ອຘິຈ຺ຈສມຸປ຺ປນ຺ນວາທວຓ຺ຓນາ

໖໗. ອຘິຈ຺ຈ ຍທິຈ຺ຉກໍ ຍໍ ກິຎ຺ຈິ ກາຣຓໍ, ກສ຺ສຈິ ວຸທ຺ຘິປຸພ຺ພໍ ວາ ວິນາ ສມຸປ຺ປນ຺ໂນຕິ ອຕ຺ຕໂລກສຎ຺ຎິຕານໍ ຂນ຺ຘານໍ ອຘິຈ຺ຈຸປ຺ປຕ຺ຕິອາກາຣາຣມ຺ມຓໍ ທສ຺ສນໍ ຕທາກາຣສນ຺ນິສ຺ສເຍນ ປວຕ຺ຕິໂຕ, ຕທາກາຣສຫຈຣິຕຕາຍ ຈ ‘‘ອຘິຈ຺ຈສມຸປ຺ປນ຺ນ’’ນ຺ຕິ ວຸຈ຺ຈຕິ ຍຖາ ‘‘ມຎ຺ຈາ ໂຆສນ຺ຕິ, ກຸນ຺ຕາ ປຈຣນ຺ຕີ’’ຕິ ຈ ອິມມຕ຺ຖໍ ທສ຺ເສນ຺ໂຕ ອາຫ ‘‘ອຘິຈ຺ຈສມຸປ຺ປນ຺ໂນ ອຕ຺ຕາ ຈ ໂລໂກ ຈາຕິ ທສ຺ສນໍ ອຘິຈ຺ຈສມຸປ຺ປນ຺ນ’’ນ຺ຕິ.

໖໘-໗໓. ເທສນາສີສນ຺ຕິ ເທສນາຍ ເຊຏ຺ຐກຠາເວນ ຄຫຓໍ, ເຕນ ສຎ຺ຎໍເຍວ ຘຸຣໍ ກຕ຺ວາ ຠຄວຕາ ອຍໍ ເທສນາ ກຕາ, ນ ປນ ຕຕ຺ຖ ອຎ຺ເຎສໍ ອຣູປຘມ຺ມານໍ ອຕ຺ຖິຠາວໂຕຕິ ທສ຺ເສຕິ. ເຕເນວາຫ ‘‘ອຈິຕ຺ຕຸປ຺ປາທາ’’ຕິອາທິ. ຠຄວາ ຫິ ຍຖາ ໂລກຸຕ຺ຕຣຘມ຺ມໍ ເທເສນ຺ໂຕ ສມາຘິໍ ປຎ຺ຎໍ ວາ ຘຸຣໍ ກໂຣຕິ, ເອວໍ ໂລກິຍຘມ຺ມໍ ເທເສນ຺ໂຕ ຈິຕ຺ຕໍ ສຎ຺ຎໍ ວາ ຘຸຣໍ ກໂຣຕິ. ຕຕ຺ຖ ‘‘ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ (ຘ. ສ. ໒໗໗) ປຎ຺ຈງ຺ຄິໂກ ສມ຺ມາສມາຘິ [ທີ. ນິ. ໓.໓໕໕ (ຂ)] ປຎ຺ຈຎາຓິໂກ ສມ຺ມາສມາຘິ, [ທີ. ນິ. ໓.໓໕໕ (ຊ); ວິຠ. ໒.໘໐໔] ປຎ຺ຎາຍ ຈສ຺ສ ທິສ຺ວາ ອາສວາ ປຣິກ຺ຂີຓາ ໂຫນ຺ຕີ’’ຕິ (ມ. ນິ. ໑.