໓. ອນ຺ຘກວິນ຺ທສຸຕ຺ຕວຓ຺ຓນາ

໑໘໔. ຊນຕນ຺ຕິ ຊນານໍ ສມູຫໍ, ຊນສຎ຺ຈຣຓຏ຺ຐານນ຺ຕິ ອຕ຺ໂຖ. ມນຸສ຺ສານໍ ອນຸປຈາເຣຕິ ຍຕ຺ຕເກ ກສນາທິກິຈ຺ຈໍ ກໂຣນ຺ຕານໍ ສຎ຺ຈາໂຣ ໂຫຕິ, ເອຕ຺ຕກໍ ອຕິກ຺ກມິຕ຺ວາ ອນຸປຈາເຣ. ສໍໂຍຊນວິປ຺ປໂມກ຺ຂາຕິ ສໍໂຍຊນວິໂມກ຺ຂເຫຕຸ. ວິເວກຣຕິໍ ປວິເວກສຸຂຊ຺ຌານໍ ອລຠນ຺ໂຕ. ຈິຕ຺ຕານຸຣກ຺ຂຓຕ຺ຖນ຺ຕິ ປຸພ຺ເພ ມໍ ມນຸສ຺ສາ ‘‘ອຣຎ຺ຎວາເສນ ປວິວິຕ຺ໂຕ ອສໍສຏ຺ໂຐ ອາຣທ຺ຘວີຣິໂຍ’’ຕິ ມຎ຺ຎິໍສຸ, ອິທານິ ຄາມນ຺ເຕ ວສນ຺ຕໍ ທິສ຺ວາ ຄຓສງ຺ຄຓິກາຍ ນິວຸຏ຺ໂຐຕິ ອປ຺ປສາທໍ ອາປຊ຺ຊິສ຺ສນ຺ຕິ. ຍທິປິ ເມ ອິຘ ອຠິຣຕິ ນຕ຺ຖິ, ເອວໍ ສນ຺ເຕປິ ອິເຘວ ວສິສ຺ສາມີຕິ ວິກ຺ຂິຕ຺ຕຈິຕ຺ເຕນ ຫຸຕ຺ວາ ນ ວສິຕພ຺ພໍ, ໂກ ອຕ຺ໂຖ ຈິຕ຺ຕວສໍ ຄນ຺ຕ຺ວາຕິ ອຘິປ຺ປາໂຍ. ສຕິປຏ຺ຐານປຣາຍໂຓຕິ ສຕິປຏ຺ຐານຠາວນາຣໂຕ. ເອວໍ ຫິສ຺ສ ຄຓວາໂສປິ ປາສໍໂສ ວິເວກວາເສນ ວິນາ ສມຓກິຈ຺ຈສ຺ສ ອສິຊ຺ຌນໂຕ.

ວຏ຺ຏຠຍໂຕ ປມຸຕ຺ໂຕ ອຊ຺ຌາສຍວເສນາຕິ ອຘິປ຺ປາໂຍ.

ນິສີທິ ຕຕ຺ຖ ຠິກ຺ຂູຕິ ອິມິນາ ສຕ຺ຕູປລທ຺ຘິຍາ ອນິສ຺ສິຕຕ຺ຕາ ຍຖາຣຸຈິຍາ ເຕສໍ ນິສຊ຺ຊໍ ທສ຺ເສຕິ. ເຕນາຫ ‘‘ອິມິນາ’’ຕິອາທິ.

ອິມິນາ ຈ ອິມິນາ ຈ ອາກາເຣນ ຊາຕນ຺ຕິ ນ ອນຸສ຺ສວທສ຺ສນເມຕໍ, ນ ອນຸສ຺ສວຄ຺ຄຫຓໍ. ຕກ຺ກເຫຕຸ ນຍເຫຕຸ ວາ ນ ວທາມີຕິ ໂຍຊນາ. ປິຏກໍ ຄນ຺ໂຖ ສມ຺ປທີຍຕິ ເອຕສ຺ສາຕິ ປິຏກສມ຺ປທານໍ, ຄນ຺ຖສ຺ສ ອຸຄ຺ຄຓ຺ຫນໂຕ ເຕນ ປິຏກສ຺ສ ອຸຄ຺ຄຓ຺ຫນກຠາເວນ, ເກນຈິ ຄນ຺ຖານຸສາເຣນ ເອວໍ ນ ວທາມີຕິ ອຕ຺ໂຖ. ພ຺ຣຫ຺ມສ຺ສ ເສຏ຺ຐສ຺ສ ຘມ຺ມສ຺ສ ຈຣິຍໍ ວາຈສິກໍ ປວຕ຺ຕຕີຕິ ພ຺ຣຫ຺ມຈຣິຍໍ, ຘມ຺ມເທສນາ. ຠາວິເຕນ ມຣຓສ຺ສ ສພ຺ພໂສ ຠາເຄນ ວິປ຺ປຫາເນນ ມຣຓປຣິຈ຺ຈາຄີນໍ. ເຕ ຈ ຂີຓຊາຕິກາຕິ ອາຫ ‘‘ຂີຓາສວານ’’ນ຺ຕິ.

ທສຘາ ທສາຕິ ທສກ຺ຂຕ຺ຕຸໍ ທສ. ອຎ຺ຎນ຺ຕິ ປຎ຺ຈສຕາຘິກສຫສ຺ສໂຕ ອຎ຺ຎໍ. ປຸຎ຺ຎຠາຄິໂນຕິ ວິວຏ຺ຏນິສ຺ສິຕປຸຎ຺ຎສ຺ສ ຠາຄິໂນ ຕສ຺ສາ ເທສນາຍ ເອຕ຺ຕກາ ສຕ຺ຕາ ຊາຕາຕິ ຄເຓຕຸໍ ອຫໍ ນ ສກ຺ໂກມີຕິ ທສ຺ເສຕິ. ພ຺ຣຫ຺ມຘມ຺ມເທສນນ຺ຕິ ພ຺ຣຫ຺ມຸນາ ວຸຕ຺ຕໍ ອາຫ.

ອນ຺ຘກວິນ຺ທສຸຕ຺ຕວຓ຺ຓນາ ນິຏ຺ຐິຕາ.