໗. ອປ຺ປຏິວິທິຕສຸຕ຺ຕວຓ຺ຓນາ

໗. ປວຕ຺ຕິນິວຕ຺ຕິຕທຸຠຍເຫຕຸວິຠາຄສ຺ສ ຘມ຺ມສ຺ສປິ ຈຕຸສຈ຺ຈນ຺ໂຕຄຘຕ຺ຕາ ອາຫ ‘‘ຘມ຺ມາຕິ ຈຕຸສຈ຺ຈຘມ຺ມາ’’ຕິ. ຈຕ຺ຕາຣິປິ ຫິ ອຣິຍສຈ຺ຈານິ ຈຕຸສຈ຺ຈນ຺ໂຕຄຘານິ. ອປ຺ປຏິວິທ຺ຘາຕິ ປຣິຎ຺ຎາຠິສມຍາທິວເສນ ອນຠິສມິຕາ. ທິຏ຺ຐິຄຕວາເທສູຕິ ທິຏ຺ຐິຄຕສຎ຺ຎິເຕສຸ ວາເທສຸ. ທິຏ຺ຐິຄເຕຫິ ເຕ ປວຕ຺ຕິຕາ. ອິໂຕ ປເຣສນ຺ຕິ ອິໂຕ ສາສນິເກຫິ ປເຣສໍ ອຎ຺ເຎສໍ. ຘມ຺ມຕາຍາຕິ ສຠາເວນ, ສຍເມວາຕິ ອຕ຺ໂຖ. ຄຈ຺ຉນ຺ຕີຕິ ປວຕ຺ຕນ຺ຕິ ທິຏ຺ຐິວາທໍ ປຄ຺ຄຍ຺ຫ ຕິຏ຺ຐນ຺ຕິ. ປເຣນາຕິ ທິຏ຺ຐິຄຕິເກນ. ນີຍນ຺ຕີຕິ ທິຏ຺ຐິວາທສງ຺ຄຓ຺ຫເນ ອຸຍ຺ໂຍຊີຍນ຺ຕິ. ເຕນາຫ ‘‘ຕຕ຺ຖາ’’ຕິອາທິ. ປພຸຊ຺ຌິຕຸນ຺ຕິ ປມາທນິທ຺ທາຍ ປຏິພຸຊ຺ຌິຕຸໍ. ປຏິປທາ ຍຖາເທສິຕສ຺ສ ຘມ຺ມສ຺ສ ກຖິຕຕາຍ, ປຏິພຸຊ຺ຌິຕຸໍ ໂຍນິໂສ ປວຕ຺ຕິຍມານຕ຺ຕາ ຠທ຺ທິກາ.

ເຫຕຸນາຕິ ຎາເຍນ. ກາຣເຓນາຕິ ຈຕຸສຈ຺ຈານໍ ສມ຺ໂພຘຍຸຕ຺ຕິຍາ. ຫຕ຺ຖຕເລ ອາມລກໍ ວິຍ ສພ຺ພໍ ເຎຍ຺ຍໍ ຊານາຕີຕິ ສພ຺ພຎ຺ຎູ, ເຕເນວ ສພ຺ພຎ຺ຎຸຕາຠິສມ຺ໂພເຘນ ພຸທ຺ໂຘຕິ ສພ຺ພຎ຺ຎຸພຸທ຺ໂຘ. ປຈ຺ເຈກໍ ປເຣຫິ ອສາຘາຣຓຕາຍ ວິສຸໍ ສຍມ຺ຠຸຎາເຓນ ສຈ຺ຈານິ ພຸທ຺ຘວາຕິ ປຈ຺ເຈກພຸທ຺ໂຘ. ປໂຣປເທເສນ ຈຕຸສຈ຺ຈໍ ພຸຊ຺ຌຕີຕິ ຈຕຸສຈ຺ຈພຸທ຺ໂຘ. ຕຖາ ຫິ ໂສ ສຍມ຺ຠຸຕາຍ ອຠາວໂຕ ເກວລໍ ຈຕຸສຈ຺ຈພຸທ຺ໂຘຕິ ວຸຈ຺ຈຕິ. ສຸເຕນ ສຸຕມຍຎາເຓນ ຂນ຺ຘາທິເຠທໍ ເຎຍ຺ຍໍ ພຸທ຺ຘວາຕິ ສຸຕພຸທ຺ໂຘ. ສພ຺ພຎ຺ຎຸພຸທ຺ຘປຈ຺ເຈກພຸທ຺ເຘ ຐເປຕ຺ວາ ອວເສສາ ອຄ຺ຄສາວກມຫາສາວກາປິ ປກຕິສາວກາປິ ວີຕຣາຄາ ອວເສສາ ຂີຓາສວາ. ຕໂຍປິ ປຸຣິມາ ວຏ຺ຏນ຺ຕິ ສມ຺ພຸທ຺ຘາຕິອາທິວຈນໂຕ. ສນ຺ນິວສຕິ ເອເຕນາຕິ ສນ຺ນິວາໂສ, ຈຣິຕໍ. ໂລກສ຺ສ ສນ຺ນິວາໂສ ໂລກສນ຺ນິວາໂສ, ຕສ຺ມິໍ. ກາຍທຸຈ຺ຈຣິຕາທິເຠເທ ວິສເມ. ສຕິສມ຺ໂມເສນ ວິສເມ ວາ ສຕ຺ຕນິກາເຍ. ໂສ ຫິ ວິສມໂຍຄໂຕ ວິສໂມ. ຣາຄວິສມາທິເກ ວິສເມ ວາ ກິເລສຊາເຕ. ຕໍ ວິສມໍ ປຫາຍ ຕໍ ວິສມໍ ອຊ຺ຌຸເປກ຺ຂິຕ຺ວາ ສມໍ ສທິສໍ ຍຸຕ຺ຕຣູປໍ, ປຸຣິມເກຫິ ວາ ສມ຺ພຸທ຺ເຘຫິ ສມໍ ສທິສໍ ຈຣນ຺ຕິ ວຕ຺ຕນ຺ຕິ.

ອປ຺ປຏິວິທິຕສຸຕ຺ຕວຓ຺ຓນາ ນິຏ຺ຐິຕາ.