໑໙໑. ສມາທາຍຉກ຺ກໍ

໓໑໔. ຠິກ຺ຂຸ ອຕ຺ຖຕກຖິໂນ ວິປ຺ປກຕຈີວຣໍ ສມາທາຍ ປກ຺ກມຕິ. ຕສ຺ສ ພຫິສີມຄຕສ຺ສ ເອວໍ ໂຫຕິ – ‘‘ອິເຘວິມໍ ຈີວຣໍ ກາເຣສ຺ສໍ, ນ ປຈ຺ເຈສ຺ສ’’ນ຺ຕິ. ໂສ ຕໍ ຈີວຣໍ ກາເຣຕິ. ຕສ຺ສ ຠິກ຺ຂຸໂນ ນິຏ຺ຐານນ຺ຕິໂກ ກຖິນຸທ຺ຘາໂຣ.

ຠິກ຺ຂຸ ອຕ຺ຖຕກຖິໂນ ວິປ຺ປກຕຈີວຣໍ ສມາທາຍ ປກ຺ກມຕິ. ຕສ຺ສ ພຫິສີມຄຕສ຺ສ ເອວໍ ໂຫຕິ – ‘‘ເນວິມໍ ຈີວຣໍ ກາເຣສ຺ສໍ, ນ ປຈ຺ເຈສ຺ສ’’ນ຺ຕິ. ຕສ຺ສ ຠິກ຺ຂຸໂນ ສນ຺ນິຏ຺ຐານນ຺ຕິໂກ ກຖິນຸທ຺ຘາໂຣ.

ຠິກ຺ຂຸ ອຕ຺ຖຕກຖິໂນ ວິປ຺ປກຕຈີວຣໍ ສມາທາຍ ປກ຺ກມຕິ. ຕສ຺ສ ພຫິສີມຄຕສ຺ສ ເອວໍ ໂຫຕິ – ‘‘ອິເຘວິມໍ ຈີວຣໍ ກາເຣສ຺ສໍ, ນ ປຈ຺ເຈສ຺ສ’’ນ຺ຕິ. ໂສ ຕໍ ຈີວຣໍ ກາເຣຕິ. ຕສ຺ສ ຕໍ ຈີວຣໍ ກຍິຣມານໍ ນສ຺ສຕິ. ຕສ຺ສ ຠິກ຺ຂຸໂນ ນາສນນ຺ຕິໂກ ກຖິນຸທ຺ຘາໂຣ.

ຠິກ຺ຂຸ ອຕ຺ຖຕກຖິໂນ ວິປ຺ປກຕຈີວຣໍ ສມາທາຍ ປກ຺ກມຕິ ‘‘ປຈ຺ເຈສ຺ສ’’ນ຺ຕິ. ໂສ ພຫິສີມຄໂຕ ຕໍ ຈີວຣໍ ກາເຣຕິ. ໂສ ກຕຈີວໂຣ ສຸຓາຕິ – ‘‘ອຸພ຺ຠຕໍ ກິຣ ຕສ຺ມິໍ ອາວາເສ ກຖິນ’’ນ຺ຕິ. ຕສ຺ສ ຠິກ຺ຂຸໂນ ສວນນ຺ຕິໂກ ກຖິນຸທ຺ຘາໂຣ.

ຠິກ຺ຂຸ ອຕ຺ຖຕກຖິໂນ ວິປ຺ປກຕຈີວຣໍ ສມາທາຍ ປກ຺ກມຕິ ‘‘ປຈ຺ເຈສ຺ສ’’ນ຺ຕິ. ໂສ ພຫິສີມຄໂຕ ຕໍ ຈີວຣໍ ກາເຣຕິ. ໂສ ກຕຈີວໂຣ ‘‘ປຈ຺ເຈສ຺ສໍ ປຈ຺ເຈສ຺ສ’’ນ຺ຕິ ພຫິທ຺ຘາ ກຖິນຸທ຺ຘາຣໍ ວີຕິນາເມຕິ. ຕສ຺ສ ຠິກ຺ຂຸໂນ ສີມາຕິກ຺ກນ຺ຕິໂກ ກຖິນຸທ຺ຘາໂຣ.

ຠິກ຺ຂຸ ອຕ຺ຖຕກຖິໂນ ວິປ຺ປກຕຈີວຣໍ ສມາທາຍ ປກ຺ກມຕິ ‘‘ປຈ຺ເຈສ຺ສ’’ນ຺ຕິ. ໂສ ພຫິສີມຄໂຕ ຕໍ ຈີວຣໍ ກາເຣຕິ. ໂສ ກຕຈີວໂຣ ‘‘ປຈ຺ເຈສ຺ສໍ ປຈ຺ເຈສ຺ສ’’ນ຺ຕິ ສມ຺ຠຸຓາຕິ ກຖິນຸທ຺ຘາຣໍ. ຕສ຺ສ ຠິກ຺ຂຸໂນ ສຫ ຠິກ຺ຂູຫິ ກຖິນຸທ຺ຘາໂຣ.

ສມາທາຍຉກ຺ກໍ ນິຏ຺ຐິຕໍ.