໓. ອຏ຺ຐສຕປຣິຍາຍວຄ຺ໂຄ

໑. ສີວກສຸຕ຺ຕວຓ຺ຓນາ

໒໖໙. ຈູຬາ ປນ ອສ຺ສ ມຫຕີ ອຕ຺ຖິ ສວິເສສາ, ຕສ຺ມາ ‘‘ໂມຬິຍສີວໂກ’’ຕິ ວຸຈ຺ຈຕິ. ຉນ຺ນປຣິພ຺ພາຊໂກຕິ ກມ຺ພລາທິນາ ໂກປີນປຏິຈ຺ຉາທກປຣິພ຺ພາຊໂກ. ປິຕ຺ຕປຈ຺ຈຍານີຕິ ປິຕ຺ຕເຫຕຸການິ. ‘‘ຕິສ຺ໂສ ເວທນາ’’ຕິ ວຕ຺ວາ ຕາສໍ ສມ຺ຠວໍ ທສ຺ເສຕຸໍ ‘‘ກຖ’’ນ຺ຕິອາທິ ວຸຕ຺ຕໍ. ກຸສລເວທນາ ອຸປ຺ປຊ຺ຊຕິ ປິຕ຺ຕປຈ຺ຈຍາ. ປິຕ຺ຕເຠສຊ຺ຊໍ ກຣິສ຺ສາມີຕິ ເຠສຊ຺ຊສມ຺ຠຣຓຕ຺ຖຎ຺ເຈວ ຕທຕ຺ຖໍ ອາມິສກິຎ຺ຊກ຺ຂສມ຺ຠຣຓຕ຺ຖຎ຺ຈ ປາຓໍ ຫນຕີຕິ ໂຍຊນາ. ມຊ຺ຌຕ຺ໂຕ ເຠສຊ຺ຊກຣເຓ ອຸທາສີໂນ.

ຕສ຺ມາຕິ ຍສ຺ມາ ປິຕ຺ຕາທິປຈ຺ຈຍເຫຕຸກນ຺ຕິ ອຕ຺ຕໂນ ຈ ໂລກສ຺ສ ຈ ປຈ຺ຈກ຺ຂໍ ອຕິຘາວນ຺ຕິ ເຍ ສມຓາ ວາ ພ຺ຣາຫ຺ມຓາ ວາ, ຕສ຺ມາ ເຕສໍ ມິຈ຺ຉາ. ປິຕ຺ຕາທີນໍ ຕິຓ຺ຓມ຺ປິ ສໂມຘານສນ຺ນິປາເຕ ຊາຕານິ ສນ຺ນິປາຕິການິ. ປຸຣິມອຸຕຸໂນ ວິສທິໂສ ອຸຕຸວິປຣິຓາໂມຕິ ອາຫ ‘‘ວິສຠາຄອຸຕຸໂຕ ຊາຕານີ’’ຕິ. ອນຸທໂກ ຖທ຺ຘລູຂຠູມິວິຠາໂຄ ຊງ຺ຄລເທໂສ, ວຸຕ຺ຕວິປຣິຍາເຍນ ອນຸປເທໂສ ເວທິຕພ຺ໂພ. ມລຍໍ ຫິມສີຕພຫຸໂລ, ອິຕໂຣ ອຸຓ຺ຫພຫຸໂລ.

