໖. ຉຏ຺ໂຐ ປຣິຈ຺ເຉໂທ

ອາຣມ຺ມຓວິຠາຄວຓ຺ຓນາ

໒໙໑. ເອເຕສໍ ປນ ຈິຕ຺ຕານໍ, ອາຣມ຺ມຓມິໂຕ ປຣໍ;

ທສ຺ສຍິສ຺ສາມຫໍ ເຕນ, ວິນາ ນຕ຺ຖິ ຫິ ສມ຺ຠໂວ.

ອິໂຕ ປຣໍ ອິໂຕ ປຣິຈ຺ເຉທໂຕ ປຣໍ ອຫໍ ເອເຕສໍ ປນ ຈິຕ຺ຕານໍ ອາຣມ຺ມຓໍ ທສ຺ສຍິສ຺ສາມິ. ຫິ ກສ຺ມາ? ເຕນ ວິນາ ຕໍ ອາຣມ຺ມຓໍ ວຊ຺ເຊຕ຺ວາ ຈິຕ຺ຕານໍ ສມ຺ຠໂວ ນຕ຺ຖິ ຍສ຺ມາ ກາຣຓາ, ຕສ຺ມາ ກາຣຓາ ທສ຺ສຍິສ຺ສາມິ.

໒໙໒. ຣູປໍ ສທ຺ທໍ ຄນ຺ຘໍ ຣສໍ, ໂຜຏ຺ຐພ຺ພໍ ຘມ຺ມເມວ ຈ;

ຉຘາ ອາຣມ຺ມຓໍ ອາຫຸ, ຉຬາຣມ຺ມຓໂກວິທາ.

ຉຬາຣມ຺ມເຓສຸ ເຉກາ ປຓ຺ຑິຕາ ອາຣມ຺ມຓໍ ຉຘາ ຉປ຺ປກາຣໍ ອາຫຸ ກເຖສຸໍ.

໒໙໓. ຕຕ຺ຖ ຠູເຕ ອຸປາທາຍ. ຕຕ຺ຖ ເຕສຸ ອາຣມ຺ມເຓສຸ ຠູເຕ ອຸປາທາຍ ຠູເຕ ປຏິຈ຺ຈ ວຓ຺ໂຓ ຈຕຸສມຸຏ຺ຐິໂຕ ກມ຺ມຈິຕ຺ຕອຸຕຸອາຫາຣສງ຺ຂາເຕຫິ ຈຕູຫິ ປຈ຺ຈເຍຫິ ສມຸຏ຺ຐິໂຕ ນິພ຺ພຕ຺ໂຕ ນິທສ຺ສເນນ ສຫ ປວຕ຺ໂຕ ປຏິເຆນ ສຫ ປວຕ຺ໂຕ ຣູປາຣມ຺ມຓສຎ຺ຎິໂຕ.

໒໙໔. ທຸວິໂຘປິ ສມຸທ຺ທິຏ຺ໂຐ, ສທ຺ໂທ ຈິຕ຺ໂຕຕຸສມ຺ຠໂວ ສທ຺ໂທ ທຸວິໂຘປິ ມຸນິນາ ສມຸທ຺ທິຏ຺ໂຐ ຈິຕ຺ໂຕຕຸສມ຺ຠໂວ, ສວິຎ຺ຎາຓກສທ຺ໂທວ ຈິຕ຺ຕສມຸຏ຺ຐິໂຕ ໂຫຕິ. ກຖໍ? ວຈີເຠທກຈິຕ຺ເຕນ ຠູຕາຍ ຊາຕາຍ ຠູມິຍາ ປຖວີຘາຕຸຍາ ວິກາຣຕາ ປຖວີລກ຺ຂຓຠາວໂຕ ອຕິຖທ຺ຘລກ຺ຂຓຕາ ວິກາຣຕາ ນາມ. ສາ ວຈີວິຎ຺ຎຕ຺ຕິ ວິຎ຺ຎາຍຕີຕິ ວິຎ຺ຎຕ຺ຕິຍາ ອຸປາທິຓ຺ຓຆຏ຺ຏນສ຺ສ ກມ຺ມຊປຖວີຘາຕຸຍາ ຆຏ຺ຏນສ຺ສ ກາຣຓໍ ຈິຕ຺ຕຊປຖວີຘາຕຸຍາ ກມ຺ມຊປຖວີຘາຕຸຍາ ຆຏ຺ຏນຎ຺ຈ ສທ຺ໂທ ຈ ອປຸພ຺ພໍ ອຈຣິມໍ ໂຫຕິ.

໒໙໕. ອວິຎ຺ຎາຓກສທ຺ໂທ ໂຍ ໂສ ອວິຎ຺ຎາຓກສທ຺ໂທ ອຸຕຸສມຸຏ຺ຐິໂຕ ໂຫຕິ. ອຍໍ ທຸວິໂຘປິ ສທ຺ໂທ ສທ຺ທາຣມ຺ມຓຕໍ ຄໂຕ ສທ຺ທາຣມ຺ມຓຠາວໍ ປຕ຺ໂຕ.

໒໙໖. ຘຣີຍຕີຕິ ຄຈ຺ຉນ຺ໂຕ ຄຈ຺ຉນ຺ໂຕ ຊເນຫິ ຘຣີຍເຕຕິ ຄນ຺ໂຘ. ຄມຸ ສປ຺ປ ຄຕິມ຺ຫິ, ຘຣ ຘາຣເຓ. ສູຈນໂຕ ອຕ຺ຕໂນ ສາຘາຣຓສ຺ສ ປຸປ຺ຜາທິໂນ ວຕ຺ຖຸສ຺ສ ປກາສນໂຕປິ ວາ ຄນ຺ໂຘ ນາມ. ຄນ຺ຘ ສູຈເນ. ອຍໍ ຄນ຺ໂຘ ຈຕູຫິ ສມຸຏ຺ຐານໍ ເອຕສ຺ສາຕິ ຈຕຸສມຸຏ຺ຐາໂນ. ຄນ຺ຘາຣມ຺ມຓສມ຺ມໂຕ.

໒໙໗. ຣສມານາ ຣສນ຺ຕີຕິ, ຣໂສຕິ ປຣິກິຕ຺ຕິໂຕ ຊນາ ຣສມານາ ຍໍ ຘມ຺ມຊາຕໍ ຣສນ຺ຕິ ອນຸຠວນ຺ຕິ, ອິຕິ ຍສ຺ມາ ກາຣຓາ, ຕສ຺ມາ ກາຣຓາ ຣໂສ ອິຕິ ຣໂສ ນາມ ປຓ຺ຑິເຕຫິ ປຣິກິຕ຺ຕິໂຕ, ໂສ ຣໂສ ຈຕຸສມ຺ຠູໂຕ ຣສາຣມ຺ມຓນາມໂກ.

໒໙໘. ຜຸສີຍຕີຕິ ໂຜຏ຺ຐພ຺ພໍ ຍໍ ຘມ຺ມຊາຕໍ ຊເນຫິ ຜຸສີຍຕີຕິ ຕສ຺ມາ ໂຜຏ຺ຐພ຺ພໍ, ປຖວີເຕຊວາຍໂວ. ຕໍ ໂຜຏ຺ຐພ຺ພໍ ຈຕຸສມ຺ຠູຕໍ ໂຜຏ຺ຐພ຺ພາຣມ຺ມຓໍ ມຕໍ.

໒໙໙. ສພ຺ພໍ ນາມຎ຺ຈ ຣູປຎ຺ຈ, ຫິຕ຺ວາ ຣູປາທິປຎ຺ຈກໍ ຣູປາທິປຎ຺ຈກໍ ຫິຕ຺ວາ ສພ຺ພໍ ນາມຎ຺ຈ ຈິຕ຺ຕເຈຕສິກນິພ຺ພານນາມຎ຺ຈ ຣູປຎ຺ຈ ປຎ຺ຈປສາທສຸຂຸມຣູປຎ຺ຈ ລກ຺ຂຓານິ ຈ ອນິຈ຺ຈທຸກ຺ຂອນຕ຺ຕລກ຺ຂຓານິ ຈ ປຎ຺ຎຕ຺ຕິ ຈ ຘມ຺ມາຣມ຺ມຓສຎ຺ຎິຕໍ.

໓໐໐. ຉາຣມ຺ມຓານິ ລພ຺ຠນ຺ຕິ, ກາມາວຈຣຠູມິຍໍ ກາມາວຈຣຠູມິຍໍ ຉາຣມ຺ມຓານິ ລພ຺ຠນ຺ຕິ. ຕີຓິ ຣູປາວຈເຣ ຣູປສທ຺ທຘມ຺ມາຣມ຺ມຓວເສນ ລພ຺ຠນ຺ຕິ. ອຣູເປ ປນ ເອເກກໍ ຘມ຺ມາຣມ຺ມຓໍ ລພ຺ຠຕິ.

