໕. ຠິກ຺ຂຸນີສໍຍຸຕ຺ຕໍ

໑. ອາຬວິກາສຸຕ຺ຕວຓ຺ຓນາ

໑໖໒. ອາຬວິຍໍ ຊາຕາຕິ ອາຬວິຍໍ ວິຊາຍິຕ຺ວາ ສໍວຑ຺ຒມານາ. ເຕນາຫ ‘‘ອາຬວິນຄຣໂຕເຍວ ຈ ນິກ຺ຂມ຺ມ ປພ຺ພຊິຕາ’’ຕິ. ຘນໍ ສມາທເປຕ຺ວາຕິ ເຈຕິຍສ຺ສ ຣາຊາ ເອກໍ ມຸຂໍ, ຣາຊປຸຕ຺ໂຕ ເອກໍ, ອມຈ຺ຈານໍ ເຊຏ຺ຐໂກ ຫຸຕ຺ວາ ເສນາປຕິ ເອກໍ, ຊນປທານໍ ເຊຏ຺ຐໂກ ຫຸຕ຺ວາ ເສຏ຺ຐິ ເອກນ຺ຕິ ເອວໍ ຈຕູສຸ ມຸເຂສຸ ນວກມ຺ເມ ກຍິຣມາເນ ເສຏ຺ຐິນາ ຄຫິຕມຸເຂ ກມ຺ເມ ໂອລີຍມາເນ ເອໂກ ອຸປາສໂກ ອຣິຍສາວໂກ ປຎ຺ຈ ສກຏສຕານິ ໂຍຊາເປຕ຺ວາ ຊນປທໍ ຄນ຺ຕ຺ວາ ‘‘ໂຍ ຍໍ ທາຕຸໍ ອຸສ຺ສຫຕິ ຫິຣຎ຺ຎໍ ວາ ສຸວຓ຺ຓໍ ວາ ສຕ຺ຕວິຘຣຕນໍ ວາ ຫຣິຕາລໍ ວາ ມໂນສິລໍ ວາ, ໂສ ຘນໍ ເທຕູ’’ຕິ ສມາທເປຕ຺ວາ ຍຖາລທ຺ຘໍ ປຐມໍ ກມ຺ມຏ຺ຐານໍ ເປເສຕ຺ວາ ‘‘ນວກມ຺ມໍ ນິຏ຺ຐິຕ’’ນ຺ຕິ ສຸຕ຺ວາ ເອກກໍ ອາຄຈ຺ຉນ຺ຕໍ ອນ຺ຕຣາມຄ຺ເຄ ໂຈຣາ ປລິພຸນ຺ຘິຕ຺ວາ ຕໂຕ ກິຎ຺ຈິປິ ຘນໍ ອລຠນ຺ຕາ ‘‘ສເຈ ນໍ ມຸຎ຺ຈິສ຺ສາມ, ອນຕ຺ຖໍ ໂນ ກເຣຍ຺ຍາ’’ຕິ ຊີວິຕາ ໂວໂຣເປສຸໍ. ອນປຣາເຘ ອຣິຍສາວເກ ອປຣາຘກາ ເຕ ໂຈຣາ ອນ຺ຘາ ຊາຕາ, ຕສ຺ມາ ຕໍ ຐານໍ ‘‘ອນ຺ຘວນ’’ນ຺ຕິ ປຎ຺ຎາຍິຕ຺ຖາຕິ ອຏ຺ຐກຖາຍໍ ວຸຕ຺ຕໍ. ຂີຓາສວານໍ ຍສ຺ມາ ຍຕ຺ຖ ກຕ຺ຖຈິ ຈິຕ຺ຕວິເວໂກ ໂຫຕິເຍວ ອຸປຘິວິເວກສ຺ສ ສິທ຺ຘຕ຺ຕາ. ຕສ຺ມາ ‘‘ກາຍວິເວກຕ຺ຖິນີ’’ຕິ ວຸຕ຺ຕໍ.