ອຕ຺ຕໂນ ປກຕິຈຣິຍານໍ ວິສມໍ ກາຍສ຺ສ ປຣິຫຣຓວເສນ, ຊາຕານິ ປນ ອສຍ຺ຫສຫນອເທສອກາລຈຣຓາທິນາ ເວທິຕພ຺ພານີຕິ ອາຫ ‘‘ມຫາຠາຣວຫນາ’’ຕິອາທິ. ປຣສ຺ສ ອຸປກ຺ກມໂຕ ນິພ຺ພຕ຺ຕານິ ໂອປກ຺ກມິການີຕິ ອາຫ – ‘‘ອຍໍ ໂຈໂຣ ວາ’’ຕິອາທິ. ເກວລນ຺ຕິ ພາຫິຣປຈ຺ຈຍໍ ອນເປກ຺ຂິຕ຺ວາ ເກວລໍ ເຕເນວ. ເຕນາຫ ‘‘ກມ຺ມວິປາກໂຕວ ຊາຕານີ’’ຕິ. ສກ຺ກາ ປຏິພາຫິຕຸໍ ປຕີກາເຣນ. ໂລກໂວຫາໂຣ ນາມ ກຖິໂຕ ປິຕ຺ຕສມຸຏ຺ຐານາທິສມຎ຺ຎາຍ ໂລກສິທ຺ຘຕ຺ຕາ. ກາມໍ ສຣີຣສນ຺ນິສ຺ສິຕາ ເວທນາ ກມ຺ມນິພ຺ພຕ຺ຕາວ, ຕສ຺ສາ ປນ ປຈ຺ຈຸປ຺ປນ຺ນປຈ຺ຈຍວເສນ ເອວມຍໍ ໂລກໂວຫາໂຣຕິ ວຸຕ຺ຕຎ຺ເຈວ ຄເຫຕ຺ວາ ປຣວາທປຏິເສໂຘ ກໂຕຕິ ທຏ຺ຐພ຺ພໍ.

ສີວກສຸຕ຺ຕວຓ຺ຓນາ ນິຏ຺ຐິຕາ.

໒-໑໐. ອຏ຺ຐສຕສຸຕ຺ຕາທິວຓ຺ຓນາ

໒໗໐-໒໗໘. ເວທນານໍ ອຏ຺ຐາຘິກໍ ສຕໍ, ຕສ຺ສ ອຏ຺ຐສຕສ຺ສ ຕພ຺ຠາວສ຺ສ ປຣິຍາໂຍ ກາຣຓໍ ເອຕ຺ຖ ອຕ຺ຖີຕິ ອຏ຺ຐສຕປຣິຍາໂຍ, ສຸຕ຺ຕໍ. ເຕນາຫ ‘‘ອຏ຺ຐສຕສ຺ສ ກາຣຓຠູຕ’’ນ຺ຕິ. ຘມ຺ມກາຣຓນ຺ຕິ ປຣິຍຕ຺ຕິຘມ຺ມຠູຕໍ ກາຣຓໍ. ກາຍິກາຕິ ປຎ຺ຈທ຺ວາຣກາຍິກາ. ເຕນາຫ ‘‘ກາມາວຈເຣເຍວ ລພ຺ຠນ຺ຕີ’’ຕິ, ກາມຠູມິກາຕິ ອຕ຺ໂຖ. ອຣູປາວຈເຣ ນຕ຺ຖິ, ຕິຠູມິກາຕິ ອຕ຺ໂຖ. ເຕນາຫ – ‘‘ອຣູເປ ຕິກຈຕຸກ຺ກຊ຺ຌານໍ ອຸປ຺ປຊ຺ຊຕິ, ຕຎ຺ຈ ໂຂ ໂລກຸຕ຺ຕຣໍ, ນ ໂລກິຍ’’ນ຺ຕິ. ອິຕຣາ ອຸເປກ຺ຂາເວທນາ. ອຸປວິຈຣນ຺ຕິ ອຸເປຈ຺ຈ ປຊ຺ຊນ຺ຕີຕິ ອຕ຺ໂຖ. ຕໍສມ຺ປຍຸຕ຺ຕານນ຺ຕິ ວິຈາຣສມ຺ປຍຸຕ຺ຕານໍ.

