໒໘. ກມ຺ມນິທ຺ເທໂສ

ກມ຺ມຎ຺ຈາຕິ –

໑໙໙. ວຄ຺ເຄນ ອຘມ຺ມກມ຺ມໍ, ສມຄ຺ເຄນ ອຘມ຺ມິກໍ;

ວຄ຺ເຄນ ຘມ຺ມກມ຺ມຎ຺ຈ, ສມຄ຺ເຄນ ຈ ຘມ຺ມິກໍ;

ຈຕຸຕ຺ຖໍເຍວານຸຎ຺ຎາຕໍ, ເສສກມ຺ເມສຸ ທຸກ຺ກຏໍ.

໒໐໐. ຈຕຸວຄ຺ໂຄ ປຎ຺ຈວຄ຺ໂຄ, ທສວີສຕິວຄ຺ຄິໂກ;

ຕິເຣກວີສຕິວຄ຺ໂຄ, ປຎ຺ຈ ສງ຺ຆາ ວິຠາວິຕາ.

໒໐໑. ຈຕຸວຄ຺ເຄຕ຺ຖ ອພ຺ຠານຸ-ປສມ຺ປທາປວາຣຓາ;

ປຎ຺ຈວຄ຺ໂຄ ຈ ອພ຺ຠານໍ, ມຊ຺ຌເທສຸປສມ຺ປທໍ.

໒໐໒. ທສວຄ຺ໂຄ ຈ ອພ຺ຠານໍ, ຐເປຕ຺ວາ ສພ຺ພກມ຺ມິໂກ;

ອິຕໂຣ ສພ຺ພກມ຺ເມສຸ, ກມ຺ມປ຺ປຕ຺ໂຕຕິ ທີປິໂຕ.

໒໐໓. ຈຕຸວຄ຺ເຄນ ກຕ຺ຕພ຺ເພ, ຈຕ຺ຕາໂຣ ປກຕຕ຺ຕກາ;

ກມ຺ມປ຺ປຕ຺ຕາ ປເຣ ຉນ຺ທາ-ຣຫາ ເສເສປ຺ຍຍໍ ນໂຍ.

໒໐໔. ຈຕຸວຄ຺ຄາທິກຕ຺ຕພ຺ພໍ, ອສໍວາສກມ຺ມາຣຫ;

ຄຣຸກຏ຺ເຐສ຺ວຎ຺ຎຕຣໍ, ກຕ຺ວານ ຄຓປູຣກໍ;

ປຣິວາສາທິກໍ ກມ຺ມໍ, ກຕໍ ກຸປ຺ປຎ຺ຈ ທຸກ຺ກຏໍ.

໒໐໕. ອຘມ຺ມກມ຺ມໍ ວາເຣຍ຺ຍ, ອນ຺ຕຣາເຍ ທຸເວ ຕໂຍ;

ທິຏ຺ຐາວິເມໂກຘິຏ຺ຐານໍ, ວາເຣນ຺ເຕວ ຕໂຕຘິກາ.

໒໐໖. ກມ຺ມາຣຫາ ອສໍວາສາ, ຂິຕ຺ຕຈິຕ຺ຕທຸຂຏ຺ຏິຕາ;

ເອເຕສໍ ສງ຺ຆມຊ຺ຌມ຺ຫິ, ປຏິກ຺ເຂໂປ ນ ຣຸຫຕິ.

໒໐໗. ປກຕຕ຺ເຕກສີມຏ຺ຐ-ສມສໍວາສຠິກ຺ຂຸໂນ;

ອາໂຣເຈນ຺ຕສ຺ສນ຺ຕມໂສ-ນນ຺ຕຣສ຺ສາປິ ຣູຫຕິ.

໒໐໘. ໂກເປຕຸໍ ຘມ຺ມິກໍ ກມ຺ມໍ, ປຏິກ຺ໂກເສຍ຺ຍ ສມ຺ມຸຂາ;

ຕິໂຣກ຺ຂາ ກາຍສາມຄ຺ຄິໍ, ຉນ຺ທໍ ໂນ ເທຍ຺ຍ ທຸກ຺ກຏນ຺ຕິ.