໑. ສຄາຖາວຄ຺ໂຄ

໑. ສມາຘິສຸຕ຺ຕວຓ຺ຓນາ

໒໔໙. ເວທນາ ຈ ປຊານາຕີຕິ ສຈ຺ຈາຠິສມ຺ໂພຘວເສນ ວຸຈ຺ຈມານເວທນານໍ ປຊານນໍ ສາຕິສຍສມາຘານປຸພ຺ພກນ຺ຕິ ຠຄວຕາ ‘‘ສມາຫິໂຕ’’ຕິ ວຸຕ຺ຕນ຺ຕິ ອາຫ ‘‘ອຸປຈາເຣນ ວາ ອປ຺ປນາຍ ວາ ສມາຫິໂຕ’’ຕິ. ເວທນາຕິ ຕິສ຺ໂສປິ ເວທນາ. ທຸກ຺ຂສຈ຺ຈວເສນາຕິ ທຸກ຺ຂສຈ຺ຈຠາເວນ, ປຣິຊານນວເສນາຕິ ອຕ຺ໂຖ. ສມ຺ຠວນ຺ຕິ ສມຸທຍໍ ຕຓ຺ຫາວິຊ຺ຊາກມ຺ມຜສ຺ສາທິປ຺ປເຠທໍ ອຸປ຺ປຕ຺ຕິກາຣຓໍ. ເຕນາຫ ‘‘ສມຸທຍສຈ຺ຈວເສນ ປຊານາຕີ’’ຕິ. ຍຕ຺ຖາຕິ ຍໍນິມິຕ຺ຕໍ, ຍໍ ອາຄມ຺ມ ກາມຕຓ຺ຫາວິຊ຺ຊາທິນິໂຣຘາ ເວທນານິໂຣໂຘ, ເຕສໍ ອຍໍ ນິໂຣໂຘ. ນິພ຺ພານໍ ອາຣພ຺ຠ ອຣິຍມຄ຺ຄປ຺ປວຕ຺ຕິຍາ ຫິ ນິພ຺ພານໍ ເວທນານິໂຣໂຘຕິ ວຸຕ຺ໂຕ. ຂຍໍ ຄເມຕີຕິ ຂຍຄາມີ, ຕໍ ຂຍຄາມິນໍ. ຉາຕໍ ວຸຈ຺ຈຕິ ຕຓ຺ຫາ ກາມານໍ ປາຕຸກາມຕາວເສນ ປວຕ຺ຕນໂຕ, ອຈ຺ຈນ຺ຕເມວ ສມຸຈ຺ຉິນ຺ນຕ຺ຕາ ນຕ຺ຖິ ເອຕສ຺ມິໍ ຉາຕນ຺ຕິ ນິຈ຺ຉາໂຕ. ເຕນາຫ ‘‘ນິຕ຺ຕຓ຺ໂຫ’’ຕິ. ສມ຺ມສນຈາຣເວທນາຕິ ສມ຺ມສນູປຈາຣເວທນາ. ທ຺ວີຫິ ປເທຫີຕິ ‘‘ສມາຫິໂຕ ສມ຺ປຊາໂນ’’ຕິ ອິເມຫິ ທ຺ວີຫິ. ‘‘ສໂຕ’’ຕິ ປນ ອິທໍ ສມ຺ປຊານປທສ຺ເສວ ອຸປພ຺ຣູຫນນ຺ຕິ ອຘິປ຺ປາໂຍ. ເສເສຫິ ຈຕູຫິ ຈຕຸສຈ຺ຈໍ ກຖິຕໍ, ອິຕເຣຫິ ປນ ທ຺ວີຫິ ຈຕຸສຈ຺ຈພຸຊ຺ຌນເມວ ກຖິຕໍ. ສພ຺ພສງ຺ຄາຫິໂກຕິ ສພ຺ພສຠາວຘມ຺ມານໍ ສງ຺ຄຓ຺ຫນໂກ. ເຕນາຫ ‘‘ຈຕຸຠູມກຘມ຺ມປຣິຈ຺ເຉໂທ ວຸຕ຺ໂຕ’’ຕິ.

ສມາຘິສຸຕ຺ຕວຓ຺ຓນາ ນິຏ຺ຐິຕາ.

