໓. ນຄ຺ຄວຄ຺ໂຄ

໑. ນຄ຺ຄສິກ຺ຂາປທວຓ຺ຓນາ

ນຄ຺ຄວຄ຺ຄສ຺ສ ປຐເມ ນຄ຺ຄາຕິ ອນິວຕ຺ຖາ ວາ ອປາຣຸຕາ ວາ. ເອວຎ຺ຫິ ນຫາຍນ຺ຕິຍາ ສພ຺ພປ຺ປໂຍເຄສຸ ທຸກ຺ກຏໍ, ນຫານປຣິໂຍສາເນ ປາຈິຕ຺ຕິຍໍ.

ສາວຕ຺ຖິຍໍ ສມ຺ພຫຸລາ ຠິກ຺ຂຸນິໂຍ ອາຣພ຺ຠ ເອວໍ ນຫານວຕ຺ຖຸສ຺ມິໍ ປຎ຺ຎຕ຺ຕໍ, ອຸທກສາຏິກຈີວເຣ ອຈ຺ຉິນ຺ເນ ວາ ນຏ຺ເຐ ວາ, ‘‘ມຫຄ຺ຆໍ ອິທໍ ທິສ຺ວາ ໂຈຣາປິ ຫເຣຍ຺ຍຸ’’ນ຺ຕິ ເອວຣູປາສຸ ອາປທາສຸ ວາ ນຫາຍນ຺ຕິຍາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ນຄ຺ຄຕາ, ອນຸຎ຺ຎາຕກາຣຓາຠາໂວ, ນຫານປຣິໂຍສານນ຺ຕິ ອິມາເນຕ຺ຖ ຕີຓິ ອງ຺ຄານິ. ສມຸຏ຺ຐານາທີນິ ເອຬກໂລມສທິສານີຕິ.

ນຄ຺ຄສິກ຺ຂາປທວຓ຺ຓນາ ນິຏ຺ຐິຕາ.

໒. ອຸທກສາຏິກສິກ຺ຂາປທວຓ຺ຓນາ

ທຸຕິເຍ ສາວຕ຺ຖິຍໍ ຉພ຺ພຄ຺ຄິຍາ ຠິກ຺ຂຸນິໂຍ ອາຣພ຺ຠ ອປ຺ປມາຓິກາໂຍ ອຸທກສາຏິກາໂຍ ຘາຣຓວຕ຺ຖຸສ຺ມິໍ ປຎ຺ຎຕ຺ຕໍ, ເສສເມຕ຺ຖ ສພ຺ພໍ ຣຕນວຄ຺ເຄ ນິສີທນສິກ຺ຂາປເທ ວຸຕ຺ຕນເຍເນວ ເວທິຕພ຺ພນ຺ຕິ.

ອຸທກສາຏິກສິກ຺ຂາປທວຓ຺ຓນາ ນິຏ຺ຐິຕາ.

໓. ຈີວຣສິພ຺ພນສິກ຺ຂາປທວຓ຺ຓນາ

ຕຕິເຍ ວິສິພ຺ເພຕ຺ວາຕິ ທຸສ຺ສິພ຺ພິຕໍ ປຸນສິພ຺ພນຕ຺ຖາຍ ວິສິພ຺ເພຕ຺ວາ. ອນນ຺ຕຣາຍິກິນີຕິ ທສສຸ ອນ຺ຕຣາເຍສຸ ເອເກກສ຺ມິມ຺ປິ ອສຕິ. ອຎ຺ຎຕ຺ຣ ຈຕູຫປຎ຺ຈາຫາຕິ ວິສິພ຺ພິຕທິວສໂຕ ປຎ຺ຈ ທິວເສ ອຕິກ຺ກາເມຕ຺ວາ ‘‘ເນວ ສິພ຺ພິສ຺ສາມິ, ນ ສິພ຺ພາປນາຍ ອຸສ຺ສຸກ຺ກໍ ກຣິສ຺ສາມີ’’ຕິ ຘຸຣໍ ນິກ຺ຂິຕ຺ຕມຕ຺ເຕ ປາຈິຕ຺ຕິຍໍ.

