໑໔໐. ທ຺ເວວາຈິກາທິປວາຣຓາ

໒໓໔. ເຕນ ໂຂ ປນ ສມເຍນ ໂກສເລສຸ ຊນປເທ ອຎ຺ຎຕຣສ຺ມິໍ ອາວາເສ ຕທຫຸ ປວາຣຓາຍ ສວຣຠຍໍ ອໂຫສິ. ຠິກ຺ຂູ ນາສກ຺ຂິໍສຸ ເຕວາຈິກໍ ປວາເຣຕຸໍ. ຠຄວໂຕ ເອຕມຕ຺ຖໍ ອາໂຣເຈສຸໍ. ອນຸຊານາມິ, ຠິກ຺ຂເວ, ທ຺ເວວາຈິກໍ ປວາເຣຕຸນ຺ຕິ.

ພາຬ຺ຫຕຣໍ ສວຣຠຍໍ ອໂຫສິ. ຠິກ຺ຂູ ນາສກ຺ຂິໍສຸ ທ຺ເວວາຈິກໍ ປວາເຣຕຸໍ. ຠຄວໂຕ ເອຕມຕ຺ຖໍ ອາໂຣເຈສຸໍ. ອນຸຊານາມິ, ຠິກ຺ຂເວ, ເອກວາຈິກໍ ປວາເຣຕຸນ຺ຕິ.

ພາຬ຺ຫຕຣໍ ສວຣຠຍໍ ອໂຫສິ. ຠິກ຺ຂູ ນາສກ຺ຂິໍສຸ ເອກວາຈິກໍ ປວາເຣຕຸໍ. ຠຄວໂຕ ເອຕມຕ຺ຖໍ ອາໂຣເຈສຸໍ. ອນຸຊານາມິ, ຠິກ຺ຂເວ, ສມານວສ຺ສິກໍ ປວາເຣຕຸນ຺ຕິ.

ເຕນ ໂຂ ປນ ສມເຍນ ອຎ຺ຎຕຣສ຺ມິໍ ອາວາເສ ຕທຫຸ ປວາຣຓາຍ ມນຸສ຺ເສຫິ ທານໍ ເທນ຺ເຕຫິ ເຍຠຸຍ຺ເຍນ ຣຕ຺ຕິ ເຂປິຕາ ໂຫຕິ. ອຖ ໂຂ ເຕສໍ ຠິກ຺ຂູນໍ ເອຕທໂຫສິ – ‘‘ມນຸສ຺ເສຫິ ທານໍ ເທນ຺ເຕຫິ ເຍຠຸຍ຺ເຍນ ຣຕ຺ຕິ ເຂປິຕາ. ສເຈ ສງ຺ໂຆ ເຕວາຈິກໍ ປວາເຣສ຺ສຕິ, ອປ຺ປວາຣິໂຕວ ສງ຺ໂຆ ຠວິສ຺ສຕິ, ອຖາຍໍ ຣຕ຺ຕິ ວິຠາຍິສ຺ສຕິ. ກຖໍ ນຸ ໂຂ ອມ຺ເຫຫິ ປຏິປຊ຺ຊິຕພ຺ພ’’ນ຺ຕິ? ຠຄວໂຕ ເອຕມຕ຺ຖໍ ອາໂຣເຈສຸໍ. ອິຘ ປນ, ຠິກ຺ຂເວ, ອຎ຺ຎຕຣສ຺ມິໍ ອາວາເສ ຕທຫຸ ປວາຣຓາຍ ມນຸສ຺ເສຫິ ທານໍ ເທນ຺ເຕຫິ ເຍຠຸຍ຺ເຍນ ຣຕ຺ຕິ ເຂປິຕາ ໂຫຕິ. ຕຕ຺ຣ ເຈ, ຠິກ຺ຂເວ, ຠິກ຺ຂູນໍ ເອວໍ ໂຫຕິ – ‘‘ມນຸສ຺ເສຫິ ທານໍ ເທນ຺ເຕຫິ ເຍຠຸຍ຺ເຍນ ຣຕ຺ຕິ ເຂປິຕາ. ສເຈ ສງ຺ໂຆ ເຕວາຈິກໍ ປວາເຣສ຺ສຕິ, ອປ຺ປວາຣິໂຕວ ສງ຺ໂຆ ຠວິສ຺ສຕິ, ອຖາຍໍ ຣຕ຺ຕິ ວິຠາຍິສ຺ສຕີ’’ຕິ, ພ຺ຍຕ຺ເຕນ ຠິກ຺ຂຸນາ ປຏິພເລນ ສງ຺ໂຆ ຎາເປຕພ຺ໂພ –