ນິສ຺ສຣຓນ຺ຕິ ນິພ຺ພານໍ ສພ຺ພສງ຺ຂຕສ຺ສ ນິສ຺ສຏຕ຺ຕາ. ປຈ຺ຈເວກ຺ຂຓຎາເຓນາຕິ ປຈ຺ຈເວກ຺ຂຓຎາເຓນ, ປເຄວ ມຄ຺ຄຜລຎາເຓຫີຕິ ອຘິປ຺ປາໂຍ. ນິພ຺ພານປທນ຺ຕິ ນິພ຺ພານສງ຺ຂາຕໍ ຘມ຺ມໂກຏ຺ຐາສໍ. ວິນິວິຊ຺ຌນຏ຺ເຐນາຕິ ຫທຍໍ ວິນິວິທ຺ເຘນ ຫທຍມ຺ຫິ ວິຊ຺ຌິຕ຺ວາ ທຸກ຺ຂຸປ຺ປາທເນນ ຂນ຺ຘານໍ ເອເຕ ປຎ຺ຈ ກາມາ ສຕ຺ຕິສູລສທິສາ. ອຘິກຸຏ຺ຏນຠຓ຺ຑິກາຕິ ອາຆາຕນຆຏິກາ.

ອາຬວິກາສຸຕ຺ຕວຓ຺ຓນາ ນິຏ຺ຐິຕາ.

໒. ໂສມາສຸຕ຺ຕວຓ຺ຓນາ

໑໖໓. ຐານນ຺ຕິ ອິສ຺ສຣິຍຏ຺ຐານໍ ວິສຍຊ຺ຌຕ຺ຕໍ. ທຸປ຺ປສຫໍ ອກມ຺ປິຍຠາວຕ຺ຕາ. ທ຺ວງ຺ຄຸລປຎ຺ຎາຍາຕິ ເອຕ຺ຖ ອິຕ຺ຖິໂຍ ຫິ ທຫຣກຸມາຣິກາກາລໂຕ ປຏ຺ຐາຍ ໂອທນປຈນວິຘິໍ ອນຸຕິຏ຺ຐນ຺ຕິໂຍ ອຸກ຺ຂລິຍໍ ອຸທກໍ ຕາເປຕ຺ວາ ຕຓ຺ຑຸເລ ປກ຺ຂິປິຕ຺ວາ ອຕ຺ຕໂນ ພຸທ຺ຘິຍາ ເຕສໍ ປາກກາລປ຺ປມາຓໍ ປຣິຈ຺ຉິນ຺ທິຕຸໍ ຕານິ ທພ຺ພິຍາ ອຸທ຺ຘຣິຕ຺ວາປິ ວຓ຺ຓສຓ຺ຐານຄ຺ຄຫຓມຕ຺ເຕນ ປກ຺ກາປກ຺ກຠາວໍ ຊານິຕຸໍ ນ ສກ຺ໂກນ຺ຕິ, ເກວລໍ ປນ ທ຺ວີຫິ ອງ຺ຄຸລີຫິ ອຸປ຺ປີຬິຕກາເລ ເອວ ຊານນ຺ຕິ, ຕສ຺ມາ ທ຺ວີຫງ຺ຄຸລິເກຫິ ທຸພ຺ພລປຎ຺ຎຕ຺ຕາ ‘‘ທ຺ວງ຺ຄຸລປຎ຺ຎາ’’ຕິ ວຸຈ຺ຈນ຺ຕິ. ຜລສມາປຕ຺ຕິຎາຓປ຺ປວຕ຺ຕິກິຕ຺ຕເນນ ຈຕູສຸ ສຈ຺ເຈສຸ ອສມ຺ໂມຫວິຫາໂຣ ທີປິໂຕ ໂຫຕີຕິ ອາຫ ‘‘ຎາຓມ຺ຫິ ວຕ຺ຕມານມ຺ຫີຕິ ຜລສມາປຕ຺ຕິຎາເຓ ປວຕ຺ຕມາເນ’’ຕິ. ວິປສ຺ສນ຺ຕສ຺ສາຕິ ອສມ຺ໂມຫປຏິເວຘໂຕ ວິເສເສນ ປສ຺ສນ຺ຕສ຺ສ ຂນ຺ຘປຎ຺ຈກເມວ ສຈ຺ຈາຠິສມຍໂຕ ປຸພ຺ພຠາເຄ ວິປສ຺ສນ຺ຕສ຺ສ. ອຎ຺ຎໍ ວາຕິ ອິຕ຺ຖິປຸຣິສໂຕ ອຎ຺ຎໍ ວາ ກິຎ຺ຈິ ວຕ຺ຖຸໍ. ‘‘ອຫໍ ອສ຺ມີ’’ຕິ ມານທິຏ຺ຐິຄາຫຕຓ຺ຫາຄາຫວເສນ ຄຫິຕວຕ຺ຖຸສ຺ມິໍ ເຍວາຕິ ອາຫ ‘‘ອຫໍ ອສ຺ມີຕິ ຕຓ຺ຫາມານທິຏ຺ຐິວເສນາ’’ຕິ.

