໑. ສຸຕ຺ຕນ຺ຕຠາຊນີຍວຓ຺ຓນາ

໖໔໒. ສພ຺ພຘີຕິ ທິສາເທໂສຘິນາ ອໂນຘິໂສຜຣຓໍ ວຸຕ຺ຕໍ, ສພ຺ພຕ຺ຕຕາຍ ສພ຺ພາວນ຺ຕນ຺ຕິ ສຕ຺ໂຕຘິນາ. ເຕນາຫ ‘‘ອໂນຘິໂສ ທສ຺ສນຕ຺ຖ’’ນ຺ຕິ. ຕຖາ-ສທ຺ໂທ ອິຕິ-ສທ຺ໂທ ວາ ນ ວຸຕ຺ໂຕຕິ ‘‘ເມຕ຺ຕາສຫຄເຕນ ເຈຕສາ’’ຕິ ເອຕສ຺ສ ອນຸວຕ຺ຕກໍ ຕໍ ທ຺ວຍໍ ຕສ຺ສ ຜຣຓນ຺ຕຣາທິຏ຺ຐານໍ ອຏ຺ຐານນ຺ຕິ ກຕ຺ວາ ນ ວຸຕ຺ຕໍ, ປຸນ ‘‘ເມຕ຺ຕາສຫຄເຕນ ເຈຕສາ’’ຕິ ວຸຕ຺ຕນ຺ຕິ ອຕ຺ໂຖ.

໖໔໓. ຫິໂຣຕ຺ຕປ຺ປານຸປາລິຕາ ເມຕ຺ຕາ ນ ປຣິຫາຍຕິ ອາສນ຺ນສປຕ຺ຕສ຺ສ ຣາຄສ຺ສ ສິເນຫສ຺ສ ຈ ວິປຕ຺ຕິຍາ ອນຸປ຺ປຕ຺ຕິໂຕຕິ ອຘິປ຺ປາໂຍ.

໖໔໕. ອຘິມຸຎ຺ຈິຕ຺ວາຕິ ສຸຏ຺ຐຸ ປສາເຣຕ຺ວາຕິ ອຕ຺ໂຖ. ຕໍ ທສ຺ເສນ຺ໂຕ ‘‘ອຘິກຠາເວນາ’’ຕິອາທິມາຫ, ພລວຕາ ວາ ອຘິໂມກ຺ເຂນ ອຘິມຸຈ຺ຈິຕ຺ວາ.

໖໔໘. ເຫຏ຺ຐາ ວຸຕ຺ໂຕເຍວາຕິ ‘‘ສພ຺ເພນ ສພ຺ພໍ ສພ຺ພຖາ ສພ຺ພ’’ນ຺ຕິ ເອເຕສໍ ‘‘ສພ຺ເພນ ສິກ຺ຂາສມາທາເນນ ສພ຺ພໍ ສິກ຺ຂໍ, ສພ຺ເພນ ສິກ຺ຂິຕພ຺ພາກາເຣນ ສພ຺ພໍ ສິກ຺ຂ’’ນ຺ຕິ ຈ ຌານວິຠງ຺ເຄ (ວິຠ. ອຏ຺ຐ. ໕໑໖) ອຕ຺ໂຖ ວຸຕ຺ໂຕ. ອິຘ ປນ ສພ຺ເພນ ອວຘິນາ ອຕ຺ຕສມຕາຍ ສພ຺ພສຕ຺ຕຍຸຕ຺ຕຕາຍ ຈ ສພ຺ພໍ ໂລກໍ, ສພ຺ພາວຘິທິສາທິຜຣຓາກາເຣຫິ ສພ຺ພໍ ໂລກນ຺ຕິ ຈ ອຕ຺ໂຖ ຍຸຊ຺ຊຕິ.

໖໕໐. ປຈ຺ຈຕ຺ຖິກວິຆາຕວເສນາຕິ ເມຕ຺ຕາທີນໍ ອາສນ຺ນທູຣປຈ຺ຈຕ຺ຖິການໍ ຣາຄພ຺ຍາປາທາທີນໍ ວິຆາຕວເສນ. ຍໍ ອປ຺ປມາຓໍ, ໂສ ອເວໂຣຕິ ໂສ ອເວຣຠາໂວຕິ ອຍໍ ວາ ຕສ຺ສ ອຕ຺ໂຖຕິ.

໖໕໓. ນິຣຍາທິ ຄຕິ, ຈຓ຺ຑາລາທິ ກຸລໍ, ອນ຺ນາທີນໍ ອລາຠິຕາ ໂຠໂຄ. ອາທິ-ສທ຺ເທນ ທຸພ຺ພຓ຺ຓຕາທິ ຄຫິຕໍ.

ສຸຕ຺ຕນ຺ຕຠາຊນີຍວຓ຺ຓນາ ນິຏ຺ຐິຕາ.