໘. ມາຣກຖາ

໓໒. ອຖ ໂຂ ຠຄວາ ເຕ ຠິກ຺ຂູ ອາມນ຺ເຕສິ [ສໍ. ນິ. ໑.໑໔໑ ມາຣສໍຍຸຕ຺ເຕປິ] – ‘‘ມຸຕ຺ຕາຫໍ, ຠິກ຺ຂເວ, ສພ຺ພປາເສຫິ, ເຍ ທິພ຺ພາ ເຍ ຈ ມານຸສາ. ຕຸມ຺ເຫປິ, ຠິກ຺ຂເວ, ມຸຕ຺ຕາ ສພ຺ພປາເສຫິ, ເຍ ທິພ຺ພາ ເຍ ຈ ມານຸສາ. ຈຣຖ, ຠິກ຺ຂເວ, ຈາຣິກໍ ພຫຸຊນຫິຕາຍ ພຫຸຊນສຸຂາຍ ໂລການຸກມ຺ປາຍ ອຕ຺ຖາຍ ຫິຕາຍ ສຸຂາຍ ເທວມນຸສ຺ສານໍ. ມາ ເອເກນ ທ຺ເວ ອຄມິຕ຺ຖ. ເທເສຖ, ຠິກ຺ຂເວ, ຘມ຺ມໍ ອາທິກລ຺ຍາຓໍ ມຊ຺ເຌກລ຺ຍາຓໍ ປຣິໂຍສານກລ຺ຍາຓໍ ສາຕ຺ຖໍ ສພ຺ຍຎ຺ຊນໍ ເກວລປຣິປຸຓ຺ຓໍ ປຣິສຸທ຺ຘໍ ພ຺ຣຫ຺ມຈຣິຍໍ ປກາເສຖ. ສນ຺ຕິ ສຕ຺ຕາ ອປ຺ປຣຊກ຺ຂຊາຕິກາ, ອສ຺ສວນຕາ ຘມ຺ມສ຺ສ ປຣິຫາຍນ຺ຕິ, ຠວິສ຺ສນ຺ຕິ ຘມ຺ມສ຺ສ ອຎ຺ຎາຕາໂຣ. ອຫມ຺ປິ, ຠິກ຺ຂເວ, ເຍນ ອຸຣຸເວລາ ເສນານິຄໂມ ເຕນຸປສງ຺ກມິສ຺ສາມິ ຘມ຺ມເທສນາຍາ’’ຕິ.

໓໓. ອຖ ໂຂ ມາໂຣ ປາປິມາ ເຍນ ຠຄວາ ເຕນຸປສງ຺ກມິ, ອຸປສງ຺ກມິຕ຺ວາ ຠຄວນ຺ຕໍ ຄາຖາຍ ອຊ຺ຌຠາສິ –

‘‘ພທ຺ໂຘສິ ສພ຺ພປາເສຫິ, ເຍ ທິພ຺ພາ ເຍ ຈ ມານຸສາ;

ມຫາພນ຺ຘນພທ຺ໂຘສິ, ນ ເມ ສມຓ ໂມກ຺ຂສີ’’ຕິ.

‘‘ມຸຕ຺ຕາຫໍ [ມຸຕ຺ໂຕຫໍ (ສີ. ສ຺ຍາ.)] ສພ຺ພປາເສຫິ, ເຍ ທິພ຺ພາ ເຍ ຈ ມານຸສາ;

ມຫາພນ຺ຘນມຸຕ຺ໂຕມ຺ຫິ, ນິຫໂຕ ຕ຺ວມສິ ອນ຺ຕກາຕິ.

[ສໍ. ນິ. ໑.໑໕໑ ມາຣສໍຍຸຕ຺ເຕປິ] ‘‘ອນ຺ຕລິກ຺ຂຈໂຣ ປາໂສ, ຍ຺ວາຍໍ ຈຣຕິ ມານໂສ;

ເຕນ ຕໍ ພາຘຍິສ຺ສາມິ, ນ ເມ ສມຓ ໂມກ຺ຂສີຕິ.

[ສໍ. ນິ. ໑.໑໑໕໑ ມາຣສໍຍຸຕ຺ເຕປິ] ‘‘ຣູປາ ສທ຺ທາ ຣສາ ຄນ຺ຘາ, ໂຜຏ຺ຐພ຺ພາ ຈ ມໂນຣມາ;

ເອຕ຺ຖ ເມ ວິຄໂຕ ຉນ຺ໂທ, ນິຫໂຕ ຕ຺ວມສິ ອນ຺ຕກາ’’ຕິ.

ອຖ ໂຂ ມາໂຣ ປາປິມາ – ຊານາຕິ ມໍ ຠຄວາ, ຊານາຕິ ມໍ ສຸຄໂຕຕິ ທຸກ຺ຂີ ທຸມ຺ມໂນ

ຕຕ຺ເຖວນ຺ຕຣຘາຍີຕິ.

ມາຣກຖາ ນິຏ຺ຐິຕາ.