ໂສມາສຸຕ຺ຕວຓ຺ຓນາ ນິຏ຺ຐິຕາ.

໓. ກິສາໂຄຕມີສຸຕ຺ຕວຓ຺ຓນາ

໑໖໔. ‘‘ກິສາໂຄຕມີ’’ຕິ ເອຕ຺ຖ ກາ ປນາຍໍ ກິສາໂຄຕມີ, ກິສ຺ສ ອຍໍ ຠິກ຺ຂຸນີ ຫຸຕ຺ວາ ສມຓຘມ຺ມໍ ມຕ຺ຖກໍ ປາເປສີຕິ ຕມຕ຺ຖໍ ວິຠາເວຕຸໍ ‘‘ປຸພ຺ເພ ກິຣາ’’ຕິອາທິມາຣທ຺ຘໍ. ອງ຺ຄາຣາວາຕິ ອທ຺ທາຣິຏ຺ຐກວຓ຺ຓອງ຺ຄາຣາ ເອວ ຊາຕາ. ທາຣຸສາກນ຺ຕິ ອທ຺ຘມາສເກນ ທາຣຸໍ ສາກຎ຺ຈ ອາຫຣິສ຺ສາມີຕິ ອນ຺ຕຣາປເຓ ອນ຺ຕຣວີຖິໍ ຄຕາ.

ສິທ຺ຘຕ຺ຖກນ຺ຕິ ສາສປໍ. ສາລາຍນ຺ຕິ ອນາຖສາລາຍໍ. ຂຸຣຄ຺ເຄເຍວາຕິ ຂຸຣສິເຂ ເອວ, ເກໂສໂຣຫນກ຺ຂເຓ ເອວາຕິ ອຕ຺ໂຖ.

ເອກມາສີຕິ ເອຕ຺ຖ ມ-ກາໂຣ ປທສນ຺ຘິກໂຣ. ສໍຫິຕາວເສນ ຈ ປຸຣິມປເທ ວາ ຣສ຺ສຕ຺ຕໍ. ປຣປເທ ວາ ທີຆຕ຺ຕນ຺ຕິ ອາຫ ‘‘ເອກາ ອາສີ’’ຕິ. ຠາວນປຸໍສກເມຕໍ ‘‘ເອກມນ຺ຕໍ ນິສີທີ’’ຕິອາທີສຸ ວິຍ. ປຸຕ຺ຕມຣຓໍ ອນ຺ຕໍ ອຕີຕໍ ອິທານິ ປຸຕ຺ຕມຣຓສ຺ສ ອຠາວໂຕ. ເຕເນວາຫ ‘‘ປຸຕ຺ຕມຣຓໍ ນາມ ນຕ຺ຖີ’’ຕິ. ປຸຣິສໍ ຄເວສິຕຸນ຺ຕິ ຍຖາ ມຍ຺ຫໍ ປຸຣິສຄເວສນາ ນາມ ສພ຺ພໂສ ນຕ຺ຖິ, ຕຖາ ເອວ ປຸຕ຺ຕຄເວສນາປິ ນຕ຺ຖິ, ຕສ຺ມາ ເມ ປຸຕ຺ຕມຣຓໍ ເອຕທນ຺ຕໍ, ສພ຺ເພສຸ ຂນ຺ຘາທີສຸ ຠວາທີສຸ ຈ ຕຓ຺ຫານນ຺ທິຍາ ອຠາວກຖເນນ ສພ຺ພສຕ຺ເຕສຸ ຕຓ຺ຫາ ສພ຺ພໂສ ວິໂສສິຕາ, ຕສ຺ສາເຍວ ກາຣກອວິຊ຺ຊາກ຺ຂນ຺ໂຘ ປທາລິໂຕຕິ ອຕ຺ຕໂນ ນິກ຺ກິເລສຕໍ ປເວເທນ຺ຕີ ເຖຣີ ສີຫນາທໍ ນທີຕິ.