ປຏິລາຠໂຕຕິ ປຏິລທ຺ຘຠາວໂຕ. ສມນຸປສ຺ສໂຕຕິ ປຈ຺ຈເວກ຺ຂໂຕ ປສ຺ສໂຕ. ອຕີຕໍ ຂຓຕ຺ຕຍາຕິກ຺ກເມນ ອຕິກ຺ກນ຺ຕໍ, ນິຣຸທ຺ຘປ຺ປຕ຺ຕິຍາ ນິຣຸທ຺ຘໍ, ປກຕິວິຊຫເນນ ວິປຣິຓຕໍ. ສມນຸສ຺ສຣໂຕຕິ ຈິນ຺ຕຍໂຕ. ເຄຫສ຺ສິຕນ຺ຕິ ກາມຄຸຓນິສ຺ສິຕໍ. ກາມຄຸຓາ ຫິ ອິຘ ເຄຫນິສ຺ສິຕຘມ຺ເມນ ເຄຫປຣິຍາເຍນ ວຸຕ຺ຕາ.

ວິປຣິຓາມວິຣາຄນິໂຣຘນ຺ຕິ ວິປຣິຓາມນໍ ວິຣຊ຺ຊນລກ຺ຂຓໍ ນິຣຸຊ຺ຌນຎ຺ຈ ວິທິຕ຺ວາ. ປຸພ຺ເພຕິ ອຕີເຕ. ເອຕຣຫີຕິ ອິທານິ ວຕ຺ຕມານາ. ສມ຺ມປ຺ປຎ຺ຎາຍ ປສ຺ສໂຕຕິ ວິປສ຺ສນາປຎ຺ຎາຍ ເຈວ ມຄ຺ຄປຎ຺ຎາຍ ຈ ຍາຖາວໂຕ ປສ຺ສໂຕ. ອຸສ຺ສຸກ຺ກາເປຕຸນ຺ຕິ ວິປສ຺ສນໍ ປຏ຺ຐເປຕ຺ວາ ມຄ຺ຄປຏິເວຘໍ ປາເປຕຸໍ. ນິພ຺ພານໍ ອຸທ຺ທິສ຺ສ ປວຕ຺ຕິຕຕ຺ຕາ ເນກ຺ຂມ຺ມສ຺ສິຕໂສມນສ຺ສານິ ນາມ. ໂລກາມິສປຏິສໍຍຸຕ຺ຕານນ຺ຕິ ກາມຄຸຓນິສ຺ສິຕານໍ. ຕທາຍຕນນ຺ຕິ ຕໍ ອາຍຕນໍ ຕໍ ກາຣຓໍ ອຣຫຕ຺ຕໍ. ອນຸຕ຺ຕເຣສຸ ວິໂມກ຺ເຂສູຕິ ອຣິຍຜລຘມ຺ເມສຸ. ປິຫນ຺ຕິ ອຘິຄມິຈ຺ຉໍ.

ອຸເປກ຺ຂາຕິ ໂສມນສ຺ສຣຫິຕອຎ຺ຎາຓຸເປກ຺ຂາ. ພາລ຺ຍໂຍຄໂຕ ພາລສ຺ສ, ຕໂຕ ເອວ ມູຬ຺ຫສ຺ສ ປຸຖຸຊ຺ຊນສ຺ສ. ກິເລໂສຘີນໍ ມຄ຺ໂຄຘີຫິ ອຊິຕຕ຺ຕາ ອໂນຘິຊິນສ຺ສ. ສຕ຺ຕມຠວາທິໂຕ ອຸທ຺ຘໍ ປວຕ຺ຕນວິປາກສ຺ສ ອຊິຕຕ຺ຕາ ອວິປາກຊິນສ຺ສ. ອເນກາທີນເວ ວຏ຺ເຏ ອາທີນວສ຺ສ ອຊານເນນ ອນາທີນວທສ຺ສາວິໂນ. ປຏິປຕ຺ຕິປຏິເວຘພາຫຸສຈ຺ຈາຠາເວນ ອສ຺ສຸຕວໂຕ ປຸຖຸຊ຺ຊນສ຺ສ. ຣູປໍ ສາ ນາຕິວຕ຺ຕຕິ ນ ອຕິກ຺ກມຕິ ຎາຓສມ຺ປຍຸຕ຺ຕາຠາວໂຕ. ສພ຺ພສງ຺ຄາຫໂກຕິ ສພ຺ພຘມ຺ເມ ສງ຺ຄຓ຺ຫນໂກ. ຕຕິຍາທີນິ ຍາວ ທສມາ ເຫຏ຺ຐາ ວຸຕ຺ຕນຍຕ຺ຕາ ອຸຕ຺ຕານຕ຺ຖາເນວ.