‘‘ສຸຓາຕຸ ເມ, ຠນ຺ເຕ, ສງ຺ໂຆ. ມນຸສ຺ເສຫິ ທານໍ ເທນ຺ເຕຫິ ເຍຠຸຍ຺ເຍນ ຣຕ຺ຕິ ເຂປິຕາ. ສເຈ ສງ຺ໂຆ ເຕວາຈິກໍ ປວາເຣສ຺ສຕິ, ອປ຺ປວາຣິໂຕວ ສງ຺ໂຆ ຠວິສ຺ສຕິ, ອຖາຍໍ ຣຕ຺ຕິ ວິຠາຍິສ຺ສຕິ. ຍທິ ສງ຺ຆສ຺ສ ປຕ຺ຕກລ຺ລໍ, ສງ຺ໂຆ ທ຺ເວວາຈິກໍ, ເອກວາຈິກໍ, ສມານວສ຺ສິກໍ ປວາເຣຍ຺ຍາ’’ຕິ.

ອິຘ ປນ, ຠິກ຺ຂເວ, ອຎ຺ຎຕຣສ຺ມິໍ ອາວາເສ ຕທຫຸ ປວາຣຓາຍ ຠິກ຺ຂູຫິ ຘມ຺ມໍ ຠຓນ຺ເຕຫິ…ເປ… ສຸຕ຺ຕນ຺ຕິເກຫິ ສຸຕ຺ຕນ຺ຕໍ ສງ຺ຄາຍນ຺ເຕຫິ… ວິນຍຘເຣຫິ ວິນຍໍ ວິນິຈ຺ຉິນນ຺ເຕຫິ… ຘມ຺ມກຖິເກຫິ ຘມ຺ມໍ ສາກຈ຺ຉນ຺ເຕຫິ… ຠິກ຺ຂູຫິ ກລຫໍ ກໂຣນ຺ເຕຫິ ເຍຠຸຍ຺ເຍນ ຣຕ຺ຕິ ເຂປິຕາ ໂຫຕິ. ຕຕ຺ຣ ເຈ ຠິກ຺ຂູນໍ ເອວໍ ໂຫຕິ – ‘‘ຠິກ຺ຂູຫິ ກລຫໍ ກໂຣນ຺ເຕຫິ ເຍຠຸຍ຺ເຍນ ຣຕ຺ຕິ ເຂປິຕາ. ສເຈ ສງ຺ໂຆ ເຕວາຈິກໍ ປວາເຣສ຺ສຕິ, ອປ຺ປວາຣິໂຕວ ສງ຺ໂຆ ຠວິສ຺ສຕິ, ອຖາຍໍ ຣຕ຺ຕິ ວິຠາຍິສ຺ສຕີ’’ຕິ, ພ຺ຍຕ຺ເຕນ ຠິກ຺ຂຸນາ ປຏິພເລນ ສງ຺ໂຆ ຎາເປຕພ຺ໂພ –

‘‘ສຸຓາຕຸ ເມ, ຠນ຺ເຕ, ສງ຺ໂຆ. ຠິກ຺ຂູຫິ ກລຫໍ ກໂຣນ຺ເຕຫິ ເຍຠຸຍ຺ເຍນ ຣຕ຺ຕິ ເຂປິຕາ. ສເຈ ສງ຺ໂຆ ເຕວາຈິກໍ ປວາເຣສ຺ສຕິ, ອປ຺ປວາຣິໂຕວ ສງ຺ໂຆ ຠວິສ຺ສຕິ, ອຖາຍໍ ຣຕ຺ຕິ ວິຠາຍິສ຺ສຕິ. ຍທິ ສງ຺ຆສ຺ສ ປຕ຺ຕກລ຺ລໍ, ສງ຺ໂຆ ທ຺ເວວາຈິກໍ, ເອກວາຈິກໍ, ສມານວສ຺ສິກໍ ປວາເຣຍ຺ຍາ’’ຕິ.

