຈີວຣາສໍ ປຍິຣຸປາສຕິ. ອາສາຍ ລຠຕິ, ອນາສາຍ ນ ລຠຕິ. ຕສ຺ສ ເອວໍ ໂຫຕິ – ‘‘ອິເຘວິມໍ ຈີວຣໍ ກາເຣສ຺ສໍ, ນ ປຈ຺ເຈສ຺ສ’’ນ຺ຕິ. ໂສ ຕໍ ຈີວຣໍ ກາເຣຕິ. ຕສ຺ສ ຕໍ ຈີວຣໍ ກຍິຣມານໍ ນສ຺ສຕິ. ຕສ຺ສ ຠິກ຺ຂຸໂນ ນາສນນ຺ຕິໂກ ກຖິນຸທ຺ຘາໂຣ.

ຠິກ຺ຂຸ ອຕ຺ຖຕກຖິໂນ ຈີວຣາສາຍ ປກ຺ກມຕິ ‘‘ປຈ຺ເຈສ຺ສ’’ນ຺ຕິ. ຕສ຺ສ ພຫິສີມຄຕສ຺ສ ເອວໍ ໂຫຕິ – ‘‘ອິເຘວິມໍ ຈີວຣາສໍ ປຍິຣຸປາສິສ຺ສໍ, ນ ປຈ຺ເຈສ຺ສ’’ນ຺ຕິ. ໂສ ຕໍ ຈີວຣາສໍ ປຍິຣຸປາສຕິ. ຕສ຺ສ ສາ ຈີວຣາສາ ອຸປຈ຺ຉິຊ຺ຊຕິ. ຕສ຺ສ ຠິກ຺ຂຸໂນ ອາສາວຈ຺ເຉທິໂກ ກຖິນຸທ຺ຘາໂຣ.

ຠິກ຺ຂຸ ອຕ຺ຖຕກຖິໂນ ຈີວຣາສາຍ ປກ຺ກມຕິ ‘‘ປຈ຺ເຈສ຺ສ’’ນ຺ຕິ. ໂສ ພຫິສີມຄໂຕ ສຸຓາຕິ – ‘‘ອຸພ຺ຠຕໍ ກິຣ ຕສ຺ມິໍ ອາວາເສ ກຖິນ’’ນ຺ຕິ. ຕສ຺ສ ເອວໍ ໂຫຕິ – ‘‘ຍໂຕ ຕສ຺ມິໍ ອາວາເສ ອຸພ຺ຠຕໍ ກຖິນໍ, ອິເຘວິມໍ ຈີວຣາສໍ ປຍິຣຸປາສິສ຺ສ’’ນ຺ຕິ. ໂສ ຕໍ ຈີວຣາສໍ ປຍິຣຸປາສຕິ. ອາສາຍ ລຠຕິ, ອນາສາຍ ນ ລຠຕິ. ຕສ຺ສ ເອວໍ ໂຫຕິ – ‘‘ອິເຘວິມໍ ຈີວຣໍ ກາເຣສ຺ສໍ, ນ ປຈ຺ເຈສ຺ສ’’ນ຺ຕິ. ໂສ ຕໍ ຈີວຣໍ ກາເຣຕິ. ຕສ຺ສ ຠິກ຺ຂຸໂນ ນິຏ຺ຐານນ຺ຕິໂກ ກຖິນຸທ຺ຘາໂຣ.

