໑໓. ຌານສໍຍຸຕ຺ຕໍ

໑. ສມາຘິມູລກສມາປຕ຺ຕິສຸຕ຺ຕວຓ຺ຓນາ

໖໖໒. ສມາຘິກຸສໂລຕິ ສມາຘິສ຺ມິໍ ກຸສໂລ. ຕຍິທໍ ສມາຘິໂກສລ຺ລຕ຺ຕໍ ສຫ ຌານງ຺ຄໂຍເຄນ ຈຕຸພ຺ພິໂຘ ຌານສມາຘິ, ຕສ຺ມາ ຕໍ ຕໍ ວິຠາຄໍ ຊານນ຺ຕສ຺ສ ສິທ຺ຘໍ ໂຫຕີຕິ ອາຫ – ‘‘ປຐມໍ ຌານ’’ນ຺ຕິອາທິ. ຕຕ຺ຖ ວິຕກ຺ກວິຈາຣປີຕິສຸເຂກຄ຺ຄຕາວເສນ ປຐມໍ ປຎ຺ຈງ຺ຄິກໍ, ປີຕິສຸເຂກຄ຺ຄຕາວເສນ ທຸຕິຍໍ ຕິວງ຺ຄິກໍ, ສຸເຂກຄ຺ຄຕາວເສນ ຕຕິຍໍ ທຸວງ຺ຄິກໍ, ອຸເປກ຺ເຂກຄ຺ຄຕາວເສນ ຈຕຸຕ຺ຖໍ ທຸວງ຺ຄິກເມວາຕິ ເອວໍ ຕສ຺ມິໍ ຕສ຺ມິໍ ຌາເນ ຕໍຕໍອງ຺ຄານໍ ວວຕ຺ຖາເນ ກຸສໂລ. ສມາປຕ຺ຕິກຸສໂລຕິ ສມາປຊ຺ຊເນ ກຸສໂລ. ຫາເສຕ຺ວາຕິ ໂຕເສຕ຺ວາ. ກລ຺ລໍ ກຕ຺ວາຕິ ສມາຘານສ຺ສ ປຏິປກ຺ຂຘມ຺ມານໍ ທູຣີກຣເຓນ ສຫກາຣີກາຣຓຎ຺ຈ ສມາຘາເນນ ສມາປຊ຺ຊເນ ຈິຕ຺ຕໍ ສມຕ຺ຖໍ ກຕ຺ວາ. ເສສປທານີຕິ ເສສາ ຕໂຍ ໂກຏ຺ຐາສາ. ຕຕິຍາທີສຸ ນເຍສຸ ອກຸສໂລປິ ຌານຕ຺ຖາຍ ປຏິປນ຺ນຕ຺ຕາ ‘‘ຌາຍີເຕວາ’’ຕິ ວຸຕ຺ໂຕ.

ສມາຘິມູລກສມາປຕ຺ຕິສຸຕ຺ຕວຓ຺ຓນາ ນິຏ຺ຐິຕາ.