ກິສາໂຄຕມີສຸຕ຺ຕວຓ຺ຓນາ ນິຏ຺ຐິຕາ.

໔. ວິຊຍາສຸຕ຺ຕວຓ຺ຓນາ

໑໖໕. ປຎ຺ຈ ອງ຺ຄານິ ເອຕສ຺ສາຕິ ປຎ຺ຈງ຺ຄໍ, ປຎ຺ຈງ຺ຄເມວ ປຎ຺ຈງ຺ຄິກໍ, ເຕນ ປຎ຺ຈງ຺ຄິເກນ. ອາຕຕນ຺ຕິອາທີສຸ ອາຕຕໍ ນາມ ຈມ຺ມປຣິໂຍນທ຺ເຘສຸ ເຠຣິອາທີສຸ ເອກຕລໍ ຕູຣິຍໍ. ວິຕຕໍ ນາມ ອຸຠຍຕລໍ. ອາຕຕວິຕຕໍ ນາມ ຕນ຺ຕິພທ຺ຘວີຓາທິ. ສຸສິຣໍ ວໍສາທິ. ຆນໍ ສມ຺ມາທິ. ຕຕອາທິວິເສໂສປິ ອາຕຕເມວາຕິ ‘‘ຈມ຺ມປຣິໂຍນທ຺ເຘສູ’’ຕິ ວິເສສນໍ. ເອກຕລໍ ກຸມ຺ຠຖູຓທທ຺ທຣາທິ. ອຸຠຍຕລໍ ເຠຣິມຸທິງ຺ຄາທິ. ຈມ຺ມປຣິໂຍນທ຺ຘໍ ເສສໍ ຕນ຺ຕິພທ຺ຘໍ ສພ຺ພໍ ອາຕຕວິຕຕໍ ນາມ, ໂຄມຸຂີອາທີນມ຺ປິ ເອຕ຺ເຖວ ສງ຺ຄໂຫ ທຏ຺ຐພ຺ໂພ. ວໍສາທີຕິ ອາທິສທ຺ເທນ ສງ຺ຂສິງ຺ຄານມ຺ປິ ສງ຺ຄໂຫ. ສມ຺ມຕາຬ-ກໍສຕາຬ-ສິລາຕາຬ-ສລາກຕາຬາທິ ສມ຺ມາທິ ນາມ. ຕຕ຺ຖ ສມ຺ມຕາຬໍ ນາມ ທຓ຺ຑມຍຕາຬໍ, ກໍສມຍຕາຬໍ ກໍສຕາຬໍ, ສິລາຍໍ ອໂຍປຕ຺ເຕນ ຈ ຕາຬນຕາຬໍ. ສພ຺ເພ ກາມຄຸເຓ. ອຸຄ຺ຆຣິຕປຄ຺ຆຣິຕຏ຺ເຐນາຕິ ອຸປຣິ ຆຣເຓນ ຈ ວິສ຺ສນ຺ທເນນ ຈ. ເອວນ຺ຕິ ‘‘ອິມິນາ ປູຕິກາເຍນາ’’ຕິ. ອຣູປຏ຺ຐາຍິໂນຕິ ສຕ຺ຕາຘິຏ຺ຐາເນນາຍໍ ຘມ຺ມເທສນາຕິ ອາຫ ‘‘ສພ຺ພຕ຺ຖາຕິ ສພ຺ເພສຸ ຣູປາຣູປຠເວສູ’’ຕິ. ເຕສໍ ທ຺ວິນ຺ນໍ ຣູປາຣູປຠວານໍ ຄຫິຕຕ຺ຕາ. ຠວຠາວສາມຎ຺ຎໂຕ, ຕທຘິຏ຺ຐານໂຕ ຄຫິເຕ ກາມຠເວ. ອວິຊ຺ຊາຕໂມ ວິຫໂຕ ອຄ຺ຄມຄ຺ເຄນ ສມຸຄ຺ຆາຕິຕຕ຺ຕາ.