໒. ສຸຂສຸຕ຺ຕວຓ຺ຓນາ

໒໕໐. ທຸກ຺ຂໍ ນ ໂຫຕີຕິ ອທຸກ຺ຂໍ, ສຸຂໍ ນ ໂຫຕີຕິ ອສຸຂໍ, ມ-ກາໂຣ ປທສນ຺ຘິກໂຣ. ອທຸກ຺ຂມສຸຂນ຺ຕິ ເວທຍິຕສທ຺ທາເປກ຺ຂາຍ ນປຸໍສກນິທ຺ເທໂສ. ສປຣສນ຺ຕານຄເຕ ສນ຺ຘາຍ ອຊ຺ຌຕ຺ຕພຫິທ຺ຘາຄຫຓນ຺ຕິ ອາຫ ‘‘ອຕ຺ຕໂນ ຈ ປຣສ຺ສ ຈາ’’ຕິ. ເຕນ ສພ຺ພມ຺ປິ ເວທຍິຕໍ ຄຫິຕນ຺ຕິ ທຏ຺ຐພ຺ພໍ. ນສ຺ສນສຠາວນ຺ຕິ ອິຕ຺ຕຣຂຓຕາຍ ຠງ຺ຄໂຕ ອຸທ຺ຘໍ ອປສ຺ສິຕພ຺ພສຠາວໍ. ປໂລໂກ ເຠໂທ ເອຕສ຺ສ ອຕ຺ຖີຕິ ປໂລກິນໍ. ເຕນາຫ ‘‘ຠິຊ຺ຊນສຠາວ’’ນ຺ຕິ. ຎາເຓນ ຜຸສິຕ຺ວາ ຜຸສິຕ຺ວາຕິ ປຸພ຺ພຠາເຄ ວິປສ຺ສນາຎາເຓນ ອນິຈ຺ຈາ ປຠງ຺ຄຸໂນຕິ ອາຣມ຺ມຓໂຕ, ອຸຕ຺ຕຣກາລໍ ອສມ຺ໂມຫໂຕ ມຄ຺ຄປຣມ຺ປຣາຍ ຜຸສິຕ຺ວາ ຜຸສິຕ຺ວາ ວຍໍ ປສ຺ສນ຺ໂຕ. ວິຣຊ຺ຊຕີຕິ ມຄ຺ຄວິຣາເຄນ ວິຣຊ຺ຊຕິ. ສມ຺ມສນຈາຣເວທນາ ກຖິຕາ ອາຣທ຺ຘວິປສ຺ສການໍ ວເສນ ເທສນາຕິ. ໂລກິຍໂລກຸຕ຺ຕເຣຫິ ຎາເຓຫິ ຍາຖາວໂຕ ປຣິຊານນໍ ປຏິວິຊ຺ຌນໍ ຎາຓຜຸສນໍ.

ສຸຂສຸຕ຺ຕວຓ຺ຓນາ ນິຏ຺ຐິຕາ.

