໑. ລສຸຓວຄ຺ໂຄ

໑. ລສຸຓສິກ຺ຂາປທວຓ຺ຓນາ

ປາຈິຕ຺ຕິເຍສຸ ລສຸຓວຄ຺ຄສ຺ສ ຕາວ ປຐເມ ລສຸຓນ຺ຕິ ມຄຘຣຏ຺ເຐ ຊາຕໍ ອາມກໍ ຠຓ຺ຑິກລສຸຓເມວ, ນ ເອກທ຺ວິຕິມິຎ຺ຊກໍ. ຕຎ຺ຫິ ‘‘ຂາທິສ຺ສາມີ’’ຕິ ປຏິຄ຺ຄຓ຺ຫນ຺ຕິຍາ ທຸກ຺ກຏໍ, ອຊ຺ໂຌຫາເຣ ອຊ຺ໂຌຫາເຣ ປາຈິຕ຺ຕິຍໍ.

ສາວຕ຺ຖິຍໍ ຖຸລ຺ລນນ຺ທໍ ອາຣພ຺ຠ ລສຸຓໍ ຫຣາປນວຕ຺ຖຸສ຺ມິໍ ປຎ຺ຎຕ຺ຕໍ, ຕິກປາຈິຕ຺ຕິຍໍ, ອລສຸເຓ ທ຺ວິກທຸກ຺ກຏໍ. ຕສ຺ມິໍ ປນ ອລສຸຓສຎ຺ຎາຍ, ປລຓ຺ຑຸເກ, ຠຎ຺ຊນເກ, ຫຣິຕເກ, ຈາປລສຸເຓ, ສູປສມ຺ປາເກ, ມໍສສມ຺ປາເກ, ເຕລສມ຺ປາເກ, ສາຬເວ, ອຸຕ຺ຕຣິຠງ຺ເຄ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ອາມກລສຸຓຎ຺ເຈວ, ອຊ຺ໂຌຫຣຓຎ຺ຈາຕິ ອິມາເນຕ຺ຖ ທ຺ເວ ອງ຺ຄານິ. ສມຸຏ຺ຐານາທີນິ ເອຬກໂລມສທິສານີຕິ.

ລສຸຓສິກ຺ຂາປທວຓ຺ຓນາ ນິຏ຺ຐິຕາ.

໒. ສມ຺ພາຘໂລມສິກ຺ຂາປທວຓ຺ຓນາ

ທຸຕິເຍ ສມ຺ພາເຘຕິ ປຏິຈ຺ຉນ຺ໂນກາເສ, ອຸປກຈ຺ຉເກສຸ ຈ ມຸຕ຺ຕກຣເຓ ຈາຕິ ອຕ຺ໂຖ. ສໍຫຣາເປຍ຺ຍາຕິ ເອຕ຺ຖ ຂຸຣສຓ຺ຑາສກຕ຺ຕຣິອາທີສຸ ເຍນ ເກນຈິ ສໍຫຣາເປນ຺ຕິຍາ ປໂຍຄຄຓນາຍ ປາຈິຕ຺ຕິຍໍ, ນ ໂລມຄຓນາຍ.

ສາວຕ຺ຖິຍໍ ຉພ຺ພຄ຺ຄິຍາ ຠິກ຺ຂຸນິໂຍ ອາຣພ຺ຠ ສມ຺ພາເຘ ໂລມໍ ສໍຫຣາປນວຕ຺ຖຸສ຺ມິໍ ປຎ຺ຎຕ຺ຕໍ, ອຕ຺ຕໂນ ອຕ຺ຖາຍ ອຎ຺ຎໍ ອາຓາເປນ຺ຕິຍາ ສາຓຕ຺ຕິກໍ, ອາປຕ຺ຕິເຠໂທນຕ຺ຖິ. ອາພາຘປຈ຺ຈຍາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ອາພາຘາຠາໂວ, ສມ຺ພາເຘ ໂລມສໍຫຣຓນ຺ຕິ ອິມາເນຕ຺ຖ ທ຺ເວ ອງ຺ຄານິ. ສມຸຏ຺ຐານາທີນິ ຠິກ຺ຂຸນິຍາ ສທ຺ຘິໍ ເອກທ຺ຘານມຄ຺ຄຄມນສິກ຺ຂາປທສທິສານີຕິ.

