໓໕. ກມ຺ມາຣຠຓ຺ຑຸວຕ຺ຖຸ

໙໘. ເຕນ ໂຂ ປນ ສມເຍນ ອຎ຺ຎຕໂຣ ກມ຺ມາຣຠຓ຺ຑຸ ມາຕາປິຕູຫິ ສທ຺ຘິໍ ຠຓ຺ຑິຕ຺ວາ ອາຣາມໍ ຄນ຺ຕ຺ວາ ຠິກ຺ຂູສຸ ປພ຺ພຊິໂຕ ໂຫຕິ. ອຖ ໂຂ ຕສ຺ສ ກມ຺ມາຣຠຓ຺ຑຸສ຺ສ ມາຕາປິຕໂຣ ຕໍ ກມ຺ມາຣຠຓ຺ຑຸໍ ວິຈິນນ຺ຕາ ອາຣາມໍ ຄນ຺ຕ຺ວາ ຠິກ຺ຂູ ປຸຈ຺ຉິໍສຸ – ‘‘ອປິ, ຠນ຺ເຕ, ເອວຣູປໍ ທາຣກໍ ປສ຺ເສຍ຺ຍາຖາ’’ຕິ? ຠິກ຺ຂູ ອຊານໍເຍວ ອາຫໍສຸ – ‘‘ນ ຊານາມາ’’ຕິ, ອປສ຺ສໍເຍວ ອາຫໍສຸ – ‘‘ນ ປສ຺ສາມາ’’ຕິ. ອຖ ໂຂ ຕສ຺ສ ກມ຺ມາຣຠຓ຺ຑຸສ຺ສ ມາຕາປິຕໂຣ ຕໍ ກມ຺ມາຣຠຓ຺ຑຸໍ ວິຈິນນ຺ຕາ ຠິກ຺ຂູສຸ ປພ຺ພຊິຕໍ ທິສ຺ວາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ອລຊ຺ຊິໂນ ອິເມ ສມຓາ ສກ຺ຍປຸຕ຺ຕິຍາ, ທຸສ຺ສີລາ ມຸສາວາທິໂນ. ຊານໍເຍວ ອາຫໍສຸ – ‘ນ ຊານາມາ’ຕິ, ປສ຺ສໍເຍວ ອາຫໍສຸ – ‘ນ ປສ຺ສາມາ’ຕິ. ອຍໍ ທາຣໂກ ຠິກ຺ຂູສຸ ປພ຺ພຊິໂຕ’’ຕິ. ອສ຺ໂສສຸໍ ໂຂ ຠິກ຺ຂູ ຕສ຺ສ ກມ຺ມາຣຠຓ຺ຑຸສ຺ສ ມາຕາປິຕູນໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ອຖ ໂຂ ເຕ ຠິກ຺ຂູ ຠຄວໂຕ ເອຕມຕ຺ຖໍ ອາໂຣເຈສຸໍ. ອນຸຊານາມິ, ຠິກ຺ຂເວ, ສງ຺ຆໍ ອປໂລເກຕຸໍ ຠຓ຺ຑຸກມ຺ມາຍາຕິ.

ກມ຺ມາຣຠຓ຺ຑຸວຕ຺ຖຸ ນິຏ຺ຐິຕໍ.