໘. ກາລິກນິທ຺ເທໂສ

ກາລິກາ ຈາຕິ –

໘໔. ປຏິຄ຺ຄຫິຕາ ຈຕ຺ຕາໂຣ, ກາລິກາ ຍາວກາລິກໍ;

ຍາມກາລິກໍ ສຕ຺ຕາຫ-ກາລິກໍ ຍາວຊີວິກໍ.

໘໕. ປິຏ຺ຐໍ ມູລໍ ຜລໍ ຂຊ຺ຊໍ, ໂຄຣໂສ ຘຎ຺ຎໂຠຊນໍ;

ຍາຄຸສູປປ຺ປຠຸຕໂຍ, ໂຫນ຺ເຕເຕ ຍາວກາລິກາ.

໘໖. ມຘຸມຸທ຺ທິກສາລູກ-ໂຈຈໂມຈມ຺ພຊມ຺ພຸຊໍ;

ຜາຣຸສໍ ນຄ຺ຄິສນ຺ຕຕ຺ຕໍ, ປານກໍ ຍາມກາລິກໍ.

໘໗. ສານຸໂລມານິ ຘຎ຺ຎານິ, ຐເປຕ຺ວາ ຜລໂຊ ຣໂສ;

ມຘູກປຸປ຺ຜມຎ຺ຎຕ຺ຣ, ສພ຺ໂພ ປຸປ຺ຜຣໂສປິ ຈ.

໘໘. ສພ຺ພປຕ຺ຕຣໂສ ເຈວ, ຐເປຕ຺ວາ ປກ຺ກຑາກຊໍ;

ສີໂຕທມທ຺ທິໂຕທິຈ຺ຈ-ປາໂກ ວາ ຍາມກາລິໂກ.

໘໙. ສປ຺ປິໂນນີຕເຕລານິ, ມຘຸຜາຓິຕເມວ ຈ;

ສຕ຺ຕາຫກາລິກາ ສປ຺ປິ, ເຍສໍ ມໍສມວາຣິຕໍ.

໙໐. ເຕລໍ ຕິລວເສຣຓ຺ຑ-ມຘຸສາສປສມ຺ຠວໍ;

ຂຸທ຺ທາຠມຣມຘຸກຣິ-ມກ຺ຂິກາຫິ ກຕໍ ມຘຸ;

ຣສາທິອຸຈ຺ຉຸວິກຕິ, ປກ຺ກາປກ຺ກາ ຈ ຜາຓິຕໍ.

໙໑. ສວຕ຺ຖຸປກ຺ກາ ສາມໍ ວາ, ວສາ ກາເລ ອມານຸສາ;

ອຎ຺ເຎສໍ ນ ປເຈ ວຕ຺ຖຸໍ, ຍາວກາລິກວຕ຺ຖຸນໍ.

໙໒. ຫລິທ຺ທິໍ ສິງ຺ຄິເວຣຎ຺ຈ, ວຈຕ຺ຕໍ ລສຸຓໍ ວຈາ;

ອຸສີຣໍ ຠທ຺ທມຸຕ຺ຕຎ຺ຈາຕິວິສາ ກຏຸໂຣຫິຓີ;

ປຎ຺ຈມູລາທິກຎ຺ຈາປິ, ມູລໍ ຕໍ ຍາວຊີວິກໍ.

໙໓. ພິຬງ຺ຄໍ ມຣິຈໍ ໂຄຏ຺ຐ-ຜລໍ ປິປ຺ຜລິ ຣາຊິກາ;

ຕິຜເລຣຓ຺ຑກາທີນໍ, ຜລໍ ຕໍ ຍາວຊີວິກໍ.

໙໔. ກປ຺ປາສນິມ຺ພກຸຏຊປໂຏລສຸລສາທິນໍ;

ສູເປຍ຺ຍປຓ຺ຓໍ ວຊ຺ເຊຕ຺ວາ, ປຓ຺ຓໍ ຕໍ ຍາວຊີວິກໍ.

