໓໑. ວິກປ຺ປນານິທ຺ເທໂສ

ວິກປ຺ປນາ ເຈວາຕິ –

໒໒໑. ສມ຺ມຸຂາ ປຣມ຺ມຸຂາຕິ, ທຸເວ ວຸຕ຺ຕາ ວິກປ຺ປນາ;

ສມ຺ມຸຂາຍ ວິກປ຺ເປນ຺ໂຕ, ພ຺ຍຕ຺ຕສ຺ເສກສ຺ສ ສນ຺ຕິເກ;

‘‘ອິມໍ ຈີວຣໍ ຕຸຍ຺ຫໍ, ວິກປ຺ເປມີ’’ຕິ ຠາສເຍ.

໒໒໒. ເອຕ຺ຕາວຕາ ນິເຘຕຸໍວ, ກປ຺ປຕີ ນ ຈ ກປ຺ປຕິ;

ປຣິໂຠຄາທິກໍ ເຕນ, ອປ຺ປຈ຺ຈຸທ຺ຘຏຠາວໂຕ.

໒໒໓. ‘‘ມຍ຺ຫໍ ສນ຺ຕກໍ ປຣິຠຸຎ຺ຊ ວາ ວິສ຺ສຊ຺ເຊຫິ ວາ ຍຖາປຈ຺ຈຍໍ ວາ ກໂຣຫີ’’ຕິ –

ເຕນ ປຈ຺ຈຸທ຺ຘເຏເຍວ, ປຣິໂຠຄາທິ ກປ຺ປຕິ.

໒໒໔. ອປຣາ ສມ຺ມຸຂາເວກາ, ຠິກ຺ຂຸສ຺ເສກສ຺ສ ສນ຺ຕິເກ;

ຄເຫຕ຺ວາ ນາມເມກສ຺ສ, ປຎ຺ຈນ຺ນໍ ສຫຘມ຺ມິນໍ.

໒໒໕. ‘‘ອິມໍ ຈີວຣໍ ຕິສ຺ສສ຺ສ ຠິກ຺ຂຸໂນ, ຕິສ຺ສາຍ ຠິກ຺ຂຸນິຍາ, ຕິສ຺ສສ຺ສ ສາມເຓຣສ຺ສ, ຕິສ຺ສາຍ ສາມເຓຣິຍາ, ຕິສ຺ສາຍ ສິກ຺ຂມານາຍ ວິກປ຺ເປມີ’’ຕິ ວຕ຺ຕພ຺ພໍ.

ເຕນ ຠິກ຺ຂຸນາ ‘‘ຕິສ຺ສສ຺ສ ຠິກ຺ຂຸໂນ, ຕິສ຺ສາຍ ຠິກ຺ຂຸນິຍາ, ຕິສ຺ສສ຺ສ ສາມເຓຣສ຺ສ, ຕິສ຺ສາຍ ສາມເຓຣິຍາ, ຕິສ຺ສາຍ ສິກ຺ຂມານາຍ ສນ຺ຕກໍ ປຣິຠຸຎ຺ຊ ວາ ວິສ຺ສຊ຺ເຊຫິ ວາ ຍຖາປຈ຺ຈຍໍ ວາ ກໂຣຫີ’’ຕິ ວຕ຺ຕພ຺ພໍ.

໒໒໖. ປຣມ຺ມຸຂາວິກປ຺ປເນ-ກສ຺ສນ຺ຕິເກວມີຣເຍ;

‘‘ອິມໍ ຈີວຣໍ ຕຸຍ຺ຫໍ ວິກປ຺ປນຕ຺ຖາຍ ທມ຺ມີ’’ຕິ.

໒໒໗. ເຕນ ວຕ຺ຕພ຺ໂພ ‘‘ໂກ ເຕ ມິຕ຺ໂຕ ວາ ສນ຺ທິຏ຺ໂຐ ວາ’’ຕິ. ອິຕເຣນ ເຈວໍ ວຕ຺ຕພ຺ພໍ ‘‘ຕິສ຺ໂສ ຠິກ຺ຂູ’’ຕິ ວາ ‘‘ຕິສ຺ສາ ຠິກ຺ຂຸນີ’’ຕິ ວາ ‘‘ຕິສ຺ໂສ ສາມເຓໂຣ’’ຕິ ວາ ‘‘ຕິສ຺ສາ ສາມເຓຣີ’’ຕິ ວາ ‘‘ຕິສ຺ສາ ສິກ຺ຂມານາ’’ຕິ ວາ.

ປຸນ ເຕນ ‘‘ອຫໍ ຕິສ຺ສສ຺ສ ຕິສ຺ສາຍ ວາ ທມ຺ມີ’’ຕິ ວິກປ຺ເປຕ຺ວາ ເຕເນວ ‘‘ຕິສ຺ສສ຺ສ ຠິກ຺ຂຸໂນ, ຕິສ຺ສາຍ ຠິກ຺ຂຸນິຍາ, ຕິສ຺ສສ຺ສ ສາມເຓຣສ຺ສ, ຕິສ຺ສາຍ ສາມເຓຣິຍາ, ຕິສ຺ສາຍ ສິກ຺ຂມານາຍ ສນ຺ຕກໍ ປຣິຠຸຎ຺ຊ ວາ ວິສ຺ສຊ຺ເຊຫິ ວາ ຍຖາປຈ຺ຈຍໍ ວາ ກໂຣຫີ’’ຕິ ປຈ຺ຈຸທ຺ຘຣິຕພ຺ພໍ.

໒໒໘. ທູຣສນ຺ຕິກຕ຺ເຕກຕ຺ຕພຫຸຠາວໍ ວິຊານິຍ;

‘‘ເອຕໍ ອິມ’’ນ຺ຕິ ‘‘ເອຕານິ, ອິມານີ’’ເຕຕ຺ຖ ໂຍຊເຍ.

໒໒໙. ທສາຫໍ ມາສເມກໍ ວາ, ປຎ຺ຈ ວາ ກຖິນຕ຺ຖເຕ;

ປາຣິປູຣຕ຺ຖມູນສ຺ສ, ປຈ຺ຈາສາ ສຕິ ມາສກໍ;

ນຸປ຺ປາທຍຕິ ນິສ຺ສຄ຺ຄິໍ, ນາຘິຏ຺ຐິຕວິກປ຺ປິຕນ຺ຕິ.