ອຏ຺ຐສຕສຸຕ຺ຕາທິວຓ຺ຓນາ ນິຏ຺ຐິຕາ.

໑໑. ນິຣາມິສສຸຕ຺ຕວຓ຺ຓນາ

໒໗໙. ອາຣມ຺ມຓໂຕ ສມ຺ປໂຍຄໂຕ ຈ ກິເລສາມິເສນ ສາມິສາ. ນິຣາມິສາຍາຕິ ນິສ຺ສກ຺ກວຈນໍ. ນິຣາມິສຕຣາວາຕິ ເອກໍສວຈນໍ ຕສ຺ສາ ຕຖາ ນິສ຺ສເມຕພ຺ພຕາຍ. ສາ ຫິ ປີຕິ ສພ຺ພໂສ ສນ຺ຕກິເລສາມິເສ ສນ຺ຕາເນ ປວຕ຺ຕິຍາ ອຈ຺ຈນ຺ຕສຠາວຘມ຺ມາຣມ຺ມຓວິສຍຕາຍ ສຍມ຺ປິ ສາຕິສຍໍ ສນ຺ຕສຠາວາກາເຣນ ປວຕ຺ຕິຍາ ນິຣາມິສາຍປິ ນິຣາມິສຕຣາ ວຸຕ຺ຕາ. ເຕນາຫ ‘‘ນນຸ ຈາ’’ຕິອາທິ. ອິທານິ ຕມຕ຺ຖໍ ອຸປມາຍ ສາເຘຕຸໍ ‘‘ຍຖາ ຫີ’’ຕິອາທິມາຫ. ອປ຺ປຏິຫາຣິກນ຺ຕິ ປຏິຫຣຓຣຫິຕໍ ອປ຺ປຏິຫາຣໍ, ເກນຈິ ອນາວຏນ຺ຕິ ອຕ຺ໂຖ. ເສສວາເຣສູຕິ ສຸຂວາຣອຸເປກ຺ຂາວາເຣສຸ.

ວິໂມກ຺ຂວາໂຣ ປນ ນ ອຕິທິຏ຺ໂຐ ອິຕເຣຫິ ວິສທິສຕ຺ຕາ. ເຕນາຫ ‘‘ວິໂມກ຺ຂວາເຣ ປນາ’’ຕິອາທິ. ຣູປປຏິສໍຍຸຕ຺ໂຕຕິ ຠາວິຕຣູປປຏິສໍຍຸຕ຺ໂຕ. ສາມິໂສ ນາມ ຍສ຺ມາ ສາມິສຣູປປຏິພທ຺ຘວຸຕ຺ຕິ ເຈວ ສາມິສຣູປປຏິຠາຄຎ຺ຈ, ຕສ຺ມາ ‘‘ຣູປາມິສ’’ນ຺ຕິ ວຸຈ຺ຈຕິ, ເຕນ ຣູປາມິເສນ ສາມິໂສ ນາມ. ອຣູປາມິສສ຺ສ ອຠາວໂຕ ອຣູປປຏິສໍຍຸຕ຺ໂຕ ວິໂມກ຺ໂຂ ນິຣາມິໂສ ນາມ.

ນິຣາມິສສຸຕ຺ຕວຓ຺ຓນາ ນິຏ຺ຐິຕາ.

ອຏ຺ຐສຕປຣິຍາຍວຄ຺ຄວຓ຺ຓນາ ນິຏ຺ຐິຕາ.

ເວທນາສໍຍຸຕ຺ຕວຓ຺ຓນາ ນິຏ຺ຐິຕາ.