໓໐. ລິຂິຕກໂຈຣວຕ຺ຖຸ

໙໓. ເຕນ ໂຂ ປນ ສມເຍນ ອຎ຺ຎຕໂຣ ປຸຣິໂສ ໂຈຣິກໍ ກຕ຺ວາ ປລາຍິຕ຺ວາ ຠິກ຺ຂູສຸ ປພ຺ພຊິໂຕ ໂຫຕິ. ໂສ ຈ ຣຎ຺ໂຎ ອນ຺ເຕປຸເຣ ລິຂິໂຕ ໂຫຕິ – ຍຕ຺ຖ ປສ຺ສຕິ, ຕຕ຺ຖ ຫນ຺ຕພ຺ໂພຕິ. ມນຸສ຺ສາ ປສ຺ສິຕ຺ວາ ເອວມາຫໍສຸ – ‘‘ອຍໍ ໂສ ລິຂິຕໂກ ໂຈໂຣ. ຫນ຺ທ, ນໍ ຫນາມາ’’ຕິ. ເອກຈ຺ເຈ ເອວມາຫໍສຸ – ‘‘ມາຍ຺ໂຍ, ເອວໍ ອວຈຸຕ຺ຖ. ອນຸຎ຺ຎາຕໍ ຣຎ຺ຎາ ມາຄເຘນ ເສນິເຍນ ພິມ຺ພິສາເຣນ ‘‘ເຍ ສມເຓສຸ ສກ຺ຍປຸຕ຺ຕິເຍສຸ ປພ຺ພຊນ຺ຕິ, ນ ເຕ ລພ຺ຠາ ກິຎ຺ຈິ ກາຕຸໍ, ສ຺ວາກ຺ຂາໂຕ ຘມ຺ໂມ, ຈຣນ຺ຕຸ ພ຺ຣຫ຺ມຈຣິຍໍ ສມ຺ມາ ທຸກ຺ຂສ຺ສ ອນ຺ຕກິຣິຍາຍາ’’ຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ອຠຍູວຣາ ອິເມ ສມຓາ ສກ຺ຍປຸຕ຺ຕິຍາ, ນຍິເມ ລພ຺ຠາ ກິຎ຺ຈິ ກາຕຸໍ. ກຖຎ຺ຫິ ນາມ ສມຓາ ສກ຺ຍປຸຕ຺ຕິຍາ ລິຂິຕກໍ ໂຈຣໍ ປພ຺ພາເຊສ຺ສນ຺ຕີ’’ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ນ, ຠິກ຺ຂເວ, ລິຂິຕໂກ ໂຈໂຣ ປພ຺ພາເຊຕພ຺ໂພ. ໂຍ ປພ຺ພາເຊຍ຺ຍ, ອາປຕ຺ຕິ ທຸກ຺ກຏສ຺ສາຕິ.

ລິຂິຕກໂຈຣວຕ຺ຖຸ ນິຏ຺ຐິຕໍ.