໒໗໑) ຕຖາ ‘‘ຍສ຺ມິໍ ສມເຍ ກາມາວຈຣໍ ກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ, (ຘ. ສ. ໑) ກິໍຈິຕ຺ໂຕ ຕ຺ວໍ ຠິກ຺ຂຸ (ປາຣາ. ໑໔໖, ໑໘໐) ມໂນປຸພ຺ພງ຺ຄມາ ຘມ຺ມາ, (ຘ. ປ. ໑, ໒; ເນຕ຺ຕິ. ໙໐; ເປຏໂກ. ໘໓) ສນ຺ຕິ ຠິກ຺ຂເວ ສຕ຺ຕາ ນານຕ຺ຕກາຍາ ນານຕ຺ຕສຎ຺ຎິໂນ, (ທີ. ນິ. ໓.໓໓໒, ໓໔໒, ໓໕໗; ອ. ນິ. ໙.໒໔; ຈູຬນິ. ໘໓) ນ ເນວສຎ຺ຎານາສຎ຺ຎາຍຕນ’’ນ຺ຕິອາທີນິ ສຸຕ຺ຕານິ (ທີ. ນິ. ໓.໓໕໘) ເອຕສ຺ສ ອຕ຺ຖສ຺ສ ສາຘການິ ທຏ຺ຐພ຺ພານິ. ຕິຕ຺ຖາຍຕເນຕິ ອຎ຺ຎຕິຕ຺ຖິຍສມເຍ. ຕິຕ຺ຖິຍາ ຫິ ອຸປປຕ຺ຕິວິເສເສ ວິມຸຕ຺ຕິສຎ຺ຎິໂນ, ສຎ຺ຎາວິຣາຄາວິຣາເຄສຸ ອາທີນວານິສໍສທສ຺ສິໂນ ວາ ຫຸຕ຺ວາ ອສຎ຺ຎສມາປຕ຺ຕິໍ ນິພ຺ພຕ຺ເຕຕ຺ວາ ອກ຺ຂຓຠູມິຍໍ ອຸປ຺ປຊ຺ຊນ຺ຕິ, ນ ສາສນິກາ. ວາໂຍກສິເຓ ປຣິກມ຺ມໍ ກຕ຺ວາຕິ ວາໂຍກສິເຓ ປຐມາທີນິ ຕີຓິ ຌານານິ ນິພ຺ພຕ຺ເຕຕ຺ວາ ຕຕິຍຊ຺ຌາເນ ຈິຓ຺ຓວສີ ຫຸຕ຺ວາ ຕໂຕ ວຸຏ຺ຐາຍ ຈຕຸຕ຺ຖຊ຺ຌານາຘິຄມາຍ ປຣິກມ຺ມໍ ກຕ຺ວາ. ເຕເນວາຫ ‘‘ຈຕຸຕ຺ຖຊ຺ຌານໍ ນິພ຺ພຕ຺ເຕຕ຺ວາ’’ຕິ.

ກສ຺ມາ ປເນຕ຺ຖ ວາໂຍກສິເຓເຍວ ປຣິກມ຺ມໍ ວຸຕ຺ຕນ຺ຕິ? ວຸຈ຺ຈເຕ – ຍເຖວ ຫິ ຣູປປຏິຠາຄຠູເຕສຸ ກສິຓວິເສເສສຸ ຣູປວິຠາວເນນ ຣູປວິຣາຄຠາວນາສງ຺ຂາໂຕ ອຣູປສມາປຕ຺ຕິວິເສໂສ ສຈ຺ຉິກຣີຍຕິ, ເອວໍ ອປຣິພ຺ຍຕ຺ຕວິຄ຺ຄຫຕາຍ ອຣູປປຏິຠາຄຠູເຕ ກສິຓວິເສເສ ອຣູປວິຠາວເນນ ອຣູປວິຣາຄຠາວນາສງ຺ຂາໂຕ ຣູປສມາປຕ຺ຕິວິເສໂສ ອຘິຄມີຍຕີຕິ ເອຕ຺ຖ ‘‘ສຎ຺ຎາ ໂຣໂຄ ສຎ຺ຎາ ຄຓ຺ໂຑ’’ຕິອາທິນາ (ມ. ນິ. ໓.