ຠິກ຺ຂຸ ອຕ຺ຖຕກຖິໂນ ຈີວຣາສາຍ ປກ຺ກມຕິ ‘‘ປຈ຺ເຈສ຺ສ’’ນ຺ຕິ. ໂສ ພຫິສີມຄໂຕ ສຸຓາຕິ – ‘‘ອຸພ຺ຠຕໍ ກິຣ ຕສ຺ມິໍ ອາວາເສ ກຖິນ’’ນ຺ຕິ. ຕສ຺ສ ເອວໍ ໂຫຕິ – ‘‘ຍໂຕ ຕສ຺ມິໍ ອາວາເສ ອຸພ຺ຠຕໍ ກຖິນໍ, ອິເຘວິມໍ ຈີວຣາສໍ ປຍິຣຸປາສິສ຺ສ’’ນ຺ຕິ. ໂສ ຕໍ ຈີວຣາສໍ ປຍິຣຸປາສຕິ. ອາສາຍ ລຠຕິ, ອນາສາຍ ນ ລຠຕິ. ຕສ຺ສ ເອວໍ ໂຫຕິ – ‘‘ເນວິມໍ ຈີວຣໍ ກາເຣສ຺ສໍ, ນ ປຈ຺ເຈສ຺ສ’’ນ຺ຕິ. ຕສ຺ສ ຠິກ຺ຂຸໂນ ສນ຺ນິຏ຺ຐານນ຺ຕິໂກ ກຖິນຸທ຺ຘາໂຣ.

ຠິກ຺ຂຸ ອຕ຺ຖຕກຖິໂນ ຈີວຣາສາຍ ປກ຺ກມຕິ ‘‘ປຈ຺ເຈສ຺ສ’’ນ຺ຕິ. ໂສ ພຫິສີມຄໂຕ ສຸຓາຕິ – ‘‘ອຸພ຺ຠຕໍ ກິຣ ຕສ຺ມິໍ ອາວາເສ ກຖິນ’’ນ຺ຕິ. ຕສ຺ສ ເອວໍ ໂຫຕິ – ‘‘ຍໂຕ ຕສ຺ມິໍ ອາວາເສ ອຸພ຺ຠຕໍ ກຖິນໍ, ອິເຘວິມໍ ຈີວຣາສໍ ປຍິຣຸປາສິສ຺ສ’’ນ຺ຕິ. ໂສ ຕໍ ຈີວຣາສໍ ປຍິຣຸປາສຕິ. ອາສາຍ ລຠຕິ, ອນາສາຍ ນ ລຠຕິ. ຕສ຺ສ ເອວໍ ໂຫຕິ – ‘‘ອິເຘວິມໍ ຈີວຣໍ ກາເຣສ຺ສໍ, ນ ປຈ຺ເຈສ຺ສ’’ນ຺ຕິ. ໂສ ຕໍ ຈີວຣໍ ກາເຣຕິ. ຕສ຺ສ ຕໍ ຈີວຣໍ ກຍິຣມານໍ ນສ຺ສຕິ. ຕສ຺ສ ຠິກ຺ຂຸໂນ ນາສນນ຺ຕິໂກ ກຖິນຸທ຺ຘາໂຣ.

ຠິກ຺ຂຸ ອຕ຺ຖຕກຖິໂນ ຈີວຣາສາຍ ປກ຺ກມຕິ ‘‘ປຈ຺ເຈສ຺ສ’’ນ຺ຕິ. ໂສ ພຫິສີມຄໂຕ ສຸຓາຕິ – ‘‘ອຸພ຺ຠຕໍ ກິຣ ຕສ຺ມິໍ ອາວາເສ ກຖິນ’’ນ຺ຕິ. ຕສ຺ສ ເອວໍ ໂຫຕິ – ‘‘ຍໂຕ ຕສ຺ມິໍ ອາວາເສ ອຸພ຺ຠຕໍ ກຖິນໍ, ອິເຘວິມໍ ຈີວຣາສໍ ປຍິຣຸປາສິສ຺ສໍ, ນ ປຈ຺ເຈສ຺ສ’’ນ຺ຕິ. ໂສ ຕໍ ຈີວຣາສໍ ປຍິຣຸປາສຕິ. ຕສ຺ສ ສາ ຈີວຣາສາ ອຸປຈ຺ຉິຊ຺ຊຕິ. ຕສ຺ສ ຠິກ຺ຂຸໂນ ອາສາວຈ຺ເຉທິໂກ ກຖິນຸທ຺ຘາໂຣ.

