໒໑. ພາລອພ຺ຍຕ຺ຕວຕ຺ຖຸ

໘໒. ເຕນ ໂຂ ປນ ສມເຍນ ຠິກ຺ຂູ, ທສວສ຺ສມ຺ຫາ ທສວສ຺ສມ຺ຫາຕິ, ພາລາ ອພ຺ຍຕ຺ຕາ ນິສ຺ສຍໍ ເທນ຺ຕິ. ທິສ຺ສນ຺ຕິ ອາຈຣິຍາ ພາລາ, ອນ຺ເຕວາສິກາ ປຓ຺ຑິຕາ. ທິສ຺ສນ຺ຕິ ອາຈຣິຍາ ອພ຺ຍຕ຺ຕາ, ອນ຺ເຕວາສິກາ ພ຺ຍຕ຺ຕາ. ທິສ຺ສນ຺ຕິ ອາຈຣິຍາ ອປ຺ປສ຺ສຸຕາ, ອນ຺ເຕວາສິກາ ພຫຸສ຺ສຸຕາ. ທິສ຺ສນ຺ຕິ ອາຈຣິຍາ ທຸປ຺ປຎ຺ຎາ, ອນ຺ເຕວາສິກາ ປຎ຺ຎວນ຺ໂຕ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂູ, ທສວສ຺ສມ຺ຫາ ທສວສ຺ສມ຺ຫາຕິ, ພາລາ ອພ຺ຍຕ຺ຕາ ນິສ຺ສຍໍ ທສ຺ສນ຺ຕິ. ທິສ຺ສນ຺ຕິ ອາຈຣິຍາ ພາລາ ອນ຺ເຕວາສິກາ ປຓ຺ຑິຕາ, ທິສ຺ສນ຺ຕິ ອາຈຣິຍາ ອພ຺ຍຕ຺ຕາ ອນ຺ເຕວາສິກາ ພ຺ຍຕ຺ຕາ, ທິສ຺ສນ຺ຕິ ອາຈຣິຍາ ອປ຺ປສ຺ສຸຕາ ອນ຺ເຕວາສິກາ ພຫຸສ຺ສຸຕາ, ທິສ຺ສນ຺ຕິ ອາຈຣິຍາ ທຸປ຺ປຎ຺ຎາ ອນ຺ເຕວາສິກາ ປຎ຺ຎວນ຺ໂຕ’’ຕິ. ອຖ ໂຂ ເຕ ຠິກ຺ຂູ ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂູ, ທສວສ຺ສມ຺ຫາ ທສວສ຺ສມ຺ຫາຕິ, ພາລາ ອພ຺ຍຕ຺ຕາ ນິສ຺ສຍໍ ເທນ຺ຕິ…ເປ… ສຈ຺ຈໍ, ຠຄວາຕິ. ວິຄຣຫິ ພຸທ຺ໂຘ ຠຄວາ…ເປ… ວິຄຣຫິຕ຺ວາ…ເປ… ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ – ‘‘ນ, ຠິກ຺ຂເວ, ພາເລນ ອພ຺ຍຕ຺ເຕນ ນິສ຺ສໂຍ ທາຕພ຺ໂພ. ໂຍ ທເທຍ຺ຍ, ອາປຕ຺ຕິ ທຸກ຺ກຏສ຺ສ. ອນຸຊານາມິ, ຠິກ຺ຂເວ, ພ຺ຍຕ຺ເຕນ ຠິກ຺ຂຸນາ ປຏິພເລນ ທສວສ຺ເສນ ວາ ອຕິເຣກທສວສ຺ເສນ ວາ ນິສ຺ສຍໍ ທາຕຸ’’ນ຺ຕິ.

ພາລອພ຺ຍຕ຺ຕວຕ຺ຖຸ ນິຏ຺ຐິຕໍ.