໔. ຊມ຺ພຸຂາທກສໍຍຸຕ຺ຕໍ

໑. ນິພ຺ພານປຎ຺ຫສຸຕ຺ຕວຓ຺ຓນາ

໓໑໔. ນິພ຺ພານໍ ອາຄມ຺ມາຕິ ເອຕ຺ຖ ອາຄມ຺ມາຕິ ສພ຺ພສງ຺ຂາເຣຫິ ນິພ຺ພິນ຺ນສ຺ສ ວິສງ຺ຂາຣນິນ຺ນສ຺ສ ໂຄຕ຺ຣຠຸນາ ວິວຏ຺ຏິຕມານສສ຺ສ ມຄ຺ເຄນ ສຈ຺ຉິກຣເຓນາຕິ ອຕ຺ໂຖ. ສຈ຺ຉິກິຣິຍມານຎ຺ຫິ ຕໍ ອຘິຄນ຺ຕ຺ວາ ອາຣມ຺ມຓປຈ຺ຈຍຠູຕຎ຺ຈ ປຏິຈ຺ຈ ອຘິປຕິປຈ຺ຈຍຠູເຕ ຈ ຕສ຺ມິໍ ປຣມສ຺ສາສຠາເວນ ວິມຸຕ຺ຕສງ຺ຂາຣສ຺ສ ປຣມຄຕິຠາເວນ ຈ ປຕິຏ຺ຐານຠູເຕ ປຕິຏ຺ຐາຍ ຂຍສງ຺ຂາໂຕ ມຄ຺ໂຄ ຣາຄາທິເກ ເຂເປຕີຕິ ຕໍສຈ຺ຉິກຣຓາຠາເວ ຣາຄາທີນໍ ອນຸປ຺ປຕ຺ຕິນິໂຣຘຄມນາຠາວໂຕ ‘‘ນິພ຺ພານໍ ອາຄມ຺ມ ຣາໂຄ ຂີຍຕີ’’ຕິ ວຸຕ຺ຕໍ.

ອິມິນາວ ສຸຕ຺ເຕນາຕິ ອິມິນາວ ຊມ຺ພຸຂາທກສຸຕ຺ເຕນ. ກິເລສກ຺ຂຍມຕ຺ຕໍ ນິພ຺ພານນ຺ຕິ ວເທຍ຺ຍ ‘‘ຣາຄກ຺ຂໂຍ’’ຕິອາທິນາ ສຸຕ຺ເຕ ອາຄຕຕ຺ຕາ. ‘‘ກິເລສກ຺ຂຍມຕ຺ຕ’’ນ຺ຕິ ອວິເສເສນ ວຸຕ຺ຕຕ຺ຕາ ອາຫ ‘‘ກສ຺ສາ’’ຕິອາທິ. ອທ຺ຘາ ອຕ຺ຕໂນຕິ ວກ຺ຂຕິ ‘‘ປຣສ຺ສ ກິເລສກ຺ຂເຍນ ປຣສ຺ສ ນິພ຺ພານສມ຺ປຕ຺ຕິ ນ ຍຸຕ຺ຕາ’’ຕິ. ນິພ຺ພານາຣມ຺ມຓກຣເຓນ ໂຄຕ຺ຣຠຸກ຺ຂເຓ ກິເລສກ຺ຂຍປ຺ປຕ຺ຕິຕາ ຈ ອາປນ຺ນາຕິ ອາຫ – ‘‘ກິໍ ປນ ເຕສຸ ອຂີເຓສຸເຍວາ’’ຕິອາທິ. ນນຸ ອາຣມ຺ມຓກຣຓມຕ຺ເຕນ ກິເລສກ຺ຂໂຍ ອນຸປ຺ປຕ຺ໂຕຕິ ນ ສກ຺ກາ ວຕ຺ຕຸໍ. ຈິຕ຺ຕຎ຺ຫິ ອຕີຕານາຄຕາທິສພ຺ພໍ ອາລມ຺ພນໍ ກໂຣຕິ, ນ ນິປ຺ຜນ຺ນເມວາຕິ. ໂຄຕ຺ຣຠູປິ ມຄ຺ເຄນ ຍາ ກິເລສານໍ ອນຸປ຺ປຕ຺ຕິຘມ຺ມຕາ ກາຕພ຺ພາ, ຕໍ ອາຣພ຺ຠ ປວຕ຺ຕິສ຺ສຕີຕິ? ນ, ອປ຺ປຕ຺ຕນິພ຺ພານສ຺ສ ນິພ຺ພານາຣມ຺ມຓຎາຓາຠາວໂຕ. ນ ຫິ ອຎ຺ເຎ ຘມ຺ມາ ວິຍ ນິພ຺ພານໍ, ຕໍ ປນ ອຕິຄມ຺ຠີຣຕ຺ຕາ ອປ຺ປຕ຺ເຕນ ອາລມ຺ພິຕຸໍ ນ ສກ຺ກາ, ຕສ຺ມາ ເຕນ ໂຄຕ຺ຣຠຸນາ ປຕ຺ຕພ຺ເພນ ຕິກາລິກສຠາວາຕິກ຺ກນ຺ຕຄມ຺ຠີຣຠາເວນ ຠວິຕພ຺ພໍ, ກິເລສກ຺ຂຍມຕ຺ຕຕໍ ວາ ອິຈ຺ຉໂຕ ໂຄຕ຺ຣຠຸໂຕ ປຸເຣຕຣໍ ນິປ຺ຜນ຺ເນນ ກິເລສກ຺ຂເຍນ ຠວິຕພ຺ພໍ. ອປ຺ປຕ຺ຕກິເລສກ຺ຂຍາຣມ຺ມຓກຣເຓ ຫິ ສຕິ ໂຄຕ຺ຣຠຸໂຕ ປຸເຣຕຣຈິຕ຺ຕານິປິ ອາລມ຺ເພຍ຺ຍຸນ຺ຕິ.