ສາວຕ຺ຖິຍໍ ຖຸລ຺ລນນ຺ທໍ ອາຣພ຺ຠ ຈີວຣໍ ວິສິພ຺ເພຕ຺ວາ ນ ສິພ຺ພນວຕ຺ຖຸສ຺ມິໍ ປຎ຺ຎຕ຺ຕໍ, ຕິກປາຈິຕ຺ຕິຍໍ, ອນຸປສມ຺ປນ຺ນາຍ ຕິກທຸກ຺ກຏໍ, ຕຖາ ອຸຠິນ຺ນມ຺ປິ ອຎ຺ຎສ຺ມິໍ ປຣິກ຺ຂາເຣ. ຍາ ປນ ອນ຺ຕຣາຍິກິນີ ວາ ໂຫຕິ, ປຣິເຍສິຕ຺ວາ ວາ ກິຎ຺ຈິ ນ ລຠຕິ, ກໂຣນ຺ຕີ ວາ ປຎ຺ຈາຫໍ ອຕິກ຺ກາເມຕິ, ຕສ຺ສາ ຈ, ຄິລານາຍ ຈ, ອາປທາສຸ ຈ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ນິວາສນປາຣຸປນຸປຄຈີວຣຕາ, ອຸປສມ຺ປນ຺ນາຍ ສນ຺ຕກຕາ, ສິພ຺ພນຕ຺ຖາຍ ວິສິພ຺ພນໍ ວາ ວິສິພ຺ພາປນໍ ວາ, ອຎ຺ຎຕ຺ຣ ອນຸຎ຺ຎາຕກາຣຓາ ປຎ຺ຈາຫາຕິກ຺ກໂມ, ຘຸຣນິກ຺ເຂໂປຕິ ອິມາເນຕ຺ຖ ປຎ຺ຈ ອງ຺ຄານິ. ສມຸຏ຺ຐານາທີນິ ສມນຸຠາສນສທິສານີຕິ.

ຈີວຣສິພ຺ພນສິກ຺ຂາປທວຓ຺ຓນາ ນິຏ຺ຐິຕາ.

໔. ສງ຺ຆາຏິຈາຣສິກ຺ຂາປທວຓ຺ຓນາ

ຈຕຸຕ຺ເຖ ປຎ຺ຈ ອຫານິ ປຎ຺ຈາຫໍ, ປຎ຺ຈາຫເມວ ປຎ຺ຈາຫິກໍ. ສງ຺ຆາຏີນໍ ຈາໂຣ ສງ຺ຆາຏິຈາໂຣ, ປຣິໂຠຄວເສນ ວາ ໂອຕາປນວເສນ ວາ ສງ຺ຆຏິຕຏ຺ເຐນ ‘ສງ຺ຆາຏີ’ຕິ ລທ຺ຘນາມໍ ຕິຈີວຣໍ, ອຸທກສາຏິກາ, ສໍກຈ຺ຈິກາຕິ ອິເມສໍ ປຎ຺ຈນ຺ນໍ ຈີວຣານໍ ປຣິວຕ຺ຕນນ຺ຕິ ອຕ຺ໂຖ. ອຕິກ຺ກາເມຍ຺ຍ ປາຈິຕ຺ຕິຍນ຺ຕິ ຉຏ຺ເຐ ອຣຸຓຸຄ຺ຄມເນ ເອກສ຺ມິໍ ຈີວເຣ ວຸຕ຺ຕນເຍນ ອປຣິວຕ຺ຕິເຕ ເອກາ ອາປຕ຺ຕິ, ປຎ຺ຈສຸ ປຎ຺ຈ.

