໔. ຣາຊາຍຕນກຖາ

໖. ອຖ ໂຂ ຠຄວາ ສຕ຺ຕາຫສ຺ສ ອຈ຺ຈເຍນ ຕມ຺ຫາ ສມາຘິມ຺ຫາ ວຸຏ຺ຐຫິຕ຺ວາ ມຸຈລິນ຺ທມູລາ ເຍນ ຣາຊາຍຕນໍ ເຕນຸປສງ຺ກມິ, ອຸປສງ຺ກມິຕ຺ວາ ຣາຊາຍຕນມູເລ ສຕ຺ຕາຫໍ ເອກປລ຺ລງ຺ເກນ ນິສີທິ ວິມຸຕ຺ຕິສຸຂປຏິສໍເວທີ. ເຕນ ໂຂ ປນ ສມເຍນ ຕປຸສ຺ສ [ຕປສ຺ສຸ (ສີ.)] ຠລ຺ລິກາ ວາຓິຊາ ອຸກ຺ກລາ ຕໍ ເທສໍ ອທ຺ຘານມຄ຺ຄປ຺ປຏິປນ຺ນາ ໂຫນ຺ຕິ. ອຖ ໂຂ ຕປຸສ຺ສຠລ຺ລິການໍ ວາຓິຊານໍ ຎາຕິສາໂລຫິຕາ ເທວຕາ ຕປຸສ຺ສຠລ຺ລິເກ ວາຓິເຊ ເອຕທໂວຈ – ‘‘ອຍໍ, ມາຣິສາ, ຠຄວາ ຣາຊາຍຕນມູເລ ວິຫຣຕິ ປຐມາຠິສມ຺ພຸທ຺ໂຘ; ຄຈ຺ຉຖ ຕໍ ຠຄວນ຺ຕໍ ມນ຺ເຖນ ຈ ມຘຸປິຓ຺ຑິກາຍ ຈ ປຕິມາເນຖ; ຕໍ ໂວ ຠວິສ຺ສຕິ ທີຆຣຕ຺ຕໍ ຫິຕາຍ ສຸຂາຍາ’’ຕິ. ອຖ ໂຂ ຕປຸສ຺ສຠລ຺ລິກາ ວາຓິຊາ ມນ຺ຖຎ຺ຈ ມຘຸປິຓ຺ຑິກຎ຺ຈ ອາທາຍ ເຍນ ຠຄວາ ເຕນຸປສງ຺ກມິໍສຸ, ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ອຏ຺ຐໍສຸ. ເອກມນ຺ຕໍ ຐິຕາ ໂຂ ຕປຸສ຺ສຠລ຺ລິກາ ວາຓິຊາ ຠຄວນ຺ຕໍ ເອຕທໂວຈຸໍ – ‘‘ປຏິຄ຺ຄຓ຺ຫາຕຸ ໂນ, ຠນ຺ເຕ, ຠຄວາ ມນ຺ຖຎ຺ຈ ມຘຸປິຓ຺ຑິກຎ຺ຈ, ຍໍ ອມ຺ຫາກໍ ອສ຺ສ ທີຆຣຕ຺ຕໍ ຫິຕາຍ ສຸຂາຍາ’’ຕິ. ອຖ ໂຂ ຠຄວໂຕ ເອຕທໂຫສິ – ‘‘ນ ໂຂ ຕຖາຄຕາ ຫຕ຺ເຖສຸ ປຏິຄ຺ຄຓ຺ຫນ຺ຕິ. ກິມ຺ຫິ ນຸ ໂຂ ອຫໍ ປຏິຄ຺ຄຓ຺ເຫຍ຺ຍໍ ມນ຺ຖຎ຺ຈ ມຘຸປິຓ຺ຑິກຎ຺ຈາ’’ຕິ? ອຖ ໂຂ ຈຕ຺ຕາໂຣ ມຫາຣາຊາໂນ ຠຄວໂຕ ເຈຕສາ ເຈໂຕປຣິວິຕກ຺ກມຎ຺ຎາຍ ຈຕຸທ຺ທິສາ ຈຕ຺ຕາໂຣ ເສລມເຍ ປຕ຺ເຕ ຠຄວໂຕ ອຸປນາເມສຸໍ – ‘‘ອິຘ, ຠນ຺ເຕ, ຠຄວາ ປຏິຄ຺ຄຓ຺ຫາຕຸ ມນ຺ຖຎ຺ຈ ມຘຸປິຓ຺ຑິກຎ຺ຈາ’’ຕິ. ປຏິຄ຺ຄເຫສິ ຠຄວາ ປຈ຺ຈຄ຺ເຆ ເສລມເຍ ປຕ຺ເຕ ມນ຺ຖຎ຺ຈ ມຘຸປິຓ຺ຑິກຎ຺ຈ, ປຏິຄ຺ຄເຫຕ຺ວາ ປຣິຠຸຎ຺ຊິ. ອຖ ໂຂ ຕປຸສ຺ສຠລ຺ລິກາ ວາຓິຊາ ຠຄວນ຺ຕໍ ໂອນີຕປຕ຺ຕປາຓິໍ ວິທິຕ຺ວາ ຠຄວໂຕ ປາເທສຸ ສິຣສາ ນິປຕິຕ຺ວາ ຠຄວນ຺ຕໍ (ໂອນີຕປຕ຺ຕປາຓິໍ ວິທິຕ຺ວາ ຠຄວໂຕ ປາເທສຸ ສິຣສາ ນິປຕິຕ຺ວາ ຠຄວນ຺ຕໍ) [( ) ສີ. ສ຺ຍາ. ໂປຕ຺ຖເກສຸ ນຕ຺ຖິ] ເອຕທໂວຈຸໍ – ‘‘ເອເຕ ມຍໍ, ຠນ຺ເຕ, ຠຄວນ຺ຕໍ ສຣຓໍ ຄຈ຺ຉາມ ຘມ຺ມຎ຺ຈ, ອຸປາສເກ ໂນ ຠຄວາ ຘາເຣຕຸ ອຊ຺ຊຕຄ຺ເຄ ປາຓຸເປເຕ ສຣຓໍ ຄເຕ’’ຕິ. ເຕ ຈ ໂລເກ ປຐມໍ ອຸປາສກາ ອເຫສຸໍ ທ຺ເວວາຈິກາ.

ຣາຊາຍຕນກຖາ ນິຏ຺ຐິຕາ.