ສມ຺ພາຘໂລມສິກ຺ຂາປທວຓ຺ຓນາ ນິຏ຺ຐິຕາ.

໓. ຕລຆາຕກສິກ຺ຂາປທວຓ຺ຓນາ

ຕຕິເຍ ຕລຆາຕເກຕິ ອນ຺ຕມໂສ ອຸປ຺ປລເກສເຣນາປິ ມຸຕ຺ຕກຣຓສ຺ສ ຕລຆາຕເນ ມຸຕ຺ຕກຣຓມ຺ຫິ ປຫາຣທາເນ ປາຈິຕ຺ຕິຍນ຺ຕິ ອຕ຺ໂຖ.

ສາວຕ຺ຖິຍໍ ທ຺ເວ ຠິກ຺ຂຸນິໂຍ ອາຣພ຺ຠ ຕລຆາຕກຣຓວຕ຺ຖຸສ຺ມິໍ ປຎ຺ຎຕ຺ຕໍ, ປຸຣິມນເຍເນວ ສາຓຕ຺ຕິກໍ, ອາປຕ຺ຕິເຠໂທ ນຕ຺ຖິ. ອິໂຕ ປຣໍ ປນ ຍຕ຺ຖ ນຕ຺ຖິ, ຕຕ຺ຖ ອວຕ຺ວາວ ຄມິສ຺ສາມ. ອາພາຘປຈ຺ຈຍາ ຄຓ຺ຑໍ ວາ ວຓໍ ວາ ປຫຣນ຺ຕິຍາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ອາພາຘາຠາໂວ, ມຸຕ຺ຕກຣເຓ ປຫາຣທານໍ, ຜສ຺ສສາທິຍນນ຺ຕິ ອິມາເນຕ຺ຖ ຕີຓິ ອງ຺ຄານິ. ສມຸຏ຺ຐານາທີນິ ປຐມປາຣາຊິກສທິສານີຕິ.

ຕລຆາຕກສິກ຺ຂາປທວຓ຺ຓນາ ນິຏ຺ຐິຕາ.

໔. ຊຕຸມຏ຺ຐກສິກ຺ຂາປທວຓ຺ຓນາ

ຈຕຸຕ຺ເຖ ຊຕຸມຏ຺ຐເກຕິ ຊຕຸນາ ກເຕ ມຏ຺ຐທຓ຺ຑເກ. ວຕ຺ຖຸວເສເນຕໍ ວຸຕ຺ຕໍ, ກາມຣາເຄນ ປນ ອຸປ຺ປລເກສຣມ຺ປິ ປເວເສນ຺ຕິຍາ ອາປຕ຺ຕິ.

ສາວຕ຺ຖິຍໍ ອຎ຺ຎຕຣໍ ຠິກ຺ຂຸນິໍ ອາຣພ຺ຠ ຊຕຸມຏ຺ຐກສາທິຍນວຕ຺ຖຸສ຺ມິໍ ປຎ຺ຎຕ຺ຕໍ, ເສສໍ ຕຕິຍສທິສເມວາຕິ.

ຊຕຸມຏ຺ຐກສິກ຺ຂາປທວຓ຺ຓນາ ນິຏ຺ຐິຕາ.