ສາວຕ຺ຖິຍໍ ສມ຺ພຫຸລາ ຠິກ຺ຂຸນິໂຍ ອາຣພ຺ຠ ຈີວຣໍ ນິກ຺ຂິປິຕ຺ວາ ສນ຺ຕຣຸຕ຺ຕເຣນ ຊນປທຈາຣິກໍ ປກ຺ກມນວຕ຺ຖຸສ຺ມິໍ ປຎ຺ຎຕ຺ຕໍ, ຕິກປາຈິຕ຺ຕິຍໍ, ປຎ຺ຈາຫານຕິກ຺ກນ຺ເຕ ທ຺ວິກທຸກ຺ກຏໍ. ຕສ຺ມິໍ ປນ ອນຕິກ຺ກນ຺ຕສຎ຺ຎາຍ, ປຎ຺ຈມໍ ທິວສໍ ປຎ຺ຈ ຈີວຣານິ ນິວາເສນ຺ຕິຍາ ວາ ປາຣຸປນ຺ຕິຍາ ວາ ໂອຕາເປນ຺ຕິຍາ ວາ, ຄິລານາຍ, ‘‘ອິທໍ ເມ ຈີວຣໍ ມຫຄ຺ຆໍ ອີທິເສ ໂຈຣຠເຍ ນ ສກ຺ກາ ຘາເຣຕຸ’’ນ຺ຕິ ເອວຣູປາສຸ ອາປທາສຸ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ປຎ຺ຈນ຺ນໍ ຈີວຣານໍ ອຎ຺ຎຕຣຕາ, ປຎ຺ຈາຫາຕິກ຺ກໂມ, ອນຸຎ຺ຎາຕກາຣຓາຠາໂວ, ອປຣິວຕ຺ຕນນ຺ຕິ ອິມາເນຕ຺ຖ ຈຕ຺ຕາຣິ ອງ຺ຄານິ. ສມຸຏ຺ຐານາທີນິ ກຖິນສທິສານີຕິ.

ສງ຺ຆາຏິຈາຣສິກ຺ຂາປທວຓ຺ຓນາ ນິຏ຺ຐິຕາ.

໕. ຈີວຣສງ຺ກມນີຍສິກ຺ຂາປທວຓ຺ຓນາ

ປຎ຺ຈເມ ຈີວຣສງ຺ກມນີຍນ຺ຕິ ສງ຺ກເມຕພ຺ພໍ ຈີວຣໍ, ອຎ຺ຎິສ຺ສາ ສນ຺ຕກໍ ອນາປຸຈ຺ຉາ ຄຫິຕໍ ປຸນ ປຏິທາຕພ຺ພໍ ປຎ຺ຈນ຺ນໍ ອຎ຺ຎຕຣໍ ຈີວຣນ຺ຕິ ອຕ຺ໂຖ. ຘາເຣຍ຺ຍາຕິ ສເຈ ຕໍ ນິວາເສຕິ ວາ ປາຣຸປຕິ ວາ ປາຈິຕ຺ຕິຍໍ.

ສາວຕ຺ຖິຍໍ ອຎ຺ຎຕຣໍ ຠິກ຺ຂຸນິໍ ອາຣພ຺ຠ ຠິກ຺ຂຸນິຍາ ຈີວຣໍ ອາທາຍ ອນາປຸຈ຺ຉາ ປາຣຸປນວຕ຺ຖຸສ຺ມິໍ ປຎ຺ຎຕ຺ຕໍ, ຕິກປາຈິຕ຺ຕິຍໍ, ອນຸປສມ຺ປນ຺ນາຍ ຕິກທຸກ຺ກຏໍ. ຍາ ປນ ຕາຍ ວາ ທິນ຺ນໍ, ຕໍ ວາ ອາປຸຈ຺ຉາ, ອຈ຺ຉິນ຺ນນຏ຺ຐຈີວຣິກາ ວາ ຫຸຕ຺ວາ, ‘‘ອິທໍ ເມ ຈີວຣໍ ມຫຄ຺ຆໍ ອີທິເສ ໂຈຣຠເຍ ນ ສກ຺ກາ ຘາເຣຕຸ’’ນ຺ຕິ ເອວຣູປາສຸ ອາປທາສຸ ວາ ຘາເຣຕິ, ຕສ຺ສາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ຈີວຣສງ຺ກມນີຍຕາ, ອຸປສມ຺ປນ຺ນາຍ ສນ຺ຕກຕາ, ອນຸຎ຺ຎາຕກາຣຓາຠາໂວ, ຘາຣຓນ຺ຕິ ອິມາເນຕ຺ຖ ຈຕ຺ຕາຣິ ອງ຺ຄານິ. ສມຸຏ຺ຐານາທີນິ ປຐມກຖິນສທິສານິ, ອິທໍ ປນ ກິຣິຍາກິຣິຍນ຺ຕິ.

ຈີວຣສງ຺ກມນີຍສິກ຺ຂາປທວຓ຺ຓນາ ນິຏ຺ຐິຕາ.

