໒໒. ທ຺ວາວີສຕິໂມ ປຣິຈ຺ເຉໂທ

ຎາຓທສ຺ສນວິສຸທ຺ຘິນິທ຺ເທສວຓ຺ຓນາ

໑໓໑໙-໒໒. ອາວຊ຺ຊນສ຺ສ ຫິຕໍ ອາວຊ຺ຊນິຍໍ, ຕໍ ຐານໍ ເອຕສ຺ສາຕິ ອາວຊ຺ຊນິຍຐານໍ, ໂຄຕ຺ຣຠູຕິ ອຕ຺ໂຖ. ຕໍ ໂຄຕ຺ຣຠຸຈິຕ຺ຕໍ ມຄ຺ຄຈິຕ຺ຕສ຺ສ ອາວຊ຺ຊນິຍຐານຕ຺ຕາ. ປຏິປທາຎາຓທສ຺ສນໍ ກຸທາຈນໍ ນ ຈ ຠຊຕິ, ຕເຖວ ຎາຓທສ຺ສນວິສຸທ຺ຘິໍ ກຸທາຈນໍ ນ ຠຊເຕວ. ອຸຠິນ຺ນໍ ຎາຓານໍ ອນ຺ຕຣາ ເອກໍ ອພ຺ໂພຫາຣິກໍ ໂວຫາເຣ ນິຍຸຕ຺ຕນ຺ຕິ ໂວຫາຣິກໍ, ນ ໂວຫາຣິກໍ ອພ຺ໂພຫາຣິກໍ. ວິປສ຺ສນາຍ ໂສຕສ຺ມິໍ ວິປສ຺ສນາຍ ໂສເຕ ປຕິຕຕ຺ຕາ ວິປສ຺ສນາ ນາມ ໂວຫຣິຕພ຺ພາ. ຕໂຕ ນິພ຺ພານໂຕ.

໑໓໒໕. ສູຣໍ ຕິກ຺ຂໍ ວິປສ຺ສນນ຺ຕິ ໂຄຕ຺ຣຠຸຈິຕ຺ຕໍ ສນ຺ຘາຍາຫ.

໑໓໒໖-໙. ວິສງ຺ຂາຣນ຺ຕິ ສງ຺ຂາເຣຫິ ວິຄຕໍ. ປຐມາວຊ຺ຊນຎ຺ເຈວາຕິ ປຐມາວຊ຺ຊນໍ ວິຍ. ປຐມາໂຠຄຕາປິ ຈາຕິ ປຐມມນສິກາຣາ ວິຍ. ມຄ຺ຄສ຺ສ ອນນ຺ຕຣາທີຫິ ປຈ຺ຈເຍຫິ. ຕສ຺ສາຕິ ມຄ຺ຄສ຺ສ. ສິຂາປຕ຺ຕາຍ ຕາຍ ວິປສ຺ສນາຍ ມຸທ຺ຘມ຺ຫິ ມຕ຺ຖເກ. ອນາວຕ຺ຕນ຺ຕິ ອນິວຕ຺ຕໍ.

໑໓໓໐-໓. ເອເກນ ອາວຊ຺ຊເນນ ເອກິສ຺ສາເຍວ ວີຖິຍາ. ອນຸໂລມໂຄຕ຺ຣຠຸເຈຕສນ຺ຕິ ອນຸໂລມໂຄຕ຺ຣຠຸຈິຕ຺ຕານໍ ນານາຣມ຺ມຓຕາ ວຸຕ຺ຕາ. ຕໍ ໂຄຕ຺ຣຠຸຈິຕ຺ຕໍ ອນາວຊ຺ຊນມ຺ປິ ມຄ຺ຄສ຺ສ ອາວຊ຺ຊນຏ຺ຐາເນ ຐຕ຺ວາ. ສຎ຺ຎໍ ທຕ຺ວາ ວິຍາຕິ ‘‘ອຫໍ ນິພ຺ພານໍ ອາຣມ຺ມຓໍ ກໂຣມິ, ຕ຺ວມ຺ປິ ຕເມວາຣມ຺ມຓໍ ກໂຣຫິ’’ ອິຕິ ສຎ຺ຎໍ ທຕ຺ວາ ວິຍາຕິ ອຘິປ຺ປາໂຍ. ສຎ຺ຎິຕນ຺ຕິ ສຎ຺ຎໍ. ກທາຈິປິ ອນິພ຺ພິທ຺ຘປຸພ຺ພໍ ມຄ຺ໂຄ ເອສ ເອໂສ ມຄ຺ໂຄ ປຸພ຺ເພ ອນິພ຺ພິທ຺ຘປຸພ຺ໂພ.

໑໓໓໖. ອຸຊ຺ຌຕີຕິ ຉິນ຺ທຕິ.

໑໓໓໘. ອເນເກສໍ ອານິສໍສານໍ ທາຍເກນ ອາທິມຄ຺ເຄນ ສໍຍຸຕ຺ຕໍ. ປຐມມຄ຺ຄຎາຓໍ.

໑໓໔໑. ເອກສ຺ສາເສວນໍ ນຕ຺ຖິ ເອກສ຺ສ ຈິຕ຺ຕຸປ຺ປາທສ຺ສ ອາເສວນປຈ຺ຈໂຍ ນຕ຺ຖິ, ຕສ຺ມາ ກາຣຓາ ທ຺ເວ ຈິຕ຺ຕຸປ຺ປາທາ ອນຸໂລມກາ. ເຕຫີຕິ ຈິຕ຺ຕຸປ຺ປາເທຫິ ອາເສວນປຈ຺ຈຍໍ ລທ຺ຘາ ລຠິຕ຺ວາ ຕຕິຍໍ ຈິຕ຺ຕໍ ໂຄຕ຺ຣຠຸ ໂຫຕິ.

໑໓໔໕-໗. ມຄ຺ຄເປກ຺ຂນເຫຕຸ ຍສ຺ສ ອາວຊ຺ຊນມນໂສ, ຕໍ ມຄ຺ຄເປກ຺ຂນເຫຕຸກໍ. ຕສ຺ມິໍ ນິຣຸທ຺ເຘຕິ ຕສ຺ມິໍ ອາວຊ຺ຊນຈິຕ຺ເຕ ນິຣຸທ຺ເຘ ມຄ຺ຄສ຺ສ ປຈ຺ຈເວກ຺ຂຓສຎ຺ຎິຕານິ ສຕ຺ຕ ຊວນານິ ປຏິປາຏິຍາ ຊາຍນ຺ເຕ. ປຈ຺ຈເວກ຺ຂຓຎາຓານິ ເອກູນວີສຕິ ໂຫນ຺ຕິ.

໑໓໕໑. ຕໂຕ ຕທາ ວິປສ຺ສນາວີຖິໍ ໂອຕຣຕິ. ທຸຕິຍມຄ຺ຄຎາຓໍ.

໑໓໖໑. ມູລຆາຕນ຺ຕິ ມູລຆາຕນໍ. ຕຕິຍມຄ຺ຄຎາຓໍ.

໑໓໖໓. ອນາວຕ຺ຕິສຠາວໂຕຕິ ອນິວຕ຺ຕໂຕ. ຈຕຸຕ຺ຖມຄ຺ຄຎາຓໍ.

ອິຕິ ອຠິຘມ຺ມາວຕາຣຏີກາຍ

ຎາຓທສ຺ສນວິສຸທ຺ຘິນິທ຺ເທສວຓ຺ຓນາ ນິຏ຺ຐິຕາ.

ທ຺ວາວີສຕິໂມ ປຣິຈ຺ເຉໂທ.