໓. ປຫານສຸຕ຺ຕວຓ຺ຓນາ

໒໕໑. ສພ຺ພມ຺ປິ ອຏ຺ຐສຕປເຠທໍ ຕຓ຺ຫໍ ຉິນ຺ທິ ສມຸຈ຺ເຉທປຫານວເສນ ປຊຫິ. ເຕນາຫ ‘‘ສມຸຈ຺ຉິນ຺ທີ’’ຕິ. ຍທຄ຺ເຄນ ຕຓ຺ຫາ ສພ຺ພໂສ ສມຸຈ຺ຉິນ຺ນາ, ຕທຄ຺ເຄນ ສພ຺ພານິປິ ສຎ຺ໂຎຊນານີຕິ ອາຫ ‘‘ທສວິຘມ຺ປີ’’ຕິອາທິ. ສມ຺ມາຕິ ສຸຏ຺ຐຸ. ປຫານຎ຺ຈ ນາມ ອຸປາເຍນ ຎາເຍນ ປຫານນ຺ຕິ ອາຫ ‘‘ເຫຕຸນາ ກາຣເຓນາ’’ຕິ. ທສ຺ສນາຠິສມຍາຕິ ອສມ຺ໂມຫປຏິເວຘາ. ອຣຫຕ຺ຕມຄ຺ໂຄ ຫິ ອຸປ຺ປຊ຺ຊມາໂນວ ສຠາວປຏິຈ຺ຉາທກໍ ໂມຫໍ ວິທ຺ຘໍເສນ຺ໂຕ ເອວ ປວຕ຺ຕຕິ, ເຕນ ມາໂນ ຍາຖາວໂຕ ທິຏ຺ໂຐ ນາມ ໂຫຕິ, ອຍມສ຺ສ ທສ຺ສນາຠິສມໂຍ. ຍຖາ ຫິ ສູຣິເຍ ອຸຏ຺ຐິເຕ ອນ຺ຘກາໂຣ ວິທ຺ຘໍສິຍມາໂນ ວິຫໂຕ, ເອວໍ ອຣຫຕ຺ຕມຄ຺ເຄ ອຸປ຺ປຊ຺ຊມາເນ ໂສ ສພ຺ພໂສ ປຫີໂນ ເອວ ໂຫຕິ, ນ ຕສ຺ມິໍ ສນ຺ຕາເນ ປຕິຏ຺ຐໍ ລຠຕິ, ອຍມສ຺ສ ປຫານາຠິສມໂຍ. ເຕນ ວຸຕ຺ຕໍ ‘‘ອຣຫຕ຺ຕມຄ຺ໂຄ ຫີ’’ຕິອາທິ. ກິຈ຺ຈວເສນາຕິ ອສມ຺ໂມຫປຏິເວຘສງ຺ຂາຕສ຺ສ ທສ຺ສນກິຈ຺ຈສ຺ສ ອນິປ຺ຜາທນວເສນ.

ເຍ ອິເມ ຈຕ຺ຕາໂຣ ອນ຺ຕາຕິ ສມ຺ພນ຺ໂຘ. ມຣິຍາທນ຺ໂຕຕິ ມຣິຍາທສງ຺ຂາໂຕ ອນ຺ໂຕ. ເອສ ນໂຍ ເສສຕ຺ຕເຍປິ. ເຕສູຕິ ຈຕູສຸ ອນ຺ເຕສຸ. ອທຸໍ ຈຕຸຕ຺ຖໂກຏິສງ຺ຂາຕໍ ສພ຺ພສ຺ເສວ ວຏ຺ຏທຸກ຺ຂສ຺ສ ອນ຺ຕໍ ປຣິຈ຺ເຉທໍ ອຣຫຕ຺ຕມຄ຺ເຄນ ມານສ຺ສ ທິຏ຺ຐຕ຺ຕາ ປຫີນຕ຺ຕາ ຈ ອກາສີຕິ ໂຍຊນາ. ສມຸສ຺ສໂຍ ອຕ຺ຕຠາໂວ.

ນ ຣິຎ຺ຈຕີຕິ ນ ວິເວເຈຕິ ນ ວິສ຺ສຊ຺ເຊຕິ. ເຕນາຫ ‘‘ສມ຺ປຊຎ຺ຎໍ ນ ຊຫຕີ’’ຕິ, ສມ຺ປຊຎ຺ຎໍ ນ ປຣິຈ຺ຈຊຕີຕິ ອຕ຺ໂຖ. ສງ຺ຂ຺ຍໍ ໂນເປຕີຕິ ອິມສ຺ສ ‘‘ທິຏ຺ຐຘມ຺ເມ ອນາສໂວ’’ຕິ ອິມສ຺ສ ວເສນ ອຕ຺ຖໍ ວທນ຺ໂຕ ‘‘ຣຕ຺ໂຕ ທຸຏ຺ໂຐ’’ຕິ ອໂວຈ ສອຸປາທິເສສນິພ຺ພານວເສນ. ສງ຺ຂ຺ຍໍ ໂນເປຕີຕິ ວາ ທິຏ຺ເຐ-ຘມ຺ເມ ອນາສໂວ ຘມ຺ມຏ຺ໂຐ ເວທຄູ ກາຍສ຺ສ ເຠທາ ມນຸສ຺ໂສ ເທໂວຕິ ວາ ປຎ຺ຎຕ຺ຕິໍ ນ ອຸເປຕີຕິ ອນຸປາທິເສສນິພ຺ພານວເສນປິ ອຕ຺ໂຖ ວຕ຺ຕພ຺ໂພ. ເອຕ຺ຖ ຈ ສຸຂາທີສຸ ເວທນາສຸ ຍຖາກ຺ກມໍ ຣາຄານຸສຍາທໂຍ ກຖິຕາຕິ ອາຫ – ‘‘ອິມສ຺ມິໍ ສຸຕ຺ເຕ ອາຣມ຺ມຓານຸສໂຍ ກຖິໂຕ’’ຕິ. ໂຍ ຫິ ຣາຄາທິ ປຈ຺ຈຍສມວາເຍ ອຕິອິຏ຺ຐາທີສຸ ອຸປ຺ປຊ຺ຊນາຣໂຫ ມຄ຺ເຄນ ອປ຺ປຫີໂນ, ໂສ ‘‘ຣາຄານຸສໂຍ’’ຕິອາທິນາ ວຸຕ຺ໂຕ, ອປ຺ປຫີນຕ຺ໂຖ ໂສ ມຄ຺ເຄນ ປຫາຕພ຺ໂພ, ນ ປຣິຍຸຏ຺ຐານາຠິຠວຕ຺ໂຖຕິ.