໓໐໑-໓. ຂຓວຕ຺ຖຸປຣິຕ຺ຕຕ຺ຕາ, ອາປາຖໍ ນ ວຊນ຺ຕິ ເຍ ເຍ ຣູປາທໂຍ ປຎ຺ຈ ວິສຍາ ຂຓວຕ຺ຖຸປຣິຕ຺ຕຕ຺ຕາ ປຎ຺ຈາຣມ຺ມຓານໍ ຂຓສ຺ສ ປຣິຕ຺ຕຕ຺ຕາ ມນ຺ທຕ຺ຕາ ເຕສໍ ອປ຺ປາຍຸກຕ຺ຕາ ວຕ຺ຖຸປຣິຕ຺ຕຕ຺ຕາ ປຎ຺ຈາຣມ຺ມຓານໍ ອຕິຂຸທ຺ທກວຕ຺ຖຸກຕ຺ຕາ ອາປາຖໍ ປຎ຺ຈທ຺ວາເຣສຸ ປາກຏຠາວໍ ນ ວຊນ຺ຕິ, ປຎ຺ຈປສາເທສຸ ຆຏ຺ຏນກິຈ຺ຈໍ ນ ສາເຘນ຺ຕິ, ເຕ ຣູປາທໂຍ ປຎ຺ຈ ວິສຍາ ຘມ຺ມາຣມ຺ມຓໍ ໂຫນ຺ຕິ. ອິຕິ ເຍສໍ ເອກຈ຺ຈານໍ ອາຈຣິຍານໍ ມຕໍ ໂຫຕິ. ກິຣາຕິ ອນຸສ຺ສວນຕ຺ເຖ ນິປາໂຕ. ເຕ ປຏິກ຺ຂິປິຕພ຺ພາວ ເຕ ເອວໍ ວາທິໂນ ເອກຈ຺ເຈ ອາຈຣິຍາ ປຏິກ຺ຂິປິຕພ຺ພາ, ມຍາ ປຏິເສຘິຕພ຺ພາ. ກສ຺ມາ? ຈກ຺ຂຸວິຎ຺ຎາຓໍ ໂສຕວິຎ຺ຎາຓສ຺ສ ໂຄຈຣຠູຕໍ ສທ຺ທໍ ນ ປຏິອນຸໂຠຕິ, ໂສຕວິຎ຺ຎາຓໍ ຈກ຺ຂຸວິຎ຺ຎາຓສ຺ສ ໂຄຈຣຠູຕໍ ຣູປໍ ນ ປຏິອນຸໂຠຕິ. ອິຕິ ອຎ຺ຎມຎ຺ຎສ຺ສ ໂຄຈຣໍ ເນວ ປຈ຺ຈນຸໂຠນ຺ຕານໍ ເຕສໍ ປຎ຺ຈນ຺ນໍ ຈກ຺ຂຸວິຎ຺ຎາຓາທີນໍ ວິຎ຺ຎາຓານໍ ຕຎ຺ຈ ໂຄຈຣໍ ມໂນຘາຕຸມໂນວິຎ຺ຎາຓຘາຕຸສງ຺ຂາຕໍ ຊວນໍ ປນ ປຈ຺ຈນຸໂຠຕິ. ອິຕິ ວຈນສ຺ສ ຠຄວຕາ ວຸຕ຺ຕຕ຺ຕາ ປຏິກ຺ຂິປິຕພ຺ພາ. ຣູປາທໂຍ ປນ ວິສຍາ ຣູປາທິປຎ຺ຈາຣມ຺ມຓານິ ເອວ ໂຫນ຺ຕິ.

໓໐໔-໖. ທິພ຺ພຈກ຺ຂາທິຎາຓານໍ, ຣູປາທີເນວ ໂຄຈຣາ ຕານິ ຣູປາທີນິ ເອວ ໂຄຈຣາ ທິພ຺ພຈກ຺ຂາທິຎາຓານໍ ອນາປາຖຄຕານໍ ເອວ ປາກຏຠາວໍ ອປ຺ປຕ຺ຕາເນວ. ອິຕິປິ ວຈນໍ ວຸຕ຺ຕໍ ນ ຍຸຊ຺ຊຕິ. ຍໍ ຘມ຺ມຊາຕໍ ຣູປາຣມ຺ມຓໍ ຠວນ຺ຕໍ, ຕໍ ຘມ຺ມຊາຕໍ ກຖໍ ເກນ ປກາເຣນ ຘມ຺ມາຣມ຺ມຓໍ ຠເວຍ຺ຍ? ເອວໍ ສຕິ ຣູປາຣມ຺ມຓສ຺ສ ຘມ຺ມາຣມ຺ມຓຕ຺ເຕ ສຕິ ເອເຕສໍ ຣູປາຣມ຺ມຓຘມ຺ມາຣມ຺ມຓານໍ ນິຍໂມປິ ກຖໍ ຠເວ ເກນ ປກາເຣນ ຠເວຍ຺ຍ? ສພ຺ພໍ ອາຣມ຺ມຓໍ ເອຕໍ ເອຕໍ ສພ຺ພໍ ອາຣມ຺ມຓໍ ຉພ຺ພິຘໍ ຉປ຺ປກາຣໍ ຠຄວຕາ ສມຸທີຣິຕໍ. ຕໍ ປຣິຕ຺ຕຕ຺ຕິກາທີນໍ ວເສນ ພຫຸປ຺ປກາເຣຫິ ມຕໍ.

໓໐໗. ສພ຺ໂພ ກາມວິປາໂກ ຈ ສພ຺ໂພ ເຕວີສຕິກາມວິປາໂກ ຈ ກ຺ຣິຍາເຫຕຸທ຺ວຍມ຺ປິ ຈ ມໂນຘາຕຸຫສິຕຸປ຺ປາທວເສນ ກິຣິຍາເຫຕຸທ຺ວຍມ຺ປິ ຈາຕິ ປຎ຺ຈວີສຕິ ຈິຕ຺ຕຸປ຺ປາທາ ເອກນ຺ຕປຣິຕ຺ຕາຣມ຺ມຓາ ເອກນ຺ຕກາມາວຈຣາຣມ຺ມຓາ ສິຍຸໍ ຠເວຍ຺ຍຸໍ.

໓໐໘-໑໐. ອິຏ຺ຐາທິເຠທາ ປຎ຺ເຈວ, ຣູປສທ຺ທາທໂຍ ປນ ທ຺ວິປຎ຺ຈນ຺ນໍ ວິຎ຺ຎາຓານໍ ປຏິປາຏິຍາ ອນຸກ຺ກເມນ ໂຄຈຣາ ໂຫນ຺ຕິ. ຣູປາທິປຎ຺ຈກໍ ສພ຺ພໍ, ມໂນຘາຕຸຕ຺ຕຍສ຺ສ ຕຸ ມໂນຘາຕຸຕ຺ຕຍສ຺ສ ປນ ສພ຺ພໍ ຣູປາທິປຎ຺ຈກໍ ອາຣມ຺ມຓໍ ໂຫຕິ, ເອເຕສໍ ເຕຣສນ຺ນໍ ປນ ຈິຕ຺ຕານໍ ຣູປກ຺ຂນ຺ໂຘວ ໂຄຈໂຣ ອາຣມ຺ມຓໍ ໂຫຕິ. ນາຣູປໍ ນາມໍ ອາຣມ຺ມຓໍ ນ ກໂຣນ຺ຕິ. ນ ຈ ປຎ຺ຎຕ຺ຕິໍ ປຎ຺ຎຕ຺ຕິໍ ອາຣມ຺ມຓໍ ນ ກໂຣນ຺ຕິ. ນາຕີຕໍ ອຕີຕໍ ອາຣມ຺ມຓໍ ນ ກໂຣນ຺ຕິ. ນ ຈນາຄຕໍ ອນາຄຕໍ ອາຣມ຺ມຓໍ ນ ກໂຣນ຺ຕິ ເອວ. ຫິ ສຈ຺ຈໍ ວຕ຺ຕມາໂນ ໂຄຈໂຣ ເອເຕສໍ ທ຺ວິປຎ຺ຈວິຎ຺ຎາຓານໍ, ມໂນຘາຕຸຕ຺ຕຍສ຺ສ ຈາຕິ ເຕຣສນ຺ນໍ ຈິຕ຺ຕານໍ ຕໍ ອາຣມ຺ມຓໍ ວຕ຺ຕມານໍ ເອວ ປຈ຺ຈຸປ຺ປນ຺ນໍ ເອວ.

໓໑໑. ເຕຣເສຕານິ ຈິຕ຺ຕານິ, ຊາຍນ຺ເຕ ກາມຘາຕຸຍໍ ເອຕານິ ເຕຣສ ຈິຕ຺ຕານິ ກາມຘາຕຸຍໍ ຊາຍນ຺ຕິ, ຣູປາວຈເຣ ປຸຎ຺ຎຊານິ ຈກ຺ຂຸໂສຕວິຎ຺ຎາຓສມ຺ປຏິຈ຺ຉນານິ, ກິຣິຍາມໂນຘາຕຸ ຈາຕິ ຈຕ຺ຕາຣິ ຈິຕ຺ຕານິ ຊາຍນ຺ຕິ. ອຣູປິສຸ ອຣູປຠູມີສຸ ເນວ ກິຎ຺ຈິປິ ເອກມ຺ປິ ຈິຕ຺ຕໍ ເນວ ຊາຍຕິ.