ວິຊຍາສຸຕ຺ຕວຓ຺ຓນາ ນິຏ຺ຐິຕາ.

໕. ອຸປ຺ປລວຓ຺ຓາສຸຕ຺ຕວຓ຺ຓນາ

໑໖໖. ອຄ຺ຄໂຕ ປຏ຺ຐາຍາຕິ ສພ຺ພອຄ຺ຄໂຕ ປຠຸຕິ ຍາວ ມູລາ ອນ຺ຕຣາຍຸຕ຺ຕໍ ສມ຺ມເທວ ປຸປ຺ຜິຕໍ ສາລຣຸກ຺ຂໍ. ວຓ຺ຓຘາຕຸສີເສນ ວຓ຺ຓຘາຕຸສມ຺ປນ຺ນໍ ທຸຕິຍໍ ຠິກ຺ຂຸນິໍ ວທຕີຕິ ອາຫ ‘‘ຕຍາ ສທິສາ ອຎ຺ຎາ ຠິກ຺ຂຸນີ ນຕ຺ຖີ’’ຕິ. ປຂຸມສີເສນ ອກ຺ຂິຠຓ຺ຑໍ ວຸຈ຺ຈຕີຕິ ອາຫ ‘‘ປຂຸມນ຺ຕຣິກາຍນ຺ຕິ ທ຺ວິນ຺ນໍ ອກ຺ຂີນໍ ມຊ຺ເຌ’’ຕິ. ນາສວໍເສຕິ ນາສວໍສມູເລ. ‘‘ນ ປສ຺ສສີ’’ຕິ ວຕ຺ວາ ອທສ຺ສເນ ກາຣຓໍ ອາຫ ‘‘ວສີຠູຕມ຺ຫີ’’ຕິ.

ອຸປ຺ປລວຓ຺ຓາສຸຕ຺ຕວຓ຺ຓນາ ນິຏ຺ຐິຕາ.

໖. ຈາລາສຸຕ຺ຕວຓ຺ຓນາ

໑໖໗. ອິທນ຺ຕິ ອິທໍ ທສ຺ສນໍ. ຄາຫາເປສີຕິ ສມາທາເປສິ ‘‘ຊາຕິໍ ມາ ໂຣຈາ’’ຕິ. ອຎ຺ຎນ຺ຕິ ພນ຺ຘວຘໂຕ ອຎ຺ຎໍ ເຉທນາທິໍ. ນິເວເສສີຕິ ປວິສາເປສິ.

ຈາລາສຸຕ຺ຕວຓ຺ຓນາ ນິຏ຺ຐິຕາ.

໗. ອຸປຈາລາສຸຕ຺ຕວຓ຺ຓນາ

໑໖໘. ປຸນປ຺ປຸນໍ…ເປ… ອາຄຈ຺ຉນ຺ຕິ ກາຣຓສ຺ສ ອສມູຫຕຕ຺ຕາ. ສນ຺ຕາປິໂຕ ກິເລສສນ຺ຕາເປຫິ. ອຄຕີຕິ ອວິສໂຍ.

ອຸປຈາລາສຸຕ຺ຕວຓ຺ຓນາ ນິຏ຺ຐິຕາ.