ປຫານສຸຕ຺ຕວຓ຺ຓນາ ນິຏ຺ຐິຕາ.

໔. ປາຕາລສຸຕ຺ຕວຓ຺ຓນາ

໒໕໒. ຍຕ຺ຖ ປຕິຏ຺ຐາ ນຕ຺ຖິ ເອກນ຺ຕິກາຕິ ເອກນ຺ຕິກສ຺ສ ມຫໂຕ ປາຕສ຺ສ ອລນ຺ຕິ ອຍເມຕ຺ຖ ອຕ຺ໂຖ ອຘິປ຺ເປໂຕຕິ ອາຫ ‘‘ນຕ຺ຖິ ເອຕ຺ຖ ປຕິຏ຺ຐາ’’ຕິ. ອສມ຺ຠູຕຕ຺ຖນ຺ຕິ ນ ສມ຺ຠູຕຕ຺ຖໍ, ມຸສາຕິ ອຕ຺ໂຖ. ໂສຕິ ອສ຺ສຸຕວາ ປຸຖຸຊ຺ຊໂນ. ຍໍ ຕໍ ອຸທກໍ ປຕຕີຕິ ໂຍຊນາ. ຍສ຺ມາ ສມຸທ຺ທປິຏ຺ເຐ ອນ຺ຕຣນ຺ຕຣາ ເວຣມ຺ຠວາຕສທິໂສ ມຫາວາໂຕ ອຸຏ຺ຐຫິຕ຺ວາ ມຫາສມຸທ຺ເທ ອຸທກໍ ອຸຄ຺ຄຈ຺ຉາເປຕິ, ຕໍ ກທາຈິ ຈກ຺ກວາຬາຠິມຸຂໍ, ກທາຈິ ສິເນຣຸປາທາຠິມຸຂໍ ຄນ຺ຕ຺ວາ ຕໍ ປຕິຫນຕິ, ຕສ຺ມາ ວຸຕ຺ຕໍ ‘‘ພລວາມຸຂໍ ມຫາສມຸທ຺ທສ຺ສາ’’ຕິອາທິ. ເວເຄນ ປກ຺ຂນ຺ທິຕ຺ວາຕິ ມຫຕາ ວາຕເວເຄນ ສມຸທ຺ຘຕໍ ເຕເນວ ເວເຄນ ປກ຺ຂນ຺ທນ຺ຕຎ຺ຈ ຫຸຕ຺ວາ. ມຫານຣກປປາໂຕ ວິຍາຕິ ໂຍຊນາຍາມວິຕ຺ຖາຣຄມ຺ຠີຣໂສພ຺ຠປປາໂຕ ວິຍ ໂຫຕິ. ຕຖາຣູປານນ຺ຕິ ຕຕ຺ຖ ວສິຕຸໍ ສມຕ຺ຖານໍ. ອສນ຺ຕນ຺ຕິ ອຠູຕໍ. ອຕ຺ຖວເສນ ຫິ ວາຈາ ອຠູຕໍ ນາມ.