ຕສ຺ມາຕິອາທິ ວຸຕ຺ຕສ຺ເສວ ອຕ຺ຖສ຺ສ ນິຄມນໍ. ຕໍ ປເນຕໍ ນິພ຺ພານໍ. ຣູປິໂນ ຘມ຺ມາ ອຣູປິໂນ ຘມ຺ມາຕິອາທີສູຕິ ອາທິສທ຺ເທນ ໂລກຸຕ຺ຕຣອນາສວາທີນໍ ສງ຺ຄໂຫ ທຏ຺ຐພ຺ໂພ. ອຣູປຘມ຺ມາທິຠາວຄ຺ຄຫເຓນ ຈສ຺ສ ປຣິນິປ຺ຜນ຺ນຕາ ທີປິຕາ. ເຕນາຫ ‘‘ນ ກິເລສກ຺ຂຍມຕ຺ຕເມວາ’’ຕິ. ກິເລສກ຺ຂຍມຕ຺ຕຕາຍ ຫິ ສຕິ ນິພ຺ພານສ຺ສ ພຫຸຕາ ອາປຊ຺ຊຕິ ‘‘ຍຕ຺ຕກາ ກິເລສາ ຂີຍນ຺ຕິ, ຕຕ຺ຕການິ ນິພ຺ພານານີ’’ຕິ. ອຠາວສ຺ສຠາວໂຕ ຄມ຺ຠີຣາທິຠາໂວ ອສງ຺ຂຕາທິຠາໂວ ຈ ນ ສິຍາ, ວຸຕ຺ໂຕ ຈ ໂສ ນິພ຺ພານສ຺ສ, ຕສ຺ມາສ຺ສ ປຈ຺ເຈຕພ຺ໂພ ປຣິນິປ຺ຜນ຺ນຠາໂວ. ຍສ຺ມາ ຈ ສມ຺ມຸຕິສຈ຺ຈາຣມ຺ມຓໍ ສງ຺ຂຕຘມ຺ມາຣມ຺ມຓໍ ວາ ສມຸຈ຺ເຉທວເສນ ກິເລເສ ປຊຫິຕຸໍ ນ ສກ຺ໂກຕິ, ຍໂຕ ມຫຄ຺ຄຕຎາຓໍ ວິປສ຺ສນາຎາຓໍ ວາ ກິເລສວິກ຺ຂມ຺ຠນວເສນ ຕທງ຺ຄວເສນ ວາ ປຊຫຕິ, ຕສ຺ມາ ອຣິຍມຄ຺ຄຎາຓສ຺ສ ສມ຺ມຸຕິສຈ຺ຈສງ຺ຂຕຘມ຺ມາຣມ຺ມເຓຫິ ວິປຣີຕສຠາເວນ ອາຣມ຺ມເຓນ ຠວິຕພ຺ພໍ. ຕຖາ ຫິ ຕໍ ສມຸຈ຺ເຉທວເສນ ກິເລເສ ປຊຫີຕິ ເອວໍ ປຣິນິປ຺ຜນ຺ນາສງ຺ຂຕສຠາວໍ ນິພ຺ພານນ຺ຕິ ນິຏ຺ຐເມຕ຺ຖ ຄນ຺ຕພ຺ພນ຺ຕິ.

