໑໔. ຠູມິນິທ຺ເທໂສ

ຠູມິໂຍຕິ –

໑໓໖. ສມ຺ມຸຕຸສ຺ສາວນນ຺ຕາ ຈ, ໂຄນິສາທີ ຄຫາປຕິ;

ກປ຺ປິຍາ ຠູມິໂຍ ຍາສຸ, ວຸຕ຺ຖໍ ປກ຺ກຎ຺ຈ ກປ຺ປຕິ.

໑໓໗. ວາສຕ຺ຖາຍ ກເຕ ເຄເຫ, ສງ຺ຆິເກ ເວກສນ຺ຕເກ;

ກປ຺ປິຍາ ກຸຏິ ລທ຺ຘພ຺ພາ, ສຫເສຍ຺ຍປ຺ປໂຫນເກ.

໑໓໘. ເຄເຫ ສງ຺ຆສ຺ສ ເວກສ຺ສ, ກຣມາເນວມີຣຍໍ;

ປຐມິຏ຺ຐກຖມ຺ຠາທິໍ, ຐເປຍ຺ຍຸສ຺ສາວນນ຺ຕິກາ;

‘‘ກປ຺ປິຍກຸຏິໍ ກໂຣມ, ກປ຺ປິຍກຸຏິໍ ກໂຣມາ’’ຕິ.

໑໓໙. ເຍຠຸຍ຺ເຍນາປຣິກ຺ຂິຕ຺ໂຕ, ອາຣາໂມ ສກໂລປິ ວາ;

ວຸຈ຺ຈເຕ ‘‘ໂຄນິສາທີ’’ຕິ, ສມ຺ມຸຕີ ສງ຺ຆສມ຺ມຕາ.

໑໔໐. ຠິກ຺ຂຸໍ ຐເປຕ຺ວາ ອຎ຺ເຎຫິ, ທິນ຺ໂນ ເຕສໍວ ສນ຺ຕໂກ;

ອຕ຺ຖາຍ ກປ຺ປກຸຏິຍາ, ເຄໂຫ ຄຫປຕີ ມໂຕ.

໑໔໑. ອກປ຺ປກຸຏິຍາ ວຸຕ຺ຖສປ຺ປິອາທີຫິ ມິສ຺ສິຕໍ;

ວເຊຍ຺ຍ ອນ຺ໂຕວຸຕ຺ຖຕ຺ຕໍ, ປຸຣິມໍ ກາລິກທ຺ວຍໍ.

໑໔໒. ເຕເຫວ ຠິກ຺ຂຸນາ ປກ຺ກໍ, ກປ຺ປເຕ ຍາວຊີວິກໍ;

ນິຣາມິສໍວ ສຕ຺ຕາຫໍ, ສາມິເສ ສາມປາກຕາ.

໑໔໓. ອຸສ຺ສາວນນ຺ຕິກາ ເຍຫິ, ຖມ຺ຠາທີຫິ ອຘິຏ຺ຐິຕາ;

ເຕສຸເຍວາປນີເຕສຸ, ຕທຎ຺ເຎສຸປິ ຕິຏ຺ຐຕິ.

໑໔໔. ສພ຺ເພສຸ ອປນີເຕສຸ, ຠເວ ຊຫິຕວຕ຺ຖຸກາ;

ໂຄນິສາທີ ປຣິກ຺ຂິຕ຺ເຕ, ເສສາ ຉທນວິພ຺ຠມາຕິ.