໓໑໒-໓. ມຫາປາການມຏ຺ຐນ຺ນໍ ອຏ຺ຐນ຺ນໍ ມຫາວິປາການໍ ປວຕ຺ຕິຍໍ ຉສຸ ທ຺ວາເຣສຸ ຕທາຣມ຺ມຓກິຈ຺ຈານໍ ຣູປາທິຉປຣິຕ຺ຕານິ ໂຄຈຣາ. ສນ຺ຕີຣຓຕ຺ຕຍສ຺ສປິ ປວຕ຺ຕິຍໍ ປຎ຺ຈທ຺ວາເຣ ສນ຺ຕີຣຓຕ຺ຕຍກິຈ຺ຈສ຺ສ, ຉທ຺ວາເຣສຸ ຕທາລມ຺ພຓກິຈ຺ຈສ຺ສ ຈ ຣູປາທິຉປຣິຕ຺ຕານິ ໂຄຈຣາ. ຣູປາທໂຍ ປຣິຕ຺ຕາ ຉ, ຫສິຕຸປ຺ປາທໂຄຈຣາ ຫສິຕຸປ຺ປາທສ຺ສ ຣູປາທໂຍ ຉ ປຣິຕ຺ຕາ ໂຄຈຣາ ໂຫນ຺ຕິ. ປຎ຺ຈທ຺ວາເຣ ປຏຸປ຺ປນ຺ນາ ປຎ຺ຈສຸ ທ຺ວາເຣສຸ ເຍ ໂຄຈຣາ ປຈ຺ຈຸປ຺ປນ຺ນາ, ມໂນທ຺ວາເຣ ຕິກາລິກາ ເຍ ໂຄຈຣາ ຕິກາລິກາ ຕີສຸ ກາເລສຸ ນິຍຸຕ຺ຕາ.

໓໑໔-໕. ທຸຕິຍາຣຸປ຺ປຈິຕ຺ຕຎ຺ຈ, ຈຕຸຕ຺ຖາຣຸປ຺ປມານສໍ ກຸສລວິປາກກິຣິຍາວເສນ ຉພ຺ພິຘໍ ຈິຕ຺ຕໍ ມຫຄ຺ຄຕໂຄຈຣໍ ນິຍຕໍ ນິຍຕາຣມ຺ມຓໍ ໂຫຕິ, ຕໍ ຉພ຺ພິຘໍ ຈິຕ຺ຕໍ ມຫຄ຺ຄຕໂຄຈຣໍ ປຸພ຺ເພ ອຕ຺ຕນາ ອຘິຄຕອາກາສານຎ຺ຈາຍຕນອາກິຎ຺ຈຎ຺ຎາຍຕນກຸສລາຣມ຺ມຓໍ, ເຕສຸ ທ຺ເວ ທຸຕິຍຈຕຸຕ຺ຖາຣຸປ຺ປປາກາ ‘‘ຍສ຺ສ ຍສ຺ສ ກຸສລຌານສ຺ສ ຍໍ ຍໍ ອາຣມ຺ມຓໍ ຄເຫຕ຺ວາ ພ຺ຣຫ຺ມໂລເກ ປຏິສນ຺ຘິ ໂຫຕີ’’ຕິ ວຈນໂຕ ສກສກກຸສລສ຺ສ ອາຣມ຺ມຓໍ ເອວ ເຕສໍ ວິປາການໍ ອາຣມ຺ມຓໍ ໂຫຕິ. ນິພ຺ພານາຣມ຺ມຓຕ຺ຕາ ຫິ, ເອກນ຺ເຕນ ອນຎ຺ຎໂຕ ອຏ຺ຐານາສວຈິຕ຺ຕານໍ ອປ຺ປມາໂຓວ ນິພ຺ພານໍ ເອວ ໂຄຈຣໍ ອາຣມ຺ມຓໍ ໂຫຕິ. ຫິ ກສ຺ມາ ກາຣຓາ? ນິພ຺ພານາຣມ຺ມຓຕ຺ຕາ, ນ ອຎ຺ຎໂຕ ອາຣມ຺ມຓໂຕ.

໓໑໖-໓໒໐. ຈຕ຺ຕາໂຣ ຎາຓຫີນາ ຈ, ກາມາວຈຣປຸຎ຺ຎໂຕ ກາມາວຈຣກຸສລວເສນ ຈຕ຺ຕາໂຣ ຎາຓຫີນາ ຈ ກ຺ຣິຍໂຕ ກິຣິຍວເສນ ຈຕ຺ຕາໂຣ ຎາຓຫີນາ ຈ ທ຺ວາທສາກຸສລານິ ຈ ເຕ ປຣິຕ຺ຕາຣມ຺ມຓາ ເຈວ ມຫຄ຺ຄຕໂຄຈຣາ ຈ, ເຕ ນ ວຕ຺ຕພ຺ພາ ຈ ໂຫນ຺ຕິ. ກສ຺ມາ? ປຎ຺ຎຕ຺ຕາຣມ຺ມຓຕ຺ຕາ. ຈຕ຺ຕາໂຣ ຎາຓສໍຍຸຕ຺ຕາ, ປຸຎ຺ຎໂຕ ກຸສລວເສນ ຈຕ຺ຕາໂຣ ຎາຓສມ຺ປຍຸຕ຺ຕາ, ກ຺ຣິຍໂຕ ກິຣິຍວເສນ ຈຕ຺ຕາໂຣ ຎາຓສມ຺ປຍຸຕ຺ຕາ ຈ ຕຖາ ອຠິຎ຺ຎາທ຺ວຍຎ຺ຈ ກິຣິຍາໂວຏ຺ຐພ຺ພນມ຺ປິ ຈ ເອກາທສນ຺ນໍ ເອເຕສໍ ຈິຕ຺ຕານໍ ໂຄຈໂຣ ປຣິຕ຺ຕມຫຄ຺ຄຕອປ຺ປມາຓວເສນ ຕິວິໂຘ ໂຫຕິ. ອິເມ ເອກາທສ ນ ວຕ຺ຕພ຺ພາປິ ໂຫນ຺ຕິ. ກສ຺ມາ? ປຎ຺ຎຕ຺ຕາຣມ຺ມຓຕ຺ຕາ. ຍານິ ວຸຕ຺ຕາວເສສານິ ວຸຕ຺ຕໂຕ ຈິຕ຺ຕໂຕ ເສສານິ ຍານິ ຈິຕ຺ຕານິ, ຕານິ ນ ວຕ຺ຕພ຺ພາຣມ຺ມຓານີຕິ ວິຠາວິນາ ວິຎ຺ເຎຍ຺ຍານິ.

ປຣິຕ຺ຕາຣມ຺ມຓຕ຺ຕິກໍ ສມຕ຺ຕໍ.

໓໒໑. ທຸຕິຍາຣຸປ຺ປຈິຕ຺ຕຎ຺ຈ, ຈຕຸຕ຺ຖາຣຸປ຺ປມານສໍ;

ຉພ຺ພິຘໍ ປນ ເອກນ຺ຕອຕີຕາຣມ຺ມຓໍ ສິຍາ.