໒-໕໕. ສມາຘິມູລກຐິຕິສຸຕ຺ຕາທິວຓ຺ຓນາ

໖໖໓-໗໑໖. ທຸຕິຍາທິສຸຕ຺ເຕສຸ ຐິຕິກຸສໂລຕິ ເອຕ຺ຖ ອນ຺ໂຕຄຘເຫຕຸອຕ຺ໂຖ ຐິຕິ-ສທ຺ໂທ, ຕສ຺ມິຎ຺ຈ ປນ ກຸສໂລຕິ ອຕ຺ໂຖຕິ ອາຫ – ‘‘ຌານໍ ຐເປຕຸໍ ອກຸສໂລ’’ຕິ. ສຕ຺ຕຏ຺ຐອຈ຺ຉຣາມຕ຺ຕນ຺ຕິ ສຕ຺ຕຏ຺ຐອຈ຺ຉຣາມຕ຺ຕໍ ຂຓໍ ຌານໍ ຐເປຕຸໍ ນ ສກ຺ໂກຕິ ອຘິຏ຺ຐານວສີຠາວສ຺ສ ອນິປ຺ຜາທິຕຕ຺ຕາ. ຍຖາປຣິຈ຺ເຉເທນ ກາເລນ ວຸຏ຺ຐາຕຸໍ ນ ສກ຺ໂກຕິ ວຸຏ຺ຐານວສີຠາວສ຺ສ ອນິປ຺ຜາທິຕຕ຺ຕາ. ກລ຺ລໍ ຊາຕໍ ອສ຺ສາຕິ ກລ຺ລິຕໍ, ຕສ຺ມິໍ ກລ຺ລິເຕ ກລ຺ລິຕຠາເວນ ກສິຓາຣມ຺ມເຓສຸ ‘‘ອິທໍ ນາມ ອສຸກສ຺ສາ’’ຕິ ວິສຍວເສນ ສມາປຊ຺ຊິຕຸໍ ອສກ຺ໂກນ຺ໂຕ ນ ສມາຘິສ຺ມິໍ ອາຣມ຺ມຓກຸສໂລ. ນ ສມາຘິສ຺ມິໍ ໂຄຈຣກຸສໂລຕິ ສມາຘິສ຺ມິໍ ນິປ຺ຜາທິຕພ຺ເພ ຕສ຺ສ ໂຄຈເຣ ກມ຺ມຏ຺ຐານສຎ຺ຎິເຕ ປວຕ຺ຕິຏ຺ຐາເນ ຠິກ຺ຂາຈາຣໂຄຈເຣ ຈ ສຕິສມ຺ປຊຎ຺ຎວິຣຫິໂຕ ອກຸສໂລ. ເກຈິ ປນ ‘‘ກມ຺ມຏ຺ຐານໂຄຈໂຣ ປຐມຊ຺ຌານາທິກໍ, ‘ເອວໍ ສມາປຊ຺ຊິຕພ຺ພໍ, ເອວໍ ພຫຸລີກາຕພ຺ພ’ນ຺ຕິ ອຊານນ຺ໂຕ ຕຕ຺ຖ ອກຸສໂລ ນາມາ’’ຕິ ວທນ຺ຕິ. ກມ຺ມຏ຺ຐານໍ ອຠິນີຫຣິຕຸນ຺ຕິ ກມ຺ມຏ຺ຐານໍ ວິເສສຠາຄິຍຕາຍ ອຠິນີຫຣິຕຸໍ ອກຸສໂລ. ສກ຺ກຈ຺ຈກາຣີຕິ ຈິຕ຺ຕີກາຣີ. ສາຕຈ຺ຈກາຣີຕິ ນິຍຕກາຣີ. ສມາຘິສ຺ສ ອຸປກາຣກຘມ຺ມາຕິ ອປ຺ປນາໂກສລ຺ລາ. ສມາປຕ຺ຕິອາທີຫີຕິ ອາທິ-ສທ຺ເທນ ສກ຺ກຈ຺ຈກາຣິປທາທີນໍເຍວ ສງ຺ຄໂຫ ທຏ຺ຐພ຺ໂພ ຈຕຸກ຺ການໍ ວຸຕ຺ຕຕ຺ຕາ. ເຕນາຫ ‘‘ໂຍເຊຕ຺ວາ ຈຕຸກ຺ກາ ວຸຕ຺ຕາ’’ຕິ. ໂລກິຍຊ຺ຌານວເສເນວ ກຖິຕໍ ‘‘ສມາຘິກຸສໂລ’’ຕິອາທິນາ ນເຍນ ເທສນາຍ ປວຕ຺ຕຕ຺ຕາ. ນ ຫິ ໂລກຸຕ຺ຕຣຘມ຺ເມສຸ ອໂກສລ຺ລໍ ນາມ ລພ຺ຠຕິ. ຍທິ ອໂກສລ຺ລໍ, ນ ກຸສລສທ຺ເທນ ວິເສສິຕພ຺ພຕາ ສິຍາຕິ.

ສມາຘິມູລກຐິຕິສຸຕ຺ຕາທິວຓ຺ຓນາ ນິຏ຺ຐິຕາ.

ຌານສໍຍຸຕ຺ຕວຓ຺ຓນາ ນິຏ຺ຐິຕາ.

ນິຏ຺ຐິຕາ ຈ ສາຣຕ຺ຖປ຺ປກາສິນິຍາ

ສໍຍຸຕ຺ຕນິກາຍ-ອຏ຺ຐກຖາຍ ຂນ຺ຘວຄ຺ຄວຓ຺ຓນາ.