ເຕນ ໂຂ ປນ ສມເຍນ ໂກສເລສຸ ຊນປເທ ອຎ຺ຎຕຣສ຺ມິໍ ອາວາເສ ຕທຫຸ ປວາຣຓາຍ ມຫາຠິກ຺ຂຸສງ຺ໂຆ ສນ຺ນິປຕິໂຕ ໂຫຕິ, ປຣິຕ຺ຕຎ຺ຈ ອໂນວສ຺ສິກໍ [ອໂນວສ຺ສກໍ (ກ.)] ໂຫຕິ, ມຫາ ຈ ເມໂຆ ອຸຄ຺ຄໂຕ ໂຫຕິ. ອຖ ໂຂ ເຕສໍ ຠິກ຺ຂູນໍ ເອຕທໂຫສິ – ‘‘ອຍໍ ໂຂ ມຫາຠິກ຺ຂຸສງ຺ໂຆ ສນ຺ນິປຕິໂຕ, ປຣິຕ຺ຕຎ຺ຈ ອໂນວສ຺ສິກໍ, ມຫາ ຈ ເມໂຆ ອຸຄ຺ຄໂຕ. ສເຈ ສງ຺ໂຆ ເຕວາຈິກໍ ປວາເຣສ຺ສຕິ, ອປ຺ປວາຣິໂຕວ ສງ຺ໂຆ ຠວິສ຺ສຕິ, ອຖາຍໍ ເມໂຆ ປວສ຺ສິສ຺ສຕິ. ກຖໍ ນຸ ໂຂ ອມ຺ເຫຫິ ປຏິປຊ຺ຊິຕພ຺ພ’’ນ຺ຕິ? ຠຄວໂຕ ເອຕມຕ຺ຖໍ ອາໂຣເຈສຸໍ. ອິຘ ປນ, ຠິກ຺ຂເວ, ອຎ຺ຎຕຣສ຺ມິໍ ອາວາເສ ຕທຫຸ ປວາຣຓາຍ ມຫາຠິກ຺ຂຸສງ຺ໂຆ ສນ຺ນິປຕິໂຕ ໂຫຕິ, ປຣິຕ຺ຕຎ຺ຈ ອໂນວສ຺ສິກໍ ໂຫຕິ, ມຫາ ຈ ເມໂຆ ອຸຄ຺ຄໂຕ ໂຫຕິ. ຕຕ຺ຣ ເຈ ຠິກ຺ຂູນໍ ເອວໍ ໂຫຕິ – ‘‘ອຍໍ ໂຂ ມຫາຠິກ຺ຂຸສງ຺ໂຆ ສນ຺ນິປຕິໂຕ, ປຣິຕ຺ຕຎ຺ຈ ອໂນວສ຺ສິກໍ, ມຫາ ຈ ເມໂຆ ອຸຄ຺ຄໂຕ. ສເຈ ສງ຺ໂຆ ເຕວາຈິກໍ ປວາເຣສ຺ສຕິ, ອປ຺ປວາຣິໂຕວ ສງ຺ໂຆ ຠວິສ຺ສຕິ, ອຖາຍໍ ເມໂຆ ປວສ຺ສິສ຺ສຕີ’’ຕິ. ພ຺ຍຕ຺ເຕນ ຠິກ຺ຂຸນາ ປຏິພເລນ ສງ຺ໂຆ ຎາເປຕພ຺ໂພ –