໕. ອຸທກສຸທ຺ຘິກສິກ຺ຂາປທວຓ຺ຓນາ

ປຎ຺ຈເມ ອຸທກສຸທ຺ຘິກນ຺ຕິ ມຸຕ຺ຕກຣຓສ຺ສ ໂຘວນໍ. ອາທິຍມານາຍາຕິ ກໂຣນ຺ຕິຍາ. ທ຺ວງ຺ຄຸລປພ຺ພປຣມໍ ອາທາຕພ຺ພນ຺ຕິ ທ຺ວີສຸ ອງ຺ຄຸລີສຸ ເອເກກໍ ກຕ຺ວາ ທ຺ວງ຺ຄຸລປພ຺ພປຣມໍ ອາທາຕພ຺ພໍ. ຕໍ ອຕິກ຺ກາເມນ຺ຕິຍາຕິ ສເຈ ໂຘວນກາເລ ຣາຄວເສນ ວິຕ຺ຖາຣໂຕ ຕຕິຍາຍ ອງ຺ຄຸລິຍາ ອຄ຺ຄປພ຺ພໍ, ຄມ຺ຠີຣໂຕ ເອກິສ຺ສາວ ອງ຺ຄຸລິຍາ ຕຕິຍປພ຺ພໍ ປເວເສຕິ ປາຈິຕ຺ຕິຍໍ.

ສກ຺ເກສຸ ອຎ຺ຎຕຣໍ ຠິກ຺ຂຸນິໍ ອາຣພ຺ຠ ອຕິຄມ຺ຠີຣໍ ອຸທກສຸທ຺ຘິກໍ ອາທິຍນວຕ຺ຖຸສ຺ມິໍ ປຎ຺ຎຕ຺ຕໍ, ຕິກປາຈິຕ຺ຕິຍໍ, ອູນກທ຺ວງ຺ຄຸລປພ຺ເພ ທ຺ວິກທຸກ຺ກຏໍ. ຕສ຺ມິໍ ປນ ອູນກສຎ຺ຎາຍ, ທ຺ວງ຺ຄຸລປພ຺ພປຣມໍ ອາທິຍນ຺ຕິຍາ, ອາພາຘປຈ຺ຈຍາ ອຕິເຣກມ຺ປິ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ, ເສສໍ ຕຕິຍສທິສເມວາຕິ.

ອຸທກສຸທ຺ຘິກສິກ຺ຂາປທວຓ຺ຓນາ ນິຏ຺ຐິຕາ.

໖. ອຸປຕິຏ຺ຐນສິກ຺ຂາປທວຓ຺ຓນາ

ຉຏ຺ເຐ ຠຸຎ຺ຊນ຺ຕສ຺ສາຕິ ປຎ຺ຈນ຺ນໍ ໂຠຊນານໍ ອຎ຺ຎຕຣໍ ຠຸຎ຺ຊໂຕ. ປານີເຍນາຕິ ສຸທ຺ເຘນ ວາ ອຸທເກນ, ຕກ຺ກາທີສຸ ວາ ອຎ຺ຎຕເຣນ. ວິຘູປເນນາຕິ ຍາຍ ກາຍຈິ ພີຊນິຍາ. ອຸປຕິຏ຺ເຐຍ຺ຍາຕິ ຍາ ເອເຕສຸ ທ຺ວີສຸ ອຎ຺ຎຕຣໍ ຄເຫຕ຺ວາ ຫຕ຺ຖປາເສ ຕິຏ຺ຐຕິ, ຕສ຺ສາ ປາຈິຕ຺ຕິຍໍ.