໓໒໒-໖. ວິຎ຺ຎາຓານໍ ທ຺ວິປຎ຺ຈນ຺ນໍ ທ຺ວິນ຺ນໍ ປຎ຺ຈວິຎ຺ຎາຓານໍ, ມໂນຘາຕຸຕ຺ຕຍສ຺ສ ຈ ເຕຣສນ຺ນໍ ຈິຕ຺ຕານໍ ໂຄຈຣາ ຣູປາທໂຍ ປຎ຺ຈ ຘມ຺ມາ ປຈ຺ຈຸປ຺ປນ຺ນາວ, ອຏ຺ຐ ກາມມຫາວິປາກາ ຕທາຣມ຺ມຓກິຈ຺ຈວເສນ ອຕີຕານາຄຕປຈ຺ຈຸປ຺ປນ຺ນໂຄຈຣາ, ຈຸຕິກິຈ຺ຈວເສນ ອຕີຕາຣມ຺ມຓາ, ປຏິສນ຺ຘິຠວງ຺ຄກິຈ຺ຈວເສນ ປຈ຺ຈຸປ຺ປນ຺ນາຕີຕາຣມ຺ມຓາ. ໂສມນສ຺ສສນ຺ຕີຣຓໍ ສນ຺ຕີຣຓກິຈ຺ຈວເສນ ປຈ຺ຈຸປ຺ປນ຺ນາຣມ຺ມຓໍ. ຕທາຣມ຺ມຓກິຈ຺ຈວເສນ ປຈ຺ຈຸປ຺ປນ຺ນານາຄຕາຕີຕາຣມ຺ມຓໍ. ເສສສນ຺ຕີຣຓທ຺ວຍໍ ສນ຺ຕີຣຓກິຈ຺ຈວເສນ ປຈ຺ຈຸປ຺ປນ຺ນາຣມ຺ມຓໍ, ຕທາຣມ຺ມຓກິຈ຺ຈວເສນ ປຈ຺ຈຸປ຺ປນ຺ນານາຄຕາຕີຕາຣມ຺ມຓໍ, ຈຸຕິກິຈ຺ຈວເສນ ອຕີຕາຣມ຺ມຓໍ, ປຏິສນ຺ຘິຠວງ຺ຄກິຈ຺ຈວເສນ ປຈ຺ຈຸປ຺ປນ຺ນາຕີຕາຣມ຺ມຓໍ. ຫສິຕຸປ຺ປາທຈິຕ຺ຕໍ ຊວນກິຈ຺ຈວເສນ ປຈ຺ຈຸປ຺ປນ຺ນາຕີຕານາຄຕໂຄຈຣໍ. ອິຕິ ເອເຕ ທ຺ວາທສ ມານສາ ປນ ສິຍາຕີຕາຣມ຺ມຓາ ອຕີຕາຣມ຺ມຓາ ສິຍຸໍ. ປຈ຺ຈຸປ຺ປນ຺ນານາຄຕໂຄຈຣາ ປຈ຺ຈຸປ຺ປນ຺ນາຣມ຺ມຓາ ອນາຄຕາຣມ຺ມຓາ ສິຍຸໍ. ກາເມ ວີສຕິ ກຸສລາກຸສລາ ກ຺ຣິຍໂຕ ກິຣິຍວເສນ ກາເມ ນວ ມານສາ, ໂວຏ຺ຐພ຺ພໍ ໂວຏ຺ຐພ຺ພນກິຈ຺ຈວເສນ ປຈ຺ຈຸປ຺ປນ຺ນາຣມ຺ມຓໍ, ອາວຊ຺ຊນກິຈ຺ຈວເສນ ຕິກາລາຣມ຺ມຓໍ. ມຫາກິຣິຍມານສາ ຊວນກິຈ຺ຈວເສນ ຕິກາລາຣມ຺ມຓາ, ສນ຺ເຕ ປຎ຺ຎຕ຺ຕິກາເລ ນວຕ຺ຕພ຺ພາຣມ຺ມຓາ. ທ຺ເວ ອຠິຎ຺ຎາມານສາປິ ອຠິຎ຺ຎາກິຈ຺ຈວເສນ ອຕີຕາທິໂຄຈຣາ ສິຍຸໍ. ອິເມ ມານສາ ປຎ຺ຎຕ຺ຕິກາເລປິ ສນ຺ເຕ ນວຕ຺ຕພ຺ພາ ຠວນ຺ຕິ. ຣູປາຣູປຠເວສຸ ມຍາ ວຸຕ຺ຕໂຕ ເສສານິ ສພ຺ພານິ ຈິຕ຺ຕານິ ອຕີຕາຣມ຺ມຓາທິນາ ອຕີຕາຣມ຺ມຓາທິວເສນ ປຓ຺ຑິເຕນ ນ ວຕ຺ຕພ຺ພານິ ນ ກຖິຕພ຺ພານິ ໂຫນ຺ຕິ ເອວ, ປຎ຺ຎຕ຺ຕາຣມ຺ມຓານິ ເອວ ໂຫນ຺ຕີຕິ ອຕ຺ໂຖ.

໓໒໗. ກາມໂຕ ຈ ກ຺ຣິຍາ ປຎ຺ຈ ກາມາວຈຣວເສນ ປຎ຺ຈ ກິຣິຍາ, ຣູປໂຕ ຣູປາວຈຣວເສນ ປຎ຺ຈມີ ກ຺ຣິຍາ ອຠິຎ຺ຎາຈິຕ຺ຕໍ, ເອເຕສໍ ຉນ຺ນໍ ຈິຕ຺ຕານໍ ນຕ຺ຖິ ກິຎ຺ຈິ ເອກມ຺ປິ ອໂຄຈຣໍ ອນາຣມ຺ມຓໍ, ສພ຺ພາຣມ຺ມຓນ຺ຕິ ອຕ຺ໂຖ. ‘‘ປຎ຺ຈມີ ກ຺ຣິຍາ’’ຕິ ວຈນໍ ອຠິຎ຺ຎາຈິຕ຺ຕວເສນ ວຸຕ຺ຕໍ. ສຸທ຺ຘຌານສ຺ສ ປຎ຺ຈມຣູປກິຣິຍສ຺ສ ປຎ຺ຎຕ຺ຕາຣມ຺ມຓໍ ເອວາຕິ ເວທິຕພ຺ພໍ.

໓໒໘. ນິພ຺ພານຎ຺ຈ ຈຕຸພ຺ພິຘໍ ຜລໍ, ມຄ຺ຄໍ ຣູປຎ຺ຈ ອຣູປໍ ຈິຕ຺ຕເຈຕສິກສງ຺ຂາຕໍ ນາມຎ຺ຈ ໂຄຈຣໍ ກາຕຸໍ ຍານິ ຈິຕ຺ຕານິ ສກ຺ໂກນ຺ຕິ, ຕານິ ຈິຕ຺ຕານິ ເມ ວທ, ອາຈຣິຍ, ຕານິ ມຍ຺ຫໍ ກເຖຫິ.

໓໒໙-໓໐. ຈຕ຺ຕາໂຣ ຎາຓສໍຍຸຕ຺ຕາ, ປຸຎ຺ຎໂຕ ປຸຎ຺ຎວເສນ ຈຕ຺ຕາໂຣ ຎາຓສມ຺ປຍຸຕ຺ຕາ, ກ຺ຣິຍໂຕ ຕຖາ ກິຣິຍວເສນ ຈຕ຺ຕາໂຣ ຎາຓສມ຺ປຍຸຕ຺ຕາ, ທ຺ເວ ອຠິຎ຺ຎາມານສາ, ກິຣິຍາໂວຏ຺ຐພ຺ພນມ຺ປິ ຈາຕິ ເອກາທສ ຈິຕ຺ຕານິ ນິພ຺ພານຎ຺ຈ ຜລຎ຺ຈ ມຄ຺ຄຎ຺ຈ ຣູປຎ຺ຈ ອຣູປໍ ນາມຎ຺ຈ ໂຄຈຣໍ ກາຕຸໍ ສກ຺ໂກນ຺ຕິ.

໓໓໑-໔. ຈິຕ຺ເຕສຸ ປນ ສພ຺ເພສຸ ຍານິ ຈິຕ຺ຕານິ ອຣຫຕ຺ຕຜລໍ ອຣຫຕ຺ຕມຄ຺ຄໍ ໂຄຈຣໍ ກາຕຸໍ ສກ຺ໂກນ຺ຕິ, ຕານິ ກຕິ ຈິຕ຺ຕານິ ເມ ວທ ຕານິ ມຍ຺ຫໍ ຕ຺ວໍ ກເຖຫິ. ສພ຺ເພສຸ ປນ ຈິຕ຺ເຕສຸ, ຉ ຈ ຈິຕ຺ຕານິ ເມ ສຸຓ, ໂຠ ຠທ຺ທມຸຂ, ຕ຺ວໍ ມຍ຺ຫໍ ວຈນໍ ສຸໂຓຫິ, ສພ຺ເພສຸ ປນ ຈິຕ຺ເຕສຸ ຉ ຈິຕ຺ຕານິ ອຣຫຕ຺ຕຜລໍ ອຣຫຕ຺ຕມຄ຺ຄໍ ໂຄຈຣໍ ກາຕຸໍ ສກ຺ໂກນ຺ຕິ. ຈຕ຺ຕາໂຣ ຎາຓສໍຍຸຕ຺ຕາ, ກິຣິຍາ ຈ ໂວຏ຺ຐພ຺ພນມ຺ປິ ຈ ກິຣິຍາຠິຎ຺ຎາມໂນ ຈາຕິ ຉ ຈ ຈິຕ຺ຕານິ ໂຄຈຣໍ ກາຕຸໍ ສກ຺ໂກນ຺ຕິ. ປຸຎ຺ຎໂຕ ປຸຎ຺ຎວເສນ ຈຕ຺ຕາໂຣ ຎາຓສມ຺ປຍຸຕ຺ຕາ, ປຸຎ຺ຎໂຕ ປຸຎ຺ຎວເສນ ອຠິຎ຺ຎາຈິຕ຺ຕຎ຺ຈ ອຣຫຕ຺ຕຜລໍ ມຄ຺ຄໍ ໂຄຈຣໍ ກາຕຸໍ ນ ສກ຺ໂກນ຺ຕິ.

໓໓໕-໘. ອຣຫໂຕ ຂີຓາສວສ຺ສ ມຄ຺ຄຈິຕ຺ຕໍ ຜລມານສໍ ວາ ປຸຖຸຊ຺ຊນາ ວາ ເສກ຺ຂາ ວາ ວິຊານິຕຸໍ ນ ສກ຺ໂກນ຺ຕິ. ກສ຺ມາ ກາຣຓາ? ປຸຖຸຊ຺ຊໂນ ໂສຕາປນ຺ນສ຺ສ ມານສໍ ນ ຊານາຕິ, ໂສຕາປນ຺ໂນ ສກທາຄາມິສ຺ສ ມານສໍ ນ ຊານາຕິ, ສກທາຄາມີ ອນາຄາມິສ຺ສ ມານສໍ ນ ຊານາຕິ, ອນາຄາມີ ອຣຫນ຺ຕສ຺ສ ມານສໍ ນ ຊານາຕິ. ເຫຏ຺ຐິໂມ ເຫຏ຺ຐິໂມ ປຸຄ຺ຄໂລ ອຸປຣູປຣິ ຐິຕສ຺ສ ປຸຄ຺ຄລສ຺ສ ມານສໍ ເນວ ຊານາຕິ, ອຸປຣູປຣິ ຐິໂຕ ປຸຄ຺ຄໂລປິ ເຫຏ຺ຐິມສ຺ສ ເຫຏ຺ຐິມສ຺ສ ປຸຄ຺ຄລສ຺ສ ມານສໍ ຊານາຕິ.