໘. ສີສຸປຈາລາສຸຕ຺ຕວຓ຺ຓນາ

໑໖໙. ສມຓິສທິສາຕິ ສມຓລິງ຺ຄສ຺ສ ຘາຣເຓນ ສມຓິສທິສາ, ກສ຺ສຈິປິ ປາສຓ຺ຑສ຺ສ ອຣຸຈ຺ຈນໂຕ ໂມນມຄ຺ຄສ຺ສ ອປ຺ປຏິປຊ຺ຊນໂຕ ຕວ ສມຓິຠາວໍ ນານຸປສ຺ສາມີຕິ ອຘິປ຺ປາໂຍ. ປາສໍ ເຑນ຺ຕີຕິ ປາສໍ ສຊ຺ເຊນ຺ຕິ, ຍຖາ ຕຕ຺ຖ ທິຏ຺ຐິປາເສ ສຕ຺ຕານໍ ຈິຕ຺ຕໍ ປຏິມຸກ຺ກໍ ໂຫຕິ, ເອວໍ ສຊ຺ເຊນ຺ຕີຕິ ອຕ຺ໂຖ. ຕຖາຠູຕາ ຈ ເຕ ສຕ຺ຕານໍ ຈິຕ຺ເຕ ຂິຕ຺ຕາ ວິຍ ໂຫນ຺ຕີຕິ ອາຫ ‘‘ຈິຕ຺ເຕສຸ ທິຏ຺ຐິປາສໍ ຂິປນ຺ຕີຕິ ອຕ຺ໂຖ’’ຕິ. ປາເສ ໂມເຈຕີຕິ ທິຏ຺ຐິປາເສ ສຕ຺ຕານໍ ຈິຕ຺ຕສນ຺ຕານໂຕ ນີຫຣຕິ ຘມ຺ມສຸຘມ຺ມຕາຍ. ຕສ຺ມາຕິ ປາສໂມຈນໂຕ ປາສຓ຺ໂຑຕິ ນ ວຸຈ຺ຈຕິ. ‘‘ອິໂຕ ພຫິທ຺ຘາເຍວ ປາສຓ຺ຑາ ໂຫນ຺ຕີ’’ຕິ ວຸຕ຺ຕສ຺ສ ອຕ຺ຖສ຺ສ ນິຄມນໍ. ເອວຎ຺ຈ ກຕ຺ວາ ສພ຺ເພປິ ພາຫິຣກສມເຍ ສນ຺ຘາຍ ຈູຬສີຫນາທສຸຕ຺ເຕ ‘‘ຉນ຺ນວຸຕິ ປາສຓ຺ຑາ’’ຕິ ວຸຕ຺ຕໍ. ປສີທນ຺ຕີຕິ ທິຏ຺ຐິປງ຺ເກ ສໍສາຣປງ຺ເກ ຈ ປກາເຣຫິ ອຄາຘາ ໂອສີທນ຺ຕິ.

ອຠິຠວິຕ຺ວາຕິ ສພ຺ພສໍກິເລສປ຺ປຫາເນນ ອຠິຠຸຍ຺ຍ ອຕິກ຺ກມິຕ຺ວາ. ອຊິໂຕຕິ ອຊິນິ ອວິຊຍຕ຺ຕາ. ສພ຺ພານິ ອກຸສລກມ຺ມານິ ກຸສລກມ຺ມານິ ຈ ຂີຓານິ ເອຕ຺ຖາຕິ ສພ຺ພກມ຺ມກ຺ຂໂຍ, ອຣຫຕ຺ຕໍ. ອຸປຘໂຍ ສມ຺ມເທວ ຂີຍນ຺ຕິ ເອຕ຺ຖາຕິ ອຸປຘິສງ຺ຂໂຍ, ນິພ຺ພານໍ.

ສີສຸປຈາລາສຸຕ຺ຕວຓ຺ຓນາ ນິຏ຺ຐິຕາ.

໙. ເສລາສຸຕ຺ຕວຓ຺ຓນາ

໑໗໐. ເກນິທໍ ປກຕໍ ພິມ຺ພນ຺ຕິ ອິທໍ ອຕ຺ຕຠາວສຎ຺ຎິຕໍ ພິມ຺ພໍ ພ຺ຣຫ຺ມາ-ວິສຓຸປຸຣິສ-ປຊາປຕິອາທີສຸ ເກນ ກຕໍ ນິມ຺ມິຕໍ ນິພ຺ພຕ຺ຕິຕນ຺ຕິ ກຕ຺ຕພ຺ພໂມຫໍ ນາມ ກາຕຸກາໂມ ປຸຈ຺ຉຕິ. ອຆນ຺ຕິ ອຆວຕ຺ຖຸ. ເຕນາຫ ‘‘ທຸກ຺ຂປຕິຏ຺ຐານຕ຺ຕາ’’ຕິ. ເຫຕຸນິໂຣເຘນາຕິ ຕຓ຺ຫາສງ຺ຂຕສ຺ສ ເຫຕຸໂນ ອນຸປ຺ປາທນິໂຣເຘນ. ປຈ຺ຈຍເວກລ຺ເລນາຕິ ຕທວສິຏ຺ຐກິເລສາຠິສງ຺ຂາຣາທິປຈ຺ຈຍສ຺ສ ເວກລ຺ລຠາເວນ, ອປຈ຺ຈຍຠາວູປຄມເນນາຕິ ອຕ຺ໂຖ.