໙໕. ຐເປຕ຺ວາ ອຸຈ຺ຉຸນິຍ຺ຍາສໍ,

ສຣສໍ ອຸຈ຺ຉຸຊໍ ຕຈໍ;

ນິຍ຺ຍາໂສ ຈ ຕໂຈ ສພ຺ໂພ,

ໂລຓໍ ໂລຫໍ ສິລາ ຕຖາ.

໙໖. ສຸທ຺ຘສິຕ຺ຖຎ຺ຈ ເສວາໂລ, ຍຎ຺ຈ ກິຎ຺ຈິ ສຸຌາປິຕໍ;

ວິກຏາທິປ຺ປເຠທຎ຺ຈ, ຎາຕພ຺ພໍ ຍາວຊີວິກໍ.

໙໗. ມູລໍ ສາຣໍ ຕໂຈ ເຜຄ຺ຄຸ, ປຓ຺ຓໍ ປຸປ຺ຜໍ ຜລໍ ລຕາ;

ອາຫາຣຕ຺ຖ ມສາເຘນ຺ຕໍ, ສພ຺ພໍ ຕໍ ຍາວຊີວິກໍ.

໙໘. ສພ຺ພກາລິກສມ຺ໂຠໂຄ, ກາເລ ສພ຺ພສ຺ສ ກປ຺ປຕິ;

ສຕິ ປຈ຺ຈເຍ ວິກາເລ, ກປ຺ປເຕ ກາລິກຕ຺ຕຍໍ.

໙໙. ກາລຍາມມຕິກ຺ກນ຺ຕາ, ປາຈິຕ຺ຕິໍ ຊນຍນ຺ຕຸໂຠ;

ຊນຍນ຺ຕິ ອຸໂຠເປເຕ, ອນ຺ໂຕວຸຕ຺ຖຎ຺ຈ ສນ຺ນິຘິໍ.

໑໐໐. ສຕ຺ຕາຫກາລິເກ ສຕ຺ຕ, ອຫານິ ອຕິນາມິເຕ;

ປາຈິຕ຺ຕິ ປາຬິນາຣຸຬ຺ເຫ, ສປ຺ປິອາທິມ຺ຫິ ທຸກ຺ກຏໍ.

໑໐໑. ນິສ຺ສຏ຺ຐລທ຺ຘໍ ມກ຺ເຂຍ຺ຍ, ນງ຺ຄໍ ນຊ຺ໂຌຫເຣຍ຺ຍ ຈ;

ວິກປ຺ເປນ຺ຕສ຺ສ ສຕ຺ຕາເຫ, ສາມເຓຣສ຺ສຘິຏ຺ຐໂຕ;

ມກ຺ຂນາທິຎ຺ຈ ນາປຕ຺ຕິ, ອຎ຺ຎສ຺ສ ທທໂຕປິ ຈ.

໑໐໒. ຍາວກາລິກອາທີນິ, ສໍສຏ຺ຐານິ ສຫຕ຺ຕນາ;

ຄາຫາປຍນ຺ຕິ ສພ຺ຠາວໍ, ຕສ຺ມາ ເອວມຸທີຣິຕໍ.

໑໐໓. ປຸເຣ ປຏິຄ຺ຄຫິຕຎ຺ຈ, ສຕ຺ຕາຫໍ ຍາວຊີວິກໍ;

ເສສກາລິກສມ຺ມິສ຺ສໍ, ປາຈິຕ຺ຕິ ປຣິຠຸຎ຺ຊໂຕ.

໑໐໔. ຍາວກາລິກສມ຺ມິສ຺ສໍ, ອິຕຣໍ ກາລິກຕ຺ຕຍໍ;

ປຏິຄ຺ຄຫິຕໍ ຕທຫຸ, ຕທເຫວ ຈ ຠຸຎ຺ຊເຍ.

໑໐໕. ຍາມກາລິກສມ຺ມິສ຺ສໍ, ເສສເມວໍ ວິຊານິຍໍ;

ສຕ຺ຕາຫກາລິກມິສ຺ສຎ຺ຈ, ສຕ຺ຕາຫໍ ກປ຺ປເຕຕຣນ຺ຕິ.