໓໓໙-໓໔໒. ໂຍ ຘມ຺ໂມ ຍສ຺ສ ຘມ຺ມສ຺ສ ອາຣມ຺ມຓໍ ໂຫຕິ, ຕໍ ອາຣມ຺ມຓໍ ເອກໍ ເອກໍ ອຸທ຺ຘຣິຕ຺ວາ ອິໂຕ ປຣໍ ປວກ຺ຂາມິ. ກຸສລາຣມ຺ມຓໍ ກາເມ ກາເມ ອຏ຺ຐວິຘໍ ກຸສລໍ ອຏ຺ຐວິຘສ຺ສ ກາມາວຈຣກຸສລສ຺ສ ອາຣມ຺ມຓໍ ໂຫຕິ. ກຖໍ? ປຸພ຺ເພວ ກຕໍ ອຏ຺ຐວິຘໍ ມຫາກຸສລໍ ປຈ຺ຉາ ໂສມນສ຺ສສຫຄຕຎາຓສມ຺ປຍຸຕ຺ຕຈິຕ຺ຕທ຺ວເຍນ ວາ ໂສມນສ຺ສສຫຄຕຎາຓວິປ຺ປຍຸຕ຺ຕຈິຕ຺ຕທ຺ວເຍນ ວາ ອຸເປກ຺ຂາສຫຄຕຎາຓສມ຺ປຍຸຕ຺ຕທ຺ວເຍນ ວາ ອຸເປກ຺ຂາສຫຄຕຎາຓວິປ຺ປຍຸຕ຺ຕທ຺ວເຍນ ວາ ອນຸສ຺ສຣຓກອາລາທີສຸ ຕສ຺ສ ອຏ຺ຐວິຘສ຺ສ ກຸສລສ຺ສ ຊວນກິຈ຺ຈວເສນ ອາຣມ຺ມຓໍ ໂຫຕິ, ວິປ຺ປຏິສາຣກາລາທີສຸ ທ຺ວາທສວິຘສ຺ສ ອກຸສລສ຺ສ ອາຣມ຺ມຓໍ ໂຫຕິ, ກຸສລສ຺ສ ອຠິຎ຺ຎາມານສສ຺ສ ຈ ກິຣິຍສ຺ສ ອຠິຎ຺ຎາມານສສ຺ສ ຈ ອາຣມ຺ມຓໍ ໂຫຕິ, ເອກາທສວິຘສ຺ສ ກາມາວຈຣວິປາກສ຺ສ ຕທາຣມ຺ມຓວເສນ ອາຣມ຺ມຓໍ ໂຫຕິ. ຕຖາ ກາມກ຺ຣິຍສ຺ສາຕິ ຊວນກິຈ຺ຈວເສນ ຫສນສ຺ສ ອາວຊ຺ຊນກິຈ຺ຈວເສນ ໂວຏ຺ຐພ຺ພນສ຺ສ ຊວນກິຈ຺ຈວເສນ ມຫາກິຣິຍສ຺ສ ອາຣມ຺ມຓໍ ໂຫຕິ, ເອເຕສໍ ຉນ຺ນໍ ຣາສີນໍ ອາຣມ຺ມຓໍ ສິຍາ ຠເວຍ຺ຍ. ຣູປາວຈຣປຸຎ຺ຎານິ ປຎ຺ຈ ຕໂຕ ຉຣາສິໂຕ ກາມວິປາກໍ ວຊ຺ເຊຕ຺ວາ ປຎ຺ຈນ຺ນໍ ຣາສີນໍ ອາຣມ຺ມຓານິ ໂຫນ຺ຕິ. ຕທາ ໂລຠມູລໂມຫມູລວເສນ ອຕ຺ຕນາ ປຏິລທ຺ຘຌານານໍ ອນຸສ຺ສຣຓກາເລ ຕສ຺ສ ທສວິຘສ຺ສ ອກຸສລສ຺ສ ອາຣມ຺ມຓໍ ໂຫຕິ, ຕິເຫຕຸກປຏິສນ຺ຘິໂນ ສຕ຺ຕສ຺ສ ຌານໂຕ ປຣິຫີນສ຺ສ ຌານໍ ປຈ຺ຈເວກ຺ຂໂຕ ຌານາຣມ຺ມຓໍ ໂທມນສ຺ສຍຸຕ຺ຕໍ ໂຫຕິ, ຕທາ ຕສ຺ສ ປຏິຆທ຺ວຍສ຺ສ ອາຣມ຺ມຓໍ ໂຫຕິ. ກາມກ຺ຣິຍສ຺ສາຕິ ເອກນ຺ຕປຣິຕ຺ຕາຣມ຺ມຓານິ ກິຣິຍາມໂນຘາຕຸຫສນານິ ວຊ຺ເຊຕ຺ວາ ອາວຊ຺ຊນກິຈ຺ຈວເສນ ໂວຏ຺ຐພ຺ພນສ຺ສ, ຊວນກິຈ຺ຈວເສນ ມຫາກິຣິຍສ຺ສ ຈ ອາຣມ຺ມຓໍ ໂຫຕິ.

໓໔໓. ອາຣຸປ຺ປກຸສລຎ຺ຈາປິ, ເຕຠູມກຸສລສ຺ສ ຈ ມຫາກຸສລສ຺ສ ຈ ອຠິຎ຺ຎາກິຈ຺ຈວເສນ ປຎ຺ຈມຣູປກຸສລສ຺ສ ຈ ທຸຕິຍຈຕຸຕ຺ຖອຣູປກຸສລສ຺ສ ຈ ເຕຠູມກກ຺ຣິຍສ຺ສາປິ ໂວຏ຺ຐພ຺ພນສ຺ສ ມຫາກິຣິຍສ຺ສ ຈ ອຠິຎ຺ຎາກິຈ຺ຈວເສນ ປຎ຺ຈມຣູປກິຣິຍສ຺ສ ຈ ທຸຕິຍຈຕຸຕ຺ຖາຣຸປ຺ປກິຣິຍສ຺ສ ຈ ອາຣມ຺ມຓໍ ໂຫຕິ, ທຸຕິຍາຣຸປ຺ປກິຣິຍສ຺ສ ຈ ປຐມາຣຸປ຺ປກິຣິຍາຍ ອາຣມ຺ມເຓນ ຠວິຕພ຺ພໍ, ຈຕຸຕ຺ຖາຣຸປ຺ປກິຣິຍສ຺ສ ຈ ຕຕິຍາຣຸປ຺ປກິຣິຍາຍ ອາຣມ຺ມເຓນ ຠວິຕພ຺ພໍ, ເອວຎ຺ຈ ສຕິ ກຖໍ ປຐມາຣຸປ຺ປກຸສລໍ ທຸຕິຍາຣຸປ຺ປກິຣິຍສ຺ສ ອາຣມ຺ມຓໍ ໂຫຕິ, ຕຕິຍາຣຸປ຺ປກຸສລຎ຺ຈ ຈຕຸຕ຺ຖາຣຸປ຺ປກິຣິຍສ຺ສ ອາຣມ຺ມຓໍ ໂຫຕີຕິ ເຈ ວຕ຺ຕພ຺ພໍ, ຍທາ ປຸຖຸຊ຺ຊນໂຍຄີ ວາ ເສກ຺ໂຂ ວາ ໂຍຄີ ຣູປສມາປຕ຺ຕິໍ ສມາປຊ຺ຊິຕ຺ວາ ຕໂຕ ວຸຏ຺ຐຫິຕ຺ວາ ອາກາສານຎ຺ຈາຍຕນສງ຺ຂາຕໍ ປຐມາຣຸປ຺ປສມາປຕ຺ຕິໍ ສມາປຊ຺ຊິຕ຺ວາ ວີຕຣາໂຄ ຫຸຕ຺ວາ ອຕ຺ຕນາ ອຘິຄຕາ ສມາປຕ຺ຕິໂຍ ຄເຫຕ຺ວາ ປຸຖຸຊ຺ຊນເສກ຺ຂກາເລ ອຕ຺ຕນາ ອນຘິຄຕໍ ທຸຕິຍໍ ອຣູປສມາປຕ຺ຕິໍ ສມາປຊ຺ຊິ, ຕທາ ຂີຓາສວກາເລ ສມາປຊ຺ຊິຕໍ ທຸຕິຍໍ ອຣູປກິຣິຍໍ ປຐມາຣຸປ຺ປກຸສລໍ ອາຣມ຺ມຓໍ ກໂຣຕິ, ເອວໍ ປຐມາຣຸປ຺ປກຸສລໍ ທຸຕິຍາຣຸປ຺ປກິຣິຍສ຺ສ ອາຣມ຺ມຓໍ ໂຫຕິ.