໖. ຄຓຈີວຣສິກ຺ຂາປທວຓ຺ຓນາ

ຉຏ຺ເຐ ຄຓສ຺ສາຕິ ຠິກ຺ຂຸນິສງ຺ຆສ຺ສ. ຈີວຣລາຠນ຺ຕິ ວິກປ຺ປນຸປຄມ຺ປິ ປຈ຺ຉິມໍ ລຠິຕພ຺ພໍ ຈີວຣໍ. ອນ຺ຕຣາຍໍ ກເຣຍ຺ຍາຕິ ຍຖາ ເຕ ທາຕຸກາມາ ນ ເທນ຺ຕິ, ເອວໍ ປຣກ຺ກເມຍ຺ຍ. ປາຈິຕ຺ຕິຍນ຺ຕິ ສເຈ ຕສ຺ສາ ວຈເນນ ເຕ ນ ເທນ຺ຕິ, ຠິກ຺ຂຸນິຍາ ປາຈິຕ຺ຕິຍໍ.

ສາວຕ຺ຖິຍໍ ຖຸລ຺ລນນ຺ທໍ ອາຣພ຺ຠ ຄຓສ຺ສ ຈີວຣລາຠນ຺ຕຣາຍກຣຓວຕ຺ຖຸສ຺ມິໍ ປຎ຺ຎຕ຺ຕໍ, ອຎ຺ຎສ຺ມິໍ ປຣິກ຺ຂາເຣ ທຸກ຺ກຏໍ, ສມ຺ພຫຸລານໍ ປນ ເອກຠິກ຺ຂຸນິຍາ ວາ ຈີວຣລາເຠປິ ທຸກ຺ກຏເມວ. ‘‘ສມຄ຺ຆກາເລ ທສ຺ສຖາ’’ຕິ ເອວໍ ອານິສໍສໍ ທສ຺ເສຕ຺ວາ ນິວາເຣນ຺ຕິຍາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ວິກປ຺ປນຸປຄປຈ຺ຉິມຕາ, ສງ຺ຆສ຺ສ ປຣິຓຕຠາໂວ, ວິນາ ອານິສໍສທສ຺ສເນນ ອນ຺ຕຣາຍກຣຓນ຺ຕິ ອິມາເນຕ຺ຖ ຕີຓິ ອງ຺ຄານິ. ສມຸຏ຺ຐານາທີນິ ອທິນ຺ນາທານສທິສານີຕິ.

ຄຓຈີວຣສິກ຺ຂາປທວຓ຺ຓນາ ນິຏ຺ຐິຕາ.

໗. ປຏິພາຫນສິກ຺ຂາປທວຓ຺ຓນາ

ສຕ຺ຕເມ ຘມ຺ມິກໍ ຈີວຣວິຠງ຺ຄນ຺ຕິ ສມຄ຺ເຄນ ສງ຺ເຆນ ສນ຺ນິປຕິຕ຺ວາ ກຣີຍມານໍ ຈີວຣວິຠງ຺ຄ. ປຏິພາເຫຍ຺ຍາຕິ ປຏິເສເຘຍ຺ຍ, ເອວໍ ປຏິເສເຘນ຺ຕິຍາ ປາຈິຕ຺ຕິຍໍ.

ສາວຕ຺ຖິຍໍ ຖຸລ຺ລນນ຺ທໍ ອາຣພ຺ຠ ຘມ຺ມິກໍ ຈີວຣວິຠງ຺ຄໍ ປຏິພາຫນວຕ຺ຖຸສ຺ມິໍ ປຎ຺ຎຕ຺ຕໍ, ຘມ຺ມິເກ ເວມຕິກາຍ, ອຘມ຺ມິເກ ຘມ຺ມິກສຎ຺ຎາຍ ເຈວ ເວມຕິກາຍ ຈ ທຸກ຺ກຏໍ. ອຸຠຍຕ຺ຖ ອຘມ຺ມິກສຎ຺ຎາຍ, ອານິສໍສໍ ທສ຺ເສຕ຺ວາ ປຏິພາຫນ຺ຕິຍາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ຈີວຣວິຠງ຺ຄສ຺ສ ຘມ຺ມິກຕາ, ຘມ຺ມິກສຎ຺ຎິຕາ, ວິນາ ອານິສໍເສນ ປຏິພາຫນນ຺ຕິ ອິມາເນຕ຺ຖ ຕີຓິ ອງ຺ຄານິ. ສມຸຏ຺ຐານາທີນິ ອທິນ຺ນາທານສທິສາເນວາຕິ.

