໕. ປຕ຺ຕນິທ຺ເທໂສ

ປຕ຺ໂຕ ຈາຕິ –

໖໐. ອໂຍປຕ຺ໂຕ ຠູມິປຕ຺ໂຕ, ຊາຕິຍາ ກປ຺ປິຍາ ທຸເວ;

ອຸກ຺ກຏ຺ໂຐ ມຊ຺ຌິໂມ ເຈວ, ໂອມໂກ ຈ ປມາຓໂຕ.

໖໑. ອຸກ຺ກຏ຺ໂຐ ມຄເຘ ນາຬິ-ທ຺ວຍຕຓ຺ຑຸລສາຘິຕໍ;

ຄຓ຺ຫາຕິ ໂອທນໍ ສູປໍ, ພ຺ຍຎ຺ຊນຎ຺ຈ ຕທູປິຍໍ.

໖໒. ມຊ຺ຌິໂມ ຕສ຺ສຸປຑ຺ໂຒວ, ຕໂຕປຑ຺ໂຒວ ໂອມໂກ;

ອຸກ຺ກຏ຺ຐໂຕ ຈ ອຸກ຺ກຏ຺ໂຐ, ອປຕ຺ໂຕ ໂອມໂກມໂກ.

໖໓. ອຕິເຣກປຕ຺ໂຕ ຘາເຣຍ຺ໂຍ, ທສາຫປຣມໍ ສໂກ;

ກປ຺ໂປ ນິສ຺ສຄ຺ຄິໂຍ ໂຫຕິ, ຕສ຺ມິໍ ກາເລຕິນາມິເຕ.

໖໔. ອຈ຺ເຉທທານຄາເຫຫິ, ວິພ຺ຠມາ ມຣຓຸທ຺ຘຏາ;

ລິງ຺ຄສິກ຺ຂາຫິ ຉິທ຺ເທນ, ປຕ຺ຕາຘິຏ຺ຐານມຸຊ຺ຌຕິ.

໖໕. ປຕ຺ຕໍ ນ ປຏິສາເມຍ຺ຍ, ໂສທກໍ ນ ຈ ໂອຕເປ;

ອຸຓ຺ເຫ ນ ນິທເຫ ຠຸມ຺ຍາ, ນ ຐເປ ໂນ ຈ ລຄ຺ຄເຍ.

໖໖. ມິຑ຺ຒນ຺ເຕ ປຣິຠຓ຺ຑນ຺ເຕ, ອງ຺ເກ ວາ ອາຕປຕ຺ຕເກ;

ປາເທສຸ ມຎ຺ຈປີເຐ ວາ, ຐເປຕຸໍ ນ ຈ ກປ຺ປຕິ.

໖໗. ນ ນີຫເຣຍ຺ຍ ອຸຈ຺ຉິຏ຺ໂຐ-ທກຎ຺ຈ ຈລກຏ຺ຐິກໍ;

ປຕ຺ເຕນ ປຕ຺ຕຫຕ຺ໂຖ ວາ, ກວາຏໍ ນ ປຓາມເຍ.

໖໘. ຠູມິອາຘາຣເກ ທາຣຸທຓ຺ຑາຘາເຣ ສຸສຊ຺ຊິເຕ;

ທຸເວ ປຕ຺ເຕ ຐເປຍ຺ເຍກໍ, ນິກ຺ກຸຊ຺ຊິຕ຺ວານ ຠູມິຍໍ.

໖໙. ທາຣຸຣູປິຍໂສວຓ຺ຓ-ມຓິເວຬຸຣິຍາມຍາ;

ກໍສກາຈຕິປຸສີສຜລິກາຕມ຺ພໂລຫຊາ.

໗໐. ຉວສີສມໂຍ ຈາປິ, ຆຏີຕຸມ຺ພກຏາຫຊາ;

ປຕ຺ຕາ ອກປ຺ປິຍາ ສພ຺ເພ, ວຸຕ຺ຕາ ທຸກ຺ກຏວຕ຺ຖຸກາຕິ.