ເສລາສຸຕ຺ຕວຓ຺ຓນາ ນິຏ຺ຐິຕາ.

໑໐. ວຊິຣາສຸຕ຺ຕວຓ຺ຓນາ

໑໗໑. ສຸທ຺ຘສງ຺ຂາຣປຸຎ຺ເຊຕິ ຣູປາຣູປວິຠາເຄ ກິເລສສງ຺ຂາຣສມູເຫ. ປຣມຕ຺ຖໂຕຕິ ສຠາເວນ. ຍຖາ ນ ຫິ ສຕ຺ຕສຎ຺ຎິຕສງ຺ຂາຣປຸຎ຺ໂຊ ນາມ ປຣມຕ຺ຖໂຕ ອຸປລພ຺ຠຕິ, ເອວໍ ຕພ຺ພິນິມຸຕ຺ໂຕ ນາມ ໂກຈິ ນ ອຸປລພ຺ຠຕິ ອວິຊ຺ຊມານຕ຺ຕາ. ວິຊ຺ຊມາເນສູຕິ ຍຖາປຈ຺ຈຍສມ຺ປຕ຺ຕິຍາ ລພ຺ຠມາເນສຸ. ເຕນາກາເຣນາຕິ ອິຕ຺ຖິປຸຣິສາທິອາກາເຣນ. ວວຕ຺ຖິເຕສູຕິ ປຈ຺ເຈກໍ ປຈ຺ຈຍວິເສສສມຸຏ຺ຐິຕໍ ສຓ຺ຐານວິເສສໍ ອຸປາທາຍ ‘‘ປຸຣິໂສ ຫຕ຺ຖີ ອສ຺ໂສ’’ຕິອາທິນາ ອຠິສງ຺ຄໂຕ ປວຕ຺ເຕສຸ. ສມ຺ມຸຕີຕິ ສຕ຺ໂຕຕິ ໂວຫາໂຣ. ເຕນາຫ ‘‘ສມຎ຺ຎາມຕ຺ຕເມວາ’’ຕິ. ປຎ຺ຈກ຺ຂນ຺ຘທຸກ຺ຂນ຺ຕິ ປຎ຺ຈກ຺ຂນ຺ຘສຎ຺ຎິຕໍ ທຸກ຺ຂໍ. ວຸຕ຺ຕໍ ເຫຕໍ ຠຄວຕາ ‘‘ສໍຂິຕ຺ເຕນ ປຎ຺ຈຸປາທານກ຺ຂນ຺ຘາ ທຸກ຺ຂາ’’ຕິ (ທີ. ນິ. ໒.໓໘໗; ມ. ນິ. ໑.໑໒໐; ໓.໓໗໓; ວິຠ. ໒໐໒) ອຎ຺ໂຎ ເນວ ສມ຺ໂຠຕິ ຍຖາວຸຕ຺ຕທຸກ຺ຂໂຕ ອຎ຺ຎສ຺ສ ສງ຺ຂຕຘມ຺ມສ຺ສ ອຠາວໂຕ. ນ ນິຣຸຊ຺ຌຕີຕິ ຕໂຕ ອຎ຺ຎໍ ນ ນິຣຸຊ຺ຌຕິ, ອຸປ຺ປາທໂຕ ໂຫຕິ ນິໂຣໂຘຕິ.

ວຊິຣາສຸຕ຺ຕວຓ຺ຓນາ ນິຏ຺ຐິຕາ.

ສາຣຕ຺ຖປ຺ປກາສິນິຍາ ສໍຍຸຕ຺ຕນິກາຍ-ອຏ຺ຐກຖາຍ

ຠິກ຺ຂຸນີສໍຍຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.