໓. ປຎ຺ຫປຸຈ຺ຉກວຓ຺ຓນາ

ນນຸ ຈ ຈຕ຺ຕາໂຣປິ ອຘິປຕໂຍ ເອກກ຺ຂເຓ ລພ຺ຠນ຺ຕິ, ອຎ຺ຎມຎ຺ຎສ຺ສ ປນ ອຘິປຕໂຍ ນ ຠວນ຺ຕິ ‘‘ຈຕ຺ຕາໂຣ ອິທ຺ຘິປາທາ ນ ມຄ຺ຄາຘິປຕິໂນ’’ຕິ ວຸຕ຺ຕຕ຺ຕາ. ຣາຊປຸຕ຺ໂຕປມາປິ ຫິ ເອຕມຕ຺ຖໍ ທີເປຕີຕິ? ນ, ເອກກ຺ຂເຓ ທຸຕິຍສ຺ສ ອຘິປຕິໂນ ອຠາວໂຕ ເອວ, ‘‘ນ ມຄ຺ຄາຘິປຕິໂນ’’ຕິ ວຸຕ຺ຕຕ຺ຕາ ຣາຊປຸຕ຺ໂຕປມາ ອຘິປຕິໍ ນ ກໂຣນ຺ຕີຕິ ອິມເມວຕ຺ຖໍ ທີເປຕິ, ນ ອຘິປຕີນໍ ສຫຠາວໍ. ຕໍ ກຖໍ ຊານິຕພ຺ພນ຺ຕິ? ປຏິກ຺ຂິຕ຺ຕຕ຺ຕາ. ອຘິປຕິປຈ຺ຈຍນິທ຺ເທເສ ຫິ ອຏ຺ຐກຖາຍໍ (ປຏ຺ຐາ. ອຏ຺ຐ. ໑.໓) ວຸຕ຺ຕາ ‘‘ກສ຺ມາ ປນ ຍຖາ ເຫຕຸປຈ຺ຈຍນິທ຺ເທເສ ‘ເຫຕູ ເຫຕຸສມ຺ປຍຸຕ຺ຕການ’ນ຺ຕິ ວຸຕ຺ຕໍ, ເອວມິຘ ‘ອຘິປຕີ ອຘິປຕິສມ຺ປຍຸຕ຺ຕການ’ນ຺ຕິ ອວຕ຺ວາ ‘ຉນ຺ທາຘິປຕິ ຉນ຺ທສມ຺ປຍຸຕ຺ຕການ’ນ຺ຕິອາທິນາ ນເຍນ ເທສນາ ກຕາຕິ? ເອກກ຺ຂເຓ ອຠາວໂຕ’’ຕິ. ສຕິ ຈ ຈຕຸນ຺ນໍ ອຘິປຕີນໍ ສຫຠາເວ ‘‘ອຣິຍມຄ຺ຄສມງ຺ຄິສ຺ສ ວີມໍສາຘິປເຕຍ຺ຍໍ ມຄ຺ຄໍ ຠາເວນ຺ຕສ຺ສາ’’ຕິ ວິເສສນໍ ນ ກຕ຺ຕພ຺ພໍ ສິຍາ ອວີມໍສາຘິປຕິກສ຺ສ ມຄ຺ຄສ຺ສ ອຠາວາ. ຉນ຺ທາທີນໍ ອຎ຺ຎມຎ຺ຎາຘິປຕິກຣຓຠາເວ ຈ ‘‘ວີມໍສໍ ຐເປຕ຺ວາ ຕໍສມ຺ປຍຸຕ຺ໂຕ’’ຕິອາທິນາ ຉນ຺ທາທີນໍ ວີມໍສາຘິປຕິກຕ຺ຕວຈນໍ ນ ວຕ຺ຕພ຺ພໍ ສິຍາ. ຕຖາ ‘‘ຈຕ຺ຕາໂຣ ອຣິຍມຄ຺ຄາ ສິຍາ ມຄ຺ຄາຘິປຕິໂນ, ສິຍາ ນ ວຕ຺ຕພ຺ພາ ມຄ຺ຄາຘິປຕິໂນ’’ຕິ (ຘ. ສ. ໑໔໒໙) ເອວມາທີຫິປິ ອຘິປຕີນໍ ສຫຠາໂວ ປຏິກ຺ຂິຕ຺ໂຕ ເອວາຕິ.

ປຎ຺ຫປຸຈ຺ຉກວຓ຺ຓນາ ນິຏ຺ຐິຕາ.

ອິທ຺ຘິປາທວິຠງ຺ຄວຓ຺ຓນາ ນິຏ຺ຐິຕາ.