ນ ປຕິຏ຺ຐາສີຕິ ປຕິຏ຺ຐໍ ນ ລຠິ. ອນິພທ຺ຘນ຺ຕິ ອນິພນ຺ຘນຕ຺ຖໍ ຍໍກິຎ຺ຈິ. ທຸພ຺ພລຎາໂຓຕິ ຎາຓພລຣຫິໂຕ. ‘‘ອສ຺ສຸຕວາ ປຸຖຸຊ຺ຊໂນ’’ຕິ ວຕ຺ວາ ‘‘ສຸຕວາ ອຣິຍສາວໂກ’’ຕິ ວຸຕ຺ຕຕ຺ຕາ ‘‘ໂສຕາປນ຺ໂນ ຘຸຣ’’ນ຺ຕິ ວຸຕ຺ຕໍ. ອິຕເຣສຸ ອຣິຍສາວເກສຸ ວຕ຺ຕພ຺ພເມວ ນຕ຺ຖິ. ເຕສຎ຺ຫິ ເວທນາ ສຸປຣິຎ຺ຎາຕາ. ພລວວິປສ຺ສໂກ…ເປ… ໂຍຄາວຈໂຣປິ ວຏ຺ຏຕິ ມຕ຺ຕໂສ ເວທນານໍ ປຣິຎ຺ຎາຕຕ຺ຕາ.

ປາຕາລສຸຕ຺ຕວຓ຺ຓນາ ນິຏ຺ຐິຕາ.

໕. ທຏ຺ຐພ຺ພສຸຕ຺ຕວຓ຺ຓນາ

໒໕໓. ວິປຣິຓາມນວເສນ ທຸກ຺ຂໂຕ ທຏ຺ຐພ຺ພາຕິ ກິຎ຺ຈາປິ ສຸຂາ, ປຣິຓາມທຸກ຺ຂຕາ ປນ ສຸຂເວທນາຍ ເອກນ຺ຕິກາຕິ. ວິນິວິຊ຺ຌນຏ຺ເຐນາຕິ ປີຬນວເສນ ອຕ຺ຕຠາວສ຺ສ ວິຊ຺ຌນຏ຺ເຐນ. ຫຸຕ຺ວາຕິ ປຈ຺ຈຍສມາຄເມນ ອຸປ຺ປຊ຺ຊິຕ຺ວາ. ເຕນ ປາກຠາວປຸພ຺ພໂກ ອຕ຺ຕລາໂຠ ວຸຕ຺ໂຕ. ອຠາວາກາເຣນາຕິ ຠງ຺ຄຸປຄມນາກາເຣນ. ເຕນ ວິທ຺ຘໍສຠາໂວ ວຸຕ຺ໂຕ. ອຸຠເຍນ ອຸທຍພ຺ພຍປຣິຈ຺ຉິນ຺ນຕາຍ ສິຂປ຺ປຕ຺ຕໍ ອນິຈ຺ຈຕໍ ທສ຺ເສຕິ. ສ຺ວາຍໍ ຫຸຕ຺ວາ ອຠາວາກາໂຣ ອິຕຣາສຸປິ ເວທນາສຸ ລພ຺ຠເຕວ, ອຘິໂກ ຈ ປນ ທ຺ວິນ຺ນໍ ທຸກ຺ຂສຠາໂວ. ທຸກ຺ຂຕາວເສນ ປຸຣິມານໍ ເວທນານໍ ທຏ຺ຐພ຺ພຕາຍ ທສ຺ສິຕຕ຺ຕາ ປຈ຺ຉິມາຍ ເວທນາຍ ເອວໍ ທຏ຺ຐພ຺ພຕາ ທສ຺ສິຕາ. ອທ຺ທາຕິ ຎາຓຄຕິຍາ ສຈ຺ຉິກຕ຺ວາ ອທກ຺ຂິ. ຎາຓຄມນຎ຺ເຫຕໍ, ຍທິທໍ ທຸກ຺ຂໂຕ ທສ຺ສນໍ. ສນ຺ຕສຠາວໍ ສຸຂທຸກ຺ຂໂຕ ອຸປສນ຺ຕຣູປຕ຺ຕາ.

ທຏ຺ຐພ຺ພສຸຕ຺ຕວຓ຺ຓນາ ນິຏ຺ຐິຕາ.