໒໔) ‘‘ຘິ ຈິຕ຺ຕໍ, ຘິພ຺ພເຕ ຕໍ ຈິຕ຺ຕ’’ນ຺ຕິອາທິນາ ຈ ນເຍນ ອຣູປປ຺ປວຕ຺ຕິຍາ ອາທີນວທສ຺ສເນນ, ຕທຠາເວ ຈ ສນ຺ຕປຓີຕຠາວສນ຺ນິຏ຺ຐາເນນ ຣູປສມາປຕ຺ຕິຍາ ອຠິສງ຺ຂຣຓໍ, ຣູປວິຣາຄຠາວນາ ປນ ສທ຺ຘິໍ ອຸປຈາເຣນ ອຣູປສມາປຕ຺ຕິໂຍ, ຕຕ຺ຖາປິ ວິເສເສນ ປຐມາຣຸປ຺ປຊ຺ຌານໍ. ຍທິ ເອວໍ ‘‘ປຣິຈ຺ຉິນ຺ນາກາສກສິເຓປີ’’ຕິ ວຕ຺ຕພ຺ພໍ. ຕສ຺ສາປິ ຫິ ອຣູປປຏິຠາຄຕາ ລພ຺ຠຕີຕິ? ອິຈ຺ຉິຕເມເວຕໍ ເກສຎ຺ຈິ ອວຈນໍ ປເນຕ຺ຖ ປຸພ຺ພາຈຣິເຍຫິ ອຄ຺ຄຫິຕຠາເວນ. ຍຖາ ຫິ ຣູປວິຣາຄຠາວນາ ວິຣຊ຺ຊນີຍຘມ຺ມຠາວມຕ຺ເຕນ ປຣິນິປ຺ຜນ຺ນາ, ວິຣຊ຺ຊນີຍຘມ຺ມປຏິຠາຄຠູເຕ ຈ ວິສຍວິເສເສ ປາຕຸຠວຕິ, ເອວໍ ອຣູປວິຣາຄຠາວນາປີຕິ ວຸຈ຺ຈມາເນ ນ ໂກຈິ ວິໂຣໂຘ, ຕິຕ຺ຖິເຍເຫວ ປນ ຕສ຺ສາ ສມາປຕ຺ຕິຍາ ປຏິປຊ຺ຊິຕພ຺ພຕາຍ, ເຕສຎ຺ຈ ວິສຍປເຖສຸປນິພນ຺ຘນສ຺ເສວ ຕສ຺ສ ຌານສ຺ສ ປຏິປຕ຺ຕິໂຕ ທິຏ຺ຐິວນ຺ເຕຫິ ປຸພ຺ພາຈຣິເຍຫິ ຈຕຸຕ຺ເຖເຍວ ຠູຕກສິເຓ ອຣູປວິຣາຄຠາວນາປຣິກມ຺ມໍ ວຸຕ຺ຕນ຺ຕິ ທຏ຺ຐພ຺ພໍ. ກິຎ຺ຈ ວຓ຺ຓກສິເຓສຸ ວິຍ ປຸຣິມຠູຕກສິຓຕ຺ຕເຍປິ ວຓ຺ຓປຏິຈ຺ຉາຍາວ ປຓ຺ຓຕ຺ຕິ ອາຣມ຺ມຓໍ ຌານສ຺ສ ໂລກໂວຫາຣານຸໂຣເຘເນວ ປວຕ຺ຕິໂຕ. ເອວຎ຺ຈ ກຕ຺ວາ ວິສຸທ຺ຘິມຄ຺ເຄ (ວິສຸທ຺ຘິ. ໑.໕໗) ປຖວີກສິຓສ຺ສ ອາທາສຈນ຺ທມຓ຺ຑລູປມາວຈນຎ຺ຈ ສມຕ຺ຖິຕໍ ໂຫຕິ, ຈຕຸຕ຺ຖໍ ປນ ຠູຕກສິຓໍ ຠູຕປ຺ປຏິຈ຺ຉາຍເມວ ຌານສ຺ສ ໂຄຈຣຠາວໍ ຄຈ຺ຉຕີຕິ ຕສ຺ເສວ ອຣູປປຏິຠາຄຕາ ຍຸຕ຺ຕາຕິ ວາໂຍກສິເຓເຍວ ປຣິກມ຺ມໍ ວຸຕ຺ຕນ຺ຕິ ເວທິຕພ຺ພໍ.