ປຏິພາຫນສິກ຺ຂາປທວຓ຺ຓນາ ນິຏ຺ຐິຕາ.

໘. ຈີວຣທານສິກ຺ຂາປທວຓ຺ຓນາ

ອຏ຺ຐເມ ສມຓຈີວຣນ຺ຕິ ກປ຺ປກຕໍ ນິວາສນປາຣຸປນຸປຄໍ, ເອວຣູປໍ ຐເປຕ຺ວາ ປຎ຺ຈ ສຫຘມ຺ມິເກ ມາຕາປິຕໂຣ ຈ ຍສ຺ສ ກສ຺ສຈິ ຄຫຏ຺ຐສ຺ສ ວາ ປພ຺ພຊິຕສ຺ສ ວາ ປຣິຈ຺ຈຊິຕ຺ວາ ເທນ຺ຕິຍາ ປາຈິຕ຺ຕິຍໍ.

ສາວຕ຺ຖິຍໍ ຖຸລ຺ລນນ຺ທໍ ອາຣພ຺ຠ ອຄາຣິກສ຺ສ ສມຓຈີວຣທານວຕ຺ຖຸສ຺ມິໍ ປຎ຺ຎຕ຺ຕໍ, ຠິກ຺ຂຸໂນ ທຸກ຺ກຏໍ. ມາຕາປິຕູນໍ ປຣິຈ຺ຈຊິຕ຺ວາປິ, ອຎ຺ເຎສໍ ຕາວກາລິກເມວ ເທນ຺ຕິຍາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ສມຓຈີວຣຕາ, ຐເປຕ຺ວາ ສຫຘມ຺ມິເກ ຈ ມາຕາປິຕໂຣ ຈ ອຎ຺ເຎສໍ ທານໍ, ອຕາວກາລິກຕາຕິ ອິມາເນຕ຺ຖ ຕີຓິ ອງ຺ຄານິ. ສມຸຏ຺ຐານາທີນິ ສຎ຺ຈຣິຕ຺ຕສທິສານີຕິ.

ຈີວຣທານສິກ຺ຂາປທວຓ຺ຓນາ ນິຏ຺ຐິຕາ.

໙. ກາລອຕິກ຺ກມນສິກ຺ຂາປທວຓ຺ຓນາ

ນວເມ ທຸພ຺ພລຈີວຣປຈ຺ຈາສາຍາຕິ ທຸພ຺ພລາຍ ຈີວຣປຈ຺ຈາສາຍ, ‘‘ສເຈ ສກ຺ໂກມ ທສ຺ສາມາ’’ຕິ ເອຕ຺ຕກມຕ຺ຕໍ ສຸຕ຺ວາ ອຸປ຺ປາທິຕາຍ ອາສາຍາຕິ ອຕ຺ໂຖ. ຈີວຣກາລສມຍໍ ອຕິກ຺ກາເມຍ຺ຍາຕິ ວສ຺ສໍວຸຏ຺ຐຠິກ຺ຂຸນີຫິ ກາລຈີວເຣ ຠາຊິຍມາເນ ‘‘ອາຄເມຍ຺ຍາຖ, ອຍ຺ເຍ, ອຕ຺ຖິ ສງ຺ຆສ຺ສ ຈີວຣປຈ຺ຈາສາ’’ຕິ ວຕ຺ວາ ຕໍ ຈີວຣວິຠງ຺ຄໍ ຈີວຣກາລໍ ອຕິກ຺ກາເມຍ຺ຍ, ຕສ຺ສາ ອນຕ຺ຖເຕ ກຖິເນ ວສ຺ສານສ຺ສ ປຈ຺ຉິມມາສໍ, ອຕ຺ຖເຕ ກຖິເນ ກຖິນຸພ຺ຠາຣທິວສໍ ອຕິກ຺ກາເມນ຺ຕິຍາ ປາຈິຕ຺ຕິຍໍ.