ນິພ຺ພານປຎ຺ຫສຸຕ຺ຕວຓ຺ຓນາ ນິຏ຺ຐິຕາ.

໓-໑໕. ຘມ຺ມວາທີປຎ຺ຫສຸຕ຺ຕາທິວຓ຺ຓນາ

໓໑໖-໓໒໘. ປຫາຍ ຄຕຕ຺ຕາຕິ ອຣິຍມຄ຺ເຄນ ຊຫິຕ຺ວາ ຎາຓຄມເນນ ຄຕຕ຺ຕາ. ສຸຏ຺ຐຸ ຄຕາຕິ ສມ຺ມາ ຄຕາ ປຏິປນ຺ນາຕິ ສຸຄຕາ. ປຣິຊານນຕ຺ຖນ຺ຕິ ຕີຫິ ປຣິຎ຺ຎາຫິ ປຣິຊານນຕ຺ຖໍ. ທຸກ຺ຂສງ຺ຂາໂຕຕິ ‘‘ທຸກ຺ຂ’’ນ຺ຕິ ສງ຺ຂາຕພ຺ໂພ ວິທິຕພ຺ໂພ ຈ ທຸກ຺ຂສຠາໂວ ຘມ຺ໂມ ທຸກ຺ຂທຸກ຺ຂຕາ. ຍສ຺ມາ ທຸກ຺ຂເວທນາວິນິມຸຕ຺ຕສງ຺ຂຕຘມ຺ເມ ສຸຂເວທນາຍ ຈ ຍຖາ ອິຘ ສງ຺ຂາຣທຸກ຺ຂຕາ ວິປຣິຓາມທຸກ຺ຂຕາຕິ ທຸກ຺ຂປຣິຍາໂຍ ນິຣຸປ຺ປເຕວ, ຕສ຺ມາ ທຸກ຺ຂສຠາໂວ ຘມ຺ໂມ ເອເກນ ທຸກ຺ຂສທ຺ເທນ ວິເສເສຕ຺ວາ ວຸຕ຺ໂຕ ‘‘ທຸກ຺ຂທຸກ຺ຂຕາ’’ຕິ. ເສສປທທ຺ວເຍຕິ ສງ຺ຂາຣທຸກ຺ຂຕາ ວິປຣິຓາມທຸກ຺ຂຕາຕິ ເອຕສ຺ມິໍ ປທທ຺ວເຍ. ສງ຺ຂາຣຠາເວນ ທຸກ຺ຂສຠາໂວ ສງ຺ຂາຣທຸກ຺ຂຕາ. ສຸຂສ຺ສ ວິປຣິຓາມເນນ ທຸກ຺ຂສຠາໂວ ວິປຣິຓາມທຸກ຺ຂຕາ.

ຘມ຺ມວາທີປຎ຺ຫສຸຕ຺ຕາທິວຓ຺ຓນາ ນິຏ຺ຐິຕາ.

໑໖. ທຸກ຺ກຣປຎ຺ຫສຸຕ຺ຕວຓ຺ຓນາ

໓໒໙. ປພ຺ພຊ຺ຊາຍາຕິ ປພ຺ພຊິຕປຏິປຕ຺ຕິຍໍ. ຘມ຺ມານຸຘມ຺ມປ຺ປຏິປນ຺ໂນ ຠິກ຺ຂູຕິ ຘມ຺ມານຸຘມ຺ມໍ ປຏິປຊ຺ຊມາໂນ ຠິກ຺ຂຸ. ປາຕນ຺ຕິ ປາໂຕ. ນຈິຣສ຺ສນ຺ຕິ ຂິປ຺ປເມວ. ເຕນາຫ ‘‘ລຫຸເຍວາ’’ຕິ.

ທຸກ຺ກຣປຎ຺ຫສຸຕ຺ຕວຓ຺ຓນາ ນິຏ຺ຐິຕາ.

ຊມ຺ພຸຂາທກສໍຍຸຕ຺ຕວຓ຺ຓນາ ນິຏ຺ຐິຕາ.