ສາວຕ຺ຖິຍໍ ອຎ຺ຎຕຣໍ ຠິກ຺ຂຸນິໍ ອາຣພ຺ຠ ຠຸຎ຺ຊນ຺ຕສ຺ສ ເອວໍ ຕິຏ຺ຐນວຕ຺ຖຸສ຺ມິໍ ປຎ຺ຎຕ຺ຕໍ, ຕິກປາຈິຕ຺ຕິຍໍ, ຫຕ຺ຖປາສໍ ວິຊຫິຕ຺ວາ ຂາທນີຍໍ ຂາທນ຺ຕສ຺ສ ອຸປຕິຏ຺ຐນ຺ຕິຍາ ທຸກ຺ກຏໍ, ອນຸປສມ຺ປນ຺ເນ ຕິກທຸກ຺ກຏໍ. ‘‘ອິມໍ ປິວຖ, ອິມິນາ ພີຊຖາ’’ຕິ ເອວໍ ເທນ຺ຕິຍາ ວາ, ທາເປນ຺ຕິຍາ ວາ, ອນຸປສມ຺ປນ຺ນໍ ວາ ອຸປຕິຏ຺ຐາປນຕ຺ຖໍ ອາຓາເປນ຺ຕິຍາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ຠຸຎ຺ຊນ຺ຕສ຺ສ ຠິກ຺ຂຸໂນ ຫຕ຺ຖປາເສ ຐານໍ, ປານີຍສ຺ສ ວາ ວິຘູປນສ຺ສ ວາ ຄຫຓນ຺ຕິ ອິມາເນຕ຺ຖ ທ຺ເວ ອງ຺ຄານິ. ສມຸຏ຺ຐານາທີນິ ເອຬກໂລມສທິສານີຕິ.

ອຸປຕິຏ຺ຐນສິກ຺ຂາປທວຓ຺ຓນາ ນິຏ຺ຐິຕາ.

໗. ອາມກຘຎ຺ຎສິກ຺ຂາປທວຓ຺ຓນາ

ສຕ຺ຕເມ ວິຎ຺ຎຕ຺ວາຕິ ອນ຺ຕມໂສ ມາຕຣມ຺ປິ ຍາຈິຕ຺ວາ. ຠຸຎ຺ເຊຍ຺ຍາຕິ ອຊ຺ໂຌຫເຣຍ຺ຍ. ເອຕ຺ຖ ຈ ວິຎ຺ຎຕ຺ຕິ ເຈວ ໂຠຊນຎ຺ຈ ປມາຓໍ, ຕສ຺ມາ ສຍໍ ວິຎ຺ຎຕ຺ວາ ອຎ຺ຎາຍ ຠຊ຺ຊນາທີນິ ກາຣາເປຕ຺ວາ ວາ, ອຎ຺ຎາຍ ວິຎ຺ຎາເປຕ຺ວາ ສຍໍ ຠຊ຺ຊນາທີນິ ກຕ຺ວາ ວາ ປຏິຄ຺ຄຫຓໂຕ ປຏ຺ຐາຍ ຍາວ ທນ຺ເຕຫິ ສໍຂາທນໍ, ຕາວ ປຸພ຺ພປ຺ປໂຍເຄສຸ ທຸກ຺ກຏານິ, ອຊ຺ໂຌຫາເຣ ອຊ຺ໂຌຫາເຣ ປາຈິຕ຺ຕິຍໍ.

ສາວຕ຺ຖິຍໍ ສມ຺ພຫຸລາ ຠິກ຺ຂຸນິໂຍ ອາຣພ຺ຠ ອາມກຘຎ຺ຎໍ ວິຎ຺ຎາປນວຕ຺ຖຸສ຺ມິໍ ປຎ຺ຎຕ຺ຕໍ, ສຍໍ ວາ ອຎ຺ຎາຍ ວາ ອວິຎ຺ຎຕ຺ຕິຍາ ລທ຺ຘໍ ຠຊ຺ຊນາທີນິ ກຕ຺ວາ ວາ ກາເຣຕ຺ວາ ວາ ຠຸຎ຺ຊນ຺ຕິຍາ ທຸກ຺ກຏໍ, ອຎ຺ຎາຍ ວິຎ຺ຎຕ຺ຕິຍາ ລທ຺ຘໍ ປນ ສຍໍ ຠຊ຺ຊນາທີນິ ກຕ຺ວາປິ ກາເຣຕ຺ວາປິ ຠຸຎ຺ຊນ຺ຕິຍາ ທຸກ຺ກຏເມວ. ອາພາເຘ ສຕິ ເສທກມ຺ມາທີນໍ ອຕ຺ຖາຍ ວິຎ຺ຎາເປນ຺ຕິຍາ, ອວິຎ຺ຎຕ຺ຕິຍາ ລພ຺ຠມານໍ ນວກມ຺ມຕ຺ຖາຍ ສມ຺ປຏິຈ຺ຉນ຺ຕິຍາ, ຎາຕກປ຺ປວາຣິຕຏ຺ຐາເນ ມຸຄ຺ຄມາສາທິອປຣຓ຺ຓໍ ວິຎ຺ຎາເປນ຺ຕິຍາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ສຕ຺ຕນ຺ນໍ ຘຎ຺ຎານໍ ອຎ຺ຎຕຣສ຺ສ ວິຎ຺ຎາປນໍ ວາ ວິຎ຺ຎາປາປນໍ ວາ, ປຏິລາໂຠ, ຠຊ຺ຊນາທີນິ ກຕ຺ວາ ວາ ກາເຣຕ຺ວາ ວາ ອຊ຺ໂຌຫຣຓນ຺ຕິ ອິມາເນຕ຺ຖ ຕີຓິ ອງ຺ຄານິ. ສມຸຏ຺ຐານາທີນິ ອທ຺ຘານມຄ຺ຄສິກ຺ຂາປທສທິສານີຕິ.