‘‘ສຸຓາຕຸ ເມ, ຠນ຺ເຕ, ສງ຺ໂຆ. ອຍໍ ມຫາຠິກ຺ຂຸສງ຺ໂຆ ສນ຺ນິປຕິໂຕ, ປຣິຕ຺ຕຎ຺ຈ ອໂນວສ຺ສິກໍ, ມຫາ ຈ ເມໂຆ ອຸຄ຺ຄໂຕ. ສເຈ ສງ຺ໂຆ ເຕວາຈິກໍ ປວາເຣສ຺ສຕິ, ອປ຺ປວາຣິໂຕວ ສງ຺ໂຆ ຠວິສ຺ສຕິ, ອຖາຍໍ ເມໂຆ ປວສ຺ສິສ຺ສຕິ. ຍທິ ສງ຺ຆສ຺ສ ປຕ຺ຕກລ຺ລໍ, ສງ຺ໂຆ ທ຺ເວວາຈິກໍ, ເອກວາຈິກໍ, ສມານວສ຺ສິກໍ ປວາເຣຍ຺ຍາ’’ຕິ.

ອິຘ ປນ, ຠິກ຺ຂເວ, ອຎ຺ຎຕຣສ຺ມິໍ ອາວາເສ ຕທຫຸ ປວາຣຓາຍ ຣາຊນ຺ຕຣາໂຍ ໂຫຕິ…ເປ… ໂຈຣນ຺ຕຣາໂຍ ໂຫຕິ… ອຄ຺ຍນ຺ຕຣາໂຍ ໂຫຕິ… ອຸທກນ຺ຕຣາໂຍ ໂຫຕິ… ມນຸສ຺ສນ຺ຕຣາໂຍ ໂຫຕິ… ອມນຸສ຺ສນ຺ຕຣາໂຍ ໂຫຕິ… ວາຬນ຺ຕຣາໂຍ ໂຫຕິ… ສຣີສປນ຺ຕຣາໂຍ ໂຫຕິ… ຊີວິຕນ຺ຕຣາໂຍ ໂຫຕິ… ພ຺ຣຫ຺ມຈຣິຍນ຺ຕຣາໂຍ ໂຫຕິ. ຕຕ຺ຣ ເຈ ຠິກ຺ຂູນໍ ເອວໍ ໂຫຕິ – ‘‘ອຍໍ ໂຂ, ພ຺ຣຫ຺ມຈຣິຍນ຺ຕຣາໂຍ. ສເຈ ສງ຺ໂຆ ເຕວາຈິກໍ ປວາເຣສ຺ສຕິ, ອປ຺ປວາຣິໂຕວ ສງ຺ໂຆ ຠວິສ຺ສຕິ, ອຖາຍໍ ພ຺ຣຫ຺ມຈຣິຍນ຺ຕຣາໂຍ ຠວິສ຺ສຕີ’’ຕິ, ພ຺ຍຕ຺ເຕນ ຠິກ຺ຂຸນາ ປຏິພເລນ ສງ຺ໂຆ ຎາເປຕພ຺ໂພ –

‘‘ສຸຓາຕຸ ເມ, ຠນ຺ເຕ, ສງ຺ໂຆ. ອຍໍ ພ຺ຣຫ຺ມຈຣິຍນ຺ຕຣາໂຍ. ສເຈ ສງ຺ໂຆ ເຕວາຈິກໍ ປວາເຣສ຺ສຕິ, ອປ຺ປວາຣິໂຕວ ສງ຺ໂຆ ຠວິສ຺ສຕິ, ອຖາຍໍ ພ຺ຣຫ຺ມຈຣິຍນ຺ຕຣາໂຍ ຠວິສ຺ສຕິ. ຍທິ ສງ຺ຆສ຺ສ ປຕ຺ຕກລ຺ລໍ, ສງ຺ໂຆ ທ຺ເວວາຈິກໍ, ເອກວາຈິກໍ, ສມານວສ຺ສິກໍ ປວາເຣຍ຺ຍາ’’ຕິ.

ທ຺ເວວາຈິກາທິປວາຣຓາ ນິຏ຺ຐິຕາ.