ສມາໂຣປນຫາຣວຓ຺ຓນາ

ອາຆາຕາທີນໍ ອກຣຓີຍຕາວຈເນນ ຂນ຺ຕິສມ຺ປທາ ທສ຺ສິຕາ ໂຫຕິ. ‘‘ອປ຺ປມຕ຺ຕກໍ ໂຂ ປເນຕ’’ນ຺ຕິອາທິນາ ໂສຣຈ຺ຈສມ຺ປທາ, ‘‘ອຕ຺ຖິ ຠິກ຺ຂເວ’’ຕິອາທິນາ ຎາຓສມ຺ປທາ, ‘‘ອປຣາມສໂຕ ຈສ຺ສ ປຈ຺ຈຕ຺ຕຎ຺ເຎວ ນິພ຺ພຸຕິ ວິທິຕາ’’ຕິ, ‘‘ເວທນານໍ…ເປ… ຍຖາຠູຕໍ ວິທິຕ຺ວາ ອນຸປາທາວິມຸຕ຺ໂຕ’’ຕິ ເອເຕຫິ ສມາຘິສມ຺ປທາຍ ສທ຺ຘິໍ ວິຊ຺ຊາວິມຸຕ຺ຕິວສີຠາວສມ຺ປທາ ທສ຺ສິຕາ ໂຫຕິ. ຕຕ຺ຖ ຂນ຺ຕິສມ຺ປທາ ປຏິສງ຺ຂານພລສິທ຺ຘິໂຕ ໂສຣຈ຺ຈສມ຺ປທາຍ ປທຏ຺ຐານໍ. ໂສຣຈ຺ຈສມ຺ປທາ ປນ ອຕ຺ຖໂຕ ສີລເມວ, ຕຖາ ປາຓາຕິປາຕາທີຫິ ປຏິວິຣຕິວຈນໍ ສີລສ຺ສ ປຣິຍາຍວິຠາຄທສ຺ສນຕ຺ຖໍ. ຕຕ຺ຖ ສີລໍ ສມາຘິສ຺ສ ປທຏ຺ຐານໍ, ສມາຘິ ປຎ຺ຎາຍ ປທຏ຺ຐານໍ. ເຕສຸ ສີເລນ ວີຕິກ຺ກມປ຺ປຫານໍ ທຸຈ຺ຈຣິຕສໍກິເລສປ຺ປຫານຎ຺ຈ ສິຊ຺ຌຕິ, ສມາຘິນາ ປຣິຍຸຏ຺ຐານປ຺ປຫານໍ, ວິກ຺ຂມ຺ຠນປ຺ປຫານໍ, ຕຓ຺ຫາສໍກິເລສປ຺ປຫານຎ຺ຈ ສິຊ຺ຌຕິ. ປຎ຺ຎາຍ ທິຏ຺ຐິສໍກິເລສປ຺ປຫານໍ, ສມຸຈ຺ເຉທປ຺ປຫານໍ, ອນຸສຍປ຺ປຫານຎ຺ຈ ສິຊ຺ຌຕີຕິ ສີລາທີຫິ ຕີຫິ ຘມ຺ມກ຺ຂນ຺ເຘຫິ ສມຖວິປສ຺ສນາຠາວນາປາຣິປູຣີ, ປຫານຕ຺ຕຍສິທ຺ຘິ ຈາຕິ ອຍໍ ສມາໂຣປໂນ ຫາໂຣ.

ໂສຬສຫາຣວຓ຺ຓນາ ນິຏ຺ຐິຕາ.