ອາມກຘຎ຺ຎສິກ຺ຂາປທວຓ຺ຓນາ ນິຏ຺ຐິຕາ.

໘. ປຐມອຸຈ຺ຈາຣຉຑ຺ຑນສິກ຺ຂາປທວຓ຺ຓນາ

ອຏ຺ຐເມ ສງ຺ກາຣນ຺ຕິ ກຈວຣໍ. ວິຆາສນ຺ຕິ ຍໍກິຎ຺ຈິ ປຣິຠຸຕ຺ຕາວເສສໍ ອຸຈ຺ຉິຏ຺ໂຐທກມ຺ປິ ທນ຺ຕກຏ຺ຐມ຺ປິ, ອຏ຺ຐິກຈລເກສຸ ປນ ວຕ຺ຕພ຺ພເມວ ນຕ຺ຖິ. ຕິໂຣກຸຏ຺ເຏ ວາ ຕິໂຣປາກາເຣ ວາຕິ ຍສ຺ສກສ຺ສຈິ ກຸຏ຺ຏສ຺ສ ວາ ປາກາຣສ຺ສ ວາ ປຣໂຕ. ຉຑ຺ເຑຍ຺ຍ ວາ ຉຑ຺ຑາເປຍ຺ຍ ວາຕິ ສພ຺ພານິເປຕານິ ເອກໂຕ ຉຑ຺ເຑນ຺ຕິຍາ ເອກປ຺ປໂຍເຄ ເອກາປຕ຺ຕິ, ສກິໍ ອາຓຕ຺ຕິຍາ ພຫຸເກປິ ຉຑ຺ຑິເຕ ເອກາວ.

ສາວຕ຺ຖິຍໍ ອຎ຺ຎຕຣໍ ຠິກ຺ຂຸນິໍ ອາຣພ຺ຠ ອຸຈ຺ຈາຣໍ ຕິໂຣກຸຏ຺ເຏ ຉຑ຺ຑນວຕ຺ຖຸສ຺ມິໍ ປຎ຺ຎຕ຺ຕໍ, ສາຓຕ຺ຕິກໍ, ຠິກ຺ຂຸສ຺ສ ທຸກ຺ກຏໍ, ໂອໂລເກຕ຺ວາ ວາ ອວລຎ຺ເຊ ວາ ຉຑ຺ເຑນ຺ຕິຍາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ອຸຈ຺ຈາຣາທິຠາໂວ, ອໂນໂລກນໍ, ວລຎ຺ຊນຏ຺ຐານໍ, ຕິໂຣກຸຏ຺ຏຕິໂຣປາກາຣຕາ, ຉຑ຺ຑນໍ ວາ ຉຑ຺ຑາປນໍ ວາຕິ ອິມາເນຕ຺ຖ ປຎ຺ຈ ອງ຺ຄານິ. ສມຸຏ຺ຐານາທີນິ ສຎ຺ຈຣິຕ຺ຕສທິສານິ, ອິທໍ ປນ ກິຣິຍາກິຣິຍນ຺ຕິ.