ຍທາ ໂຍຄີ ຣູປສມາປຕ຺ຕິໂຍ ສມາປຊ຺ຊິຕ຺ວາ ຕໂຕ ວຸຏ຺ຐຫິຕ຺ວາ ປຐມາຣຸປ຺ປກຸສລໍ ທຸຕິຍາຣຸປ຺ປກຸສລໍ ຕຕິຍາຣຸປ຺ປກຸສລຎ຺ຈ ສມາປຊ຺ຊິຕ຺ວາ ຂີຓາສໂວ ຫຸຕ຺ວາ ອຕ຺ຕນາ ອຘິຄຕາ ສມາປຕ຺ຕິໂຍ ຄເຫຕ຺ວາ ອຕ຺ຕນາ ອນຘິຄຕໍ ຈຕຸຕ຺ຖໍ ອຣູປສມາປຕ຺ຕິໍ ສມາປຊ຺ຊິ, ຕທາ ຈຕຸຕ຺ຖາຣຸປ຺ປກິຣິຍາ ຕຕິຍາຣຸປ຺ປກຸສລໍ ອາຣມ຺ມຓໍ ກໂຣຕິ, ເອວໍ ຈຕຸຕ຺ຖາຣຸປ຺ປກິຣິຍສ຺ສ ຕຕິຍາຣຸປ຺ປກຸສລໍ ອາຣມ຺ມຓໍ ໂຫຕິ, ປຈ຺ຉາ ຂີຓາສວກາເລ ສມາປຊ຺ຊິຕາ ຣູປາຣູປສມາປຕ຺ຕິໂຍ ໂຫນ຺ຕິ. ຍຖາ ໂຫຕິ, ຕຖາ ເອວ ອກຸສລສ຺ສປິ ອາຣມ຺ມຓໍ ໂຫຕິ.

໓໔໔-໗. ອຣູປາວຈຣປາການນ຺ຕິ ຊາຕິນິທ຺ຘາຣຓໍ, ຈຕຸຕ຺ຖທຸຕິຍານໍ ອຣູປປາການມ຺ປິ ອາຣມ຺ມຓໍ ໂຫຕິ, ‘‘ຈຕຸຕ຺ຖທຸຕິຍານ’’ນ຺ຕິ ວຕ຺ຕພ຺ເພ ຕິຍານໍ-ສທ຺ທສ຺ສ ໂລປໍ ກຕ຺ວາ ‘‘ຈຕຸຕ຺ຖທູ’’ຕິ ວຸຕ຺ຕໍ, ຕທາ ທ຺ວິນ຺ນໍ ອຣູປປາການໍ ປຐມາຣຸປ຺ປຕຕິຍາຣຸປ຺ປຊວນານິ ອາຣມ຺ມຓານິ ໂຫນ຺ຕິ, ‘‘ຍສ຺ສ ກຸສລສ຺ສ ຌານສ຺ສ ຍໍ ອາຣມ຺ມຓໍ ຄເຫຕ຺ວາ ພ຺ຣຫ຺ມໂລເກ ປຏິສນ຺ຘິ ໂຫຕີ’’ຕິ ວຈນໂຕ ສກສກກຸສລານໍ ອາຣມ຺ມຓຠູຕານິ ອາກາສານຎ຺ຈາຍຕນອາກິຎ຺ຈຎ຺ຎາຍຕນານິ ເຕສໍ ທຸຕິຍຈຕຸຕ຺ຖາຣຸປ຺ປປາການໍ ອາຣມ຺ມຓານິ ໂຫນ຺ຕິ, ເອວໍ ອຣູປກຸສລໍ ອິເມສໍ ອຏ຺ຐຣາສີນໍ ອາຣມ຺ມຓປຈ຺ຈໂຍ ໂຫຕິ. ອປຣິຍາປນ຺ນປຸຎ຺ຎມ຺ປິ ຈຕຸພ຺ພິຘໂລກຸຕ຺ຕຣກຸສລມ຺ປິ ກາມາວຈຣໂຕ ກາມາວຈຣວເສນ ກຸສລສ຺ສ ຎາຓສມ຺ປຍຸຕ຺ຕມຫາກຸສລສ຺ສ ຈ ກ຺ຣິຍສ຺ສ ໂວຏ຺ຐພ຺ພນສ຺ສ, ຎາຓສມ຺ປຍຸຕ຺ຕໂຕ ກິຣິຍສ຺ສ ຈ ຣູປໂຕ ຣູປາວຈຣວເສນ ປຎ຺ຈມສ຺ສ ຣູປກຸສລສ຺ສ ຈ ປຎ຺ຈມສ຺ສ ຣູປກິຣິຍສ຺ສ ຈາຕິ ຈຕຸນ຺ນໍ ຣາສີນໍ ອາຣມ຺ມຓໍ ສທາ ໂຫຕິ, ອຍເມຕ຺ຖ ອຘິປ຺ປາໂຍ – ເສກ຺ຂານໍ ຎາຓສມ຺ປຍຸຕ຺ຕມຫາກຸສລສ຺ສ, ໂວຏ຺ຐພ຺ພນສ຺ສ, ປຎ຺ຈມສ຺ສ ຣູປກຸສລສ຺ສ ຈ ຕິວິຘໍ ໂລກຸຕ຺ຕຣປຸຎ຺ຎໍ ອາຣມ຺ມຓໍ ໂຫຕິ. ຂີຓາສວສ຺ສ ໂວຏ຺ຐພ຺ພນສ຺ສ, ຎາຓສມ຺ປຍຸຕ຺ຕມຫາກິຣິຍສ຺ສ, ປຎ຺ຈມສ຺ສ ຣູປກິຣິຍສ຺ສ ຈ ອຣຫຕ຺ຕປຸຎ຺ຎໍ ອາຣມ຺ມຓໍ ໂຫຕິ. ຍຖາ ຕຖາ ເອວ ສພ຺ພໍ ອກຸສລໍ ກາມາວຈຣໂຕ ກາມາວຈຣວເສນ ກຸສລສ຺ສ ມຫາກຸສລສ຺ສ, ກ຺ຣິຍສ຺ສ ຫສນໂວຏ຺ຐພ຺ພນມຫາກິຣິຍສ຺ສ ຈ ຣູປາວຈຣໂຕ ປນ ຣູປາວຈຣວເສນ ປຎ຺ຈມສ຺ສ ຣູປກຸສລສ຺ສ, ປຎ຺ຈມສ຺ສ ຣູປກິຣິຍສ຺ສ ຈ ອາຣມ຺ມຓໍ ໂຫຕິ, ຍຖາ ຕຖາ ເອວ ສພ຺ພສ຺ສ ອກຸສລສ຺ສ ຈ ກາມາວຈຣວິປາການໍ ຕທາຣມ຺ມຓກິຈ຺ຈວເສນ ເອກາທສນ຺ນຎ຺ຈາຕິ ຉນ຺ນໍ ຣາສີນໍ ອາຣມ຺ມຓໍ ຠຄວຕາ ອີຣິຕໍ.

໓໔໘-໓໕໒. ວິປາກາຣມ຺ມຓໍ ກາເມ ສພ຺ພໍ ວິປາກາຣມ຺ມຓໍ ກາມາວຈຣໂຕປິ ກາມາວຈຣວເສນປິ ກຸສລສ຺ສ ມຫາກຸສລສ຺ສ, ກ຺ຣິຍສ຺ສ ຫສນໂວຏ຺ຐພ຺ພນມຫາກິຣິຍສ຺ສ ຈ ຣູປາວຈຣໂຕ ເຈວ ຣູປາວຈຣວເສນ ຈ ເອວ ປຎ຺ຈມສ຺ສ ຣູປກຸສລສ຺ສ, ປຎ຺ຈມສ຺ສ ຣູປກິຣິຍສ຺ສ ຈ ກາມາວຈຣປາການໍ ກາມາວຈຣວິປາການໍ ເອກາທສນ຺ນຎ຺ຈ ຕເຖວ ອກຸສລສ຺ສ ຈ ຉນ຺ນໍ ຣາສີນໍ ອາຣມ຺ມຓໍ ໂຫຕິ. ຣູເປ ວິປາກາຣມ຺ມຓໍ ກາມາວຈຣໂຕປິ ຈ ກາມາວຈຣວເສນປິ ຈ ກຸສລສ຺ສ ມຫາກຸສລສ຺ສ, ກ຺ຣິຍສ຺ສ ຈ ໂວຏ຺ຐພ຺ພນມຫາກິຣິຍສ຺ສ ຈ ຣູປາວຈຣໂຕ ເຈວ ຣູປາວຈຣວເສນ ຈ ເອວ ກຸສລສ຺ສ ຈ ອປຸຎ຺ຎສ຺ສ ຈາຕິ ປຎ຺ຈນ຺ນໍ ຣາສີນໍ ໂຄຈໂຣ ໂຫຕິ, ອຣູປາວຈຣປາເກສຸ ອຍໍ ນໂຍ ຠຄວຕາ ມໂຕ. ວຏ຺ເຏ ນ ປຣິຍາປນ຺ນາ ນປ຺ປວິຏ຺ຐາຕິ ອປຣິຍາປນ຺ນາ, ເຕສໍ ປຸຄ຺ຄລານໍ ປາກາປິ ກາມໂຕ ກາມາວຈຣວເສນ ກຸສລສ຺ສ ຎາຓສມ຺ປຍຸຕ຺ຕມຫາກຸສລສ຺ສ, ກ຺ຣິຍສ຺ສ ຈ ໂວຏ຺ຐພ຺ພນຎາຓສມ຺ປຍຸຕ຺ຕມຫາກິຣິຍສ຺ສ ຈ ຣູປໂຕປິ ຣູປາວຈຣວເສນປິ ກຸສລສ຺ສ ປຎ຺ຈມສ຺ສ ຣູປກຸສລສ຺ສ, ກ຺ຣິຍສ຺ສ ຈ ປຎ຺ຈມສ຺ສ ຣູປກິຣິຍສ຺ສ ຈ ເອວໍ ອາຣມ຺ມຓໍ ໂຫຕີຕິ. ເອຕ຺ຖາຍມຘິປ຺ປາໂຍ ອປຣິຍາປນ຺ນປຸຎ຺ເຎ ວຸຕ຺ຕນເຍເນວ ເວທິຕພ຺ໂພ.