ສາວຕ຺ຖິຍໍ ຖຸລ຺ລນນ຺ທໍ ອາຣພ຺ຠ ທຸພ຺ພລຈີວຣປຈ຺ຈາສາຍ ຈີວຣກາລສມຍໍ ອຕິກ຺ກມນວຕ຺ຖຸສ຺ມິໍ ປຎ຺ຎຕ຺ຕໍ, ທຸພ຺ພລຈີວເຣ ເວມຕິກາຍ, ອທຸພ຺ພລຈີວເຣ ທຸພ຺ພລຈີວຣສຎ຺ຎາຍ ເຈວ ເວມຕິກາຍ ຈ ທຸກ຺ກຏໍ. ອຸຠຍຕ຺ຖ ອທຸພ຺ພລຈີວຣສຎ຺ຎາຍ, ກິຎ຺ຈາປິ ‘ນ ສກ຺ໂກມາ’ຕິ ວທນ຺ຕິ, ‘‘ອິທານິ ປນ ເຕສໍ ກປ຺ປາໂສ ວາ ອຸປ຺ປຊ຺ຊິສ຺ສຕິ, ສທ຺ໂຘ ວາ ປຸຣິໂສ ອາຄມິສ຺ສຕິ, ຕສ຺ມິໍ ອາຄເຕ ອທ຺ຘາ ທສ຺ສນ຺ຕີ’’ຕິ ເອວໍ ອານິສໍສໍ ທສ຺ເສຕ຺ວາ ນິວາເຣນ຺ຕິຍາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ທຸພ຺ພລຈີວຣຕາ, ທຸພ຺ພລສຎ຺ຎິຕາ, ວິນາ ອານິສໍເສນ ນິວາຣຓນ຺ຕິ ອິມາເນຕ຺ຖ ຕີຓິ ອງ຺ຄານິ. ສມຸຏ຺ຐານາທີນິ ອທິນ຺ນາທານສທິສານີຕິ.

ກາລອຕິກ຺ກມນສິກ຺ຂາປທວຓ຺ຓນາ ນິຏ຺ຐິຕາ.

໑໐. ກຖິນຸທ຺ຘາຣສິກ຺ຂາປທວຓ຺ຓນາ

ທສເມ ຘມ຺ມິກໍ ກຖິນຸທ຺ຘາຣນ຺ຕິ ສພ຺ພາສໍ ຠິກ຺ຂຸນີນໍ ອກາລຈີວຣໍ ທາຕຸກາເມນ ອຸປາສເກນ ຍຕ຺ຕໂກ ອຕ຺ຖາຣມູລິໂກ ອານິສໍໂສ, ຕໂຕ ອຘິກໍ ວາ ສມກໍ ວາ ທຕ຺ວາ ຍາຈິເຕນ ສມຄ຺ເຄນ ຠິກ຺ຂຸນິສງ຺ເຆນ ຍໍ ກຖິນໍ ຎຕ຺ຕິທຸຕິຍກມ຺ເມນ ອນ຺ຕຣາ ອຸທ຺ຘຣີຍຕິ, ຕສ຺ສ ໂສ ອຸທ຺ຘາໂຣ ‘ຘມ຺ມິໂກ’ຕິ ວຸຈ຺ຈຕິ, ເອວຣູປໍ ກຖິນຸທ຺ຘາຣນ຺ຕິ ອຕ຺ໂຖ. ປຏິພາເຫຍ຺ຍາຕິ ນິວາເຣຍ຺ຍ, ຕສ຺ສ ເອວຣູປໍ ກຖິນຸທ຺ຘາຣໍ ນິວາເຣນ຺ຕິຍາ ປາຈິຕ຺ຕິຍໍ.

ສາວຕ຺ຖິຍໍ ຖຸລ຺ລນນ຺ທໍ ອາຣພ຺ຠ ກຖິນຸທ຺ຘາຣໍ ປຏິພາຫນວຕ຺ຖຸສ຺ມິໍ ປຎ຺ຎຕ຺ຕໍ, ເສສໍ ສຕ຺ຕເມ ວຸຕ຺ຕນເຍເນວ ເວທິຕພ຺ພນ຺ຕິ.

ກຖິນຸທ຺ຘາຣສິກ຺ຂາປທວຓ຺ຓນາ ນິຏ຺ຐິຕາ.

ນຄ຺ຄວຄ຺ໂຄ ຕຕິໂຍ.