ປຐມອຸຈ຺ຈາຣຉຑ຺ຑນສິກ຺ຂາປທວຓ຺ຓນາ ນິຏ຺ຐິຕາ.

໙. ທຸຕິຍອຸຈ຺ຈາຣຉຑ຺ຑນສິກ຺ຂາປທວຓ຺ຓນາ

ນວເມ ຫຣິເຕຕິ ເຂຕ຺ເຕ ວາ ນາຬິເກຣາທິອາຣາເມ ວາ ຍຕ຺ຖກຕ຺ຖຈິ ໂຣປິມຫຣິຕຏ຺ຐາເນ. ຕານິ ວຕ຺ຖູນິ ຉຑ຺ເຑນ຺ຕິຍາ ວາ ຉຑ຺ຑາເປນ຺ຕິຍາ ວາ ປຸຣິມນເຍເນວ ອາປຕ຺ຕິ, ຕາທິເສ ຐາເນ ນິສີທິຕ຺ວາ ອນ຺ຕມໂສ ອຸທກໍ ປິວິຕ຺ວາ ມຕ຺ຖກຈ຺ຉິນ຺ນໍ ນາຬິເກຣມ຺ປິ ຉຑ຺ເຑນ຺ຕິຍາ ອາປຕ຺ຕິເຍວ.

ສາວຕ຺ຖິຍໍ ສມ຺ພຫຸລາ ຠິກ຺ຂຸນິໂຍ ອາຣພ຺ຠ ອຸຈ຺ຈາຣາທີນິ ຫຣິເຕ ຉຑ຺ຑນວຕ຺ຖຸສ຺ມິໍ ປຎ຺ຎຕ຺ຕໍ, ສາຓຕ຺ຕິກໍ, ຕິກປາຈິຕ຺ຕິຍໍ, ຠິກ຺ຂຸໂນ ທຸກ຺ກຏໍ, ຠິກ຺ຂຸນິຍາປິ ນິກ຺ຂິຕ຺ຕພີເຊ ເຂຕ຺ເຕ ຍາວ ອງ຺ກຸໂຣ ນ ອຸຏ຺ຐຫຕິ, ຕາວ ທຸກ຺ກຏໍ, ອຫຣິເຕ ທ຺ວິກທຸກ຺ກຏໍ. ຕສ຺ມິໍ ປນ ອຫຣິຕສຎ຺ຎາຍ ຉຑ຺ຑິຕເຂຕ຺ເຕ ວາ, ສາມິເກ ອປໂລເກຕ຺ວາ ວາ ຉຑ຺ເຑນ຺ຕິຍາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ເສສໍ ອຏ຺ຐມສທິສເມວາຕິ.

ທຸຕິຍອຸຈ຺ຈາຣຉຑ຺ຑນສິກ຺ຂາປທວຓ຺ຓນາ ນິຏ຺ຐິຕາ.

໑໐. ນຈ຺ຈຄີຕສິກ຺ຂາປທວຓ຺ຓນາ

ທສເມ ນຈ຺ຈນ຺ຕິ ອນ຺ຕມໂສ ໂມຣນຈ຺ຈມ຺ປິ. ຄີຕນ຺ຕິ ອນ຺ຕມໂສ ຘມ຺ມຠາຓກຄີຕມ຺ປິ. ວາທິຕນ຺ຕິ ອນ຺ຕມໂສ ອຸທກເຠຣິວາທິຕມ຺ປິ. ທສ຺ສນາຍາຕິ ເອເຕສຸ ຍໍກິຎ຺ຈິ ທສ຺ສນາຍ ຄຈ຺ຉນ຺ຕິຍາ ປເທ ປເທ ທຸກ຺ກຏໍ, ຍຕ຺ຖ ຐິຕາ ປສ຺ສຕິ ວາ ສຸຓາຕິ ວາ, ເອກປ຺ປໂຍເຄ ເອກາປຕ຺ຕິ, ຕໍ ຕໍ ທິສໍ ໂອໂລເກນ຺ຕິຍາ ປໂຍເຄ ປໂຍເຄ ອາປຕ຺ຕິ.