໖. ສລ຺ລສຸຕ຺ຕວຓ຺ຓນາ

໒໕໔. ທ຺ວີສຸ ຊເນສູຕິ ສຸຕວນ຺ຕອສ຺ສຸຕວນ຺ເຕສຸ ທ຺ວີສຸ ຊເນສຸ. ອນຸຄຕເວຘນ຺ຕິ ປຸພ຺ເພ ປວຕ຺ຕເວຘສ຺ສ ອນຸຄຕເວຘໍ. ພລວຕຣາ ທິຄຸຓາ ວິຍ ຫຸຕ຺ວາ ທຬ຺ຫຕຣປວຕ຺ຕິຍາ. ເອວເມວາຕິ ຍຖາ ວິທ຺ຘສ຺ສ ປຸຣິສສ຺ສ ອນຸເວຘນາ ພລວຕຣາ, ເອວເມວ. ສມາຘິມຄ຺ຄຜລານິ ນິສ຺ສຣຓໍ ວິກ຺ຂມ຺ຠນສມຸຈ຺ເຉທປຏິປ຺ປສ຺ສທ຺ຘິວເສນ. ສມາຘິສີເສນ ເຫຕ຺ຖ ຌານຎ຺ຈ ຄຫິຕໍ. ໂສ ນ ຊານາຕິ ອນຘິຄຕຕ຺ຕາ. ນິສ຺ສຣຓນ຺ຕິ ຊານາຕິ ອນິສ຺ສຣຓເມວ. ຕາສໍ ສມຘິຄຕານໍ ສຸຂທຸກ຺ຂເວທນານໍ. ນ ວິປ຺ປຍຸຕ຺ໂຕ ອປ຺ປຫີນກິເລສຕ຺ຕາ. ສງ຺ຂາຕຘມ຺ມສ຺ສາຕິ ສງ຺ຂາຍ ປຎ຺ຎາຍ ປຣິຎ຺ຎາຕຈຕຸກ຺ຂນ຺ຘສ຺ສ. ເຕນາຫ ‘‘ຕຸລິຕຘມ຺ມສ຺ສາ’’ຕິ. ອິມສ຺ມິມ຺ປິ ສຸຕ຺ເຕ ປຸຣິມສຸຕ຺ເຕ ວິຍ ອາຣມ຺ມຓານຸສໂຍວ ກຖິໂຕ, ໂສ ປນ ຕຕ຺ຖ ວຸຕ຺ຕນເຍເນວ ເວທິຕພ຺ໂພ. ອນຸໂຣຘວິໂຣຘປຫານສ຺ສ ວຸຕ຺ຕຕ຺ຕາ ຂີຓາສໂວ ຘຸຣໍ. ອນາຄາມີປິ ວຏ຺ຏຕິ, ຕສ຺ສ ວິໂຣຘປ຺ປຫານໍ ລພ຺ຠຕິ.

ສລ຺ລສຸຕ຺ຕວຓ຺ຓນາ ນິຏ຺ຐິຕາ.

໗. ປຐມເຄລຎ຺ຎສຸຕ຺ຕວຓ຺ຓນາ

໒໕໕. ສທ຺ທຫິຕ຺ວາ ຄິລາເນ ອຸປຏ຺ຐາຕພ຺ເພ ມຎ຺ຎິສ຺ສນ຺ຕີຕິ ໂຍຊນາ. ຕຕ຺ຖາຕິ ຕສ຺ມິໍ ຐາເນ. ກມ຺ມຏ຺ຐານານຸໂຍໂຄ ສປ຺ປາໂຍ ເຍສໍ ເຕ ກມ຺ມຏ຺ຐານສປ຺ປາຍາ, ສຕິປຏ຺ຐານຣຕາຕິ ອຕ຺ໂຖ. ອນິຈ຺ຈຕໍ ອນຸປສ຺ສນ຺ໂຕຕິ ກາຍໍ ປຏິຈ຺ຈ ອຸປ຺ປນ຺ນາຍ ເວທນາຍ ຈ ອນິຈ຺ຈຕໍ ອນຸປສ຺ສນ຺ໂຕ. ວຍໍ ອນຸປສ຺ສນ຺ໂຕຕິອາທີສຸປິ ເອເສວ ນໂຍ. ວຍນ຺ຕິ ປນ ຕາຍ ເອວ ຂຍສງ຺ຂາຕໍ. ວິຣາຄນ຺ຕິ ວິຣຊ຺ຊນໍ. ປຏິນິສ຺ສຄ຺ຄນ຺ຕິ ປຣິຈ຺ຈາຄປຏິນິສ຺ສຄ຺ຄໍ, ປກ຺ຂນ຺ທນປຏິນິສ຺ສຄ຺ຄມ຺ປິ ວາ.