ຠິກ຺ຂຸ ອຕ຺ຖຕກຖິໂນ ຈີວຣາສາຍ ປກ຺ກມຕິ ‘‘ປຈ຺ເຈສ຺ສ’’ນ຺ຕິ. ໂສ ພຫິສີມຄໂຕ ຕໍ ຈີວຣາສໍ ປຍິຣຸປາສຕິ. ອາສາຍ ລຠຕິ, ອນາສາຍ ນ ລຠຕິ. ໂສ ຕໍ ຈີວຣໍ ກາເຣຕິ. ໂສ ກຕຈີວໂຣ ສຸຓາຕິ – ‘‘ອຸພ຺ຠຕໍ ກິຣ ຕສ຺ມິໍ ອາວາເສ ກຖິນ’’ນ຺ຕິ. ຕສ຺ສ ຠິກ຺ຂຸໂນ ສວນນ຺ຕິໂກ ກຖິນຸທ຺ຘາໂຣ.

ຠິກ຺ຂຸ ອຕ຺ຖຕກຖິໂນ ຈີວຣາສາຍ ປກ຺ກມຕິ ‘‘ປຈ຺ເຈສ຺ສ’’ນ຺ຕິ. ຕສ຺ສ ພຫິສີມຄຕສ຺ສ ເອວໍ ໂຫຕິ – ‘‘ອິເຘວິມໍ ຈີວຣາສໍ ປຍິຣຸປາສິສ຺ສໍ, ນ ປຈ຺ເຈສ຺ສ’’ນ຺ຕິ. ໂສ ຕໍ ຈີວຣາສໍ ປຍິຣຸປາສຕິ. ຕສ຺ສ ສາ ຈີວຣາສາ ອຸປຈ຺ຉິຊ຺ຊຕິ. ຕສ຺ສ ຠິກ຺ຂຸໂນ ອາສາວຈ຺ເຉທິໂກ ກຖິນຸທ຺ຘາໂຣ.

ຠິກ຺ຂຸ ອຕ຺ຖຕກຖິໂນ ຈີວຣາສາຍ ປກ຺ກມຕິ ‘‘ປຈ຺ເຈສ຺ສ’’ນ຺ຕິ. ໂສ ພຫິສີມຄໂຕ ຕໍ ຈີວຣາສໍ ປຍິຣຸປາສຕິ. ອາສາຍ ລຠຕິ, ອນາສາຍ ນ ລຠຕິ. ໂສ ຕໍ ຈີວຣໍ ກາເຣຕິ. ໂສ ກຕຈີວໂຣ ‘‘ປຈ຺ເຈສ຺ສໍ ປຈ຺ເຈສ຺ສ’’ນ຺ຕິ – ພຫິທ຺ຘາ ກຖິນຸທ຺ຘາຣໍ ວີຕິນາເມຕິ. ຕສ຺ສ ຠິກ຺ຂຸໂນ ສີມາຕິກ຺ກນ຺ຕິໂກ ກຖິນຸທ຺ຘາໂຣ.

ຠິກ຺ຂຸ ອຕ຺ຖຕກຖິໂນ ຈີວຣາສາຍ ປກ຺ກມຕິ ‘‘ປຈ຺ເຈສ຺ສ’’ນ຺ຕິ. ໂສ ພຫິສີມຄໂຕ ຕໍ ຈີວຣາສໍ ປຍິຣຸປາສຕິ. ອາສາຍ ລຠຕິ, ອນາສາຍ ນ ລຠຕິ. ໂສ ຕໍ ຈີວຣໍ ກາເຣຕິ. ໂສ ກຕຈີວໂຣ ‘‘ປຈ຺ເຈສ຺ສໍ ປຈ຺ເຈສ຺ສ’’ນ຺ຕິ – ສມ຺ຠຸຓາຕິ ກຖິນຸທ຺ຘາຣໍ. ຕສ຺ສ ຠິກ຺ຂຸໂນ ສຫ ຠິກ຺ຂູຫິ ກຖິນຸທ຺ຘາໂຣ.

ອາສາໂທຬສກໍ ນິຏ຺ຐິຕໍ.