໒. ຣາຘສໍຍຸຕ຺ຕໍ

໑. ປຐມວຄ຺ໂຄ

໑. ມາຣສຸຕ຺ຕວຓ຺ຓນາ

໑໖໐. ມາຣສທ຺ໂທຍໍ ຠາວສາຘໂນຕິ ທສ຺ເສນ຺ໂຕ ‘‘ມາໂຣ ວາ ອສ຺ສາຕິ ມຣຓໍ ວາ ຠເວຍ຺ຍາ’’ຕິ ອາຫ. ມາເຣຕາຕິ ມຣິຕພ຺ໂພ ມາຣໍ ມຣຓໍ ເອຕພ຺ໂພຕິ ອາຫ ‘‘ມາເຣຕພ຺ໂພ’’ຕິ. ອນຸປາທານິພ຺ພານຕ຺ຖາຕິ ຜລວິມຸຕ຺ຕິສງ຺ຂາຕາ ອຣຫໂຕ ອຣຫນ຺ຕຕາ ນາມ ຍາວເທວ ອນຸປາທານິພ຺ພານຕ຺ຖາ. ນິພ຺ພານພ຺ຠນ຺ຕເຣຕິ ອນຸປາທານິພ຺ພານາຘິຄມສ຺ສ ອພ຺ຠນ຺ຕເຣ ຕໂຕ ໂອຣເມວ ອິທໍ ມຄ຺ຄໍ ພ຺ຣຫ຺ມຈຣິຍໍ ວຸສ຺ສຕິ, ນ ຕໂຕ ປຣໍ. ອສ຺ສາຕິ ພ຺ຣຫ຺ມຈຣິຍສ຺ສ.

ມາຣສຸຕ຺ຕວຓ຺ຓນາ ນິຏ຺ຐິຕາ.

໒-໑໐. ສຕ຺ຕສຸຕ຺ຕາທິວຓ຺ຓນາ

໑໖໑-໑໖໙. ລຄ຺ຄປຸຈ຺ຉາຕິ ລຄ຺ຄນສ຺ສ ພຊ຺ຌນສ຺ສ ປຸຈ຺ຉາ. ຍທິ ຣູປາທີສຸ ສຕ຺ຕຕ຺ຕາ ສຕ຺ໂຕ, ຂີຓາສວາ ກຖໍ ສຕ຺ຕາຕິ? ສຕ຺ຕຠູຕປຸພ຺ພາຕິ ກຕ຺ວາ. ກີຬາວິຄມນ຺ຕິ ກີຬາຍ ອປນຍນໍ ໂອຣມຓໍ. ຍນ຺ຕຣຊ຺ຊຸ ວິຍ ຠວປພນ຺ຘສ຺ສ ນຍນໂຕ ຠວຣຊ຺ຊູຕິ ຕຓ຺ຫາ ວຸຕ຺ຕາ.

ສຕ຺ຕສຸຕ຺ຕາທິວຓ຺ຓນາ ນິຏ຺ຐິຕາ.

ປຐມວຄ຺ຄວຓ຺ຓນາ ນິຏ຺ຐິຕາ.

໒. ທຸຕິຍວຄ຺ໂຄ

໑-໑໒. ມາຣສຸຕ຺ຕາທິວຓ຺ຓນາ

໑໗໐-໑໘໑. ຣູປາທິວິນິມຸຕ຺ຕໍ ມຣຓໍ ນາມ ນຕ຺ຖິ ຣູປາທີນໍເຍວ ວິຠເວ ມຣຓສມຎ຺ຎາຕິ. ມຣຓຘມ຺ໂມ ວິນາສຠາໂວ.

ມາຣສຸຕ຺ຕາທິວຓ຺ຓນາ ນິຏ຺ຐິຕາ.

ທຸຕິຍວຄ຺ຄວຓ຺ຓນາ ນິຏ຺ຐິຕາ.

໓-໔. ອາຍາຈນວຄ຺ຄາທິ

໑-໑໑. ມາຣາທິສຸຕ຺ຕເອກາທສກວຓ຺ຓນາ

໑໘໒-໒໐໕. ສຸຂຸມໍ ກາຣຓໍ ອຸປຏ຺ຐາຕິ, ເຕເນສ ເຖໂຣ ປຏິຠາເນຍ຺ຍການໍ ເອຕທຄ຺ເຄ ຐປິໂຕ. ວິມຸຕ຺ຕິປຣິປາຈນີຍຘມ຺ມວເສເນວ, ນ ປຏິເວຘາວຫຠາເວນ.

ມາຣາທິສຸຕ຺ຕເອກາທສກວຓ຺ຓນາ ນິຏ຺ຐິຕາ.

ອາຍາຈນວຄ຺ຄາທິວຓ຺ຓນາ ນິຏ຺ຐິຕາ.

ສາຣຕ຺ຖປ຺ປກາສິນິຍາ ສໍຍຸຕ຺ຕນິກາຍ-ອຏ຺ຐກຖາຍ

ຣາຘສໍຍຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.