ຣາຊຄເຫ ຉພ຺ພຄ຺ຄິຍາ ຠິກ຺ຂຸນິໂຍ ອາຣພ຺ຠ ນຈ຺ຈາທີນິ ທສ຺ສນາຍ ຄມນວຕ຺ຖຸສ຺ມິໍ ປຎ຺ຎຕ຺ຕໍ, ສຍໍ ຕານິ ວຕ຺ຖູນິ ກໂຣນ຺ຕິຍາ, ອຎ຺ຎໍ ວາ ອາຓາເປນ຺ຕິຍາ, ‘‘ເຈຕິຍສ຺ສ ອຸປຫາຣໍ ເທຖາ’’ຕິ ອີທິເສນ ປຣິຍາເຍນ ວາ ຠຓນ຺ຕິຍາ, ‘‘ເຈຕິຍສ຺ສ ອຸປຫາຣໍ ກໂຣມາ’’ຕິ ວາ ວຸຕ຺ເຕ ‘‘ສາຘູ’’ຕິ ສມ຺ປຏິຈ຺ຉນ຺ຕິຍາ ຈ ປາຈິຕ຺ຕິຍເມວາຕິ ສພ຺ພອຏ຺ຐກຖາສຸ (ປາຈິ. ອຏ຺ຐ. ໘໓໕-໘໓໗) ວຸຕ຺ຕໍ, ຠິກ຺ຂຸໂນ ສພ຺ພຕ຺ຖ ທຸກ຺ກຏໍ. ‘‘ຕຸມ຺ຫາກໍ ເຈຕິຍສ຺ສ ອຸປຏ຺ຐານໍ ກໂຣມາ’’ຕິ ວຸຕ຺ເຕ ປນ ‘‘ອຸປຏ຺ຐານກຣຓໍ ນາມ ສຸນ຺ທຣ’’ນ຺ຕິ ອີທິສໍ ປຣິຍາຍໍ ຠຓນ຺ຕິຍາ, ອາຣາເມ ຐຕ຺ວາ ປສ຺ສນ຺ຕິຍາ ວາ ສຸຓນ຺ຕິຍາ ວາ, ຕຖາ ອຕ຺ຕໂນ ຐິໂຕກາສໍ ອາຄນ຺ຕ຺ວາ ປໂຍຊິຕໍ ປຏິປຖໍ ຄຈ຺ຉນ຺ຕິຍາ ສມ຺ມຸຂີຠູຕໍ ສລາກຠຕ຺ຕາທິເກ ສຕິ ກຣຓີເຍ ຄນ຺ຕ຺ວາ, ອາປທາສຸ ວາ ສມຊ຺ຊຏ຺ຐານໍ ປວິສິຕ຺ວາປິ ປສ຺ສນ຺ຕິຍາ ວາ ສຸຓນ຺ຕິຍາ ວາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ນຈ຺ຈາທີນໍ ອຎ຺ຎຕຣຕາ, ອຎ຺ຎຕ຺ຣ ອນຸຎ຺ຎາຕກາຣຓາ ຄມນໍ, ທສ຺ສນໍ ວາ ສວນໍ ວາຕິ ອິມາເນຕ຺ຖ ຕີຓິ ອງ຺ຄານິ. ສມຸຏ຺ຐານາທີນິ ເອຬກໂລມສທິສານິ, ອິທໍ ປນ ໂລກວຊ຺ຊໍ, ອກຸສລຈິຕ຺ຕໍ, ຕິເວທນນ຺ຕິ.

ນຈ຺ຈຄີຕສິກ຺ຂາປທວຓ຺ຓນາ ນິຏ຺ຐິຕາ.

ລສຸຓວຄ຺ໂຄ ປຐໂມ.