ອິເຘວາຕິ ປຎ຺ຈໂວກາຣຠເວເຍວ. ຕຕ຺ຖາຕິ ອສຎ຺ຎຠເວ. ຍທິ ຣູປກ຺ຂນ຺ຘມຕ຺ຕເມວ ອສຎ຺ຎຠເວ ປາຕຸຠວຕິ, ກຖມຣູປສນ຺ນິສ຺ສເຍນ ວິນາ ຕຕ຺ຖ ຣູປໍ ປວຕ຺ຕຕິ, ກຖໍ ປນ ຣູປສນ຺ນິສ຺ສເຍນ ວິນາ ອຣູປຘາຕຸຍໍ ອຣູປໍ ປວຕ຺ຕຕິ, ອິທມ຺ປິ ເຕນ ສມານຊາຕິຍເມວ. ກສ຺ມາ? ອິເຘວ ອທສ຺ສນໂຕ. ຍທິ ເອວໍ ກພຬີກາຣາຫາເຣນ ວິນາ ຣູປຘາຕຸຍໍ ຣູເປນ ນ ປວຕ຺ຕິຕພ຺ພໍ, ກິໍ ກາຣຓໍ? ອິເຘວ ອທສ຺ສນໂຕ. ອປິ ຈ ຍຖາ ຍສ຺ສ ຈິຕ຺ຕສນ຺ຕານສ຺ສ ນິພ຺ພຕ຺ຕິກາຣຓໍ ຣູເປ ອວິຄຕຕຓ຺ຫໍ, ຕສ຺ສ ສຫ ຣູເປນ ສມ຺ຠວໂຕ ຣູປໍ ນິສ຺ສາຍ ປວຕ຺ຕິ, ຍສ຺ສ ປນ ນິພ຺ພຕ຺ຕິກາຣຓໍ ຣູເປ ວິຄຕຕຓ຺ຫໍ, ຕສ຺ສ ວິນາ ຣູເປນ ຣູປນິຣເປກ຺ຂຕາຍ ກາຣຓສ຺ສ, ເອວໍ ຍສ຺ສ ຣູປປ຺ປພນ຺ຘສ຺ສ ນິພ຺ພຕ຺ຕິກາຣຓໍ ວິຄຕຕຓ຺ຫໍ ອຣູເປ, ຕສ຺ສ ວິນາ ອຣູເປນ ປວຕ຺ຕິ ໂຫຕີຕິ ອສຎ຺ຎຠເວ ຣູປກ຺ຂນ຺ຘມຕ຺ຕເມວ ນິພ຺ພຕ຺ຕຕິ. ກຖໍ ປນ ຕຕ຺ຖ ເກວໂລ ຣູປປ຺ປພນ຺ໂຘ ປຈ຺ຈຸປ຺ປນ຺ນປຈ຺ຈຍຣຫິໂຕ ຈິຣກາລໍ ປວຕ຺ຕຕີຕິ ປຈ຺ເຈຕພ຺ພໍ, ກິຕ຺ຕກໍ ວາ ກາລໍ ປວຕ຺ຕຕີຕິ ໂຈທນໍ ມນສິ ກຕ຺ວາ ອາຫ ‘‘ຍຖາ ນາມ ຊິຍາເວຄຸກ຺ຂິຕ຺ໂຕ ສໂຣ’’ຕິອາທິ, ເຕນ ນ ເກວລມາຄໂມເຍວ ອຍເມຕ຺ຖ ຍຸຕ຺ຕີຕິ ທສ຺ເສຕິ. ຕຕ຺ຕກເມວ ກາລນ຺ຕິ ອຸກ຺ກໍສໂຕ ປຎ຺ຈ ມຫາກປ຺ປສຕານິປິ ຕິຏ຺ຐນ຺ຕິ ອສຎ຺ຎສຕ຺ຕາ. ຌານເວເຄຕິ ອສຎ຺ຎສມາປຕ຺ຕິປຣິກ຺ຂເຕ ກມ຺ມເວເຄ. ອນ຺ຕຣຘາຍຕີຕິ ປຈ຺ຈຍນິໂຣເຘນ ນິຣຸຊ຺ຌຕິ ນປ຺ປວຕ຺ຕຕິ.

