໑໒໖. ອາປຕ຺ຕິອາວິກຣຓວິຘິ

໒໒໐. ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ປວາຣຍມາໂນ ອາປຕ຺ຕິໍ ສຣຕິ. ອຖ ໂຂ ຕສ຺ສ ຠິກ຺ຂຸໂນ ເອຕທໂຫສິ – ‘‘ຠຄວຕາ ປຎ຺ຎຕ຺ຕໍ ‘ນ ສາປຕ຺ຕິເກນ ປວາເຣຕພ຺ພ’ນ຺ຕິ. ອຫຎ຺ຈມ຺ຫິ ອາປຕ຺ຕິໍ ອາປນ຺ໂນ. ກຖໍ ນຸ ໂຂ ມຍາ ປຏິປຊ຺ຊິຕພ຺ພ’’ນ຺ຕິ? ຠຄວໂຕ ເອຕມຕ຺ຖໍ ອາໂຣເຈສຸໍ.

ອິຘ ປນ, ຠິກ຺ຂເວ, ຠິກ຺ຂຸ ປວາຣຍມາໂນ ອາປຕ຺ຕິໍ ສຣຕິ. ເຕນ, ຠິກ຺ຂເວ, ຠິກ຺ຂຸນາ ສາມນ຺ໂຕ ຠິກ຺ຂຸ ເອວມສ຺ສ ວຈນີໂຍ – ‘‘ອຫໍ, ອາວຸໂສ, ອິຕ຺ຖນ຺ນາມໍ ອາປຕ຺ຕິໍ ອາປນ຺ໂນ. ອິໂຕ ວຸຏ຺ຐຫິຕ຺ວາ ຕໍ ອາປຕ຺ຕິໍ ປຏິກຣິສ຺ສາມີ’’ຕິ ວຕ຺ວາ ປວາເຣຕພ຺ພໍ; ນ ຕ຺ເວວ ຕປ຺ປຈ຺ຈຍາ ປວາຣຓາຍ ອນ຺ຕຣາໂຍ ກາຕພ຺ໂພ.

ອິຘ ປນ, ຠິກ຺ຂເວ, ຠິກ຺ຂຸ ປວາຣຍມາໂນ ອາປຕ຺ຕິຍາ ເວມຕິໂກ ໂຫຕິ. ເຕນ, ຠິກ຺ຂເວ,

ຠິກ຺ຂຸນາ ສາມນ຺ໂຕ ຠິກ຺ຂຸ ເອວມສ຺ສ ວຈນີໂຍ – ‘‘ອຫໍ, ອາວຸໂສ, ອິຕ຺ຖນ຺ນາມາຍ ອາປຕ຺ຕິຍາ ເວມຕິໂກ; ຍທາ ນິພ຺ເພມຕິໂກ ຠວິສ຺ສາມິ ຕທາ ຕໍ ອາປຕ຺ຕິໍ ປຏິກຣິສ຺ສາມີ’’ຕິ ວຕ຺ວາ ປວາເຣຕພ຺ພໍ; ນ ຕ຺ເວວ ຕປ຺ປຈ຺ຈຍາ ປວາຣຓາຍ ອນ຺ຕຣາໂຍ ກາຕພ຺ໂພຕິ.

ອາປຕ຺ຕິ ອາວິກຣຓວິຘິ ນິຏ຺ຐິຕາ.