໓໕໓-໖. ກາເມ ອິທໍ ສພ຺ພກິຣິຍຈິຕ຺ຕໍ ກາມາວຈຣໂຕປິ ຈ ກາມາວຈຣວເສນປິ ຈ ກຸສລສ຺ສ ມຫາກຸສລສ຺ສ, ກ຺ຣິຍສ຺ສ ຈ ຫສນໂວຏ຺ຐພ຺ພນມຫາກິຣິຍສ຺ສ ຈ ຣູປາວຈຣໂຕ ເຈວ ຣູປາວຈຣວເສນ ຈ ເອວ ກຸສລສ຺ສ ປຎ຺ຈມສ຺ສ ຣູປກຸສລສ຺ສ, ກ຺ຣິຍສ຺ສ ຈ ປຎ຺ຈມສ຺ສ ຣູປກິຣິຍສ຺ສ ຈ ເອກາທສກາມາວຈຣປາກສ຺ສ ຈ ຕເຖວ ອກຸສລສ຺ສ ຈ ເອເຕສໍ ຉນ຺ນໍ ຣາສີນໍ ອາຣມ຺ມຓໍ ໂຫຕິ. ຍໍ ກ຺ຣິຍາມານສໍ ຣູເປ ຣູປາວຈເຣ ຍໍ ກິຣິຍາມານສໍ, ກາມປາກໍ ຕໂຕ ວິນາ ຕໂຕ ຣາສິໂຕ ກາມປາກໍ ວິນາ ວຊ຺ເຊຕ຺ວາ ປຎ຺ຈນ຺ນໍ ປນ ຣາສີນໍ ອາຣມ຺ມຓໍ ໂຫຕິ. ກາມາວຈຣໂຕ ກາມາວຈຣວເສນ ກິຣິຍສ຺ສ ໂວຏ຺ຐພ຺ພນມຫາກິຣິຍສ຺ສ ອາຣມ຺ມຓໍ ໂຫຕິ, ຫສນໍ ເອກນ຺ຕປຣິຕ຺ຕາຣມ຺ມຓຕ຺ຕາ ຣູປກິຣິຍໍ ອາຣມ຺ມຓໍ ນ ກໂຣຕິ. ກ຺ຣິຍາຈິຕ຺ຕໍ ປນາຣຸປ຺ເປ ອຣູປກິຣິຍາຈິຕ຺ຕໍ ປນ ເຕສໍ ປຎ຺ຈນ຺ນໍ ເອວ ຈ ຣາສີນໍ ອາຣຸປ຺ປກ຺ຣິຍສ຺ສາປິ ປຐມາຣຸປ຺ປກິຣິຍໍ ທຸຕິຍາຣຸປ຺ປກິຣິຍສ຺ສ ອາຣມ຺ມຓໍ ໂຫຕິ, ຕຕິຍາຣຸປ຺ປກິຣິຍໍ ຈຕຸຕ຺ຖາຣຸປ຺ປກິຣິຍສ຺ສ ອາຣມ຺ມຓໍ ໂຫຕິ. ອິຕິ ຉນ຺ນໍ ຣາສີນໍ ໂຄຈໂຣ ໂຫຕິເຍວ.

໓໕໗-໘. ຣູປໍ ຈຕຸສມຸຏ຺ຐານໍ, ຣູປາຣມ຺ມຓສຎ຺ຎິຕໍ;

ກາມາວຈຣປຸຎ຺ຎສ຺ສ, ຕເຖວ ກຸສລສ຺ສ ຈ;

ອຠິຎ຺ຎາທ຺ວຍຈິຕ຺ຕສ຺ສ, ກາມປາກກ຺ຣິຍສ຺ສ ຈ.

ທ຺ວິຈກ຺ຂຸວິຎ຺ຎາຓມໂນຘາຕຸທ຺ວຍສນ຺ຕີຣຓຕ຺ຕຍມຫາປາກສ຺ສ ຈ ກາມກິຣິຍສ຺ສ ຈາຕິ ເອກາທສວິຘສ຺ສ ກາມກິຣິຍສ຺ສ ຈ ຉນ຺ນໍ ເອເຕສໍ ຣາສີນໍ ອາຣມ຺ມຓປຈ຺ຈໂຍ ໂຫຕິ.

໓໕໙-໓໖໐. ນິພ຺ພານາຣມ຺ມຓໍ ກາມຣູປາວຈຣໂຕ ກາມຣູປາວຈຣວເສນ ເສກ຺ຂານໍ ຎາຓສມ຺ປຍຸຕ຺ຕມຫາກຸສລສ຺ສ, ຣູປາວຈຣວເສນ ປຎ຺ຈມສ຺ສ ຣູປກຸສລສ຺ສ ຈ ກາມຣູປກິຣິຍສ຺ສ ຈ ຂີຓາສວານໍ ໂວຏ຺ຐພ຺ພນຎາຓສມ຺ປຍຸຕ຺ຕມຫາກິຣິຍສ຺ສ ຈ ປຎ຺ຈມຣູປກິຣິຍສ຺ສ ຈ ອຸຠຍສ຺ສາປິ ຈິຕ຺ຕສ຺ສ ອາຣມ຺ມຓໍ ໂຫຕິ. ອປຣິຍາປນ຺ນໂຕ ເຈວ ໂລກຸຕ຺ຕຣວເສນ ຈ ເອວ ຜລສ຺ສ, ກຸສລສ຺ສ ຈ ເອເຕສໍ ຉນ຺ນໍ ຣາສີນໍ ອາຣມ຺ມຓປຈ຺ຈໂຍ ໂຫຕິ.

໓໖໑-໒. ນານປ຺ປກາຣກໍ ສພ຺ພໍ, ປຎ຺ຎຕ຺ຕາຣມ຺ມຓໍ ປນ ເຕຠູມກສ຺ສ ປຸຎ຺ຎສ຺ສ ມຫາກຸສລສ຺ສ, ສຸທ຺ຘຌານສ຺ສ ປຎ຺ຈວິຘສ຺ສ ຣູປກຸສລສ຺ສ, ປຐມາຣຸປ຺ປຕຕິຍາຣຸປ຺ປກຸສລສ຺ສ ຈ ຕເຖວ ອກຸສລສ຺ສ ຈ ຣູປາຣູປວິປາກສ຺ສ ສພ຺ພສ຺ສ ຣູປວິປາກສ຺ສ, ປຐມາຣຸປ຺ປຕຕິຍາຣຸປ຺ປວິປາກສ຺ສ ຈ ເຕຠູມກກ຺ຣິຍສ຺ສ ຈ ຫສນໂວຏ຺ຐພ຺ພນມຫາກິຣິຍສ຺ສ ສພ຺ພສ຺ສ ຣູປກິຣິຍສ຺ສ, ປຐມາຣຸປ຺ປຕຕິຍາຣຸປ຺ປກິຣິຍສ຺ສ ຈາຕິ ນວນ຺ນໍ ປນ ຣາສີນໍ ອາຣມ຺ມຓປຈ຺ຈໂຍ ໂຫຕິ.