ອິຘາຕິ ກາມຠເວ. ກຖໍ ປນ ອເນກກປ຺ປສຕສມຕິກ຺ກເມນ ຈິຣນິຣຸທ຺ຘໂຕ ວິຎ຺ຎາຓໂຕ ອິຘ ວິຎ຺ຎາຓໍ ສມຸປ຺ປຊ຺ຊຕິ. ນ ຫິ ນິຣຸທ຺ເຘ ຈກ຺ຂຸມ຺ຫິ ຈກ຺ຂຸວິຎ຺ຎາຓມຸປ຺ປຊ຺ຊມານໍ ທິຏ຺ຐນ຺ຕິ? ນຍິທເມກນ຺ຕໂຕ ທຏ຺ຐພ຺ພໍ. ຈິຣນິຣຸທ຺ຘມ຺ປິ ຫິ ຈິຕ຺ຕໍ ສມານຊາຕິກສ຺ສ ອນ຺ຕຣານຸປ຺ປຊ຺ຊນໂຕ ອນນ຺ຕຣປຈ຺ຈຍມຕ຺ຕໍ ໂຫຕິເຍວ, ນ ພີຊໍ, ພີຊໍ ປນ ກມ຺ມໍ. ຕສ຺ມາ ກມ຺ມໂຕ ພີຊຠູຕໂຕ ອາຣມ຺ມຓາທີຫິ ປຈ຺ຈເຍຫິ ອສຎ຺ຎຠວໂຕ ຈຸຕານໍ ກາມຘາຕຸຍາ ອຸປປຕ຺ຕິວິຎ຺ຎາຓໍ ໂຫຕິເຍວ. ເຕນາຫ ‘‘ອິຘ ປຏິສນ຺ຘິສຎ຺ຎາ ອຸປ຺ປຊ຺ຊຕີ’’ຕິ. ເອຕ຺ຖ ຈ ຍຖາ ນາມ ອຸຕຸນິຍາເມນ ປຸປ຺ຜຄ຺ຄຫເຓ ນິຍຕກາລານໍ ຣຸກ຺ຂານໍ ເວເຂ ທິນ຺ເນ ເວຂພເລນ ນ ຍຖາ ນິຍາມຕາ ໂຫຕິ ປຸປ຺ຜຄ຺ຄຫຓສ຺ສ, ເອວເມວ ປຎ຺ຈໂວກາຣຠເວ ອວິປ຺ປໂຍເຄນ ວຕ຺ຕມາເນສຸ ຣູປາຣູປຘມ຺ເມສຸ ຣູປາຣູປວິຣາຄຠາວນາເວເຂ ທິນ຺ເນ ຕສ຺ສ ສມາປຕ຺ຕິເວຂພລສ຺ສ ອນຸຣູປໂຕ ອຣູປຠເວ ອສຎ຺ຎາຠເວ ຈ ຍຖາກ຺ກມໍ ຣູປຣຫິຕາ ອຣູປຣຫິຕາ ຈ ຂນ຺ຘານໍ ປວຕ຺ຕິ ໂຫຕີຕິ ເວທິຕພ຺ພໍ. ນນຸ ເອຕ຺ຖ ຊາຕິສຕສຫສ຺ສທສສໍວຏ຺ຏາທີນໍ ມຕ຺ຖເກ, ອພ຺ຠນ຺ຕຣໂຕ ວາ ປວຕ຺ຕາຍ ອສຎ຺ຎູປວຕ຺ຕິຍາ ວເສນ ລາຠີອຘິຈ຺ຈສມຸປ຺ປນ຺ນິກວາໂທ ລາຠີສສ຺ສຕວາໂທ ວິຍ ອເນກເຠໂທ ສມ຺ຠວຕີຕິ? ສຈ຺ຈໍ ສມ຺ຠວຕິ, ອນນ຺ຕຣຕ຺ຕາ ປນ ອາປນ຺ນາຍ ອສຎ຺ຎູປປຕ຺ຕິຍາ ວເສນ ລາຠີອຘິຈ຺ຈສມຸປ຺ປນ຺ນິກວາໂທ ນຍທສ຺ສນວເສນ ເອໂກວ ທສ຺ສິໂຕຕິ ທຏ຺ຐພ຺ພໍ. ອຖ ວາ ສສ຺ສຕທິຏ຺ຐິສງ຺ຄຫໂຕ ອຘິຈ຺ຈສມຸປ຺ປນ຺ນິກວາທສ຺ສ ສສ຺ສຕວາເທ ອາຄໂຕ ສພ຺ໂພ ເທສນານໂຍ ຍຖາສມ຺ຠວໍ ອຘິຈ຺ຈສມຸປ຺ປນ຺ນິກວາເທປິ ຄເຫຕພ຺ໂພຕິ ອິມສ຺ສ ວິເສສສ຺ສ ທສ຺ສນຕ຺ຖໍ ຠຄວຕາ ລາຠີອຘິຈ຺ຈສມຸປ຺ປນ຺ນິກວາໂທ ອວິຠຊິຕ຺ວາ ເທສິໂຕ. ອວສ຺ສຎ຺ຈ ສສ຺ສຕທິຏ຺ຐິສງ຺ຄໂຫ ອຘິຈ຺ຈສມຸປ຺ປນ຺ນິກວາທສ຺ສ ອິຈ຺ຉິຕພ຺ໂພ ສໍກິເລສປກ຺ເຂ ສຕ຺ຕານໍ ອຊ຺ຌາສຍສ຺ສ ທຸວິຘຕ຺ຕາ. ຕຖາ ຫິ ວຸຕ຺ຕໍ ອຏ຺ຐກຖາຍໍ ‘‘ສສ຺ສຕຸຈ຺ເຉທທິຏ຺ຐິ ຈາ’’ຕິ. ຕຖາ ຈ ວກ຺ຂຕິ ‘‘ຍາສໍ ສຕ຺ເຕວ ອຸຈ຺ເຉທທິຏ຺ຐິໂຍ, ເສສາ ສສ຺ສຕທິຏ຺ຐິໂຍ’’ຕິ (ທີ. ນິ. ອຏ຺ຐ. ໑.໙໗-໙໘).