ອາຄມນີຍປຏິປທາຕິ ອຣິຍມຄ຺ຄສ຺ສ ອາຄມນຏ຺ຐານິຍາ ປຸພ຺ພຠາຄປຏິປທາ. ປຸພ຺ພຠາຄາເຍວ ນ ໂລກຸຕ຺ຕຣາ. ສມ຺ປຊຎ຺ຎໍ ປຸພ຺ພຠາຄິຍເມວ. ຕິສ຺ໂສ ອນຸປສ຺ສນາ ປຸພ຺ພຠາຄາເຍວ ວິປສ຺ສນາປຣິຍາປນ຺ນຕ຺ຕາ. ມິສ຺ສກາຕິ ໂລກິຍໂລກຸຕ຺ຕຣມິສ຺ສກາ. ຠາວນາກາໂລ ທສ຺ສິໂຕ ‘‘ນິໂຣຘານຸປສ຺ສິໂນ ວິຫຣໂຕ, ປຏິນິສ຺ສຄ຺ຄານຸປສ຺ສິໂນ ວິຫຣໂຕ ຣາຄານຸສໂຍ ປຫີຍຕີ’’ຕິ ວຸຕ຺ຕຕ຺ຕາ.

ປຐມເຄລຎ຺ຎສຸຕ຺ຕວຓ຺ຓນາ ນິຏ຺ຐິຕາ.

໘-໙. ທຸຕິຍເຄລຎ຺ຎສຸຕ຺ຕາທິວຓ຺ຓນາ

໒໕໖-໒໕໗. ຜສ຺ສໍ ປຏິຈ຺ຈາຕິ ເອຕ຺ຖ ຜສ຺ສສີເສນ ຜສ຺ສາຍຕນານໍ ຄຫຓໍ. ນ ຫິ ຜສ຺ສາຍຕເນຫິ ວິນາ ຜສ຺ສສ຺ສ ສມ຺ຠໂວ. ເຕນາຫ ‘‘ກາໂຍວ ຫິ ເອຕ຺ຖ ຜສ຺ໂສຕິ ວຸຕ຺ໂຕ’’ຕິ, ຜສ຺ສສີເສນ ວຸຕ຺ໂຕຕິ ອຘິປ຺ປາໂຍ. ນວມໍ ອຸຕ຺ຕານເມວ ເຫຏ຺ຐາ ວຸຕ຺ຕນຍຕ຺ຕາ.

ທຸຕິຍເຄລຎ຺ຎສຸຕ຺ຕາທິວຓ຺ຓນາ ນິຏ຺ຐິຕາ.

໑໐. ຜສ຺ສມູລກສຸຕ຺ຕວຓ຺ຓນາ

໒໕໘. ສຸຂເວທນາຍ ຫິຕໍ ສຸຂເວທນິຍໍ. ໂສ ປເນສ ຫິຕຠາໂວ ປຈ຺ຈຍຠາເວນາຕິ ອາຫ ‘‘ສຸຂເວທນາຍ ປຈ຺ຈຍຠູຕ’’ນ຺ຕິ. ອິມສ຺ມິມ຺ປິ ສຸຕ຺ຕທ຺ວເຍຕິ ອິມສ຺ມິໍ ນວເມ ທສເມ ຈ ສຸຕ຺ເຕປິ. ສມ຺ມສນຈາຣເວທນາຕິ ສມ຺ມສນີຍເວທນາ ເອວ ກຖິຕາ, ນ ໂລກຸຕ຺ຕຣາຕິ ອຘິປ຺ປາໂຍ.

ຜສ຺ສມູລກສຸຕ຺ຕວຓ຺ຓນາ ນິຏ຺ຐິຕາ.

ສຄາຖາວຄ຺ຄວຓ຺ຓນາ ນິຏ຺ຐິຕາ.