໓໖໓-໔. ຣູປາຣມ຺ມຓິກາ ທ຺ເວ ຕຸ ທ຺ເວ ຈິຕ຺ຕຸປ຺ປາທາ ຣູປາຣມ຺ມຓິກາ, ທ຺ເວ ທ຺ເວ ສທ຺ທາທິໂຄຈຣາ ທ຺ເວ ທ຺ເວ ຈິຕ຺ຕຸປ຺ປາທາ ສທ຺ທາຣມ຺ມຓາທິໂຄຈຣາ, ຕໂຍ ມໂນຘາຕຸສງ຺ຂາຕາ ຈິຕ຺ຕຸປ຺ປາທາ ປຎ຺ຈາຣມ຺ມຓິກາ ນາມ ມຕາ ຠຄວຕາ. ອິຘ ອິມສ຺ມິໍ ກາມາວຈຣາຘິກາເຣ ເອກຈຕ຺ຕາລີເສວ ຈິຕ຺ຕຸປ຺ປາທາ ຉຬາຣມ຺ມຓິກາ ມຕາ. ອຍໍ ກາມາວຈຣຈິຕ຺ຕານໍ ອາຣມ຺ມຓກ຺ກໂມ.

໓໖໕-໙. ປຎ຺ຈາຠິຎ຺ຎາ ວິວຊ຺ເຊຕ຺ວາ, ຣູປາຣູປາ ອນາສວາ ອິເມ ສພ຺ເພ ຈິຕ຺ຕຸປ຺ປາທາ ຘມ຺ມາຣມ຺ມຓໂຄຈຣາ ໂຫນ຺ຕິ. ປຐມາຣຸປ຺ປກຸສລໍ ທຸຕິຍາຣຸປ຺ປເຈຕໂສ ກຸສລສ຺ສ ອາຣມ຺ມຓໍ ໂຫຕິ, ທຸຕິຍາຣຸປ຺ປເຈຕໂສ ວິປາກສ຺ສ ຈ ອາຣມ຺ມຓໍ ໂຫຕິ, ທຸຕິຍາຣຸປ຺ປເຈຕໂສ ກິຣິຍສ຺ສ ຈ ອາຣມ຺ມຓໍ ໂຫຕິ. ທຸຕິຍາຣຸປ຺ປເຈຕໂສ ກິຣິຍສ຺ສ ປຐມາຣຸປ຺ປກຸສລາຣມ຺ມຓຠາເວ ກາຣຓໍ ເຫຏ຺ຐາ ວຸຕ຺ຕເມວ. ປຐມາຣຸປ຺ປປາໂກຍໍ, ທຸຕິຍາຣຸປ຺ປເຈຕໂສ ກຸສລສ຺ສ ຈ ທຸຕິຍາຣຸປ຺ປເຈຕໂສ ວິປາກສ຺ສ ຈ ທຸຕິຍາຣຸປ຺ປເຈຕໂສ ກິຣິຍສ຺ສ ຈ ອາຣມ຺ມຓໍ ນ ໂຫຕິ. ຫິ ກສ຺ມາ? ເຕສໍ ທຸຕິຍາຣຸປ຺ປກຸສລວິປາກກິຣິຍານໍ ປຐມາຣຸປ຺ປກຸສລາຣມ຺ມຓຕ຺ຕາ. ປຐມໍ ຕຸ ກ຺ຣິຍາຈິຕ຺ຕໍ ປຐມໍ ກິຣິຍາຈິຕ຺ຕໍ ປນ ທຸຕິຍາຣຸປ຺ປເຈຕໂສ ປຸຎ຺ຎສ຺ສ ອາຣມ຺ມຓໍ ນ ໂຫຕິ. ທຸຕິຍາຣຸປ຺ປເຈຕໂສ ວິປາກສ຺ສ ອາຣມ຺ມຓໍ ນ ໂຫຕິ. ຣູປາຣູປຠເວສຸ ຫິ ຂີຓາສວາ ວິປາກຈິຕ຺ຕານິ ຈຸຕິວເສນ ສກສກກຸສລານໍ ອາຣມ຺ມຓໍ ກໂຣນ຺ຕິ. ປຐມໍ ຕຸ ກ຺ຣິຍາຈິຕ຺ຕໍ ປນ ທຸຕິຍາຣຸປ຺ປເຈຕໂສ ກິຣິຍສ຺ສ ອາຣມ຺ມຓໍ ໂຫຕິ. ອິຕິ ເອວໍ ອິມິນາ ມຍາ ວຸຕ຺ຕປ຺ປກາເຣນ ຈິຕ຺ຕານໍ ອາຣມ຺ມຓຸປ຺ປຕ຺ຕິ ວິຠາວິນາ ຘີເຣນ ເຎຍ຺ຍາ.

໓໗໐-໓. ປຸຖຸຊ຺ຊນສ຺ສ ເສກ຺ຂສ຺ສ, ອຣູປາຣມ຺ມຓໍ ທ຺ວິຘາ ທ຺ວິປ຺ປກາຣໍ ກຸສລໍ ກຸສລສ຺ສ ທຸຕິຍາຣຸປ຺ປກຸສລສ຺ສ ອາຣມ຺ມຓໍ ໂຫຕິ, ຕໍ ປຐມາຣຸປ຺ປກຸສລໍ ທຸຕິຍາຣຸປ຺ປວິປາກສ຺ສ ອາຣມ຺ມຓໍ ສິຍາ ຠເວຍ຺ຍ. ຂີຓາສວສ຺ສ ຠິກ຺ຂຸສ຺ສ, ປຐມາຣຸປ຺ປມານສໍ ອາຣມ຺ມຓໍ ຕິຘາ ຕິປ຺ປກາຣໍ ໂຫຕິ. ອິຕິ ວຈນໍ ມເຫສິນາ ວຸຕ຺ຕໍ. ກ຺ຣິຍສ຺ສາປິ ທຸຕິຍາຣຸປ຺ປກິຣິຍສ຺ສາປິ ປຐມາຣຸປ຺ປກິຣິຍາ ອາຣມ຺ມຓໍ ໂຫຕິ. ກຸສລມ຺ປິ ປຐມາຣຸປ຺ປກຸສລມ຺ປິ ທຸຕິຍາຣຸປ຺ປກິຣິຍສ຺ສ ຈ ອາຣມ຺ມຓໍ ໂຫຕິ. ກຸສລໍ ປຐມາຣຸປ຺ປກຸສລໍ ທຸຕິຍາຣຸປ຺ປວິປາກສ຺ສ ອາຣມ຺ມຓໍ ໂຫຕິ. ເອວໍ ອິມິນາ ມຍາ ວຸຕ຺ຕປ຺ປກາເຣນ ປຐມາຣຸປ຺ປມານສໍ ອາຣມ຺ມຓໍ ຕິຘາ ໂຫຕິ. ຕຕິຍາຣຸປ຺ປຈິຕ຺ຕມ຺ປິ ຈຕຸຕ຺ຖາຣຸປ຺ປເຈຕໂສ ກຸສລສ຺ສ ອາຣມ຺ມຓໍ ໂຫຕິ, ຈຕຸຕ຺ຖາຣຸປ຺ປເຈຕໂສ ວິປາກສ຺ສ ຈ ຕໍ ອາຣມ຺ມຓໍ ໂຫຕິ. ເອວເມວ ຍຖາ ປຐມາຣຸປ຺ປມານສໍ ອາຣມ຺ມຓໍ ທ຺ວິຘາ ໂຫຕິ, ເອວເມວ ຕຖາ ຕຕິຍາຣຸປ຺ປຈິຕ຺ຕໍ ອາຣມ຺ມຓໍ ທ຺ວິຘາ ໂຫຕິ. ຍຖາ ປຐມາຣຸປ຺ປມານສໍ ອາຣມ຺ມຓໍ ຕິຘາ ໂຫຕິ, ເອວເມວ ຕຖາ ຕຕິຍາຣຸປ຺ປຈິຕ຺ຕໍ ອາຣມ຺ມຓໍ ຕິຘາ ສິຍາ.

໓໗໔. ຍໍ ຍໍ ປນ ອິຘາຣພ຺ຠ ອິຘ ອິມສ຺ມິໍ ອຘິກາເຣ ຍໍ ຍໍ ໂຄຈຣໍ ອາຣພ຺ຠ ປຏິຈ຺ຈ ເຍ ເຍ ຈິຕ຺ຕຸປ຺ປາທາ ຊາຍນ຺ຕິ, ໂສ ໂສ ໂຄຈໂຣ ເຕສຎ຺ຈ ເຕສຎ຺ຈ ຈິຕ຺ຕຸປ຺ປາທານໍ ອາຣມ຺ມຓປຈ຺ຈໂຍ ໂຫຕິ.

໓໗໕. ໂຍ ປນ ນໂຣ ອິມສ຺ສ ອຠິຘມ຺ມາວຕາຣສ຺ສ ກິຣ ປາຣໍ ທຸຕ຺ຕຣໍ ອິຘ ອິມສ຺ມິໍ ໂລເກ ອຸຕ຺ຕຣຕິ, ໂສ ນໂຣ ອຠິຘມ຺ມມຫຓ຺ຓເວ ປາຣໍ ທຸຕ຺ຕຣໍ ອຸຕ຺ຕຣໍ ອຸຕ຺ຕຣຕິ ເອວ.

ອິຕິ ອຠິຘມ຺ມາວຕາຣຏີກາຍ

ອາຣມ຺ມຓວິຠາຄວຓ຺ຓນາ ນິຏ຺ຐິຕາ.

ຉຏ຺ໂຐ ປຣິຈ຺ເຉໂທ.