ນນຸ ຈ ອຘິຈ຺ຈສມຸປ຺ປນ຺ນິກວາທສ຺ສ ສສ຺ສຕທິຏ຺ຐິສງ຺ຄໂຫ ນ ຍຸຕ຺ໂຕ. ‘‘ອຫຎ຺ຫິ ປຸພ຺ເພ ນາໂຫສິ’’ນ຺ຕິອາທິວເສນ ປວຕ຺ຕນໂຕ, ອປຸພ຺ພສຕ຺ຕປາຕຸຠາວຄ຺ຄາຫຕ຺ຕາ, ອຕ຺ຕໂນ ໂລກສ຺ສ ຈ ສທາຠາວຄາຫິນີ ຈ ສສ຺ສຕທິຏ຺ຐິ ‘‘ອຕ຺ຖິຕ຺ເວວ ສສ຺ສຕິສມ’’ນ຺ຕິ ປວຕ຺ຕນໂຕ? ໂນ ນ ຍຸຕ຺ໂຕ ອນາຄເຕ ໂກຏິອທສ຺ສນໂຕ. ຍທິປິ ຫິ ອຍໍ ວາໂທ ‘‘ໂສມ຺ຫິ ເອຕຣຫິ ອຫຸຕ຺ວາ ສນ຺ຕຕາຍ ປຣິຓໂຕ’’ຕິ (ທີ. ນິ. ໑.໖໘) ອຕ຺ຕໂນ ໂລກສ຺ສ ຈ ອຕີຕໂກຏິປຣາມສນວເສນ ປວຕ຺ໂຕ, ຕຖາປິ ວຕ຺ຕມານກາລໂຕ ປຏ຺ຐາຍ ນ ເຕສໍ ກຕ຺ຖຈິ ອນາຄເຕ ປຣິຍນ຺ຕໍ ປສ຺ສຕິ, ວິເສເສນ ຈ ປຈ຺ຈຸປ຺ປນ຺ນານາຄຕກາເລສຸ ປຣິຍນ຺ຕາທສ຺ສນປຠາວິໂຕ ສສ຺ສຕວາໂທ. ຍຖາຫ ‘‘ສສ຺ສຕິສມໍ ຕເຖວ ຐສ຺ສຕີ’’ຕິ. ຍທິ ເອວໍ ອິມສ຺ສ ວາທສ຺ສ, ສສ຺ສຕວາທາທີນຎ຺ຈ ປຸພ຺ພນ຺ຕກປ຺ປິເກສຸ ສງ຺ຄໂຫ ນ ຍຸຕ຺ໂຕ ອນາຄຕກາລປຣາມສນວເສນ ປວຕ຺ຕຕ຺ຕາຕິ? ນ, ສມຸທາຄມສ຺ສ ອຕີຕໂກຏ຺ຐາສິກຕ຺ຕາ. ຕຖາ ຫິ ເນສໍ ສມຸປ຺ປຕ຺ຕິ ອຕີຕໍສປຸພ຺ເພນິວາສຎາເຓຫິ, ຕປ຺ປຏິຣູປການຸສ຺ສວາທິປ຺ປຠາວິຕຕກ຺ກເນຫິ ຈ ສງ຺ຄຫິຕາຕິ, ຕຖາ ເຈວ ສໍວຓ຺ຓິຕໍ. ອຖ ວາ ສພ຺ພຕ຺ຖ ອປ຺ປຏິຫຕຎາເຓນ ວາທິວເຣນ ຘມ຺ມສ຺ສາມິນາ ນິຣວເສສໂຕ ອຄຕິຎ຺ຈ ຄຕິຎ຺ຈ ຍຖາຠູຕໍ ສຍໍ ອຠິຎ຺ຎາ ສຈ຺ຉິກຕ຺ວາ ປເວທິຕາ ເອຕາ ທິຏ຺ຐິໂຍ, ຕສ຺ມາ ຍາວຕິກາ ທິຏ຺ຐິໂຍ ຠຄວຕາ ເທສິຕາ, ຍຖາ ຈ ເທສິຕາ, ຕຖາ ຕຖາວ ສນ຺ນິຏ຺ຐານໂຕ ສມ຺ປຏິຈ຺ຉິຕພ຺ພາ, ນ ເອຕ຺ຖ ຍຸຕ຺ຕິວິຈາຣຓາ ກາຕພ຺ພາ ພຸທ຺ຘວິສຍຕ຺ຕາ. ອຈິນ຺ເຕຍ຺ໂຍ ຫິ ພຸທ຺ຘວິສໂຍຕິ.

ທຸຕິຍຠາຓວາຣວຓ຺ຓນາ ນິຏ຺ຐິຕາ.