໔. ອຈ຺ເຈນ຺ຕິສຸຕ຺ຕວຓ຺ຓນາ

໔. ກາລຍນ຺ຕິ ເຂເປນ຺ຕີຕິ ກາລາ. ປຸເຣຠຕ຺ຕາທໂຍ ຫິ ກາລາ ຘມ຺ມປ຺ປວຕ຺ຕິມຕ຺ຕຕາຍ ປຣມຕ຺ຖໂຕ ອວິຊ຺ຊມານາປິ ໂລກສງ຺ເກຕມຕ຺ຕສິທ຺ຘາ ຕສ຺ສາເຍວ ຘມ຺ມປ຺ປວຕ຺ຕິຍາ ຄຕຄຕາຍ ອນິວຕ຺ຕນໂຕ ຕໍ ຕໍ ຘມ຺ມປ຺ປວຕ຺ຕິໍ ເຂເປນ຺ຕາ ວິນາສຍນ຺ຕາ ວິຍ ສຍຎ຺ຈ ຕາຫິ ສທ຺ຘິໍ ອຈ຺ເຈນ຺ຕາ ວິຍ ໂຫນ຺ຕິ. ເຕນາຫ – ‘‘ກາໂລ ຆສຕິ ຠູຕານິ, ສພ຺ພາເນວ ສຫຕ຺ຕນາ’’ຕິ (ຊາ. ໑.໒.໑໙໐). ‘‘ຕຣຍນ຺ຕິ ຣຕ຺ຕິໂຍ’’ຕິ ເອຕ຺ຖາປິ ວຸຕ຺ຕນເຍເນວ ອຕ຺ໂຖ ເວທິຕພ຺ໂພ. ‘‘ເອຕໍ ຠຍໍ ມຣເຓ ເປກ຺ຂມາໂນ’’ຕິ ວຸຈ຺ຈມານຕ຺ຕາ ປຸຄ຺ຄລໍ ມຣຓູປຄມນາຍ ຕຣຍນ຺ຕີຕິ ອຕ຺ໂຖ ວຸຕ຺ໂຕ. ວໂຍຄຸຓາຕິ ເອຕ຺ຖ ໂກຏ຺ຐາສາ ຄຸຓາ. ຕິຕ຺ຖິຍານໍ ຫິ ຈຣິມຈິຕ຺ເຕນ ສກລຈິຕ຺ເຕ ວຍສມູເຫ ວຍສມຎ຺ຎາຕິ ອາຫ – ‘‘ປຐມມຊ຺ຌິມປຈ຺ຉິມວຍານໍ ຄຸຓາ, ຣາສໂຍຕິ ອຕ຺ໂຖ’’ຕິ. ອານິສໍສຏ຺ໂຐ ຄຸຓຏ຺ໂຐ ‘‘ວາກຈິຣໍ ນິວາເສສິໍ, ທ຺ວາທສຄຸຓມຸປາຄຕ’’ນ຺ຕິອາທີສຸ (ພຸ. ວໍ. ໒.໓໐) ວິຍ. ‘‘ຕນ຺ທິຄຸຓາຫໍ ກຣິສ຺ສາມິ, ທິຄຸຓໍ ທິຄຸຓໍ ວທ຺ເຘຍ຺ຍາ’’ຕິ ຈ ເອວມາທີສຸ ປນ ຕພ຺ຠາວວຸຕ຺ຕິອຕ຺ໂຖ ຄຸຓຏ຺ໂຐ.

‘‘ອສງ຺ຂ຺ເຍຍ຺ຍານິ ນາມານິ, ສຄຸເຓນ ມເຫສິໂນ;

ຄຸເຓນ ນາມມຸທ຺ເຘຍ຺ຍໍ, ອປິ ນາມ ສຫສ຺ສໂຕ’’ຕິ. (ຘ. ສ. ອຏ຺ຐ. ໑໓໑໓; ອຸທາ. ໕໓; ປຏິ. ມ. ອຏ຺ຐ. ໑.໑.໗໖) –

ອາທີສຸ ປສໍສຏ຺ໂຐ ຄຸຓຏ຺ໂຐ ທຏ຺ຐພ຺ໂພ. ‘‘ວໂຍຄຸຓາ ອນຸປຸພ຺ພໍ ຊຫນ຺ຕີ’’ຕິ ເອຕ຺ຖ ອຕ຺ໂຖ ‘‘ອຈ຺ເຈນ຺ຕິ ກາລາ’’ຕິ ເອຕ຺ຖ ວຸຕ຺ຕນໂຍ ເອວ. ປຐມມຊ຺ຌິມວຍາຕິ ປຐມຄ຺ຄຫຓຎ຺ເຈຕ຺ຖ ວຍສ຺ສ ຄຕສ຺ສ ອປຸນຣາວຕ຺ຕິທສ຺ສນຕ຺ຖໍ ກຕໍ. ເຕເນວາຫ – ‘‘ມຣຓກ຺ຂເຓ ປນ ຕໂຍປິ ວຍາ ຊຫນ຺ເຕວາ’’ຕິ.

ເອຕ຺ຖ ຈ ປາຬິຍໍ ‘‘ອຈ຺ເຈນ຺ຕິ ກາລາ’’ຕິ ສາມຎ຺ຎໂຕ ກາລສ຺ສ ອປຄມນໍ ທສ຺ສິຕໍ, ປຸນ ຕໍ ວິເສສໂຕປິ ທສ຺ເສຕຸໍ ອິຕຣທ຺ວຍໍ ວຸຕ຺ຕໍ. ອຏ຺ຐກຖາຍໍ ປນ ມຸທິນ຺ທ຺ຣິຍສ຺ສ ວເສນ ‘‘ວໂຍຄຸຓາ ອນຸປຸພ຺ພໍ ຊຫນ຺ຕີ’’ຕິ ວຸຕ຺ຕໍ, ມຊ຺ຌິມິນ຺ທ຺ຣິຍສ຺ສ ວເສນ ‘‘ຕຣຍນ຺ຕິ ຣຕ຺ຕິໂຍ’’ຕິ ວຸຕ຺ຕນ຺ຕິ ອຘິປ຺ປາເຍນ ‘‘ກາລາຕິ ປຸເຣຠຕ຺ຕາທໂຍ ກາລາ’’ຕິ ວຸຕ຺ຕໍ. ຕສ຺ມາ ຕຕ຺ຖ ອາທິ-ສທ຺ເທນ ປຈ຺ຉາຠຕ຺ຕປຐມຍາມ-ມຸຫຸຕ຺ຕກາລາທິ-ກາລໂກຏ຺ຐາໂສ ເອວ ອຓຸປເຠໂທ ກາລວິຠາໂຄ ຄຫິໂຕຕິ ເວທິຕພ຺ໂພ. ເສສນ຺ຕິ ອິຘ ທ຺ວີສຸ ຄາຖາສຸ ປຈ຺ຉິມທ຺ໂຘ. ໂສ ຫິ ອິຘ ອຕ຺ຖໂຕ ອຘິຄຕຕ຺ຕາ ອນນ຺ຕຣສຸຕ຺ເຕ ຈ ວຸຕ຺ຕຕ຺ຕາ ອຕິທິສິໂຕ.

ອຈ຺ເຈນ຺ຕິສຸຕ຺ຕວຓ຺ຓນາ ນິຏ຺ຐິຕາ.